บาลีพระไตรปิฎกเล่มที่ ๓๗ - พระอภิธรรมปิฎกเล่มที่ ๔

                                         นิรยปาลกถา
     [๑๘๑๘]   นตฺถิ  นิรเยสุ  นิรยปาลาติ ฯ อามนฺตา ฯ นตฺถิ นิรเยสุ
กมฺมการณาติ  ฯ  น  เหวํ  วตฺตพฺเพ ฯเปฯ อตฺถิ นิรเยสุ กมฺมการณาติ ฯ
อามนฺตา    ฯ    อตฺถิ    นิรเยสุ    นิรยปาลาติ    ฯ    น   เหวํ
วตฺตพฺเพ ฯเปฯ
     [๑๘๑๙]   อตฺถิ  มนุสฺเสสุ  กมฺมการณา  อตฺถิ  จ  การณิกาติ  ฯ
อามนฺตา   ฯ   อตฺถิ   นิรเยสุ   กมฺมการณา  อตฺถิ  จ  การณิกาติ  ฯ
น   เหวํ   วตฺตพฺเพ   ฯเปฯ   อตฺถิ   นิรเยสุ  กมฺมการณา  นตฺถิ  จ
การณิกาติ   ฯ   อามนฺตา   ฯ   อตฺถิ   มนุสฺเสสุ   กมฺมการณา  นตฺถิ
จ การณิกาติ ฯ น เหวํ วตฺตพฺเพ ฯเปฯ
     [๑๘๒๐]   อตฺถิ  นิรเยสุ  นิรยปาลาติ  ฯ  อามนฺตา  ฯ นนุ วุตฺตํ
ภควตา
                               น เวสฺสภู โนปิ จ เปตฺติราชา
                               โสโม ยโม เวสฺสวโณ จ ราชา
                               สกานิ กมฺมานิ หนนฺติ ตตฺถ
                               อิโต ปณุณฺณํ ปรโลกปตฺตนฺติ
อตฺเถว สุตฺตนฺโตติ ฯ อามนฺตา ฯ เตน หิ นตฺถิ นิรเยสุ นิรยปาลาติ ฯ
     [๑๘๒๑]   นตฺถิ  นิรเยสุ  นิรยปาลาติ  ฯ  อามนฺตา  ฯ นนุ วุตฺตํ
ภควตา   ตเมนํ   ภิกฺขเว   นิรยปาลา   ปญฺจวิธํ  พนฺธนํ  นาม  การณํ
กาเรนฺติ   ตตฺตํ   อโยขิลํ   หตฺเถ   คเมนฺติ   ตตฺตํ   อโยขิลํ  ทุติเย
หตฺเถ   คเมนฺติ  ตตฺตํ  อโยขิลํ  ปาเท  คเมนฺติ  ตตฺตํ  อโยขิลํ  ทุติเย
ปาเท   คเมนฺติ   ตตฺตํ   อโยขิลํ   มชฺเฌอุรสฺมึ   คเมนฺติ   โส  ตตฺถ
ทุกฺขา   ติพฺพา   กฏุกา   เวทนา  เวเทติ  น  จ  ตาว  กาลํ  กโรติ
ยาว   น   ตํ   ปาปกมฺมํ   พฺยนฺตี   โหตีติ   อตฺเถว   สุตฺตนฺโตติ  ฯ
อามนฺตา ฯ เตน หิ อตฺถิ นิรเยสุ นิรยปาลาติ ฯ
     [๑๘๒๒]   นตฺถิ  นิรเยสุ  นิรยปาลาติ  ฯ  อามนฺตา  ฯ นนุ วุตฺตํ
ภควตา   ตเมนํ   ภิกฺขเว   นิรยปาลา   สํเวสิตฺวา   กุธารีหิ  ตจฺฉนฺติ
ฯเปฯ   ตเมนํ   ภิกฺขเว   นิรยปาลา   อุทฺธํปาทํ   อโธสิรํ   ฐเปตฺวา
วาสีหิ   ตจฺฉนฺติ   ฯเปฯ  ตเมนํ  ภิกฺขเว  นิรยปาลา  รเถ  โยเชตฺวา
อาทิตฺตาย     ปฐวิยา     สมฺปชฺชลิตาย    สญฺโชติภูตาย    สาเรนฺติปิ
ปจฺจาสาเรนฺติปิ  ฯเปฯ  ตเมนํ  ภิกฺขเว  นิรยปาลา  มหนฺตํ องฺคารปพฺพตํ
อาทิตฺตํ   สมฺปชฺชลิตํ   สญฺโชติภูตํ   อาโรเปนฺติปิ   โอโรเปนฺติปิ  ฯเปฯ
ตเมนํ   ภิกฺขเว   นิรยปาลา   อุทฺธํปาทํ   อโธสิรํ   คเหตฺวา  ตตฺตาย
โลหกุมฺภิยา    ปกฺขิปนฺติ    อาทิตฺตาย    สมฺปชฺชลิตาย    สญฺโชติภูตาย
โส   ตตฺถ   เผณุทฺเทหกํ   ปจฺจติ   โส  ตตฺถ  เผณุทฺเทหกํ  ปจฺจมาโน
สกิมฺปิ   อุทฺธํ   คจฺฉติ   สกิมฺปิ   อโธ   คจฺฉติ   สกิมฺปิ  ติริยํ  คจฺฉติ
โส   ตตฺถ   ทุกฺขา   ฯเปฯ   ตเมนํ   ภิกฺขเว  นิรยปาลา  มหานิรเย
ปกฺขิปนฺติ โส โข ปน ภิกฺขเว มหานิรโย
                จตุกฺกณฺโณ จตุทฺวาโร       วิภตฺโต ภาคโส มิโต
                อโยปาการปริยนฺโต          อยสา ปฏิกุชฺชิโต
                ตสฺส อโยมยา ภูมิ            ชลิตา เตชสา ยุตา
                สมนฺตา โยชนสตํ              ผลิตฺวา ติฏฺฐติ สพฺพทาติ ^๑-
อตฺเถว สุตฺตนฺโตติ ฯ อามนฺตา ฯ เตน หิ อตฺถิ นิรเยสุ นิรยปาลาติ ฯ
                                        นิรยปาลกถา ฯ
                                         -------------
@เชิงอรรถ: ^๑ อํ. ติกฺก. ๑๘๐ ฯ ม. อุ. ๓๑๖ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๖๒๘-๖๓๐. https://84000.org/tipitaka/read/pali_read.php?B=37&A=12448&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=12448&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=1818&items=5 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=214 ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=1818 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=7009 The Pali Atthakatha in Roman :- https://84000.org/tipitaka/atthapali/read_rm.php?B=55&A=7009 สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37