ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๗ ภาษาบาลี อักษรไทย พระอภิธรรมปิฎกเล่มที่ ๔ อภิ. กถาวตฺถุ

     [๙๒]   รูปํ   อุปาทาย   ปุคฺคลสฺส   ปญฺญตฺตีติ  ฯ  อามนฺตา  ฯ
รูปํ   อนิจฺจํ   สงฺขตํ   ปฏิจฺจสมุปฺปนฺนํ   ขยธมฺมํ   วยธมฺมํ   วิราคธมฺมํ
นิโรธธมฺมํ   วิปริณามธมฺมนฺติ   ฯ   อามนฺตา   ฯ   ปุคฺคโลปิ   อนิจฺโจ
สงฺขโต     ปฏิจฺจสมุปฺปนฺโน     ขยธมฺโม     วยธมฺโม    วิราคธมฺโม
นิโรธธมฺโม วิปริณามธมฺโมติ ฯ น เหวํ วตฺตพฺเพ ฯเปฯ
     {๙๒.๑}   เวทนํ  อุปาทาย  ฯเปฯ  สญฺญํ อุปาทาย ฯเปฯ สงฺขาเร
อุปาทาย  ฯเปฯ  วิญฺญาณํ  อุปาทาย  ปุคฺคลสฺส  ปญฺญตฺตีติ  ฯ อามนฺตา ฯ
วิญฺญาณํ   อนิจฺจํ   สงฺขตํ   ปฏิจฺจสมุปฺปนฺนํ  ขยธมฺมํ  วยธมฺมํ  วิราคธมฺมํ
นิโรธธมฺมํ   วิปริณามธมฺมนฺติ   ฯ   อามนฺตา   ฯ   ปุคฺคโลปิ   อนิจฺโจ
สงฺขโต     ปฏิจฺจสมุปฺปนฺโน     ขยธมฺโม     วยธมฺโม    วิราคธมฺโม
นิโรธธมฺโม วิปริณามธมฺโมติ ฯ น เหวํ วตฺตพฺเพ ฯเปฯ
     [๙๓]   รูปํ   อุปาทาย   ปุคฺคลสฺส   ปญฺญตฺตีติ  ฯ  อามนฺตา  ฯ
นีลํ   รูปํ   อุปาทาย   นีลกสฺส   ปุคฺคลสฺส   ปญฺญตฺตีติ   ฯ   น  เหวํ
วตฺตพฺเพ   ฯเปฯ   ปีตํ   รูปํ  อุปาทาย  ฯเปฯ  โลหิตํ  รูปํ  อุปาทาย
ฯเปฯ   โอทาตํ   รูปํ   อุปาทาย   ฯเปฯ   สนิทสฺสนํ   รูปํ  อุปาทาย
ฯเปฯ   อนิทสฺสนํ   รูปํ   อุปาทาย   ฯเปฯ   สปฺปฏิฆํ   รูปํ  อุปาทาย
ฯเปฯ   อปฺปฏิฆํ   รูปํ   อุปาทาย   อปฺปฏิฆสฺส  ปุคฺคลสฺส  ปญฺญตฺตีติ  ฯ
น เหวํ วตฺตพฺเพ ฯเปฯ
     [๙๔]   เวทนํ   อุปาทาย  ปุคฺคลสฺส  ปญฺญตฺตีติ  ฯ  อามนฺตา  ฯ
กุสลํ   เวทนํ   อุปาทาย   กุสลสฺส   ปุคฺคลสฺส  ปญฺญตฺตีติ  ฯ  น  เหวํ
วตฺตพฺเพ    ฯเปฯ    กุสลํ    เวทนํ   อุปาทาย   กุสลสฺส   ปุคฺคลสฺส
ปญฺญตฺตีติ  ฯ  อามนฺตา  ฯ  กุสลา  เวทนา  สผลา  สวิปากา  อิฏฺฐผลา
กนฺตผลา    มนุญฺญผลา    อเสจนกผลา    สุขุทฺรยา   สุขวิปากาติ   ฯ
อามนฺตา   ฯ   กุสโลปิ  ปุคฺคโล  สผโล  สวิปาโก  อิฏฺฐผโล  กนฺตผโล
มนุญฺญผโล    อเสจนกผโล    สุขุทฺรโย   สุขวิปาโกติ   ฯ   น   เหวํ
วตฺตพฺเพ ฯเปฯ
     [๙๕]   เวทนํ   อุปาทาย  ปุคฺคลสฺส  ปญฺญตฺตีติ  ฯ  อามนฺตา  ฯ
อกุสลํ   เวทนํ   อุปาทาย   อกุสลสฺส   ปุคฺคลสฺส   ปญฺญตฺตีติ   ฯ   น
เหวํ   วตฺตพฺเพ   ฯเปฯ  อกุสลํ  เวทนํ  อุปาทาย  อกุสลสฺส  ปุคฺคลสฺส
ปญฺญตฺตีติ   ฯ   อามนฺตา   ฯ   อกุสลา   เวทนา   สผลา   สวิปากา
อนิฏฺฐผลา     อกนฺตผลา     อมนุญฺญผลา    เสจนกผลา    ทุกฺขุทฺรยา
ทุกฺขวิปากาติ   ฯ   อามนฺตา   ฯ  อกุสโลปิ  ปุคฺคโล  สผโล  สวิปาโก
อนิฏฺฐผโล     อกนฺตผโล     อมนุญฺญผโล    เสจนกผโล    ทุกฺขุทฺรโย
ทุกฺขวิปาโกติ ฯ น เหวํ วตฺตพฺเพ ฯเปฯ
     [๙๖]   เวทนํ   อุปาทาย  ปุคฺคลสฺส  ปญฺญตฺตีติ  ฯ  อามนฺตา  ฯ
อพฺยากตํ   เวทนํ   อุปาทาย   อพฺยากตสฺส   ปุคฺคลสฺส   ปญฺญตฺตีติ   ฯ
น   เหวํ   วตฺตพฺเพ   ฯเปฯ  อพฺยากตํ  เวทนํ  อุปาทาย  อพฺยากตสฺส
ปุคฺคลสฺส   ปญฺญตฺตีติ   ฯ   อามนฺตา   ฯ  อพฺยากตา  เวทนา  อนิจฺจา
สงฺขตา     ปฏิจฺจสมุปฺปนฺนา     ขยธมฺมา     วยธมฺมา    วิราคธมฺมา
นิโรธธมฺมา   วิปริณามธมฺมาติ   ฯ   อามนฺตา  ฯ  อพฺยากโตปิ  ปุคฺคโล
อนิจฺโจ   สงฺขโต   ปฏิจฺจสมุปฺปนฺโน   ขยธมฺโม   วยธมฺโม  วิราคธมฺโม
นิโรธธมฺโม วิปริณามธมฺโมติ ฯ น เหวํ วตฺตพฺเพ ฯเปฯ
     {๙๖.๑}   สญฺญํ  อุปาทาย  ฯเปฯ สงฺขาเร อุปาทาย ฯเปฯ วิญฺญาณํ
อุปาทาย  ปุคฺคลสฺส  ปญฺญตฺตีติ  ฯ  อามนฺตา  ฯ  กุสลํ  วิญฺญาณํ อุปาทาย
กุสลสฺส   ปุคฺคลสฺส   ปญฺญตฺตีติ   ฯ   น  เหวํ  วตฺตพฺเพ  ฯเปฯ  กุสลํ
วิญฺญาณํ   อุปาทาย   กุสลสฺส   ปุคฺคลสฺส   ปญฺญตฺตีติ   ฯ  อามนฺตา  ฯ
กุสลํ    วิญฺญาณํ    สผลํ    สวิปากํ    อิฏฺฐผลํ    กนฺตผลํ   มนุญฺญผลํ
อเสจนกผลํ   สุขุทฺรยํ   สุขวิปากนฺติ  ฯ  อามนฺตา  ฯ  กุสโลปิ  ปุคฺคโล
สผโล    สวิปาโก    อิฏฺฐผโล   กนฺตผโล   มนุญฺญผโล   อเสจนกผโล
สุขุทฺรโย สุขวิปาโกติ ฯ น เหวํ วตฺตพฺเพ ฯเปฯ
     [๙๗]   วิญฺญาณํ  อุปาทาย  ปุคฺคลสฺส  ปญฺญตฺตีติ  ฯ  อามนฺตา  ฯ
อกุสลํ   วิญฺญาณํ   อุปาทาย   อกุสลสฺส   ปุคฺคลสฺส   ปญฺญตฺตีติ   ฯ  น
เหวํ   วตฺตพฺเพ  ฯเปฯ  อกุสลํ  วิญฺญาณํ  อุปาทาย  อกุสลสฺส  ปุคฺคลสฺส
ปญฺญตฺตีติ   ฯ   อามนฺตา  ฯ  อกุสลํ  วิญฺญาณํ  สผลํ  สวิปากํ  อนิฏฺฐผลํ
อกนฺตผลํ    อมนุญฺญผลํ    เสจนกผลํ    ทุกฺขุทฺรยํ    ทุกฺขวิปากนฺติ   ฯ
อามนฺตา  ฯ  อกุสโลปิ  ปุคฺคโล  สผโล  สวิปาโก  อนิฏฺฐผโล อกนฺตผโล
อมนุญฺญผโล   เสจนกผโล   ทุกฺขุทฺรโย   ทุกฺขวิปาโกติ   ฯ   น   เหวํ
วตฺตพฺเพ ฯเปฯ
     [๙๘]   วิญฺญาณํ  อุปาทาย  ปุคฺคลสฺส  ปญฺญตฺตีติ  ฯ  อามนฺตา  ฯ
อพฺยากตํ   วิญฺญาณํ   อุปาทาย   อพฺยากตสฺส   ปุคฺคลสฺส   ปญฺญตฺตีติ  ฯ
น   เหวํ   วตฺตพฺเพ  ฯเปฯ  อพฺยากตํ  วิญฺญาณํ  อุปาทาย  อพฺยากตสฺส
ปุคฺคลสฺส   ปญฺญตฺตีติ   ฯ   อามนฺตา   ฯ   อพฺยากตํ   วิญฺญาณํ  อนิจฺจํ
สงฺขตํ    ปฏิจฺจสมุปฺปนฺนํ    ขยธมฺมํ   วยธมฺมํ   วิราคธมฺมํ   นิโรธธมฺมํ
วิปริณามธมฺมนฺติ   ฯ   อามนฺตา   ฯ   อพฺยากโตปิ   ปุคฺคโล   อนิจฺโจ
สงฺขโต   ปฏิจฺจสมุปฺปนฺโน  ขยธมฺโม  วยธมฺโม  วิราคธมฺโม  นิโรธธมฺโม
วิปริณามธมฺโมติ ฯ น เหวํ วตฺตพฺเพ ฯเปฯ
     [๙๙]   จกฺขุํ   อุปาทาย   จกฺขุมา   ปุคฺคโลติ   วตฺตพฺโพติ   ฯ
อามนฺตา  ฯ  จกฺขุมฺหิ  นิรุทฺเธ  จกฺขุมา  ปุคฺคโล  นิรุทฺโธติ วตฺตพฺโพติ ฯ
น  เหวํ  วตฺตพฺเพ  ฯเปฯ  โสตํ  อุปาทาย  ฯเปฯ ฆานํ อุปาทาย ฯเปฯ
ชิวฺหํ   อุปาทาย  ฯเปฯ  กายํ  อุปาทาย  ฯเปฯ  มนํ  อุปาทาย  มนวา
ปุคฺคโลติ   วตฺตพฺโพติ   ฯ   อามนฺตา   ฯ   มนมฺหิ   นิรุทฺเธ   มนวา
ปุคฺคโล นิรุทฺโธติ วตฺตพฺโพติ ฯ น เหวํ วตฺตพฺเพ ฯเปฯ
     [๑๐๐]   มิจฺฉาทิฏฺฐึ    อุปาทาย    มิจฺฉาทิฏฺฐิโย    ปุคฺคโลติ
วตฺตพฺโพติ   ฯ   อามนฺตา   ฯ   มิจฺฉาทิฏฺฐิยา  นิรุทฺธาย  มิจฺฉาทิฏฺฐิโย
ปุคฺคโล นิรุทฺโธติ วตฺตพฺโพติ ฯ น เหวํ วตฺตพฺเพ ฯเปฯ
     [๑๐๑]   มิจฺฉาสงฺกปฺปํ   อุปาทาย   ฯเปฯ  มิจฺฉาวาจํ  อุปาทาย
ฯเปฯ    มิจฺฉากมฺมนฺตํ    อุปาทาย    ฯเปฯ   มิจฺฉาอาชีวํ   อุปาทาย
ฯเปฯ   มิจฺฉาวายามํ   อุปาทาย   ฯเปฯ   มิจฺฉาสตึ  อุปาทาย  ฯเปฯ
มิจฺฉาสมาธึ    อุปาทาย    มิจฺฉาสมาธิโย   ปุคฺคโลติ   วตฺตพฺโพติ   ฯ
อามนฺตา    ฯ    มิจฺฉาสมาธิมฺหิ    นิรุทฺเธ   มิจฺฉาสมาธิโย   ปุคฺคโล
นิรุทฺโธติ วตฺตพฺโพติ ฯ น เหวํ วตฺตพฺเพ ฯเปฯ
     [๑๐๒]   สมฺมาทิฏฺฐึ    อุปาทาย    สมฺมาทิฏฺฐิโย    ปุคฺคโลติ
วตฺตพฺโพติ   ฯ   อามนฺตา   ฯ   สมฺมาทิฏฺฐิยา  นิรุทฺธาย  สมฺมาทิฏฺฐิโย
ปุคฺคโล    นิรุทฺโธติ   วตฺตพฺโพติ   ฯ   น   เหวํ   วตฺตพฺเพ   ฯเปฯ
สมฺมาสงฺกปฺปํ    อุปาทาย    ฯเปฯ    สมฺมาวาจํ    อุปาทาย   ฯเปฯ
สมฺมากมฺมนฺตํ    อุปาทาย    ฯเปฯ    สมฺมาอาชีวํ   อุปาทาย   ฯเปฯ
สมฺมาวายามํ    อุปาทาย    ฯเปฯ    สมฺมาสตึ    อุปาทาย    ฯเปฯ
สมฺมาสมาธึ    อุปาทาย    สมฺมาสมาธิโย   ปุคฺคโลติ   วตฺตพฺโพติ   ฯ
อามนฺตา    ฯ    สมฺมาสมาธิมฺหิ    นิรุทฺเธ   สมฺมาสมาธิโย   ปุคฺคโล
นิรุทฺโธติ วตฺตพฺโพติ ฯ น เหวํ วตฺตพฺเพ ฯเปฯ
     [๑๐๓]   รูปํ  อุปาทาย  เวทนํ  อุปาทาย  ปุคฺคลสฺส  ปญฺญตฺตีติ  ฯ
อามนฺตา  ฯ  ทฺวินฺนํ  ขนฺธานํ  อุปาทาย  ทฺวินฺนํ  ปุคฺคลานํ  ปญฺญตฺตีติ  ฯ
น  เหวํ  วตฺตพฺเพ  ฯเปฯ  รูปํ  อุปาทาย เวทนํ อุปาทาย สญฺญํ อุปาทาย
สงฺขาเร    อุปาทาย   วิญฺญาณํ   อุปาทาย   ปุคฺคลสฺส   ปญฺญตฺตีติ   ฯ
อามนฺตา    ฯ    ปญฺจนฺนํ    ขนฺธานํ   อุปาทาย   ปญฺจนฺนํ   ปุคฺคลานํ
ปญฺญตฺตีติ ฯ น เหวํ วตฺตพฺเพ ฯเปฯ
     [๑๐๔]   จกฺขายตนํ   อุปาทาย   โสตายตนํ  อุปาทาย  ปุคฺคลสฺส
ปญฺญตฺตีติ   ฯ   อามนฺตา   ฯ   ทฺวินฺนํ   อายตนานํ   อุปาทาย  ทฺวินฺนํ
ปุคฺคลานํ ปญฺญตฺตีติ ฯ น เหวํ วตฺตพฺเพ ฯเปฯ
     [๑๐๕]   จกฺขายตนํ   อุปาทาย   โสตายตนํ   อุปาทาย   ฯเปฯ
ธมฺมายตนํ    อุปาทาย    ปุคฺคลสฺส    ปญฺญตฺตีติ    ฯ   อามนฺตา   ฯ
ทฺวาทสนฺนํ   อายตนานํ   อุปาทาย   ทฺวาทสนฺนํ  ปุคฺคลานํ  ปญฺญตฺตีติ  ฯ
น เหวํ วตฺตพฺเพ ฯเปฯ
     [๑๐๖]   จกฺขุธาตุํ   อุปาทาย   โสตธาตุํ   อุปาทาย   ปุคฺคลสฺส
ปญฺญตฺตีติ    ฯ    อามนฺตา   ฯ   ทฺวินฺนํ   ธาตูนํ   อุปาทาย   ทฺวินฺนํ
ปุคฺคลานํ ปญฺญตฺตีติ ฯ น เหวํ วตฺตพฺเพ ฯเปฯ
     [๑๐๗]   จกฺขุธาตุํ  อุปาทาย  โสตธาตุํ  อุปาทาย  ฯเปฯ ธมฺมธาตุํ
อุปาทาย   ปุคฺคลสฺส   ปญฺญตฺตีติ   ฯ  อามนฺตา  ฯ  อฏฺฐารสนฺนํ  ธาตูนํ
อุปาทาย อฏฺฐารสนฺนํ ปุคฺคลานํ ปญฺญตฺตีติ ฯ น เหวํ วตฺตพฺเพ ฯเปฯ
     [๑๐๘]   จกฺขุนฺทฺริยํ   อุปาทาย   โสตินฺทฺริยํ  อุปาทาย  ปุคฺคลสฺส
ปญฺญตฺตีติ   ฯ   อามนฺตา   ฯ   ทฺวินฺนํ   อินฺทฺริยานํ   อุปาทาย  ทฺวินฺนํ
ปุคฺคลานํ ปญฺญตฺตีติ ฯ น เหวํ วตฺตพฺเพ ฯเปฯ
     [๑๐๙]   จกฺขุนฺทฺริยํ   อุปาทาย   โสตินฺทฺริยํ   อุปาทาย   ฯเปฯ
อญฺญาตาวินฺทฺริยํ   อุปาทาย   ปุคฺคลสฺส   ปญฺญตฺตีติ   ฯ   อามนฺตา   ฯ
พาวีสตีนํ   อินฺทฺริยานํ   อุปาทาย   พาวีสตีนํ   ปุคฺคลานํ   ปญฺญตฺตีติ  ฯ
น เหวํ วตฺตพฺเพ ฯเปฯ
     [๑๑๐]   เอกโวการภวํ  อุปาทาย  เอกสฺส  ปุคฺคลสฺส  ปญฺญตฺตีติ ฯ
อามนฺตา   ฯ   จตุโวการภวํ  อุปาทาย  จตุนฺนํ  ปุคฺคลานํ  ปญฺญตฺตีติ  ฯ
น เหวํ วตฺตพฺเพ ฯเปฯ
     [๑๑๑]   เอกโวการภวํ  อุปาทาย  เอกสฺส  ปุคฺคลสฺส  ปญฺญตฺตีติ ฯ
อามนฺตา  ฯ  ปญฺจโวการภวํ  อุปาทาย  ปญฺจนฺนํ  ปุคฺคลานํ  ปญฺญตฺตีติ  ฯ
น เหวํ วตฺตพฺเพ ฯเปฯ
     [๑๑๒]   เอกโวการภเว   เอโกว   ปุคฺคโลติ  ฯ  อามนฺตา  ฯ
จตุโวการภเว จตฺตาโรว ปุคฺคลาติ ฯ น เหวํ วตฺตพฺเพ ฯเปฯ
     [๑๑๓]   เอกโวการภเว   เอโกว   ปุคฺคโลติ  ฯ  อามนฺตา  ฯ
ปญฺจโวการภเว ปญฺเจว ปุคฺคลาติ ฯ น เหวํ วตฺตพฺเพ ฯเปฯ
     [๑๑๔]   ยถา   รุกฺขํ   อุปาทาย   ฉายาย   ปญฺญตฺติ  เอวเมว
รูปํ    อุปาทาย   ปุคฺคลสฺส   ปญฺญตฺตีติ   ฯ   ยถา   รุกฺขํ   อุปาทาย
ฉายาย   ปญฺญตฺติ   รุกฺโขปิ   อนิจฺโจ  ฉายาปิ  อนิจฺจา  เอวเมว  รูปํ
อุปาทาย   ปุคฺคลสฺส   ปญฺญตฺติ   รูปมฺปิ  อนิจฺจํ  ปุคฺคโลปิ  อนิจฺโจติ  ฯ
น   เหวํ   วตฺตพฺเพ   ฯเปฯ  ยถา  รุกฺขํ  อุปาทาย  ฉายาย  ปญฺญตฺติ
อญฺโญ   รุกฺโข   อญฺญา   ฉายา   เอวเมว   รูปํ  อุปาทาย  ปุคฺคลสฺส
ปญฺญตฺติ อญฺญํ รูปํ อญฺโญ ปุคฺคโลติ ฯ น เหวํ วตฺตพฺเพ ฯเปฯ
     {๑๑๔.๑}   ยถา  คามํ  อุปาทาย  คามิยสฺส  ปญฺญตฺติ เอวเมว รูปํ
อุปาทาย   ปุคฺคลสฺส   ปญฺญตฺตีติ   ฯ   ยถา  คามํ  อุปาทาย  คามิยสฺส
ปญฺญตฺติ  อญฺโญ  คาโม  อญฺโญ  คามิโย  เอวเมว รูปํ อุปาทาย ปุคฺคลสฺส
ปญฺญตฺติ อญฺญํ รูปํ อญฺโญ ปุคฺคโลติ ฯ น เหวํ วตฺตพฺเพ ฯเปฯ
     {๑๑๔.๒}   ยถา  รฏฺฐํ  อุปาทาย  รญฺโญ  ปญฺญตฺติ  เอวเมว  รูปํ
อุปาทาย   ปุคฺคลสฺส   ปญฺญตฺตีติ   ฯ   ยถา   รฏฺฐํ   อุปาทาย  รญฺโญ
ปญฺญตฺติ  อญฺญํ  รฏฺฐํ  อญฺโญ  ราชา  เอวเมว  รูปํ  อุปาทาย  ปุคฺคลสฺส
ปญฺญตฺติ อญฺญํ รูปํ อญฺโญ ปุคฺคโลติ ฯ น เหวํ วตฺตพฺเพ ฯเปฯ
     {๑๑๔.๓}   ยถา  น  นิคโฬ  เนคฬิโก  ยสฺส  นิคโฬ โส เนคฬิโก
เอวเมว  น  รูปํ  รูปวา ยสฺส รูปํ โส รูปวาติ ฯ ยถา น นิคโฬ เนคฬิโก
ยสฺส  นิคโฬ  โส  เนคฬิโก  อญฺโญ  นิคโฬ  อญฺโญ  เนคฬิโก  เอวเมว
น  รูปํ  รูปวา  ยสฺส  รูปํ  โส  รูปวา  อญฺญํ  รูปํ  อญฺโญ  รูปวาติ  ฯ
น เหวํ วตฺตพฺเพ ฯเปฯ
     [๑๑๕]   จิตฺเต   จิตฺเต   ปุคฺคลสฺส  ปญฺญตฺตีติ  ฯ  อามนฺตา  ฯ
จิตฺเต   จิตฺเต   ปุคฺคโล   ชายติ  ชิยฺยติ  มิยฺยติ  จวติ  อุปปชฺชตีติ  ฯ
น   เหวํ   วตฺตพฺเพ   ฯเปฯ   ทุติเย   จิตฺเต  อุปฺปนฺเน  น  วตฺตพฺพํ
โสติ   วา   อญฺโญติ  วาติ  ฯ  อามนฺตา  ฯ  ทุติเย  จิตฺเต  อุปฺปนฺเน
น วตฺตพฺพํ กุมารโกติ วา กุมาริกาติ วาติ ฯ วตฺตพฺพํ ฯ
     {๑๑๕.๑}   อาชานาหิ  นิคฺคหํ  หญฺจิ  ทุติเย  จิตฺเต  อุปฺปนฺเน  น
วตฺตพฺพํ  โสติ  วา  อญฺโญติ  วา  เตน  วต  เร วตฺตพฺเพ ทุติเย จิตฺเต
อุปฺปนฺเน  น  วตฺตพฺพํ  กุมารโกติ  วา  กุมาริกาติ  วาติ  ยํ ตตฺถ วเทสิ
วตฺตพฺเพ  โข  ทุติเย  จิตฺเต  อุปฺปนฺเน  น  วตฺตพฺพํ  โสติ  วา อญฺโญติ
วา   ทุติเย   จิตฺเต   อุปฺปนฺเน   วตฺตพฺพํ  กุมารโกติ  วา  กุมาริกาติ
วาติ มิจฺฉา
     {๑๑๕.๒}   หญฺจิ   วา   ปน  ทุติเย  จิตฺเต  อุปฺปนฺเน  วตฺตพฺพํ
กุมารโกติ   วา   กุมาริกาติ   วา   เตน  วต  เร  วตฺตพฺเพ  ทุติเย
จิตฺเต   อุปฺปนฺเน   วตฺตพฺพํ   โสติ   วา   อญฺโญติ   วาติ   ยํ  ตตฺถ
วเทสิ   วตฺตพฺเพ   โข   ทุติเย   จิตฺเต  อุปฺปนฺเน  น  วตฺตพฺพํ  โสติ
วา   อญฺโญติ   วา  ทุติเย  จิตฺเต  อุปฺปนฺเน  วตฺตพฺพํ  กุมารโกติ  วา
กุมาริกาติ วาติ มิจฺฉา ฯ
     [๑๑๖]   ทุติเย  จิตฺเต  อุปฺปนฺเน  น  วตฺตพฺพํ  โสติ  วา อญฺโญติ
วาติ   ฯ   อามนฺตา  ฯ  ทุติเย  จิตฺเต  อุปฺปนฺเน  น  วตฺตพฺพํ  อิตฺถีติ
วา  ปุริโสติ  วา  คหฏฺโฐติ  วา  ปพฺพชิโตติ  วา  เทโวติ วา มนุสฺโสติ
วาติ  ฯ  วตฺตพฺพํ  ฯ  อาชานาหิ  นิคฺคหํ  หญฺจิ  ทุติเย  จิตฺเต อุปฺปนฺเน
น  วตฺตพฺพํ  โสติ  วา  อญฺโญติ  วา  เตน  วต  เร  วตฺตพฺเพ  ทุติเย
จิตฺเต   อุปฺปนฺเน  น  วตฺตพฺพํ  เทโวติ  วา  มนุสฺโสติ  วาติ  ยํ  ตตฺถ
วเทสิ   วตฺตพฺเพ   โข   ทุติเย   จิตฺเต  อุปฺปนฺเน  น  วตฺตพฺพํ  โสติ
วา   อญฺโญติ   วา   ทุติเย   จิตฺเต  อุปฺปนฺเน  วตฺตพฺพํ  เทโวติ  วา
มนุสฺโสติ วาติ มิจฺฉา
     {๑๑๖.๑}   หญฺจิ  วา  ปน  ทุติเย จิตฺเต อุปฺปนฺเน วตฺตพฺพํ เทโวติ
วา  มนุสฺโสติ  วา  เตน วต เร วตฺตพฺเพ ทุติเย จิตฺเต อุปฺปนฺเน วตฺตพฺพํ
โสติ  วา อญฺโญติ วาติ ยํ ตตฺถ วเทสิ วตฺตพฺเพ โข ทุติเย จิตฺเต อุปฺปนฺเน
น  วตฺตพฺพํ  โสติ  วา อญฺโญติ วา ทุติเย จิตฺเต อุปฺปนฺเน วตฺตพฺพํ เทโวติ
วา มนุสฺโสติ วาติ มิจฺฉา ฯเปฯ
     [๑๑๗]   น  วตฺตพฺพํ  ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ
อามนฺตา   ฯ   นนุ  โย  ปสฺสติ  ยํ  ปสฺสติ  เยน  ปสฺสติ  โส  ปสฺสติ
ตํ   ปสฺสติ   เตน   ปสฺสตีติ   ฯ  อามนฺตา  ฯ  หญฺจิ  โย  ปสฺสติ  ยํ
ปสฺสติ   เยน   ปสฺสติ   โส   ปสฺสติ   ตํ  ปสฺสติ  เตน  ปสฺสติ  เตน
วต เร วตฺตพฺเพ ปุคฺคโล อุปลพฺภติ สจฺฉิกฏฺฐปรมฏฺเฐนาติ ฯ
     [๑๑๘]   น  วตฺตพฺพํ  ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ
อามนฺตา   ฯ   นนุ   โย   สุณาติ   ฯเปฯ   โย  ฆายติ  ฯเปฯ  โย
สายติ   ฯเปฯ   โย  ผุสติ  ฯเปฯ  โย  วิชานาติ  ยํ  วิชานาติ  เยน
วิชานาติ  โส  วิชานาติ  ตํ  วิชานาติ  เตน  วิชานาตีติ  ฯ อามนฺตา ฯ
หญฺจิ   โย   วิชานาติ    ยํ  วิชานาติ  เยน  วิชานาติ  โส  วิชานาติ
ตํ   วิชานาติ   เตน   วิชานาติ   เตน   วต  เร  วตฺตพฺเพ  ปุคฺคโล
อุปลพฺภติ สจฺฉิกฏฺฐปรมฏฺเฐนาติ ฯ
     [๑๑๙]   ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ  อามนฺตา ฯ
นนุ   โย  น  ปสฺสติ  ยํ  น  ปสฺสติ  เยน  น  ปสฺสติ  โส  น  ปสฺสติ
ตํ  น  ปสฺสติ  เตน  น  ปสฺสตีติ  ฯ  อามนฺตา  ฯ  หญฺจิ  โย น ปสฺสติ
ยํ  น  ปสฺสติ  เยน  น  ปสฺสติ  โส น ปสฺสติ ตํ น ปสฺสติ เตน น ปสฺสติ
โน วต เร วตฺตพฺเพ ปุคฺคโล อุปลพฺภติ สจฺฉิกฏฺฐปรมฏฺเฐนาติ ฯ
     [๑๒๐]   ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ  อามนฺตา ฯ
นนุ  โย  น  สุณาติ  ฯเปฯ  โย  น  ฆายติ  ฯเปฯ โย น สายติ ฯเปฯ
โย  น  ผุสติ  ฯเปฯ  โย  น  วิชานาติ ยํ น วิชานาติ เยน น วิชานาติ
โส  น  วิชานาติ  ตํ  น  วิชานาติ  เตน  น  วิชานาตีติ ฯ อามนฺตา ฯ
หญฺจิ  โย  น  วิชานาติ  ยํ  น  วิชานาติ  เยน  น  วิชานาติ  โส  น
วิชานาติ  ตํ  น  วิชานาติ  เตน  น  วิชานาติ  โน  วต  เร วตฺตพฺเพ
ปุคฺคโล อุปลพฺภติ สจฺฉิกฏฺฐปรมฏฺเฐนาติ ฯ
     [๑๒๑]   น  วตฺตพฺพํ  ปุคฺคโล  อุปลพฺภติ  สจฺฉิกฏฺฐปรมฏฺเฐนาติ  ฯ
อามนฺตา   ฯ  นนุ  วุตฺตํ  ภควตา  ปสฺสามหํ  ภิกฺขเว  ทิพฺเพน  จกฺขุนา
วิสุทฺเธน   อติกฺกนฺตมานุสเกน   สตฺเต   จวมาเน   อุปปชฺชมาเน  หีเน
ปณีเต   สุวณฺเณ   ทุพฺพณฺเณ   สุคเต   ทุคฺคเต   ยถากมฺมูปเค   สตฺเต
ปชานามีติ   อตฺเถว   สุตฺตนฺโตติ   ฯ  อามนฺตา  ฯ  เตน  หิ  ปุคฺคโล
อุปลพฺภติ สจฺฉิกฏฺฐปรมฏฺเฐนาติ ฯ
     {๑๒๑.๑}   วุตฺตํ    ภควตา    ปสฺสามหํ    ภิกฺขเว   ทิพฺเพน
จกฺขุนา      วิสุทฺเธน     อติกฺกนฺตมานุสเกน     สตฺเต     จวมาเน
อุปปชฺชมาเน    หีเน   ปณีเต   สุวณฺเณ   ทุพฺพณฺเณ   สุคเต   ทุคฺคเต
ยถากมฺมูปเค   สตฺเต   ปชานามีติ   กตฺวา  เตเนว  การเณน  ปุคฺคโล
อุปลพฺภติ   สจฺฉิกฏฺฐปรมฏฺเฐนาติ   ฯ   อามนฺตา   ฯ   ภควา  ทิพฺเพน
จกฺขุนา   วิสุทฺเธน  อติกฺกนฺตมานุสเกน  รูปํ  ปสฺสติ  ปุคฺคลํ  ปสฺสตีติ  ฯ
รูปํ   ปสฺสติ   ฯ   รูปํ   ปุคฺคโล   รูปํ   จวติ   รูปํ   อุปปชฺชติ  รูปํ
ยถากมฺมูปคนฺติ ฯ น เหวํ วตฺตพฺเพ ฯเปฯ
     {๑๒๑.๒}   ภควา  ทิพฺเพน  จกฺขุนา  วิสุทฺเธน  อติกฺกนฺตมานุสเกน
รูปํ  ปสฺสติ  ปุคฺคลํ  ปสฺสตีติ  ฯ  ปุคฺคลํ  ปสฺสติ  ฯ ปุคฺคโล รูปํ รูปายตนํ
รูปธาตุ   นีลํ   ปีตกํ  โลหิตํ  โอทาตํ  จกฺขุวิญฺเญยฺยํ  จกฺขุสฺมึ  ปฏิหญฺญติ
จกฺขุสฺส อาปาถํ อาคจฺฉตีติ ฯ น เหวํ วตฺตพฺเพ ฯเปฯ
     {๑๒๑.๓}   ภควา  ทิพฺเพน  จกฺขุนา  วิสุทฺเธน  อติกฺกนฺตมานุสเกน
รูปํ  ปสฺสติ  ปุคฺคลํ  ปสฺสตีติ  ฯ อุโภ ปสฺสติ ฯ อุโภ รูปํ รูปายตนํ รูปธาตุ
อุโภ  นีลา  อุโภ ปีตกา อุโภ โลหิตกา อุโภ โอทาตา อุโภ จกฺขุวิญฺเญยฺยา
อุโภ   จกฺขุสฺมึ   ปฏิหญฺญนฺติ   อุโภ  จกฺขุสฺส  อาปาถํ  อาคจฺฉนฺติ  อุโภ
จวนฺติ อุโภ อุปปชฺชนฺติ อุโภ ยถากมฺมูปคาติ ฯ น เหวํ วตฺตพฺเพ ฯเปฯ
                                    อุปาทาปญฺญตฺตานุโยโค ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๔๖-๕๗. https://84000.org/tipitaka/read/pali_read.php?B=37&A=948&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=948&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=92&items=30              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=16              ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=92              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=3343              The Pali Atthakatha in Roman :- https://84000.org/tipitaka/atthapali/read_rm.php?B=55&A=3343              สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]