ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๘ ภาษาบาลี อักษรไทย พระวินัยปิฎกเล่มที่ ๘ วินย. ปริวาโร

                                  โจทนากณฺฑํ
     [๑๐๗๗]   อนุวิชฺชเกน  โจทโก  ปุจฺฉิตพฺโพ  ยํ  โข  ตฺวํ  อาวุโส
อิมํ   ภิกฺขุํ   โจเทสิ   กิมฺหิ  นํ  โจเทสิ  สีลวิปตฺติยา  [๑]-  โจเทสิ
อาจารวิปตฺติยา  [๑]-  โจเทสิ ทิฏฺฐิวิปตฺติยา [๑]-  โจเทสีติ ฯ โส เจ
เอวํ    วเทยฺย   สีลวิปตฺติยา   วา   โจเทมิ   อาจารวิปตฺติยา   วา
โจเทมิ   ทิฏฺฐิวิปตฺติยา   วา   โจเทมีติ   ฯ   โส  เอวมสฺส  วจนีโย
ชานาติ  ๒-  ปนายสฺมา  สีลวิปตฺตึ  ชานาติ ๒- อาจารวิปตฺตึ ชานาติ ๒-
ทิฏฺฐิวิปตฺตินฺติ   ฯ  โส  เจ  เอวํ  วเทยฺย  ชานามิ  โข  อหํ  อาวุโส
สีลวิปตฺตึ   ชานามิ   อาจารวิปตฺตึ   ชานามิ   ทิฏฺฐิวิปตฺตินฺติ   ฯ   โส
เอวมสฺส   วจนีโย   กตมา   ปนาวุโส  สีลวิปตฺติ  กตมา  อาจารวิปตฺติ
กตมา   ทิฏฺฐิวิปตฺตีติ   ฯ   โส   เจ   เอวํ  วเทยฺย  จตฺตาริ  [๓]-
ปาราชิกานิ   เตรส   [๓]-   สงฺฆาทิเสสา   อยํ  สีลวิปตฺติ  ถุลฺลจฺจยํ
ปาจิตฺติยํ    ปาฏิเทสนียํ    ทุกฺกฏํ    ทุพฺภาสิตํ    อยํ    อาจารวิปตฺติ
มิจฺฉาทิฏฺฐิ อนฺตคฺคาหิกา ทิฏฺฐิ อยํ ทฏฺฐิวิปตฺตีติ ฯ
     {๑๐๗๗.๑}   โส  เอวมสฺส  วจนีโย  ยํ  โข ตฺวํ อาวุโส อิมํ ภิกฺขุํ
โจเทสิ  ทิฏฺเฐน  [๔]-  โจเทสิ  สุเตน [๔]- โจเทสิ ปริสงฺกาย [๔]-
โจเทสีติ  ฯ  โส เจ เอวํ วเทยฺย ทิฏฺเฐน วา โจเทมิ สุเตน วา โจเทมิ
ปริสงฺกาย  วา  โจเทมีติ  ฯ  โส  เอวมสฺส  วจนีโย ยํ โข ตฺวํ อาวุโส
อิมํ    ภิกฺขุํ   ทิฏฺเฐน   โจเทสิ   กินฺเต   ทิฏฺฐํ   กินฺติ   เต   ทิฏฺฐํ
@เชิงอรรถ:  ม. วาสทฺทตฺตยํ ทิสฺสติ ฯ   ม. ชานาสิ ฯ   ม. จสทฺททฺวยํ ทิสฺสติ ฯ
@ ม. วาสทุทตฺตยํ ทิสฺสติ ฯ
กทา    เต    ทิฏฺฐํ   กตฺถ   เต   ทิฏฺฐํ   ปาราชิกํ   อชฺฌาปชฺชนฺโต
ทิฏฺโฐ   สงฺฆาทิเสสํ   อชฺฌาปชฺชนฺโต   ทิฏฺโฐ  ถุลฺลจฺจยํ  อชฺฌาปชฺชนฺโต
ทิฏฺโฐ       ปาจิตฺติยํ      อชฺฌาปชฺชนฺโต     ทิฏฺโฐ     ปาฏิเทสนียํ
อชฺฌาปชฺชนฺโต   ทิฏฺโฐ   ทุกฺกฏํ   อชฺฌาปชฺชนฺโต   ทิฏฺโฐ  [๑]-  กตฺถ
จ   ตฺวํ   อโหสิ   กตฺถ   จายํ   ภิกฺขุ   อโหสิ   กิญฺจ   ตฺวํ  กโรสิ
กิญฺจายํ   ภิกฺขุ   กโรตีติ   ฯ   โส  เจ  เอวํ  วเทยฺย  น  โข  อหํ
อาวุโส อิมํ ภิกฺขุํ ทิฏฺเฐน โจเทมิ อปิจ สุเตน โจเทมีติ ฯ
     {๑๐๗๗.๒}   โส เอวมสฺส วจนีโย ยํ โข ตฺวํ อาวุโส อิมํ ภิกฺขุํ สุเตน
โจเทสิ  กินฺเต  สุตํ  กินฺติ  เต  สุตํ กทา เต สุตํ กตฺถ เต สุตํ ปาราชิกํ
อชฺฌาปนฺโนติ    สุตํ    สงฺฆาทิเสสํ    อชฺฌาปนฺโนติ    สุตํ   ถุลฺลจฺจยํ
อชฺฌาปนฺโนติ    สุตํ    ปาจิตฺติยํ    อชฺฌาปนฺโนติ    สุตํ   ปาฏิเทสนียํ
อชฺฌาปนฺโนติ     สุตํ     ทุกฺกฏํ     อชฺฌาปนฺโนติ    สุตํ    ทุพฺภาสิตํ
อชฺฌาปนฺโนติ    สุตํ    ภิกฺขุสฺส    สุตํ   ภิกฺขุนิยา   สุตํ   สิกฺขมานาย
สุตํ   สามเณรสฺส   สุตํ   สามเณริยา  สุตํ  อุปาสกสฺส  สุตํ  อุปาสิกาย
สุตํ   ราชูนํ   สุตํ  ราชมหามตฺตานํ  สุตํ  ติตฺถิยานํ  สุตํ  ติตฺถิยสาวกานํ
สุตนฺติ  ฯ  โส  เจ  เอวํ  วเทยฺย  น  โข อหํ อาวุโส อิมํ ภิกฺขุํ สุเตน
โจเทมิ อปิจ ปริสงฺกาย โจเทมีติ ฯ
     {๑๐๗๗.๓}   โส  เอวมสฺส  วจนีโย  ยํ  โข ตฺวํ อาวุโส อิมํ ภิกฺขุํ
ปริสงฺกาย   โจเทสิ   กึ   ปริสงฺกสิ   กินฺติ  ปริสงฺกสิ  กทา  ปริสงฺกสิ
กตฺถ           ปริสงฺกสิ          ปาราชิกํ          อชฺฌาปนฺโนติ
@เชิงอรรถ:  ม. ทุพฺภาสิตํ อชฺฌาปชฺชนฺโต ทิฏฺโฐ ฯ
ปริสงฺกสิ     สงฺฆาทิเสสํ     อชฺฌาปนฺโนติ     ปริสงฺกสิ     ถุลฺลจฺจยํ
อชฺฌาปนฺโนติ     ปริสงฺกสิ     ปาจิตฺติยํ     อชฺฌาปนฺโนติ    ปริสงฺกสิ
ปาฏิเทสนียํ     อชฺฌาปนฺโนติ     ปริสงฺกสิ     ทุกฺกฏํ    อชฺฌาปนฺโนติ
ปริสงฺกสิ    ทุพฺภาสิตํ    อชฺฌาปนฺโนติ    ปริสงฺกสิ    ภิกฺขุสฺส   สุตฺวา
ปริสงฺกสิ     ภิกฺขุนิยา    สุตฺวา    ปริสงฺกสิ    สิกฺขมานาย    สุตฺวา
ปริสงฺกสิ    สามเณรสฺส    สุตฺวา    ปริสงฺกสิ    สามเณริยา   สุตฺวา
ปริสงฺกสิ     อุปาสกสฺส    สุตฺวา    ปริสงฺกสิ    อุปาสิกาย    สุตฺวา
ปริสงฺกสิ   ราชูนํ   สุตฺวา  ปริสงฺกสิ  ราชมหามตฺตานํ  สุตฺวา  ปริสงฺกสิ
ติตฺถิยานํ สุตฺวา ปริสงฺกสิ ติตฺถิยสาวกานํ สุตฺวา ปริสงฺกสีติ ฯ
     [๑๐๗๘]   ทิฏฺฐํ ทิฏฺเฐน สเมติ           ทิฏฺเฐน สํสนฺทเต ทิฏฺฐํ
                ทิฏฺฐํ ปฏิจฺจ น อุเปติ         อสุทฺธปริสงฺกิโต
                โส ปุคฺคโล ปฏิญฺญาย       กาตพฺโพ เตนุโปสโถ ฯ
                สุตํ สุเตน สเมติ                สุเตน  สํสนฺทเต สุตํ
                สุตํ ปฏิจฺจ น อุเปติ            อสุทฺธปริสงฺกิโต
                โส ปุคฺคโล ปฏิญฺญาย       กาตพฺโพ เตนุโปสโถ ฯ
                มุตํ มุเตน สเมติ                มุเตน สํสนฺทเต มุตํ
                มุตํ ปฏิจฺจ น อุเปติ            อสุทฺธปริสงฺกิโต
                โส  ปุคฺคโล ปฏิญฺญาย      กาตพฺโพ เตนุโปสโถติ ๑- ฯ
     [๑๐๗๙]   โจทนาย   โก   อาทิ  กึ  มชฺเฌ  กึ  ปริโยสานํ  ฯ
โจทนาย   โอกาสกมฺมํ   อาทิ   กิริยา   มชฺเฌ  สมโถ  ปริโยสานํ  ฯ
@เชิงอรรถ:  ม. ยุ. อิติสทฺโท น ทิสฺสติ ฯ
โจทนาย    กติ   มูลานิ   กติ   วตฺถูนิ   กติ   ภูมิโย   กตีหากาเรหิ
โจเทติ   ฯ   โจทนาย   เทฺว   มูลานิ   ตีณิ   วตฺถูนิ   ปญฺจ  ภูมิโย
ทฺวีหากาเรหิ  โจเทติ  ฯ  โจทนาย  กตมานิ  เทฺว  มูลานิ  ฯ  สมูลิกา
วา   อมูลิกา   วา   โจทนาย   อิมานิ   เทฺว   มูลานิ  ฯ  โจทนาย
กตมานิ   ตีณิ   วตฺถูนิ   ฯ   ทิฏฺเฐน   สุเตน   ปริสงฺกาย   โจทนาย
อิมานิ   ตีณิ   วตฺถูนิ   ฯ  โจทนาย  กตมา  ปญฺจ  ภูมิโย  ฯ  กาเลน
วกฺขามิ   โน   อกาเลน   ภูเตน   วกฺขามิ   โน   อภูเตน   สเณฺหน
วกฺขามิ   โน   ผรุเสน   อตฺถสญฺหิเตน   วกฺขามิ   โน  อนตฺถสญฺหิเตน
เมตฺตจิตฺโต    วกฺขามิ    โน   โทสนฺตโรติ   โจทนาย   อิมา   ปญฺจ
ภูมิโย   ฯ   กตเมหิ  ทฺวีหากาเรหิ  โจเทติ  ฯ  กาเยน  วา  โจเทติ
วาจาย วา โจเทติ อิเมหิ ทฺวีหากาเรหิ โจเทติ ฯ
     [๑๐๘๐]   โจทเกน  กถํ  ปฏิปชฺชิตพฺพํ  จุทิตเกน  กถํ  ปฏิปชฺชิตพฺพํ
สงฺเฆน    กถํ    ปฏิปชฺชิตพฺพํ    อนุวิชฺชเกน   กถํ   ปฏิปชฺชิตพฺพํ   ฯ
โจทเกน   กถํ  ปฏิปชฺชิตพฺพนฺติ  ฯ  โจทเกน  ปญฺจสุ  ธมฺเมสุ  ปติฏฺฐาย
ปโร   โจเทตพฺโพ   กาเลน   วกฺขามิ  โน  อกาเลน  ภูเตน  วกฺขามิ
โน    อภูเตน    สเณฺหน    วกฺขามิ    โน   ผรุเสน   อตฺถสญฺหิเตน
วกฺขามิ  โน  อนตฺถสญฺหิเตน  เมตตจิตฺโต  วกฺขามิ  โน  โทสนฺตโรติ  ฯ
โจทเกน   เอวํ   ปฏิปชฺชิตพฺพํ   ฯ   จุทิตเกน  กถํ  ปฏิปชฺชิตพฺพนฺติ  ฯ
จุทิตเกน   ทฺวีสุ  ธมฺเมสุ  ปติฏฺฐาตพฺพํ  ๑-  สจฺเจ  จ  อกุปฺเป  จ  ฯ
จุทิตเกน   เอวํ   ปฏิปชฺชิตพฺพํ   ฯ   สงฺเฆน   กถํ  ปฏิปชฺชิตพฺพนฺติ  ฯ
@เชิงอรรถ:  ม. ยุ. ปฏิปชฺชิตพฺพํ ฯ
สงฺเฆน  โอติณฺณาโนติณฺณํ  ชานิตพฺพํ  ฯ  สงฺเฆน  เอวํ ปฏิปชฺชิตพฺพํ ๑- ฯ
อนุวิชฺชเกน   กถํ   ปฏิปชฺชิตพฺพนฺติ   ฯ   อนุวิชฺชเกน   เยน   ธมฺเมน
เยน   วินเยน   เยน   สตฺถุสาสเนน   ตํ   อธิกรณํ   วูปสมฺมติ  ตถา
ตํ อธิกรณํ วูปสเมตพฺพํ ฯ อนุวิชฺชเกน เอวํ ปฏิปชฺชิตพฺพํ ฯ
     [๑๐๘๑]   อุโปสโถ กิมตฺถาย             ปวารณา กิสฺส การณา
                ปริวาโส กิมตฺถาย             มูลาย ปฏิกสฺสนา กิสฺส การณา
                มานตฺตํ กิมตฺถาย             อพฺภานํ กิสฺส การณา ฯ
                อุโปสโถ สมคฺคตฺถาย         วิสุทฺธตฺถาย ปวารณา
                ปริวาโส มานตฺตตฺถาย       มูลาย ปฏิกสฺสนา นิคฺคหตฺถาย
                มานตฺตํ อพฺภานตฺถาย       วิสุทฺธตฺถาย อพฺภานํ ฯ
                ฉนฺทา โทสา ภยา โมหา     เถเร จ ปริภาสติ
                กายสฺส เภทา ทุปฺปญฺโญ    ขโต อุปหตินฺทฺริโย
                นิรยํ คจฺฉติ ทุมฺเมโธ           น จ สิกฺขาย คารโว ฯ
                น จามิสํปิ ๒- นิสฺสาย        น จ นิสฺสาย ปุคฺคลํ
                อุโภ เอเต วิวชฺเชตฺวา          ยถา ธมฺโม ตถา กเร ฯ
                โกธโน อุปนาหี จ               จณฺโฑ จ ปริภาสโก
                       อนาปตฺติยา อาปตฺตีติ โรเปติ
                       ตาทิโส โจทโก ฌาเปติ อตฺตานํ ฯ
                       อุปกณฺณกํ ชปฺเปติ ๓- วิมฺหํ เปกฺขติ
@เชิงอรรถ:  ยุ. ปฏิปชฺชิตพฺพนฺติ ฯ   ยุ. น จ อามิสํ ฯ   สี. ม. ยุ. ชปฺปติ ฯ
                วีติหรติ กุมฺมคฺคํ ปฏิเสวติ
                อนาปตฺติยา อาปตฺตีติ โรเปติ
                ตาทิโส โจทโก ฌาเปติ อตฺตานํ
                อกาเลน โจเทติ อภูเตน
                ผรุเสน อนตฺถสญฺหิเตน
                โทสนฺตโร โจเทติ โน เมตฺตจิตฺโต
                อนาปตฺติยา อาปตฺตีติ โรเปติ
                ตาทิโส โจทโก ฌาเปติ อตฺตานํ ฯ
                ธมฺมาธมฺมํ น ชานาติ
                ธมฺมาธมฺมสฺส อโกวิโท
                อนาปตฺติยา อาปตฺตีติ โรเปติ
                ตาทิโส โจทโก ฌาเปติ อตฺตานํ ฯ
                วินยาวินยํ น ชานาติ
                วินยาวินยสฺส อโกวิโท
                อนาปตฺติยา อาปตฺตีติ โรเปติ
                ตาทิโส โจทโก ฌาเปติ อตฺตานํ ฯ
                ภาสิตาภาสิตํ น ชานาติ
                ภาสิตาภาสิตสฺส อโกวิโท
                อนาปตฺติยา อาปตฺตีติ โรเปติ
                ตาทิโส โจทโก ฌาเปติ อตฺตานํ ฯ
                อาจิณฺณานาจิณฺณํ น ชานาติ
                อาจิณฺณานาจิณฺณสฺส อโกวิโท
                อนาปตฺติยา อาปตฺตีติ โรเปติ
                ตาทิโส โจทโก ฌาเปติ อตฺตานํ ฯ
                ปญฺญตฺตาปญฺญตฺตํ น ชานาติ
                ปญฺญตฺตาปญฺญตฺตสฺส อโกวิโท
                อนาปตฺติยา อาปตฺตีติ โรเปติ
                ตาทิโส โจทโก ฌาเปติ อตฺตานํ ฯ
                อาปตฺตานาปตฺตึ น ชานาติ
                อาปตฺตานาปตฺติยา อโกวิโท
                อนาปตฺติยา อาปตฺตีติ โรเปติ
                ตาทิโส โจทโก ฌาเปติ อตฺตานํ ฯ
                ลหุกครุกํ น ชานาติ
                ลหุกครุกสฺส อโกวิโท
                อนาปตฺติยา อาปตฺตีติ โรเปติ
                ตาทิโส โจทโก ฌาเปติ อตฺตานํ ฯ
                สาวเสสานวเสสํ น ชานาติ
                สาวเสสานวเสสสฺส อโกวิโท
                อนาปตฺติยา อาปตฺตีติ โรเปติ
                ตาทิโส โจทโก ฌาเปติ อตฺตานํ ฯ
                ทุฏฺฐุลฺลาทุฏฺฐุลฺลํ น ชานาติ
                ทุฏฺฐุลฺลาทุฏฺฐุลฺลสฺส อโกวิโท
                อนาปตฺติยา อาปตฺตีติ โรเปติ
                ตาทิโส โจทโก ฌาเปติ อตฺตานํ ฯ
                ปุพฺพาปรํ น ชานาติ
                ปุพฺพาปรสฺส อโกวิโท
                อนาปตฺติยา อาปตฺตีติ โรเปติ
                ตาทิโส โจทโก ฌาเปติ อตฺตานํ ฯ
                อนุสนฺธิวจนปถํ น ชานาติ
                อนุสนฺธิวจนปถสฺส อโกวิโท
                อนาปตฺติยา อาปตฺตีติ โรเปติ
                ตาทิโส โจทโก ฌาเปติ อตฺตานนฺติ ฯ
                            โจทนากณฺฑํ นิฏฺฐิตํ ฯ
                                  ตสฺสุทฺทานํ
     [๑๐๘๒]   โจทนา อนุวิชฺชญฺจ ๑-       อาทิ มูเลนุโปสโถ
                คติ โจทนกณฺฑมฺหิ            สาสนํ ปติฏฺฐาปยนฺติ ฯ
                                    ----------
@เชิงอรรถ:  ม. ยุ. อนุวิชฺชา จ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๘ หน้าที่ ๓๙๖-๔๐๓. https://84000.org/tipitaka/read/pali_read.php?B=8&A=8017&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=8&A=8017&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=8&item=1077&items=6              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=8&siri=97              ศึกษาอรรถกถานี้ได้ที่ :- https://84000.org/tipitaka/attha/attha.php?b=8&i=1077              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=3&A=11264              The Pali Atthakatha in Roman :- https://84000.org/tipitaka/atthapali/read_rm.php?B=3&A=11264              สารบัญพระไตรปิฎกเล่มที่ ๘ https://84000.org/tipitaka/read/?index_8 https://84000.org/tipitaka/english/?index_8

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]