ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๗ ภาษาบาลี อักษรไทย พระอภิธรรมปิฎกเล่มที่ ๔ อภิ. กถาวตฺถุ

                                           ทานกถา
     [๑๑๓๙]   เจตสิโก   ธมฺโม   ทานนฺติ  ฯ  อามนฺตา  ฯ  ลพฺภา
เจตสิโก  ธมฺโม  ปเรสํ  ทาตุนฺติ  ฯ  น  เหวํ  วตฺตพฺเพ  ฯเปฯ ลพฺภา
เจตสิโก   ธมฺโม   ปเรสํ   ทาตุนฺติ   ฯ  อามนฺตา  ฯ  ลพฺภา  ผสฺโส
ปเรสํ  ทาตุนฺติ  ฯ  น  เหวํ  วตฺตพฺเพ  ฯเปฯ  ลพฺภา  เวทนา  ฯเปฯ
สญฺญา   เจตนา   สทฺธา   วิริยํ   สติ   สมาธิ  ฯเปฯ  ปญฺญา  ปเรสํ
ทาตุนฺติ ฯ น เหวํ วตฺตพฺเพ ฯเปฯ
     [๑๑๔๐]   น  วตฺตพฺพํ  เจตสิโก  ธมฺโม  ทานนฺติ  ฯ  อามนฺตา ฯ
ทานํ    อนิฏฺฐผลํ    อกนฺตผลํ    อมนุญฺญผลํ    เสจนกผลํ    ทุกฺขุทฺรยํ
ทุกฺขวิปากนฺติ   ฯ   น   เหวํ   วตฺตพฺเพ   ฯเปฯ  นนุ  ทานํ  อิฏฺฐผลํ
กนฺตผลํ   มนุญฺญผลํ  อเสจนกผลํ  สุขุทฺรยํ  สุขวิปากนฺติ  ฯ  อามนฺตา  ฯ
หญฺจิ    ทานํ    อิฏฺฐผลํ   กนฺตผลํ   มนุญฺญผลํ   อเสจนกผลํ   สุขุทฺรยํ
@เชิงอรรถ:  ที. สี. ๒๗๗ ฯ
สุขวิปากํ   เตน   วต   เร   วตฺตพฺเพ  เจตสิโก  ธมฺโม  ทานนฺติ  ฯ
ทานํ   อิฏฺฐผลํ   วุตฺตํ   ภควตา   จีวรํ   ทานนฺติ   ฯ   อามนฺตา  ฯ
จีวรํ     อิฏฺฐผลํ     กนฺตผลํ     มนุญฺญผลํ    อเสจนกผลํ    สุขุทฺรยํ
สุขวิปากนฺติ  ฯ  น  เหวํ  วตฺตพฺเพ  ฯเปฯ  ทานํ  อิฏฺฐผลํ วุตฺตํ ภควตา
ปิณฺฑปาโต    เสนาสนํ    คิลานปจฺจยเภสชฺชปริกฺขาโร    ทานนฺติ    ฯ
อามนฺตา    ฯ    คิลานปจฺจยเภสชฺชปริกฺขาโร    อิฏฺฐผโล    กนฺตผโล
มนุญฺญผโล    อเสจนกผโล    สุขุทฺรโย   สุขวิปาโกติ   ฯ   น   เหวํ
วตฺตพฺเพ ฯเปฯ
     [๑๑๔๑]   น  วตฺตพฺพํ  เจตสิโก  ธมฺโม  ทานนฺติ  ฯ  อามนฺตา ฯ
นนุ วุตฺตํ ภควตา
                                สทฺธา หิริยํ กุสลญฺจ ทานํ
                                ธมฺมา เอเต สปฺปุริสานุยาตา
                                เอตํ หิ มคฺคํ ทิวิยํ วทนฺติ
                                เอเตน หิ คจฺฉติ เทวโลกนฺติ ๑-
อตฺเถว สุตฺตนฺโตติ ฯ อามนฺตา ฯ เตน หิ เจตสิโก ธมฺโม ทานนฺติ ฯ
     [๑๑๔๒]   น  วตฺตพฺพํ  เจตสิโก  ธมฺโม  ทานนฺติ  ฯ  อามนฺตา ฯ
นนุ    วุตฺตํ    ภควตา    ปญฺจิมานิ   ภิกฺขเว   ทานานิ   มหาทานานิ
อคฺคญฺญานิ     รตฺตญฺญานิ     วํสญฺญานิ     โปราณานิ     อสงฺกิณฺณานิ
อสงฺกิณฺณปุพฺพานิ    น    สงฺกิยนฺติ    น   สงฺกิยิสฺสนฺติ   อปฺปฏิกฺกุฏฺฐานิ
@เชิงอรรถ:  อํ. อฏฺฐก. ๙๓ ฯ
สมเณหิ   พฺราหฺมเณหิ   วิญฺญูหิ   ฯ   กตมานิ   ปญฺจ  ฯ  อิธ  ภิกฺขเว
อริยสาวโก    ปาณาติปาตํ    ปหาย   ปาณาติปาตา   ปฏิวิรโต   โหติ
ปาณาติปาตา   ปฏิวิรโต   ภิกฺขเว   อริยสาวโก   อปริมาณานํ  สตฺตานํ
อภยํ   เทติ   อเวรํ   เทติ   อพฺยาปชฺฌํ   เทติ  อปริมาณานํ  สตฺตานํ
อภยํ   ทตฺวา   อเวรํ  ทตฺวา  อพฺยาปชฺฌํ  ทตฺวา  อปริมาณสฺส  อภยสฺส
อเวรสฺส  อพฺยาปชฺฌสฺส  ภาคี  โหติ  อิทํ  ภิกฺขเว  ปฐมํ  ทานํ มหาทานํ
อคฺคญฺญํ     รตฺตญฺญํ    วํสญฺญํ    โปราณํ    อสงฺกิณฺณํ    อสงฺกิณฺณปุพฺพํ
น      สงฺกิยติ      น      สงฺกิยิสฺสติ     อปฺปฏิกฺกุฏฺฐํ     สมเณหิ
พฺราหฺมเณหิ วิญฺญูหิ
     {๑๑๔๒.๑}   ปุน   จปรํ   ภิกฺขเว   อริยสาวโก   อทินฺนาทานํ
ปหาย   ฯเปฯ   กาเมสุมิจฺฉาจารํ   ปหาย   ฯเปฯ   มุสาวาทํ  ปหาย
ฯเปฯ    สุราเมรยมชฺชปมาทฏฺฐานํ   ปหาย   สุราเมรยมชฺชปมาทฏฺฐานา
ปฏิวิรโต    โหติ    สุราเมรยมชฺชปมาทฏฺฐานา    ปฏิวิรโต    ภิกฺขเว
อริยสาวโก    อปริมาณานํ    สตฺตานํ    อภยํ   เทติ   อเวรํ   เทติ
อพฺยาปชฺฌํ    เทติ    อปริมาณานํ    สตฺตานํ   อภยํ   ทตฺวา   อเวรํ
ทตฺวา     อพฺยาปชฺฌํ    ทตฺวา    อปริมาณสฺส    อภยสฺส    อเวรสฺส
อพฺยาปชฺฌสฺส   ภาคี   โหติ   อิทํ   ภิกฺขเว   ปญฺจมํ   ทานํ  มหาทานํ
อคฺคญฺญํ     รตฺตญฺญํ    วํสญฺญํ    โปราณํ    อสงฺกิณฺณํ    อสงฺกิณฺณปุพฺพํ
น    สงฺกิยติ    น   สงฺกิยิสฺสติ   อปฺปฏิกฺกุฏฺฐํ   สมเณหิ   พฺราหฺมเณหิ
วิญฺญูหิ   อิมานิ   โข   ภิกฺขเว  ปญฺจ  ทานานิ  มหาทานานิ  อคฺคญฺญานิ
รตฺตญฺญานิ    วํสญฺญานิ    โปราณานิ    อสงฺกิณฺณานิ    อสงฺกิณฺณปุพฺพานิ
น   สงฺกิยนฺติ   น   สงฺกิยิสฺสนฺติ   อปฺปฏิกฺกุฏฺฐานิ  สมเณหิ  พฺราหฺมเณหิ
วิญฺญูหีติ  ๑-  อตฺเถว  สุตฺตนฺโตติ  ฯ  อามนฺตา  ฯ  เตน  หิ  เจตสิโก
ธมฺโม ทานนฺติ ฯ
     [๑๑๔๓]   น   วตฺตพฺพํ   เทยฺยธมฺโม  ทานนฺติ  ฯ  อามนฺตา  ฯ
นนุ    วุตฺตํ    ภควตา    อิเธกจฺโจ    อนฺนํ    เทติ   ปานํ   เทติ
วตฺถํ    เทติ    ยานํ   เทติ   มาลํ   เทติ   คนฺธํ   เทติ   วิเลปนํ
เทติ    เสยฺยํ   เทติ   อาวสถํ   เทติ   ปทีเปยฺยํ   เทตีติ   อตฺเถว
สุตฺตนฺโตติ ฯ อามนฺตา ฯ เตน หิ เทยฺยธมฺโม ทานนฺติ ฯ
     [๑๑๔๔]   เทยฺยธมฺโม   ทานนฺติ   ฯ  อามนฺตา  ฯ  เทยฺยธมฺโม
อิฏฺฐผโล  กนฺตผโล  มนุญฺญผโล  อเสจนกผโล  สุขุทฺรโย  สุขวิปาโกติ  ฯ
น   เหวํ   วตฺตพฺเพ   ฯเปฯ   ทานํ   อิฏฺฐผลํ   วุตฺตํ  ภควตา  จีวรํ
ทานนฺติ    ฯ    อามนฺตา   ฯ   จีวรํ   อิฏฺฐผลํ   กนฺตผลํ   มนุญฺญผลํ
อเสจนกผลํ   สุขุทฺรยํ   สุขวิปากนฺติ   ฯ   น   เหวํ  วตฺตพฺเพ  ฯเปฯ
ทานํ   อิฏฺฐผลํ   วุตฺตํ   ภควตา   ปิณฺฑปาโต   ทานํ   เสนาสนํ  ทานํ
คิลานปจฺจยเภสชฺชปริกฺขาโร   ทานนฺติ   ฯ   อามนฺตา  ฯ  คิลานปจฺจย-
เภสชฺชปริกฺขาโร    อิฏฺฐผโล    กนฺตผโล   มนุญฺญผโล   อเสจนกผโล
สุขุทฺรโย   สุขวิปาโกติ   ฯ   น   เหวํ   วตฺตพฺเพ   ฯเปฯ  เตน  หิ
น วตฺตพฺพํ เทยฺยธมฺโม ทานนฺติ ฯ
                                         ทานกถา ฯ
@เชิงอรรถ:  อํ. อฏฺฐก. ๑๐๓ ปริยาเยน ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๓๖๘-๓๗๑. https://84000.org/tipitaka/read/pali_read.php?B=37&A=7357&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=7357&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=1139&items=6              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=86              ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=1139              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=5019              The Pali Atthakatha in Roman :- https://84000.org/tipitaka/atthapali/read_rm.php?B=55&A=5019              สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]