บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ | |
| |
พระไตรปิฎกเล่มที่ ๓๓ ภาษาบาลี อักษรไทย พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ
ปญฺจมํ ปญฺจทีปทายิกาเถริยาปทานํ (๑๕) [๑๕๕] |๑๕๕.๖๐| นคเร หํสวติยา จาริกา ๑- อาสหํ ตทา อาราเมน ๒- วิหาเรน จรามิ กุสลตฺถิกา ฯ |๑๕๕.๖๑| กาฬปกฺขมฺหิ ทิวเส อทฺทสํ โพธิมุตฺตมํ ตตฺถ จิตฺตํ ปสาเทตฺวา โพธิมูเล นิสีทหํ ฯ |๑๕๕.๖๒| ครุจิตฺตํ อุปฏฺเฐตฺวา สิเร กตฺวาน อญฺชลึ โสมนสฺสํ ปเวเทตฺวา เอวํ จินฺเตสิ ตาวเท ฯ |๑๕๕.๖๓| ยทิ พุทฺโธ อมิตคุโณ อสมปฺปฏิปุคฺคโล ทสฺเสตุ ปาฏิหีรํ เม โพธิ โอภาสตุ อยํ ฯ |๑๕๕.๖๔| สห อาวชฺชิเต มยฺหํ โพธิ ปชฺชลิ ตาวเท สพฺพโสวณฺณมยา อาสิ ทิสา สพฺพา วิโรจติ ฯ |๑๕๕.๖๕| สตฺตรตฺตินฺทิวํ ตตฺถ โพธิมูเล นิสีทหํ สตฺตเม ทิวเส ปตฺเต ทีปปูชํ อกาสหํ ฯ |๑๕๕.๖๖| อาสนํ ปริวาเรตฺวา ปญฺจ ทีปานิ ปชฺชลุํ ยาว อุเทติ สุริโย ทีปา เม ปชฺชลุํ ตทา ฯ |๑๕๕.๖๗| เตน กมฺเมน สุกเตน เจตนาปณิธีหิ จ ชหิตฺวา มานุสํ เทหํ ตาวตึสํ อคญฺฉหํ ฯ |๑๕๕.๖๘| ตตฺถ เม สุกตํ พฺยมฺหํ ปญฺจทีปาติ ๓- วุจฺจติ สฏฺฐิโยชนมุพฺเพธํ ตึสโยชนวิตฺถตํ ฯ @เชิงอรรถ: ๑ โป. จรีติ ฯ ม. ยุ. จาริกี ฯ ๒ โป. ม. จ อารามํ ฯ ๓ ยุ. ปญฺจทีปีติ ฯ--------------------------------------------------------------------------------------------- หน้าที่ ๒๗๘.
|๑๕๕.๖๙| อสงฺเขยฺยานิ ทีปานิ ปริวาเร ชลึสุ เม ยาวตา เทวภวนํ ทีปาโลเกน โชตติ ฯ |๑๕๕.๗๐| ปุพฺพมุขา ๑- นิสีทิตฺวา ยทิ อิจฺฉามิ ปสฺสิตุํ อุทฺธํ อโธ จ ติริยํ สพฺพํ ปสฺสามิ จกฺขุนา ฯ |๑๕๕.๗๑| ยาวตา อภิกงฺขามิ ทฏฺฐุํ สุกตทุกฺกฏํ ๒- ตตฺถ อาวรณํ นตฺถิ รุกฺเขสุ ปพฺพเตสุ ๓- วา ฯ |๑๕๕.๗๒| อสีติเทวราชูนํ มเหสิตฺตมการยึ สตานํ จกฺกวตฺตีนํ มเหสิตฺตมการยึ ฯ |๑๕๕.๗๓| ยํ ยํ โยนูปปชฺชามิ เทวตฺตํ อถ มานุสํ ทีปสตสหสฺสานิ ปริวาเร ชลนฺติ เม ฯ |๑๕๕.๗๔| เทวโลกา จวิตฺวาน อุปฺปชฺชึ มาตุกุจฺฉิยํ มาตุ กุจฺฉิคตํ ๔- สนฺตํ อกฺขิ เม น นิมีลติ ฯ |๑๕๕.๗๕| ทีปสตสหสฺสานิ ปุญฺญกมฺมสมงฺคิโน ๕- ชลนฺติ สูติกาเคเห ปญฺจทีปานิทํ ผลํ ฯ |๑๕๕.๗๖| ปจฺฉิเม ภวสมฺปตฺเต มานสํ วินิวตฺตยึ อชรามรํ สีติภาวํ นิพฺพานํ ปสฺสยึ อหํ ฯ |๑๕๕.๗๗| ชาติยา สตฺตวสฺสาหํ อรหตฺตํ อปาปุณึ อุปสมฺปาทยิ พุทฺโธ ปญฺจทีปานิทํ ๖- ผลํ ฯ |๑๕๕.๗๘| มณฺฑเป รุกฺขมูเล วา สุญฺญาคาเร วสนฺติยา สทา ปชฺชลเต ทีปํ ปญฺจทีปานิทํ ผลํ ฯ @เชิงอรรถ: ๑ ม. ปรมฺมุขา ฯ ๒ ม. ยุ. สุคตทุคฺคเต ฯ ๓ โป. ปทเรสุ ฯ @๔ ม. มาตุกุจฺฉิคตาสนฺตี ฯ ๕ ม. ...สมงฺคิตา ฯ ยุ. ...สมงฺคินา ฯ @๖ โป. ม. คุณปญฺญาย โคตโม ฯ--------------------------------------------------------------------------------------------- หน้าที่ ๒๗๙.
|๑๕๕.๗๙| ทิพฺพจกฺขุ วิสุทฺธํ เม สมาธิกุสลา อหํ อภิญฺญาปารมิปฺปตฺตา ปญฺจทีปานิทํ ผลํ ฯ |๑๕๕.๘๐| สพฺพโวสิตโวสานา กตกิจฺจา อนาสวา ปญฺจทีปา มหาวีร ปาเท วนฺทามิ จกฺขุม ฯ |๑๕๕.๘๑| สตสหสฺเส อิโต กปฺเป ยํ ทานมททึ ตทา ทุคฺคตึ นาภิชานามิ ปญฺจทีปานิทํ ผลํ ฯ |๑๕๕.๘๒| กิเลสา ฌาปิตา มยฺหํ ภวา สพฺเพ สมูหตา นาคีว พนฺธนํ เฉตฺวา วิหรามิ อนาสวา ฯ |๑๕๕.๘๓| สฺวาคตํ วต เม อาสิ พุทฺธเสฏฺฐสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๑๕๕.๘๔| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปญฺจทีปทายิกา ภิกฺขุนี อิมา คาถาโย อภาสิตฺถาติ ฯ ปญฺจทีปทายิกาเถริยา อปทานํ สมตฺตํ ฯ
เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๒๗๗-๒๗๙. https://84000.org/tipitaka/read/pali_read.php?B=33&A=5564&w=&modeTY=2&pagebreak=1 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=33&A=5564&modeTY=2&pagebreak=1 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=33.1&item=155&items=1 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=33&siri=166 ศึกษาอรรถกถานี้ได้ที่ :- https://84000.org/tipitaka/attha/attha.php?b=33&i=155 สารบัญพระไตรปิฎกเล่มที่ ๓๓ https://84000.org/tipitaka/read/?index_33 https://84000.org/tipitaka/english/?index_33
|
บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]