ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๗ ภาษาบาลี อักษรไทย พระอภิธรรมปิฎกเล่มที่ ๔ อภิ. กถาวตฺถุ

                                     อฏฺฐมกสฺส อินฺทฺริยกถา
     [๗๗๙]   อฏฺฐมกสฺส  ปุคฺคลสฺส  นตฺถิ  สทฺธินฺทฺริยนฺติ  ฯ อามนฺตา ฯ
อฏฺฐมกสฺส ปุคฺคลสฺส นตฺถิ สทฺธาติ ฯ น เหวํ วตฺตพฺเพ ฯเปฯ
     [๗๘๐]   อฏฺฐมกสฺส   ปุคฺคลสฺส   นตฺถิ  วิริยินฺทฺริยํ  ฯเปฯ  นตฺถิ
สตินฺทฺริยํ   ฯเปฯ   นตฺถิ   สมาธินฺทฺริยํ  ฯเปฯ  นตฺถิ  ปญฺญินฺทฺริยนฺติ  ฯ
อามนฺตา   ฯ   อฏฺฐมกสฺส   ปุคฺคลสฺส   นตฺถิ   ปญฺญาติ   ฯ  น  เหวํ
วตฺตพฺเพ ฯเปฯ
     [๗๘๑]   อฏฺฐมกสฺส   ปุคฺคลสฺส  อตฺถิ  สทฺธาติ  ฯ  อามนฺตา  ฯ
อฏฺฐมกสฺส   ปุคฺคลสฺส   อตฺถิ   สทฺธินฺทฺริยนฺติ   ฯ   น  เหวํ  วตฺตพฺเพ
ฯเปฯ    อฏฺฐมกสฺส    ปุคฺคลสฺส   อตฺถิ   วิริยํ   ฯเปฯ   อตฺถิ   สติ
อตฺถิ   สมาธิ   ฯเปฯ   อตฺถิ   ปญฺญาติ   ฯ  อามนฺตา  ฯ  อฏฺฐมกสฺส
ปุคฺคลสฺส อตฺถิ ปญฺญินฺทฺริยนฺติ ฯ น เหวํ วตฺตพฺเพ ฯเปฯ
     [๗๘๒]   อฏฺฐมกสฺส  ปุคฺคลสฺส  อตฺถิ  มโน  อตฺถิ  มนินฺทฺริยนฺติ  ฯ
อามนฺตา  ฯ  อฏฺฐมกสฺส  ปุคฺคลสฺส  อตฺถิ  สทฺธา  อตฺถิ  สทฺธินฺทฺริยนฺติ ฯ
น   เหวํ   วตฺตพฺเพ   ฯเปฯ  อฏฺฐมกสฺส  ปุคฺคลสฺส  อตฺถิ  มโน  อตฺถิ
มนินฺทฺริยนฺติ    ฯ    อามนฺตา    ฯ    อฏฺฐมกสฺส    ปุคฺคลสฺส   อตฺถิ
ปญฺญา อตฺถิ ปญฺญินฺทฺริยนฺติ ฯ น เหวํ วตฺตพฺเพ ฯเปฯ
     [๗๘๓]   อฏฺฐมกสฺส  ปุคฺคลสฺส  อตฺถิ  โสมนสฺสํ อตฺถิ โสมนสฺสินฺทฺริยํ
ฯเปฯ   อตฺถิ   ชีวิตํ  อตฺถิ  ชีวิตินฺทฺริยนฺติ  ฯ  อามนฺตา  ฯ  อฏฺฐมกสฺส
ปุคฺคลสฺส   อตฺถิ   สทฺธา   อตฺถิ  สทฺธินฺทฺริยนฺติ  ฯ  น  เหวํ  วตฺตพฺเพ
ฯเปฯ   อฏฺฐมกสฺส   ปุคฺคลสฺส   อตฺถิ   ชีวิตํ   อตฺถิ  ชีวิตินฺทฺริยนฺติ  ฯ
อามนฺตา    ฯ   อฏฺฐมกสฺส   ปุคฺคลสฺส   อตฺถิ   วิริยํ   ฯเปฯ   อตฺถิ
ปญฺญา อตฺถิ ปญฺญินฺทฺริยนฺติ ฯ น เหวํ วตฺตพฺเพ ฯเปฯ
     [๗๘๔]   อฏฺฐมกสฺส  ปุคฺคลสฺส  อตฺถิ  สทฺธา  นตฺถิ สทฺธินฺทฺริยนฺติ ฯ
อามนฺตา     ฯ     อฏฺฐมกสฺส    ปุคฺคลสฺส    อตฺถิ    มโน    นตฺถิ
มนินฺทฺริยนฺติ ฯ น เหวํ วตฺตพฺเพ ฯเปฯ
     [๗๘๕]   อฏฺฐมกสฺส  ปุคฺคลสฺส  อตฺถิ  สทฺธา  นตฺถิ สทฺธินฺทฺริยนฺติ ฯ
อามนฺตา      ฯ     อฏฺฐมกสฺส     ปุคฺคลสฺส     อตฺถิ     โสมนสฺสํ
นตฺถิ   โสมนสฺสินฺทฺริยํ   ฯเปฯ   อตฺถิ   ชีวิตํ   นตฺถิ  ชีวิตินฺทฺริยนฺติ  ฯ
น เหวํ วตฺตพฺเพ ฯเปฯ
     [๗๘๖]   อฏฺฐมกสฺส  ปุคฺคลสฺส  อตฺถิ  ปญฺญา  นตฺถิ ปญฺญินฺทฺริยนฺติ ฯ
อามนฺตา   ฯ   อฏฺฐมกสฺส   ปุคฺคลสฺส   อตฺถิ  มโน  นตฺถิ  มนินฺทฺริยนฺติ
ฯเปฯ   อตฺถิ   โสมนสฺสํ   นตฺถิ  โสมนสฺสินฺทฺริยนฺติ  ฯเปฯ  อตฺถิ  ชีวิตํ
นตฺถิ ชีวิตินฺทฺริยนฺติ ฯ น เหวํ วตฺตพฺเพ ฯเปฯ
     [๗๘๗]   อฏฺฐมกสฺส  ปุคฺคลสฺส  นตฺถิ  สทฺธินฺทฺริยนฺติ  ฯ อามนฺตา ฯ
อฏฺฐมโก  ปุคฺคโล  อสทฺโธติ  ฯ  น  เหวํ  วตฺตพฺเพ  ฯเปฯ  อฏฺฐมกสฺส
ปุคฺคลสฺส   นตฺถิ   วิริยินฺทฺริยนฺติ   ฯ   อามนฺตา  ฯ  อฏฺฐมโก  ปุคฺคโล
กุสีโต  หีนวิริโยติ  ฯ  น  เหวํ  วตฺตพฺเพ  ฯเปฯ  อฏฺฐมกสฺส  ปุคฺคลสฺส
นตฺถิ   สตินฺทฺริยนฺติ   ฯ   อามนฺตา   ฯ   อฏฺฐมโก  ปุคฺคโล  มุฏฺฐสฺสติ
อสมฺปชาโนติ   ฯ   น   เหวํ   วตฺตพฺเพ  ฯเปฯ  อฏฺฐมกสฺส  ปุคฺคลสฺส
นตฺถิ   สมาธินฺทฺริยนฺติ   ฯ  อามนฺตา  ฯ  อฏฺฐมโก  ปุคฺคโล  อสมาหิโต
วิพฺภนฺตจิตฺโตติ ฯ น เหวํ วตฺตพฺเพ ฯเปฯ
     [๗๘๘]   อฏฺฐมกสฺส  ปุคฺคลสฺส  นตฺถิ  ปญฺญินฺทฺริยนฺติ  ฯ อามนฺตา ฯ
อฏฺฐมโก ปุคฺคโล ทุปฺปญฺโญ เอฬมูโคติ ฯ น เหวํ วตฺตพฺเพ ฯเปฯ
     [๗๘๙]   อฏฺฐมกสฺส   ปุคฺคลสฺส   อตฺถิ   สทฺธา  สา  จ  สทฺธา
นิยฺยานิกาติ   ฯ   อามนฺตา   ฯ   หญฺจิ   อฏฺฐมกสฺส   ปุคฺคลสฺส  อตฺถิ
สทฺธา  สา  จ  สทฺธา  นิยฺยานิกา  โน  วต  เร  วตฺตพฺเพ  อฏฺฐมกสฺส
ปุคฺคลสฺส     นตฺถิ     สทฺธินฺทฺริยนฺติ     ฯ    อฏฺฐมกสฺส    ปุคฺคลสฺส
อตฺถิ   วิริยํ   ตญฺจ   วิริยํ   นิยฺยานิกํ   ฯเปฯ   อตฺถิ   สติ  สา  จ
สติ   นิยฺยานิกา   ฯเปฯ   อตฺถิ   สมาธิ   โส  จ  สมาธิ  นิยฺยานิโก
ฯเปฯ   อตฺถิ   ปญฺญา   สา  จ  ปญฺญา  นิยฺยานิกาติ  ฯ  อามนฺตา  ฯ
หญฺจิ    อฏฺฐมกสฺส    ปุคฺคลสฺส    อตฺถิ    ปญฺญา   สา   จ   ปญฺญา
นิยฺยานิกา   โน   วต   เร   วตฺตพฺเพ   อฏฺฐมกสฺส   ปุคฺคลสฺส  นตฺถิ
ปญฺญินฺทฺริยนฺติ ฯ
     [๗๙๐]   สกทาคามิผลสจฺฉิกิริยาย   ปฏิปนฺนสฺส   ปุคฺคลสฺส   อตฺถิ
สทฺธา   อตฺถิ   สทฺธินฺทฺริยนฺติ   ฯ   อามนฺตา  ฯ  อฏฺฐมกสฺส  ปุคฺคลสฺส
อตฺถิ   สทฺธา   อตฺถิ   สทฺธินฺทฺริยนฺติ   ฯ   น  เหวํ  วตฺตพฺเพ  ฯเปฯ
สกทาคามิผลสจฺฉิกิริยาย     ปฏิปนฺนสฺส     ปุคฺคลสฺส    อตฺถิ    ปญฺญา
อตฺถิ   ปญฺญินฺทฺริยนฺติ   ฯ   อามนฺตา   ฯ   อฏฺฐมกสฺส  ปุคฺคลสฺส  อตฺถิ
ปญฺญา อตฺถิ ปญฺญินฺทฺริยนฺติ ฯ น เหวํ วตฺตพฺเพ ฯเปฯ
     [๗๙๑]   อนาคามิผลสจฺฉิกิริยาย   ปฏิปนฺนสฺส   ปุคฺคลสฺส   ฯเปฯ
อรหตฺตสจฺฉิกิริยาย    ปฏิปนฺนสฺส    ปุคฺคลสฺส    อตฺถิ    สทฺธา   อตฺถิ
สทฺธินฺทฺริยํ    ฯเปฯ    อตฺถิ    ปญฺญา    อตฺถิ    ปญฺญินฺทฺริยนฺติ    ฯ
อามนฺตา     ฯ    อฏฺฐมกสฺส    ปุคฺคลสฺส    อตฺถิ    ปญฺญา    อตฺถิ
ปญฺญินฺทฺริยนฺติ ฯ น เหวํ วตฺตพฺเพ ฯเปฯ
     [๗๙๒]   อฏฺฐมกสฺส  ปุคฺคลสฺส  อตฺถิ  สทฺธา  นตฺถิ สทฺธินฺทฺริยนฺติ ฯ
อามนฺตา     ฯ     สกทาคามิผลสจฺฉิกิริยาย    ปฏิปนฺนสฺส    ปุคฺคลสฺส
อตฺถิ   สทฺธา   นตฺถิ   สทฺธินฺทฺริยนฺติ   ฯ   น  เหวํ  วตฺตพฺเพ  ฯเปฯ
อฏฺฐมกสฺส    ปุคฺคลสฺส    อตฺถิ    ปญฺญา    นตฺถิ   ปญฺญินฺทฺริยนฺติ   ฯ
อามนฺตา        ฯ        สกทาคามิผลสจฺฉิกิริยาย        ปฏิปนฺนสฺส
ปุคฺคลสฺส    อตฺถิ    ปญฺญา    นตฺถิ    ปญฺญินฺทฺริยนฺติ   ฯ   น   เหวํ
วตฺตพฺเพ ฯเปฯ
     [๗๙๓]   อฏฺฐมกสฺส   ปุคฺคลสฺส   อตฺถิ  สทฺธา  นตฺถิ  สทฺธินฺทฺริยํ
ฯเปฯ    อตฺถิ    ปญฺญา    นตฺถิ   ปญฺญินฺทฺริยนฺติ   ฯ   อามนฺตา   ฯ
อนาคามิผลสจฺฉิกิริยาย        ปฏิปนฺนสฺส       ปุคฺคลสฺส       ฯเปฯ
อรหตฺตสจฺฉิกิริยาย      ปฏิปนฺนสฺส      ปุคฺคลสฺส     อตฺถิ     ปญฺญา
นตฺถิ ปญฺญินฺทฺริยนฺติ ฯ น เหวํ วตฺตพฺเพ ฯเปฯ
     [๗๙๔]   อฏฺฐมกสฺส  ปุคฺคลสฺส  นตฺถิ  ปญฺจินฺทฺริยานีติ ฯ อามนฺตา ฯ
นนุ   วุตฺตํ   ภควตา   ปญฺจิมานิ   ภิกฺขเว   อินฺทฺริยานิ   ฯ   กตมานิ
ปญฺจ  ฯ  สทฺธินฺทฺริยํ  วิริยินฺทฺริยํ  สตินฺทฺริยํ สมาธินฺทฺริยํ ปญฺญินฺทฺริยํ
อิมานิ   โข   ภิกฺขเว   ปญฺจินฺทฺริยานิ   อิเมสํ   โข  ภิกฺขเว  ปญฺจนฺนํ
อินฺทฺริยานํ    สมตฺตา    ปริปูรตฺตา   อรหา   โหติ   ตโต   มุทุตเรหิ
อรหตฺตสจฺฉิกิริยาย    ปฏิปนฺโน    โหติ    ตโต   มุทุตเรหิ   อนาคามี
โหติ    ตโต    มุทุตเรหิ    อนาคามิผลสจฺฉิกิริยาย   ปฏิปนฺโน   โหติ
ตโต   มุทุตเรหิ   สกทาคามี   โหติ   ตโต   มุทุตเรหิ  สกทาคามิผล-
สจฺฉิกิริยาย  ปฏิปนฺโน  โหติ  ตโต  มุทุตเรหิ  โสตาปนฺโน  โหติ  ตโต
มุทุตเรหิ   โสตาปตฺติผลสจฺฉิกิริยาย  ปฏิปนฺโน  โหติ  ยสฺส  โข  ภิกฺขเว
อิมานิ  ปญฺจินฺทฺริยานิ  สพฺเพน  สพฺพํ  สพฺพถา  สพฺพํ  นตฺถิ  ตมหํ พาหิโร
ปุถุชฺชนปกฺเข  ฐิโตติ  วทามีติ  ๑-  อตฺเถว  สุตฺตนฺโตติ  ฯ  อามนฺตา ฯ
@เชิงอรรถ:  สํ. มหาวาร. ๒๑๒ ฯ
อฏฺฐมโก  ปุคฺคโล  พาหิโร  ปุถุชฺชนปกฺเข  ฐิโตติ  ฯ  น  เหวํ วตฺตพฺเพ
ฯเปฯ เตน หิ อฏฺฐมกสฺส ปุคฺคลสฺส อตฺถิ ปญฺจินฺทฺริยานีติ ฯ
                                  อฏฺฐมกสฺส อินฺทฺริยกถา ฯ
                                           ---------


             เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๒๗๐-๒๗๕. https://84000.org/tipitaka/read/pali_read.php?B=37&A=5440&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=5440&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=779&items=16              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=46              ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=779              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=4399              The Pali Atthakatha in Roman :- https://84000.org/tipitaka/atthapali/read_rm.php?B=55&A=4399              สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]