ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๗ ภาษาบาลี อักษรไทย พระอภิธรรมปิฎกเล่มที่ ๔ อภิ. กถาวตฺถุ

     [๑๗๗]   ปุคฺคโล  กึ  นิสฺสาย  ติฏฺฐตีติ  ฯ  ภวํ นิสฺสาย ติฏฺฐตีติ ฯ
ภโว  อนิจฺโจ  สงฺขโต  ปฏิจฺจสมุปฺปนฺโน  ขยธมฺโม  วยธมฺโม วิราคธมฺโม
นิโรธธมฺโม   วิปริณามธมฺโมติ   ฯ   อามนฺตา   ฯ   ปุคฺคโลปิ  อนิจฺโจ
สงฺขโต   ปฏิจฺจสมุปฺปนฺโน  ขยธมฺโม  วยธมฺโม  วิราคธมฺโม  นิโรธธมฺโม
วิปริณามธมฺโมติ ฯ น เหวํ วตฺตพฺเพ ฯเปฯ
     [๑๗๘]   น  วตฺตพฺพํ  ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ
อามนฺตา   ฯ   นนุ  อตฺถิ  โกจิ  สุขํ  เวทนํ  เวทิยมาโน  สุขํ  เวทนํ
เวทิยามีติ  ปชานาตีติ  ฯ  อามนฺตา  ฯ  หญฺจิ  อตฺถิ  โกจิ  สุขํ  เวทนํ
เวทิยมาโน  สุขํ  เวทนํ  เวทิยามีติ  ปชานาติ  เตน  วต  เร วตฺตพฺเพ
ปุคฺคโล อุปลพฺภติ สจฺฉิกฏฺฐปรมฏฺเฐนาติ ฯ
     {๑๗๘.๑}   น       วตฺตพฺพํ      ปุคฺคโล      อุปลพฺภติ
สจฺฉิกฏฺฐปรมฏฺเฐนาติ    ฯ    อามนฺตา    ฯ    นนุ    อตฺถิ    โกจิ
ทุกฺขํ   เวทนํ   เวทิยมาโน   ฯเปฯ   อทุกฺขมสุขํ   เวทนํ  เวทิยมาโน
อทุกฺขมสุขํ  เวทนํ  เวทิยามีติ  ปชานาตีติ  ฯ  อามนฺตา  ฯ  หญฺจิ  อตฺถิ
โกจิ   อทุกฺขมสุขํ   เวทนํ   เวทิยมาโน  อทุกฺขมสุขํ  เวทนํ  เวทิยามีติ
ปชานาติ เตน วต เร วตฺตพฺเพ ปุคฺคโล อุปลพฺภติ สจฺฉิกฏฺฐปรมฏฺเฐนาติ ฯ
     {๑๗๘.๒}   อตฺถิ  โกจิ สุขํ เวทนํ เวทิยมาโน สุขํ เวทนํ เวทิยามีติ
ปชานาตีติ   กตฺวา  เตน  จ  การเณน  ปุคฺคโล  อุปลพฺภติ   สจฺฉิกฏฺฐ-
ปรมฏฺเฐนาติ   ฯ   อามนฺตา   ฯ  โย  สุขํ  เวทนํ  เวทิยมาโน  สุขํ
เวทนํ   เวทิยามีติ   ปชานาติ   เสฺวว   ปุคฺคโล   โย   สุขํ   เวทนํ
เวทิยมาโน  สุขํ  เวทนํ  เวทิยามีติ  น  ปชานาติ  น  โส  ปุคฺคโลติ ฯ
น เหวํ วตฺตพฺเพ ฯเปฯ
     {๑๗๘.๓}   โย  ทุกฺขํ  เวทนํ  เวทิยมาโน  ฯเปฯ โย  อทุกฺขมสุขํ
เวทนํ   เวทิยมาโน   อทุกฺขมสุขํ   เวทนํ  เวทิยามีติ  ปชานาติ  เสฺวว
ปุคฺคโล   โย   อทุกฺขมสุขํ   เวทนํ   เวทิยมาโน   อทุกฺขมสุขํ   เวทนํ
เวทิยามีติ น ปชานาติ น โส ปุคฺคโลติ ฯ น เหวํ วตฺตพฺเพ ฯเปฯ
     {๑๗๘.๔}   อตฺถิ  โกจิ สุขํ เวทนํ เวทิยมาโน สุขํ เวทนํ เวทิยามีติ
ปชานาตีติ    กตฺวา    เตน    จ    การเณน    ปุคฺคโล   อุปลพฺภติ
สจฺฉิกฏฺฐปรมฏฺเฐนาติ    ฯ    อามนฺตา   ฯ   อญฺญา   สุขา   เวทนา
อญฺโญ  สุขํ  เวทนํ  เวทิยมาโน  สุขํ  เวทนํ  เวทิยามีติ  ปชานาตีติ  ฯ
น   เหวํ   วตฺตพฺเพ   ฯเปฯ   อญฺญา  ทุกฺขา  เวทนา  ฯเปฯ  อญฺญา
อทุกฺขมสุขา    เวทนา    อญฺโญ    อทุกฺขมสุขํ    เวทนํ   เวทิยมาโน
อทุกฺขมสุขํ     เวทนํ    เวทิยามีติ    ปชานาตีติ    ฯ    น    เหวํ
วตฺตพฺเพ ฯเปฯ
     [๑๗๙]   น  วตฺตพฺพํ  ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ
อามนฺตา  ฯ  นนุ  อตฺถิ  โกจิ  กาเย กายานุปสฺสี วิหรตีติ ฯ อามนฺตา ฯ
หญฺจิ  อตฺถิ  โกจิ  กาเย  กายานุปสฺสี  วิหรติ  เตน  วต  เร วตฺตพฺเพ
ปุคฺคโล อุปลพฺภติ สจฺฉิกฏฺฐปรมฏฺเฐนาติ ฯ
     {๑๗๙.๑}   น  วตฺตพฺพํ  ปุคฺคโล  อุปลพฺภติ สจฺฉิกฏฺฐปรมฏฺเฐนาติ ฯ
อามนฺตา  ฯ  นนุ  อตฺถิ  โกจิ  เวทนาสุ  ฯเปฯ  จิตฺเต  ฯเปฯ ธมฺเมสุ
ธมฺมานุปสฺสี   วิหรตีติ   ฯ   อามนฺตา   ฯ  หญฺจิ  อตฺถิ  โกจิ  ธมฺเมสุ
ธมฺมานุปสฺสี   วิหรติ   เตน   วต   เร   วตฺตพฺเพ  ปุคฺคโล  อุปลพฺภติ
สจฺฉิกฏฺฐปรมฏฺเฐนาติ ฯ
     {๑๗๙.๒}   อตฺถิ  โกจิ  กาเย  กายานุปสฺสี วิหรตีติ กตฺวา เตน จ
การเณน   ปุคฺคโล   อุปลพฺภติ   สจฺฉิกฏฺฐปรมฏฺเฐนาติ  ฯ  อามนฺตา  ฯ
โย  กาเย  กายานุปสฺสี  วิหรติ  เสฺวว ปุคฺคโล โย น กาเย กายานุปสฺสี
วิหรติ น โส ปุคฺคโลติ ฯ น เหวํ วตฺตพฺเพ ฯเปฯ
     {๑๗๙.๓}   โย  เวทนาสุ  ฯเปฯ จิตฺเต ฯเปฯ ธมฺเมสุ ธมฺมานุปสฺสี
วิหรติ  เสฺวว ปุคฺคโล โย น ธมฺเมสุ ธมฺมานุปสฺสี วิหรติ น โส ปุคฺคโลติ ฯ
น เหวํ วตฺตพฺเพ ฯเปฯ
     {๑๗๙.๔}   อตฺถิ   โกจิ   กาเย   กายานุปสฺสี  วิหรตีติ  กตฺวา
เตน   จ   การเณน   ปุคฺคโล   อุปลพฺภติ   สจฺฉิกฏฺฐปรมฏฺเฐนาติ   ฯ
อามนฺตา   ฯ   อญฺโญ  กาโย  อญฺโญ  กาเย  กายานุปสฺสี  วิหรตีติ  ฯ
น   เหวํ   วตฺตพฺเพ   ฯเปฯ   อญฺญา   เวทนา   ฯเปฯ  อญฺญํ  จิตฺตํ
ฯเปฯ   อญฺเญ   ธมฺมา   อญฺโญ   ธมฺเมสุ   ธมฺมานุปสฺสี   วิหรตีติ  ฯ
น เหวํ วตฺตพฺเพ ฯเปฯ
     [๑๘๐]   ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ  อามนฺตา ฯ
นนุ วุตฺตํ ภควตา
                       สุญฺญโต โลกํ อเวกฺขสฺสุ   โมฆราช สทา สโต
                       อตฺตานุทิฏฺฐึ อูหจฺจ          เอวํ มจฺจุตโร สิยา
                       เอวํ โลกํ อเวกฺขนฺตํ          มจฺจุราชา น ปสฺสตีติ ๑-
อตฺเถว   สุตฺตนฺโตติ   ฯ  อามนฺตา  ฯ  เตน  หิ  น  วตฺตพฺพํ  ปุคฺคโล
อุปลพฺภติ สจฺฉิกฏฺฐปรมฏฺเฐนาติ ฯ
     [๑๘๑]   ปุคฺคโล  อเวกฺขตีติ  ฯ  อามนฺตา ฯ สห รูเปน อเวกฺขตีติ
วินา   รูเปน   อเวกฺขตีติ  ฯ  สห  รูเปน  อเวกฺขตีติ  ฯ  ตํ  ชีวํ  ตํ
สรีรนฺติ   ฯ   น  เหวํ  วตฺตพฺเพ  ฯเปฯ  วินา  รูเปน  อเวกฺขตีติ  ฯ
อญฺญํ   ชีวํ   อญฺญํ   สรีรนฺติ   ฯ  น  เหวํ  วตฺตพฺเพ  ฯเปฯ  ปุคฺคโล
อเวกฺขตีติ    ฯ   อามนฺตา   ฯ   อพฺภนฺตรคโต   อเวกฺขตีติ   พหิทฺธา
นิกฺขมิตฺวา   อเวกฺขตีติ   ฯ   อพฺภนฺตรคโต  อเวกฺขตีติ  ฯ  ตํ  ชีวํ  ตํ
สรีรนฺติ  ฯ  น  เหวํ  วตฺตพฺเพ  ฯเปฯ  พหิทฺธา นิกฺขมิตฺวา อเวกฺขตีติ ฯ
อญฺญํ ชีวํ อญฺญํ สรีรนฺติ ฯ น เหวํ วตฺตพฺเพ ฯเปฯ
     [๑๘๒]   น  วตฺตพฺพํ  ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ
อามนฺตา   ฯ   นนุ   ภควา   สจฺจวาที   กาลวาที   ภูตวาที  ตถวาที
อวิตถวาที   อนญฺญถวาทีติ   ฯ   อามนฺตา   ฯ   วุตฺตํ   ภควตา  อตฺถิ
@เชิงอรรถ:  ขุ, สุ. ๕๔๙ ฯ
ปุคฺคโล  อตฺตหิตาย  ปฏิปนฺโนติ  ๑-  อตฺเถว  สุตฺตนฺโตติ  ฯ อามนฺตา ฯ
เตน   หิ   ปุคฺคโล   อุปลพฺภติ   สจฺฉิกฏฺฐปรมฏฺเฐนาติ  ฯ  น  วตฺตพฺพํ
ปุคฺคโล   อุปลพฺภติ  สจฺฉิกฏฺฐปรมฏฺเฐนาติ  ฯ  อามนฺตา  ฯ  นนุ  ภควา
สจฺจวาที   กาลวาที   ภูตวาที   ตถวาที   อวิตถวาที  อนญฺญถวาทีติ  ฯ
อามนฺตา  ฯ  วุตฺตํ  ภควตา  เอกปุคฺคโล  ภิกฺขเว  โลเก  อุปฺปชฺชมาโน
อุปฺปชฺชติ   พหุชนหิตาย   พหุชนสุขาย   โลกานุกมฺปาย   อตฺถาย  หิตาย
สุขาย   เทวมนุสฺสานนฺติ   ๒-   อตฺเถว   สุตฺตนฺโตติ  ฯ  อามนฺตา  ฯ
เตน หิ ปุคฺคโล อุปลพฺภติ สจฺฉิกฏฺฐปรมฏฺเฐนาติ ฯ
     [๑๘๓]   ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ  อามนฺตา ฯ
นนุ  ภควา  สจฺจวาที กาลวาที ภูตวาที ตถวาที อวิตถวาที อนญฺญถวาทีติ ฯ
อามนฺตา   ฯ   วุตฺตํ   ภควตา  สพฺเพ  ธมฺมา  อนตฺตาติ  ๓-  อตฺเถว
สุตฺตนฺโตติ   ฯ  อามนฺตา  ฯ  เตน  หิ  น  วตฺตพฺพํ  ปุคฺคโล  อุปลพฺภติ
สจฺฉิกฏฺฐปรมฏฺเฐนาติ ฯ
     [๑๘๔]   ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ  อามนฺตา ฯ
นนุ    ภควา    สจฺจวาที   กาลวาที   ภูตวาที   ตถวาที   อวิตถวาที
อนญฺญถวาทีติ   ฯ   อามนฺตา  ฯ  วุตฺตํ  ภควตา  ทุกฺขเมว  อุปฺปชฺชมานํ
อุปฺปชฺชติ   ทุกฺขเมว  นิรุชฺฌมานํ  นิรุชฺฌตีติ  น  กงฺขติ  น  วิจิกิจฺฉติ  ฯ
อปรปจฺจยา   ญาณเมวสฺส   เอตฺถ   โหติ   เอตฺตาวตา   โข  กจฺจาน
สมฺมาทิฏฺฐิ  โหตีติ  ๔-  อตฺเถว  สุตฺตนฺโตติ  ฯ  อามนฺตา  ฯ เตน หิ น
@เชิงอรรถ:  อภิ. ปุ. ๑๖๗-๑๙๓ ฯ  อํ. เอก. ๒๘ ฯ  ขุ. ขุ. ๔๓ ฯ  สํ. นิ. ๒๑ ฯ
วตฺตพฺพํ ปุคฺคโล อุปลพฺภติ สจฺฉิกฏฺฐปรมฏฺเฐนาติ ฯ
     [๑๘๕]   ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ  อามนฺตา ฯ
นนุ วชิรา ภิกฺขุนี มารํ ปาปิมนฺตํ เอตทโวจ
                      กึ นุ สตฺโตติ ปจฺเจสิ       มาร ทิฏฺฐิคตํ นุ เต
                      สุทฺธสงฺขารปุญฺโชยํ       น ยิธ สตฺตูปลพฺภติ
                      ยถา หิ องฺคสมฺภารา     โหติ สทฺโท รโถ อิติ
                      เอวํ ขนฺเธสุ สนฺเตสุ       โหติ สตฺโตติ สมฺมติ
                      ทุกฺขเมว หิ สมฺโภติ       ทุกฺขํ ติฏฺฐติ เวติ จ
                      นาญฺญตฺร ทุกฺขา สมฺโภติ   นาญฺญตฺร ทุกฺขา นิรุชฺฌตีติ ๑-
อตฺเถว   สุตฺตนฺโตติ   ฯ  อามนฺตา  ฯ  เตน  หิ  น  วตฺตพฺพํ  ปุคฺคโล
อุปลพฺภติ สจฺฉิกฏฺฐปรมฏฺเฐนาติ ฯ
     [๑๘๖]   ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ  อามนฺตา ฯ
นนุ    อายสฺมา    อานนฺโท    ภควนฺตํ   เอตทโวจ   สุญฺโญ   โลโก
สุญฺโญ   โลโกติ   ภนฺเต   วุจฺจติ   กิตฺตาวตา   นุโข   ภนฺเต  สุญฺโญ
โลโกติ   วุจฺจตีติ  ยสฺมา  โข  อานนฺท  สุญฺญํ  อตฺเตน  วา  อตฺตนิเยน
วา   ตสฺมา   สุญฺโญ   โลโกติ  วุจฺจติ  กิญฺจานนฺท  สุญฺญํ  อตฺเตน  วา
อตฺตนิเยน   วา   จกฺขุํ   โข  อานนฺท  สุญฺญํ  อตฺเตน  วา  อตฺตนิเยน
วา   รูปา   สุญฺญา   ฯเปฯ   จกฺขุวิญฺญาณํ  สุญฺญํ  ฯเปฯ  จกฺขุสมฺผสฺโส
สุญฺโญ      ฯเปฯ      ยมฺปิทํ      จกฺขุสมฺผสฺสปจฺจยา      อุปฺปชฺชติ
@เชิงอรรถ:  สํ. ส. ๑๙๘ ฯ
เวทยิตํ   สุขํ   วา   ทุกฺขํ  วา  อทุกฺขมสุขํ  วา  ตมฺปิ  สุญฺญํ  อตฺเตน
วา   อตฺตนิเยน   วา   โสตํ   สุญฺญํ   ฯเปฯ   สทฺทา  สุญฺญา  ฯเปฯ
ฆานํ  สุญฺญํ  ...  คนฺธา  สุญฺญา  ฯเปฯ  ชิวฺหา สุญฺญา ... รสา สุญฺญา
ฯเปฯ  กาโย  สุญฺโญ  ...  โผฏฺฐพฺพา  สุญฺญา  ฯเปฯ มโน สุญฺโญ ...
ธมฺมา  สุญฺญา  ...  มโนวิญฺญาณํ  สุญฺญํ  ... มโนสมฺผสฺโส สุญฺโญ ฯเปฯ
ยมฺปิทํ   มโนสมฺผสฺสปจฺจยา   อุปฺปชฺชติ   เวทยิตํ   สุขํ  วา  ทุกฺขํ  วา
อทุกฺขมสุขํ   วา   ตมฺปิ   สุญฺญํ   อตฺเตน  วา  อตฺตนิเยน  วา  ยสฺมา
โข   อานนฺท   สุญฺญํ   อตฺเตน   วา   อตฺตนิเยน  วา  ตสฺมา  สุญฺโญ
โลโกติ   วุจฺจตีติ  ๑-  อตฺเถว  สุตฺตนฺโตติ  ฯ  อามนฺตา  ฯ  เตน  หิ
น วตฺตพฺพํ ปุคฺคโล อุปลพฺภติ สจฺฉิกฏฺฐปรมฏฺเฐนาติ ฯ
     [๑๘๗]   ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ  อามนฺตา ฯ
นนุ    ภควา    สจฺจวาที   กาลวาที   ภูตวาที   ตถวาที   อวิตถวาที
อนญฺญถวาทีติ  ฯ  อามนฺตา  ฯ  วุตฺตํ  ภควตา  อตฺตนิ  วา  ภิกฺขเว สติ
อตฺตนิยํ   เมติ   อสฺสาติ   เอวํ   ภนฺเต  อตฺตนิเย  วา  ภิกฺขเว  สติ
อตฺตา   เมติ  อสฺสาติ  เอวํ  ภนฺเต  อตฺตนิ  จ  ภิกฺขเว  อตฺตนิเย  จ
สจฺจโต   เถตโต   อนุปลพฺภิยมาเน  ยมิทํ  ทิฏฺฐิฏฺฐานํ  โส  โลโก  โส
อตฺตา   โส   เปจฺจ  ภวิสฺสามิ  นิจฺโจ  ธุโว  สสฺสโต  อวิปริณามธมฺโม
สสฺสติสมํ    ตเถว   ฐสฺสามีติ   นนฺวายํ   ภิกฺขเว   เกวโล   ปริปูโร
พาลธมฺโมติ   กิญฺจิ   โน   สิยา   ภนฺเต  เกวโล  หิ  ภนฺเต  ปริปูโร
@เชิงอรรถ:  ขุ. ป. ๔๓๓ ฯ
พาลธมฺโมติ   ๑-   อตฺเถว  สุตฺตนฺโตติ  ฯ  อามนฺตา  ฯ  เตน  หิ  น
วตฺตพฺพํ ปุคฺคโล อุปลพฺภติ สจฺฉิกฏฺฐปรมฏฺเฐนาติ ฯ
     [๑๘๘]   ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ  อามนฺตา ฯ
นนุ    ภควา    สจฺจวาที   กาลวาที   ภูตวาที   ตถวาที   อวิตถวาที
อนญฺญถวาทีติ  ฯ  อามนฺตา  ฯ  วุตฺตํ  ภควตา  ตโยเม  เสนิย สตฺถาโร
สนฺโต  สํวิชฺชมานา  โลกสฺมึ  กตเม  ตโย  อิธ  เสนิย  เอกจฺโจ สตฺถา
ทิฏฺเฐ  เจว  ธมฺเม  อตฺตานํ  สจฺจโต  เถตโต  ปญฺญเปติ อภิสมฺปรายญฺจ
อตฺตานํ สจฺจโต เถตโต ปญฺญเปติ
     {๑๘๘.๑}   อิธ  ปน  เสนิย  เอกจฺโจ สตฺถา ทิฏฺเฐว หิ โข ธมฺเม
อตฺตานํ  สจฺจโต  เถตโต  ปญฺญเปติ  โน  จ  โข  อภิสมฺปรายํ  อตฺตานํ
สจฺจโต เถตโต ปญฺญเปติ
     {๑๘๘.๒}   อิธ  ปน  เสนิย  เอกจฺโจ  สตฺถา  ทิฏฺเฐ เจว ธมฺเม
อตฺตานํ   สจฺจโต   เถตโต   น   ปญฺญเปติ   อภิสมฺปรายญฺจ   อตฺตานํ
สจฺจโต เถตโต น ปญฺญเปติ
     {๑๘๘.๓}   ตตฺร  เสนิย  ยฺวายํ  สตฺถา ทิฏฺเฐ เจว ธมฺเม อตฺตานํ
สจฺจโต   เถตโต   ปญฺญเปติ  อภิสมฺปรายญฺจ  อตฺตานํ  สจฺจโต  เถตโต
ปญฺญเปติ อยํ วุจฺจติ เสนิย สตฺถา สสฺสตวาโท
     {๑๘๘.๔}   ตตฺร  เสนิย ยฺวายํ สตฺถา ทิฏฺเฐว หิ โข ธมฺเม อตฺตานํ
สจฺจโต   เถตโต   ปญฺญเปติ   โน   จ   โข   อภิสมฺปรายํ   อตฺตานํ
สจฺจโต เถตโต ปญฺญเปติ อยํ วุจฺจติ เสนิย สตฺถา อุจฺเฉทวาโท
     {๑๘๘.๕}   ตตฺร เสนิย ยฺวายํ สตฺถา ทิฏฺเฐ เจว ธมฺเม อตฺตานํ สจฺจโต
@เชิงอรรถ:  ม. มู. ๒๖๐ ฯ
เถตโต   น   ปญฺญเปติ   อภิสมฺปรายญฺจ   อตฺตานํ   สจฺจโต   เถตโต
น   ปญฺญเปติ   อยํ   วุจฺจติ  เสนิย  สตฺถา  สมฺมาสมฺพุทฺโธ  อิเม  โข
เสนิย   ตโย   สตฺถาโร   สนฺโต   สํวิชฺชมานา   โลกสฺมินฺติ   อตฺเถว
สุตฺตนฺโตติ   ฯ  อามนฺตา  ฯ  เตน  หิ  น  วตฺตพฺพํ  ปุคฺคโล  อุปลพฺภติ
สจฺฉิกฏฺฐปรมฏฺเฐนาติ ฯ
     [๑๘๙]   ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ  อามนฺตา ฯ
นนุ    ภควา    สจฺจวาที   กาลวาที   ภูตวาที   ตถวาที   อวิตถวาที
อนญฺญถวาทีติ  ฯ  อามนฺตา  ฯ   วุตฺตํ ภควตา สปฺปิกุมฺโภติ ฯ อามนฺตา ฯ
อตฺถิ   โกจิ   สปฺปิสฺส   กุมฺภํ   กโรตีติ   ฯ   น  เหวํ  วตฺตพฺเพ  ฯ
เตน หิ น วตฺตพฺพํ ปุคฺคโล อุปลพฺภติ สจฺฉิกฏฺฐปรมฏฺเฐนาติ ฯ
     [๑๙๐]   ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ  อามนฺตา ฯ
นนุ    ภควา    สจฺจวาที   กาลวาที   ภูตวาที   ตถวาที   อวิตถวาที
อนญฺญถวาทีติ   ฯ   อามนฺตา   ฯ  วุตฺตํ  ภควตา  เตลกุมฺโภ  มธุกุมฺโภ
ผาณิตกุมฺโภ     ขีรกุมฺโภ     อุทกกุมฺโภ    ปานียถาลกํ    ปานียโกสกํ
ปานียสราวกํ   นิจฺจภตฺตํ  ธุวยาคูติ  ฯ  อามนฺตา  ฯ  อตฺถิ  กาจิ  ยาคุ
นิจฺจา  ธุวา  สสฺสตา  อวิปริณามธมฺมาติ  ฯ  น  เหวํ  วตฺตพฺเพ ฯ เตน
หิ น วตฺตพฺพํ ปุคฺคโล อุปลพฺภติ สจฺฉิกฏฺฐปรมฏฺเฐนาติ ฯ สงฺขิตฺตํ ฯ
                                          ปุคฺคลกถา
              อฏฺฐนิคฺคหเปยฺยาลา        สนฺธาวนิยา อุปาทาย
              จิตฺเตน ปญฺจมํ กลฺยาณํ    อิทฺธิ สุตฺตาหรเณน อฏฺฐมํ ฯ
                                            -------


             เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๗๕-๘๓. https://84000.org/tipitaka/read/pali_read.php?B=37&A=1530&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=1530&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=177&items=14              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=20              ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=177              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=3528              The Pali Atthakatha in Roman :- https://84000.org/tipitaka/atthapali/read_rm.php?B=55&A=3528              สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]