พระไตรปิฎกเล่มที่ ๓๓ ภาษาบาลี อักษรไทย
 พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                                  นวมํ อุปฺปลวณฺณาเถริยาปทานํ (๑๙)
     [๑๕๙]   |๑๕๙.๓๘๒| ภิกฺขุนี อุปฺปลวณฺณา        อิทฺธิยา ปารมึ คตา
                           วนฺทิตฺวา สตฺถุโน ปาเท     อิมํ วจนมพฺรวิ ฯ
       |๑๕๙.๓๘๓| นิติณฺณา ๑- ชาติสํสารํ    ปตฺตาหํ อจลํ ปทํ
                           สพฺพทุกฺขํ มยา ขีณํ         อาโรเจมิ มหามุนิ ฯ
@เชิงอรรถ: ๑ ม. นิตฺถิณฺณา ฯ ยุ. นิตฺติณฺณา ชาติสํสารา ฯ
---------------------------------------------------------------------------------------------
หน้าที่ ๓๑๑.
       |๑๕๙.๓๘๔| ยาวตา ปริสา อตฺถิ       ปสนฺนา ชินสาสเน
                           เยสญฺจ เมปราโธตฺถิ    ขมนฺตุ ชินสมฺมุขา ฯ
       |๑๕๙.๓๘๕| สํสาเร สํสรนฺตา ๑- เม   ขลิตํ เม สเจ ภเว
                           อาโรเจมิ มหาวีร          อปราธํ ขมสฺสุ เม ๒- ฯ
       |๑๕๙.๓๘๖| อิทฺธิญฺจาปิ นิทสฺเสหิ     มม สาสนการิเก
                           จตสฺโส ปริสา อชฺช       กงฺขํ ฉินฺทาหิ ยาวตา ฯ
       |๑๕๙.๓๘๗| ธีตา ตุยฺหํ มหาวีร         ปญฺญวนฺต ชุตินฺธร
                           พหุญฺจ ทุกฺกรํ กมฺมํ     กตํ เม อติทุกฺกรํ ฯ
       |๑๕๙.๓๘๘| อุปฺปลสฺเสว เม วณฺโณ   นาเมนุปฺปลนามิกา
                           สา ธีตา เต มหาวีร       ปาเท วนฺทามิ จกฺขุมา ฯ
       |๑๕๙.๓๘๙| ราหุโล จ อหญฺเจว        เนกชาติสเต พหู
                           เอกสฺมึ สมฺภเว ชาตา    สมานฉนฺทเจตสา ฯ
       |๑๕๙.๓๙๐| นิพฺพตฺติ เอกโต โหติ     ชาติยา จาปิ เอกโต
                           ปจฺฉิเม ภวสมฺปตฺเต      อุภโย นามสมฺภวา ฯ
       |๑๕๙.๓๙๑| ปุตฺโต จ ราหุโล นาม     ธีตา อุปฺปลสวฺหยา
                           ปสฺส วีร มม อิทฺธึ        พลํ ทสฺเสมิ สตฺถุโน ฯ
       |๑๕๙.๓๙๒| มหาสมุทฺเท จตุโร        ปกฺขิปิ หตฺถปาณิยํ
                           เตลํ หตฺถคตญฺเจว ๓-   ขิฑฺโฑ โกมารโก ยถา ฯ
       |๑๕๙.๓๙๓| อุพฺพตฺตยิตฺวา ปฐวึ       ปกฺขิปิ หตฺถปาณิยํ
                           จิตฺตมุญฺชํ ยถา นาม    ลุญฺจิ โกมารโก ยุวา ฯ
@เชิงอรรถ: ๑ ม. สํสรนฺติยา ฯ ๒ ม. ยุ. ตํ ฯ ๓ ยุ. ... วตฺถิคตญฺเจว เวชฺโช โกมารโก ยถา ฯ
---------------------------------------------------------------------------------------------
หน้าที่ ๓๑๒.
       |๑๕๙.๓๙๔| จกฺกวาฬสมํ ปาณึ        ฉาทยิตฺวาน มตฺถเก
                           วสฺสาเปตฺวาน ผุสิตํ      นานาวณฺณํ ปุนปฺปุนํ ฯ
       |๑๕๙.๓๙๕| ภูมึ อุทุกฺขลํ กตฺวา        ธญฺญํ กตฺวาน สกฺขรํ
                           สิเนรุํ มุสลํ กตฺวา         มทฺทิ โกมาริกา ยถา ๑- ฯ
       |๑๕๙.๓๙๖| ธีตาหํ พุทฺธเสฏฺฐสฺส     นาเมนุปฺปลสวฺหยา
                           อภิญฺญาสุ วสีภูตา      ตว สาสนการิกา ฯ
       |๑๕๙.๓๙๗| นานาวิกุพฺพนํ กตฺวา    ทสฺเสตฺวา โลกนายกํ
                          นามโคตฺตํ ปกาเสตฺวา ๒-  ปาเท วนฺทามิ จกฺขุมา ฯ
       |๑๕๙.๓๙๘| อิทฺธิยา จ วสี โหมิ        ทิพฺพาย โสตธาตุยา
                           เจโตปริยญาณสฺส        วสี โหมิ มหามุเน ฯ
       |๑๕๙.๓๙๙| ปุพฺเพนิวาสํ ชานามิ      ทิพฺพจกฺขุํ วิโสธิตํ
                           สพฺพาสวา ปริกฺขีณา    นตฺถิ ทานิ ปุนพฺภโว ฯ
       |๑๕๙.๔๐๐| อตฺถธมฺมนิรุตฺตีสุ          ปฏิภาเณ ตเถว จ
                          ญาณํ เม วิปุลํ ๓- สุทฺธ  สภาเวน มเหสิโน ฯ
       |๑๕๙.๔๐๑| ปุริมานํ ชินคฺคานํ          สงฺคามนฺเตน ทสฺสิตํ ๔-
                           อธิการํ พหุ มยฺหํ          ตุยฺหตฺถาย มหามุนิ ฯ
       |๑๕๙.๔๐๒| ยํ มยา ปุริมํ กมฺมํ         กุสลํ สร ๕- เม มุนิ
                           ตวตฺถาย มหาวีร          ปุญฺญํ อุปจิตํ มยา ฯ
       |๑๕๙.๔๐๓| อภพฺพฏฺฐาเน วชฺเชตฺวา   ปริปาเจนฺโต อนาจารํ ๖-
                           ตวตฺถาย มหาวีร          จตฺตํ ๗- เม ชีวิตุตฺตมํ ฯ
@เชิงอรรถ: ๑ ยุ. ปทโกมาริโก ยถา ฯ ๒ ม. จ สาเวตฺวา ฯ ยุ. ... สํสาเวตฺวา ฯ
@๓ ม. วิมลํ ฯ ๔ ม. ยุ. สงฺคามนฺเต นิทสฺสิตํ ฯ ๕ ยุ. ... สํสเร มุนิ ฯ
@๖ ม. วารยนฺติ อนาจรํ ฯ ยุ. ปริปาเจนฺโต อนาวรํ ฯ ๗ ยุ. วตฺตํ ฯ
---------------------------------------------------------------------------------------------
หน้าที่ ๓๑๓.
       |๑๕๙.๔๐๔| ทสโกฏิสหสฺสานิ          อทาสิ มม ชีวิตํ
                           ปริจตฺตา จ เม โหมิ      ตวตฺถาย มหามุนิ ฯ
       |๑๕๙.๔๐๕| ตทาติวิมฺหิตา สพฺพา    สิรสาว กตญฺชลี
                           อโวจยฺเย กตํ อาสิ        อตุลิทฺธิ ปรกฺกมา ฯ
       |๑๕๙.๔๐๖| สตสหสฺเส อิโต กปฺเป    นาคกญฺญา อหํ ตทา
                           วิมลา นาม นาเมน      กญฺญานํ สาธุสมฺมตา ฯ
       |๑๕๙.๔๐๗| มโหรโค มหานาโค       ปสนฺโน ชินสาสเน
                           ปทุมุตฺตรํ มหาเตชํ       นิมนฺเตสิ สสาวกํ ฯ
       |๑๕๙.๔๐๘| รตนมยญฺจ มณฺฑปํ      ปลฺลงฺกํ รตนามยํ
                           รตนวาลุกากิณฺณํ        อุปโภคํ รตนามยํ ฯ
       |๑๕๙.๔๐๙| มคฺคญฺจ ปฏิยาเทสิ      รตนธชภูสิตํ
                           ปจฺจุคฺคนฺตฺวาน สมฺพุทฺธํ  วชฺชนฺโต ตุริเยหิ โส ฯ
       |๑๕๙.๔๑๐| ปริสาหิ จ จตูหิ             ผรเต ๑- โลกนายโก
                           มโหรคสฺส ภวเน          นิสีทิ ปรมาสเน ๒- ฯ
       |๑๕๙.๔๑๑| อนฺนปานํ ขาทนียํ         โภชนญฺจ มหารหํ
                           วรํ วรญฺจ ปาทาสิ         นาคราชา มหายสํ ๓- ฯ
       |๑๕๙.๔๑๒| ภุญฺชิตฺวาน ส สมฺพุทฺโธ ๔-  ปตฺเต โธวิตฺว โยนิโส
                           อนุโมทนิยํกาสิ            นาคกญฺญา มหิทฺธิกา ฯ
       |๑๕๙.๔๑๓| สพฺพญฺญุํ ผุลฺลิตํ ทิสฺวา  นาคกญฺญา มหายสํ
                           ปสนฺนํ สตฺถุโน จิตฺตํ     สุนิวทฺธญฺจ มานสํ ฯ
@เชิงอรรถ: ๑ ม. ปริวุโต ฯ ยุ. ปเรโต ฯ ๒ ยุ. วรมาสเน ฯ ๓ ยุ. มหายโส ฯ
@๔ ม. ... สมฺมาสมฺพุทฺโธ ฯ
---------------------------------------------------------------------------------------------
หน้าที่ ๓๑๔.
       |๑๕๙.๔๑๔| มมญฺจ จิตฺตมญฺญาย    ชลชุตฺตมนามโก
                           ตสฺมึ ขเณ มหาวีโร       ภิกฺขุนึ ทสฺสยิทฺธิยา ฯ
       |๑๕๙.๔๑๕| อิทฺธี อเนกา ทสฺเสสิ      ภิกฺขุนี สา วิสารทา
                           ปโมทิตา เวทชาตา       สตฺถารํ เอตทพฺรวึ ฯ
       |๑๕๙.๔๑๖| อทฺทสาหํ อิมา อิทฺธี ๑-  สุมิตา อิตรายปิ
                           กถํ อโหสิ สา ธีร          อิทฺธิยา สุวิสารทา ฯ
       |๑๕๙.๔๑๗| โอรสามุขโต ชาตา        ธีตา มม มหิทฺธิกา
                           มมานุสาสนีการา        อิทฺธิยา สุวิสารทา ฯ
       |๑๕๙.๔๑๘| พุทฺธสฺส วจนํ สุตฺวา       ตุฏฺฐา เอวํ อโวจหํ ๒-
                           อหํปิ ตาทิสา โหมิ       อิทฺธิยา สุวิสารทา ฯ
       |๑๕๙.๔๑๙| ปโมทิตาหํ สุมนา         ปตฺตอุตฺตมมานสา ๓-
                           อนาคตมฺหิ อทฺธาเน     อีทิสา โหมิ นายก ฯ
       |๑๕๙.๔๒๐| มณิมยญฺจ ๔- ปลฺลงฺกํ   มณฺฑปญฺจ ปภสฺสรํ
                          อนฺนปาเนน ตปฺเปตฺวา   สสงฺฆํ โลกนายกํ ฯ
       |๑๕๙.๔๒๑| นาคานํ ปวรํ ปุปฺผํ         อรุณํ นาม อุปฺปลํ
                           วณฺณํ เม อีทิสํ โหตุ      ปูเชสึ โลกนายกํ ฯ
       |๑๕๙.๔๒๒| เตน กมฺเมน สุกเตน      เจตนาปณิธีหิ จ
                           ชหิตฺวา มานุสํ เทหํ      ตาวตึสํ อคญฺฉหํ ฯ
       |๑๕๙.๔๒๓| ตโต จุตาหํ มนุเช          อุปปนฺนา สยมฺภุโน
                           อุปฺปเลหิ ปฏิจฺฉนฺนํ      ปิณฺฑปาตมทาสหํ ฯ
@เชิงอรรถ: ๑ ม. ยุ. ... อิมํ อิทฺธึ สุมนํ ... ฯ ยุ. สุมิตฺตํ ฯ ๒ ม. เอวํ ปตฺเถสฺสหํ ตทา ฯ
@ยุ. ตุฏฺฐาเอว ปตฺเถสฺสหํ ฯ ๓ ม. ปตฺเถ อุตฺตมมานสา ฯ ๔ ม. มณิมยมฺหิ ปลฺลงฺเก
@มณฺฑปมฺหิ ปภสฺสเร ฯ
---------------------------------------------------------------------------------------------
หน้าที่ ๓๑๕.
       |๑๕๙.๔๒๔| เอกนวุเต อิโต กปฺเป     วิปสฺสี นาม นายโก
                           อุปฺปชฺชิ จารุนยโน       สพฺพธมฺเมสุ จกฺขุมา ฯ
       |๑๕๙.๔๒๕| เสฏฺฐิธีตา ตทา หุตฺวา    พาราณสิปุรุตฺตเม
                          นิมนฺเตตฺวาน สมฺพุทฺธํ   สสงฺฆํ โลกนายกํ ฯ
       |๑๕๙.๔๒๖| มหาทานํ ททิตฺวาน       อุปฺปเลหิ วินายกํ
                           ปูชยิตฺวา จ เตเหว        วณฺณโสภํ อปตฺถยึ ฯ
       |๑๕๙.๔๒๗| อิมมฺหิ ภทฺทเก กปฺเป    พฺรหฺมพนฺธุ มหายโส
                           กสฺสโป นาม นาเมน    อุปฺปชฺชิ วทตํ วโร ฯ
       |๑๕๙.๔๒๘| อุปฏฺฐาโก มเหสิสฺส      ตทา อาสิ นริสฺสโร
                           กาสิราชา กิกี นาม       พาราณสิปุรุตฺตเม ฯ
       |๑๕๙.๔๒๙| ตสฺสาสึ ทุติยา ธีตา       สมณีคุตฺตสวฺหยา
                          ธมฺมํ สุตฺวา ชินคฺคสฺส    ปพฺพชฺชํ สมโรจยึ ฯ
       |๑๕๙.๔๓๐| อนุชานิ น โน ตาโต      อคาเรว ตทา มยํ
                           วีสํ วสฺสสหสฺสานิ         วิจริมฺห อตนฺทิตา ฯ
       |๑๕๙.๔๓๑| โกมาริพฺรหฺมจริยํ         ราชกญฺญา สุเขฏฺฐิตา
                           พุทฺโธปฏฺฐานนิรตา      มุทิตา สตฺต ธีตโร ฯ
       |๑๕๙.๔๓๒| สมณี สมณคุตฺตา จ      ภิกฺขุนี ภิกฺขุทาสิกา
                          ธมฺมา เจว สุธมฺมา จ     สตฺตมี สงฺฆทาสิกา ฯ
       |๑๕๙.๔๓๓| อหํ เขมา จ สปฺปญฺญา   ปฏาจารา จ กุณฺฑลา
                          กิสาโคตมี ธมฺมทินฺนา    วิสาขา โหติ สตฺตมี ฯ
---------------------------------------------------------------------------------------------
หน้าที่ ๓๑๖.
       |๑๕๙.๔๓๔| เตหิ กมฺเมหิ สุกเตหิ      เจตนาปณิธีหิ จ
                           ชหิตฺวา มานุสํ เทหํ       ตาวตึสํ อคญฺฉหํ ฯ
       |๑๕๙.๔๓๕| ตโต จุตา มนุสฺเสสุ        อุปปนฺนา มหากุเล
                           ปีตมฏฺฐวรํ ทุสฺสํ          อทํ อรหโต อหํ ฯ
       |๑๕๙.๔๓๖| ตโต จุตา อริฏฺฐปุเร       ชาตา วิปฺปกุเล อหํ
                           ธีตา ติริฏิวจฺฉสฺส         อุมฺมาทนฺตี มโนหรา ฯ
       |๑๕๙.๔๓๗| ตโต จุตา ชนปเท          กุเล อญฺญตเร อหํ
                           ปสุตา นาติผีตมฺหิ        สาลึ โคเปมหนฺตทา ฯ
       |๑๕๙.๔๓๘| ทิสฺวา ปจฺเจกสมฺพุทฺธํ    ปญฺจลาชสตานหํ
                           ทตฺวา ปทุมฉนฺนานิ      ปญฺจ ปุตฺตสตานิปิ ๑- ฯ
       |๑๕๙.๔๓๙| ปตฺถยึ เตสุ ปุตฺเตสุ ๒-   มธุํ ทตฺวา สยมฺภุโน
                           ตโต จุตา อรญฺเญหํ      อชายึ ปทุโมทเร ฯ
       |๑๕๙.๔๔๐| กาสิรญฺโญ มเหสีหํ       หุตฺวา สกฺกตปูชิตา
                           อชนึ ราชปุตฺตานํ         อนูนํ สตปญฺจกํ ฯ
       |๑๕๙.๔๔๑| ยทา เต โยพฺพนปฺปตฺตา   กีฬนฺตา ชลกีฬิตํ
                           ทิสฺวาน โอปตฺตปทุมํ    อาสุํ ปจฺเจกนายกา ฯ
       |๑๕๙.๔๔๒| สาหํ เตหิ วินาภูตา        สุตวเรหิ ๓- โสกินี
                           จุตา อิสิคิลิปสฺเส          คามกมฺหิ อชายิหํ ฯ
       |๑๕๙.๔๔๓| ยทา พุทฺธาสุตมติ         สุตานํ อตฺตโนปิจ ๔-
                           ยาคุํ อาทาย คจฺฉนฺติ    อฏฺฐ ปจฺเจกนายเก ฯ
@เชิงอรรถ: ๑ ม. ยุ. ปุตฺตสตานิหํ ฯ ๒ ม. ปตฺถยึ เตปิ ปตฺเถสุํ ฯ ยุ. ปตฺถยึ เตสุ ปตฺเถสุ ฯ
@๓ ม. ยุ. สุตวีเรหิ ฯ ๔ ม. สุตานํ สตฺถุโนปิจ ฯ ยุ. สุตาน กสกํ ตทา ฯ
---------------------------------------------------------------------------------------------
หน้าที่ ๓๑๗.
       |๑๕๙.๔๔๔| ภิกฺขาย คามํ คจฺฉนฺเต   ทิสฺวา ปุตฺเต อนุสฺสรึ
                           ขีรธารา วินิคฺคญฺฉิ        ตทา เม ปุตฺตเปมสา ฯ
       |๑๕๙.๔๔๕| ตโต เตสํ อทํ ยาคุํ         ปสนฺนา เสหิ ปาณิภิ
                           ตโต จุตาหํ ติทสํ           นนฺทนํ อุปปชฺชหํ ฯ
       |๑๕๙.๔๔๖| อนุโภตฺวา สุขทุกฺขํ        สํสริตฺวา ภวาภเว
                           ตวตฺถาย มหาวีร          ปริจฺจตฺตญฺจ ชีวิตํ ฯ
       |๑๕๙.๔๔๗| เอวํ พหุวิธํ ทุกฺขํ            สมฺปตฺตี จ พหูวิธา
                           ปจฺฉิเม ภวสมฺปตฺเต      ชาตา สาวตฺถิยํ ปุเร ฯ
       |๑๕๙.๔๔๘| มหทฺธเน เสฏฺฐิกุเล        สุขิเต สชฺชิเต ตถา
                           นานารตนปชฺโชเต        สพฺพกามสมิทฺธเน ฯ
       |๑๕๙.๔๔๙| สกฺกตปูชิตา เจว           มานิตาปจิตา ตถา
                           รูปสิรึ อนุปฺปตฺตา         กุเลสุ อติสกฺกตา ฯ
       |๑๕๙.๔๕๐| อตีว ปตฺถิตา จาสึ         รูปโภคสิรีหิ จ
                           ปตฺถิตา เสฏฺฐิปุตฺเตหิ    อเนเกหิ สเตหิ จ ฯ
       |๑๕๙.๔๕๑| อคารํ ปชหิตฺวาน          ปพฺพชึ อนคาริยํ
                         อฑฺฒมาเส ๑- อสมฺปตฺเต   จตุสจฺจํ อปาปุณึ ฯ
       |๑๕๙.๔๕๒| อิทฺธิยา อภินิมฺมิตฺวา     จตุรสฺสํ รถํ อหํ
                           พุทฺธสฺส ปาเท อวนฺทึ ๒-   โลกนาถสิริมโต ๓- ฯ
       |๑๕๙.๔๕๓| สุปุปฺผิตคฺคํ อุปคมฺม ปาทปํ ๔-
                           เอกา ตุวํ ติฏฺฐสิ สาลมูเล
@เชิงอรรถ: ๑ ม. ยุ. อฏฺฐมาเส ฯ ๒ ม. ยุ. อวนฺทิสฺสํ ฯ ๓ ม. โลกนาถสฺส ตาทิโน ฯ
@๔ ยุ. ภิกฺขุนี ฯ
---------------------------------------------------------------------------------------------
หน้าที่ ๓๑๘.
                           น จาปิ ตุยฺหํ ทุติยตฺถิ โกจิ ๑-
                           พาเล น ตฺวํ ภายสิ ธุตฺตกานํ ฯ
       |๑๕๙.๔๕๔| สตํ สหสฺสานิปิ ธุตฺตกานํ
                           อิธาคตา เอทิสกา ภเวยฺยุํ ๒-
                           โลมํ น อิญฺเช นปิ สมฺปเวเธ ๓-
                           กึ เม ตุวํ มาร กริสฺสเสโก ๔- ฯ
       |๑๕๙.๔๕๕| เอสา อนฺตรธายามิ       กุจฺฉึ วา ปวิสามิ เต
                           ภมุกนฺตริกายมฺปิ         ติฏฺฐนฺตึ มํ น ทกฺขสิ ฯ
       |๑๕๙.๔๕๖| จิตฺตมฺหิ วสิภูตาหํ         อิทฺธิปาทา สุวิภาวิตา
                           สพฺพพนฺธนมุตฺตามฺหิ   น ตํ ภายามิ อาวุโส ฯ
       |๑๕๙.๔๕๗| สตฺติสูลูปมา กามา       ขนฺธาปิ อธิกุณฺฑรา
                           ยตฺถ กามรตึ พฺรูสิ        อรติ ทานิ สา มม ฯ
       |๑๕๙.๔๕๘| สพฺพตฺถ วิหตา นนฺทิ     ตโมกฺขนฺธา ปทาลิตา
                           เอวํ ชานาหิ ปาปิม       นิหโต ตฺวมสิ อนฺตก ฯ
       |๑๕๙.๔๕๙| ชิโน ตสฺมึ คุเณ ตุฏฺโฐ    เอตทคฺเค ฐเปสิ มํ
                           เสฏฺฐา ๕- อิทฺธิมตีนนฺติ  ปริสาสุ วินายโก ฯ
       |๑๕๙.๔๖๐| ปริจิณฺโณ มยา สตฺถา   กตํ พุทฺธสฺส สาสนํ
                           โอหิโต คุรุโก ภาโร       ภวเนตฺติ สมูหตา ฯ
       |๑๕๙.๔๖๑| ยสฺสตฺถาย ปพฺพชิตา    อคารสฺมา อนคาริยํ
                          โส เม อตฺโถ อนุปฺปตฺโต  สพฺพสํโยชนกฺขโย ฯ
@เชิงอรรถ: ๑ ยุ. น จตฺถิ เต ทุติยา วณฺณธาตุ ฯ  ๒ ม. สมาคตา ... ฯ
@ยุ. อิธาคตา ตาทิสกา ... ฯ  ๓ ยุ. โลมํ น อิญฺชามิ น สนฺตสามิ ฯ
@๔ ยุ. มารํ น ภายามิ ตํ เอกิกาสํ ฯ  ๕ ม. อคฺคา ฯ
---------------------------------------------------------------------------------------------
หน้าที่ ๓๑๙.
       |๑๕๙.๔๖๒| จีวรํ ปิณฺฑปาตญฺจ       ปจฺจยํ สยนาสนํ
                           ขเณน อุปนาเมนฺติ       สหสฺสานิ สมนฺตโต ฯ
       |๑๕๙.๔๖๓| กิเลสา ฌาปิตา มยฺหํ    ภวา สพฺเพ สมูหตา
                           นาคีว พนฺธนํ เฉตฺวา    วิหรามิ อนาสวา ฯ
       |๑๕๙.๔๖๔| สฺวาคตํ วต เม อาสิ       พุทฺธเสฏฺฐสฺส สนฺติเก
                           ติสฺโส วิชฺชา อนุปฺปตฺตา  กตํ พุทฺธสฺส สาสนํ ฯ
       |๑๕๙.๔๖๕| ปฏิสมฺภิทา จตสฺโส       วิโมกฺขาปิจ อฏฺฐิเม
                           ฉฬภิญฺญา สจฺฉิกตา    กตํ พุทฺธสฺส สาสนนฺติ ฯ
             อิตฺถํ สุทํ อุปฺปลวณฺณา ภิกฺขุนี อิมา คาถาโย อภาสิตฺถาติ ฯ
                                อุปฺปลวณฺณาเถริยา อปทานํ สมตฺตํ ฯ

             เนื้อความพระไตรปิฎกฉบับภาษาบาลี อักษรไทย เล่มที่ ๓๓ หน้าที่ ๓๑๐-๓๑๙.
https://84000.org/tipitaka/read/pali_read.php?B=33&A=6295&w=&modeTY=2&pagebreak=1
             อ่านเทียบพระไตรปิฎกฉบับภาษาบาลี อักษรโรมัน :-
https://84000.org/tipitaka/read/roman_read.php?B=33&A=6295&modeTY=2&pagebreak=1
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=33.1&item=159&items=1
             อ่านเทียบพระไตรปิฎกฉบับมหาจุฬาฯ :-
https://84000.org/tipitaka/pitaka_item/m_siri.php?B=33&siri=170
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=33&i=159
             สารบัญพระไตรปิฎกเล่มที่ ๓๓
https://84000.org/tipitaka/read/?index_33
https://84000.org/tipitaka/english/?index_33