ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๘ ภาษาบาลี อักษรไทย พระวินัยปิฎกเล่มที่ ๘ วินย. ปริวาโร

     [๑๒๐๒]   กตีหิ  นุ  โข  ภนฺเต  องฺเคหิ  สมนฺนาคตสฺส  ภิกฺขุโน
ภิกฺขุนีสงฺเฆเนว     กมฺมํ    กาตพฺพนฺติ    ฯ    ปญฺจหุปาลิ    องฺเคหิ
สมนฺนาคตสฺส    ภิกฺขุโน   ภิกฺขุนีสงฺเฆเนว   กมฺมํ   กาตพฺพํ   อวนฺทิโย
โส   ภิกฺขุ   ภิกฺขุนีสงฺเฆน   ฯ   กตเมหิ   ปญฺจหิ  ฯ  วิวริตฺวา  กายํ
ภิกฺขุนีนํ    ทสฺเสติ    อูรุํ    ทสฺเสติ    องฺคชาตํ    ทสฺเสติ    อุโภ
อํสกูเฏ    ทสฺเสติ   โอภาสติ   คิหี   สมฺปโยเชติ   ฯ   อิเมหิ   โข
อุปาลิ     ปญฺจหงฺเคหิ     สมนฺนาคตสฺส    ภิกฺขุโน    ภิกฺขุนีสงฺเฆเนว
กมฺมํ กาตพฺพํ อวนฺทิโย โส ภิกฺขุ ภิกฺขุนีสงฺเฆน ฯ
     {๑๒๐๒.๑}   อปเรหิปิ    อุปาลิ    ปญฺจหงฺเคหิ   สมนฺนาคตสฺส
ภิกฺขุโน    ภิกฺขุนีสงฺเฆเนว    กมฺมํ   กาตพฺพํ   อวนฺทิโย   โส   ภิกฺขุ
ภิกฺขุนีสงฺเฆน   ฯ   กตเมหิ   ปญฺจหิ   ฯ  ภิกฺขุนีนํ  อลาภาย  ปริสกฺกติ
ภิกฺขุนีนํ    อนตฺถาย    ปริสกฺกติ    ภิกฺขุนีนํ    อนาวาสาย   ปริสกฺกติ
ภิกฺขุนิโย   อกฺโกสติ  ปริภาสติ  ภิกฺขู  ภิกฺขุนีหิ  เภเทติ  ฯ  อิเมหิ  โข
อุปาลิ   ปญฺจหงฺเคหิ   สมนฺนาคตสฺส   ภิกฺขุโน   ภิกฺขุนีสงฺเฆเนว   กมฺมํ
กาตพฺพํ อวนฺทิโย โส ภิกฺขุ ภิกฺขุนีสงฺเฆน ฯ
     {๑๒๐๒.๒}   อปเรหิปิ  อุปาลิ  ปญฺจหงฺเคหิ  สมนฺนาคตสฺส  ภิกฺขุโน
ภิกฺขุนีสงฺเฆเนว          กมฺมํ          กาตพฺพํ          อวนฺทิโย
โส   ภิกฺขุ   ภิกฺขุนีสงฺเฆน   ฯ  กตเมหิ  ปญฺจหิ  ฯ  ภิกฺขุนีนํ  อลาภาย
ปริสกฺกติ    ภิกฺขุนีนํ    อนตฺถาย    ปริสกฺกติ    ภิกฺขุนีนํ   อนาวาสาย
ปริสกฺกติ     ภิกฺขุนิโย     อกฺโกสติ     ปริภาสติ    ภิกฺขู    ภิกฺขุนีหิ
สมฺปโยเชติ    ฯ   อิเมหิ   โข   อุปาลิ   ปญฺจหงฺเคหิ   สมนฺนาคตสฺส
ภิกฺขุโน    ภิกฺขุนีสงฺเฆเนว    กมฺมํ   กาตพฺพํ   อวนฺทิโย   โส   ภิกฺขุ
ภิกฺขุนีสงฺเฆนาติ ฯ
     [๑๒๐๓]   กตีหิ  นุ  โข  ภนฺเต  องฺเคหิ  สมนฺนาคตาย  ภิกฺขุนิยา
กมฺมํ   กาตพฺพนฺติ   ฯ   ปญฺจหุปาลิ   องฺเคหิ   สมนฺนาคตาย  ภิกฺขุนิยา
กมฺมํ   กาตพฺพํ   ฯ   กตเมหิ   ปญฺจหิ   ฯ   วิวริตฺวา   กายํ  ภิกฺขูนํ
ทสฺเสติ    อูรุํ    ทสฺเสติ    องฺคชาตํ    ทสฺเสติ    อุโภ    อํสกูเฏ
ทสฺเสติ    โอภาสติ    คิหี   สมฺปโยเชติ   ฯ   อิเมหิ   โข   อุปาลิ
ปญฺจหงฺเคหิ สมนฺนาคตาย ภิกฺขุนิยา กมฺมํ กาตพฺพํ ฯ
     {๑๒๐๓.๑}   อปเรหิปิ    อุปาลิ    ปญฺจหงฺเคหิ   สมนฺนาคตาย
ภิกฺขุนิยา   กมฺมํ   กาตพฺพํ   ฯ   กตเมหิ  ปญฺจหิ  ฯ  ภิกฺขูนํ  อลาภาย
ปริสกฺกติ   ภิกฺขูนํ   อนตฺถาย   ปริสกฺกติ  ภิกฺขูนํ  อนาวาสาย  ปริสกฺกติ
ภิกฺขู  อกฺโกสติ  ปริภาสติ  ภิกฺขุนิโย  ภิกฺขูหิ  เภเทติ ฯ อิเมหิ โข อุปาลิ
ปญฺจหงฺเคหิ   สมนฺนาคตาย   ภิกฺขุนิยา   กมฺมํ   กาตพฺพํ   ฯ  อปเรหิปิ
อุปาลิ    ปญฺจหงฺเคหิ   สมนฺนาคตาย   ภิกฺขุนิยา   กมฺมํ   กาตพฺพํ   ฯ
กตเมหิ   ปญฺจหิ   ฯ   ภิกฺขูนํ   อลาภาย   ปริสกฺกติ  ภิกฺขูนํ  อนตฺถาย
ปริสกฺกติ       ภิกฺขูนํ       อนาวาสาย       ปริสกฺกติ       ภิกฺขู
อกฺโกสติ    ปริภาสติ    ภิกฺขุนิโย   ภิกฺขูหิ   สมฺปโยเชติ   ฯ   อิเมหิ
โข อุปาลิ ปญฺจหงฺเคหิ สมนฺนาคตาย ภิกฺขุนิยา กมฺมํ กาตพฺพนฺติ ฯ
     [๑๒๐๔]   กตีหิ  นุ  โข  ภนฺเต  องฺเคหิ  สมนฺนาคเตน  ภิกฺขุนา
ภิกฺขุนีนํ    โอวาโท    น    ฐเปตพฺโพติ    ฯ   ปญฺจหุปาลิ   องฺเคหิ
สมนฺนาคเตน   ภิกฺขุนา   ภิกฺขุนีนํ  โอวาโท  น  ฐเปตพฺโพ  ฯ  กตเมหิ
ปญฺจหิ  ฯ  อลชฺชี  จ  โหติ  พาโล  จ  อปกตตฺโต  จ  จาวนาธิปฺปาโย
วตฺตา  โหติ  โน  วุฏฺฐานาธิปฺปาโย  ฯ  อิเมหิ  โข  อุปาลิ ปญฺจหงฺเคหิ
สมนฺนาคเตน    ภิกฺขุนา    ภิกฺขุนีนํ    โอวาโท   น   ฐเปตพฺโพ   ฯ
อปเรหิปิ    อุปาลิ    ปญฺจหงฺเคหิ    สมนฺนาคเตน   ภิกฺขุนา   ภิกฺขุนีนํ
โอวาโท  น  ฐเปตพฺโพ  ฯ  กตเมหิ  ปญฺจหิ  ฯ  อปริสุทฺธกายสมาจาโร
โหติ   อปริสุทฺธวจีสมาจาโร   โหติ  อปริสุทฺธาชีโว  โหติ  พาโล  โหติ
อพฺยตฺโต   น   ปฏิพโล  อนุยุญฺชิยมาโน  อนุโยคํ  ทาตุํ  ฯ  อิเมหิ  โข
อุปาลิ   ปญฺจหงฺเคหิ   สมนฺนาคเตน   ภิกฺขุนา   ภิกฺขุนีนํ   โอวาโท  น
ฐเปตพฺโพ ฯ
     {๑๒๐๔.๑}   อปเรหิปิ  อุปาลิ  ปญฺจหงฺเคหิ  สมนฺนาคเตน  ภิกฺขุนา
ภิกฺขุนีนํ   โอวาโท   น   ฐเปตพฺโพ  ฯ  กตเมหิ  ปญฺจหิ  ฯ  กายิเกน
อนาจาเรน   สมนฺนาคโต   โหติ   วาจสิเกน  อนาจาเรน  สมนฺนาคโต
โหติ    กายิกวาจสิเกน    อนาจาเรน   สมนฺนาคโต   โหติ   ภิกฺขุนีนํ
อกฺโกสกปริภาสโก     โหติ     ภิกฺขุนีหิ    สทฺธึ    สํสฏฺโฐ    วิหรติ
อนนุโลมิเกน    สํสคฺเคน    ฯ    อิเมหิ   โข   อุปาลิ   ปญฺจหงฺเคหิ
สมนฺนาคเตน    ภิกฺขุนา    ภิกฺขุนีนํ    โอวาโท   น   ฐเปตพฺโพ   ฯ
อปเรหิปิ    อุปาลิ    ปญฺจหงฺเคหิ    สมนฺนาคเตน   ภิกฺขุนา   ภิกฺขุนีนํ
โอวาโท   น   ฐเปตพฺโพ   ฯ   กตเมหิ  ปญฺจหิ  ฯ  อลชฺชี  จ  โหติ
พาโล   จ   อปกตตฺโต   จ   ภณฺฑนการโก   จ   โหติ   กลหการโก
สิกฺขาย   จ   น   ปริปูริการี   ฯ   อิเมหิ   โข  อุปาลิ  ปญฺจหงฺเคหิ
สมนฺนาคเตน ภิกฺขุนา ภิกฺขุนีนํ โอวาโท น ฐเปตพฺโพติ ฯ
     [๑๒๐๕]   กตีหิ  นุ  โข  ภนฺเต  องฺเคหิ  สมนฺนาคเตน  ภิกฺขุนา
ภิกฺขุนีนํ  โอวาโท  น  คเหตพฺโพติ  ฯ  ปญฺจหุปาลิ  องฺเคหิ สมนฺนาคเตน
ภิกฺขุนา   ภิกฺขุนีนํ   โอวาโท   น   คเหตพฺโพ  ฯ  กตเมหิ  ปญฺจหิ  ฯ
กายิเกน   อนาจาเรน   สมนฺนาคโต   โหติ   วาจสิเกน   อนาจาเรน
สมนฺนาคโต   โหติ   กายิกวาจสิเกน   อนาจาเรน   สมนฺนาคโต  โหติ
ภิกฺขุนีนํ   อกฺโกสกปริภาสโก   โหติ   ภิกฺขุนีหิ   สทฺธึ   สํสฏฺโฐ  วิหรติ
อนนุโลมิเกน    สํสคฺเคน    ฯ    อิเมหิ   โข   อุปาลิ   ปญฺจหงฺเคหิ
สมนฺนาคเตน   ภิกฺขุนา  ภิกฺขุนีนํ  โอวาโท  น  คเหตพฺโพ  ฯ  อปเรหิปิ
อุปาลิ    ปญฺจหงฺเคหิ    สมนฺนาคเตน    ภิกฺขุนา   ภิกฺขุนีนํ   โอวาโท
น  คเหตพฺโพ  ฯ  กตเมหิ  ปญฺจหิ  ฯ อลชฺชี จ โหติ พาโล จ อปกตตฺโต
จ  คมิโก  วา  โหติ  คิลาโน  วา  ฯ  อิเมหิ  โข  อุปาลิ ปญฺจหงฺเคหิ
สมนฺนาคเตน ภิกฺขุนา ภิกฺขุนีนํ โอวาโท น คเหตพฺโพติ ฯ
     [๑๒๐๖]   กตีหิ  นุ  โข  ภนฺเต  องฺเคหิ  สมนฺนาคเตน  ภิกฺขุนา
สทฺธึ   น   สากจฺฉาตพฺโพติ   ฯ   ปญฺจหุปาลิ   องฺเคหิ   สมนฺนาคเตน
ภิกฺขุนา  สทฺธึ  น  สากจฺฉาตพฺโพ  ฯ  กตเมหิ  ปญฺจหิ  ฯ  น  อเสเขน
สีลกฺขนฺเธน    สมนฺนาคโต    โหติ    น    อเสเขน   สมาธิกฺขนฺเธน
สมนฺนาคโต    โหติ    น    อเสเขน    ปญฺญาขนฺเธน    สมนฺนาคโต
โหติ   น   อเสเขน   วิมุตฺติกฺขนฺเธน  สมนฺนาคโต  โหติ  น  อเสเขน
วิมุตฺติญาณทสฺสนกฺขนฺเธน   สมนฺนาคโต   โหติ   ฯ   อิเมหิ  โข  อุปาลิ
ปญฺจหงฺเคหิ สมนฺนาคเตน ภิกฺขุนา สทฺธึ น สากจฺฉาตพฺโพ ฯ
     {๑๒๐๖.๑}   ปญฺจหุปาลิ   องฺเคหิ   สมนฺนาคเตน  ภิกฺขุนา  สทฺธึ
สากจฺฉาตพฺโพ    ฯ    กตเมหิ   ปญฺจหิ   ฯ   อเสเขน   สีลกฺขนฺเธน
สมนฺนาคโต    โหติ    อเสเขน   สมาธิกฺขนฺเธน   สมนฺนาคโต   โหติ
อเสเขน   ปญฺญาขนฺเธน   สมนฺนาคโต   โหติ  อเสเขน  วิมุตฺติกฺขนฺเธน
สมนฺนาคโต       โหติ       อเสเขน       วิมุตฺติญาณทสฺสนกฺขนฺเธน
สมนฺนาคโต   โหติ   ฯ  อิเมหิ  โข  อุปาลิ  ปญฺจหงฺเคหิ  สมนฺนาคเตน
ภิกฺขุนา สทฺธึ สากจฺฉาตพฺโพ ฯ
     {๑๒๐๖.๒}   อปเรหิปิ    อุปาลิ    ปญฺจหงฺเคหิ   สมนฺนาคเตน
ภิกฺขุนา   สทฺธึ   น   สากจฺฉาตพฺโพ   ฯ   กตเมหิ   ปญฺจหิ   ฯ   น
อตฺถปฏิสมฺภิทาปตฺโต     โหติ     น     ธมฺมปฏิสมฺภิทาปตฺโต     โหติ
น     นิรุตฺติปฏิสมฺภิทาปตฺโต     โหติ     น    ปฏิภาณปฏิสมฺภิทาปตฺโต
โหติ   น   ยถาวิมุตฺตํ  จิตฺตํ  ปจฺจเวกฺขติ  ๑-  ฯ  อิเมหิ  โข  อุปาลิ
ปญฺจหงฺเคหิ   สมนฺนาคเตน   ภิกฺขุนา   สทฺธึ   น   สากจฺฉาตพฺโพ   ฯ
@เชิงอรรถ:  ม. ปจฺจเวกฺขิตา ฯ
ปญฺจหุปาลิ   องฺเคหิ   สมนฺนาคเตน   ภิกฺขุนา  สทฺธึ  สากจฺฉาตพฺโพ  ฯ
กตเมหิ   ปญฺจหิ   ฯ   อตฺถปฏิสมฺภิทาปตฺโต   โหติ  ธมฺมปฏิสมฺภิทาปตฺโต
โหติ      นิรุตฺติปฏิสมฺภิทาปตฺโต      โหติ      ปฏิภาณปฏิสมฺภิทาปตฺโต
โหติ       ยถาวิมุตฺตํ      จิตฺตํ      ปจฺจเวกฺขติ      ๑-      ฯ
อิเมหิ    โข    อุปาลิ   ปญฺจหงฺเคหิ   สมนฺนาคเตน   ภิกฺขุนา   สทฺธึ
สากจฺฉาตพฺโพติ ฯ
                        ภิกฺขุนีโอวาทวคฺโค อฏฺฐโม ฯ
                                   ตสฺสุทฺทานํ
     [๑๒๐๗]   ภิกฺขุนีเหว กาตพฺพํ      อปเรหิ ตถา ทุเว
           ภิกฺขุนีนํ ตโย กมฺมา           น ฐเปตพฺโพ ๒- เทฺว ทุกา
           น คเหตพฺโพ เทฺว วุตฺตา      สากจฺฉาสุ ๓- จ เทฺว ทุกาติ ฯ


             เนื้อความพระไตรปิฎกฉบับภาษาบาลี อักษรไทย เล่มที่ ๘ หน้าที่ ๔๘๐-๔๘๕. https://84000.org/tipitaka/read/pali_read.php?B=8&A=9720&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=8&A=9720&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=8&item=1202&items=6              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=8&siri=113              ศึกษาอรรถกถานี้ได้ที่ :- https://84000.org/tipitaka/attha/attha.php?b=8&i=1202              สารบัญพระไตรปิฎกเล่มที่ ๘ https://84000.org/tipitaka/read/?index_8 https://84000.org/tipitaka/english/?index_8

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]