paliTIPITAKA Volume 1 - Vinaya Pitaka 1

[611] So bhikkhūti yo so dubbacajātiko bhikkhu . bhikkhūhīti aññehi bhikkhūhi . ye passanti ye suṇanti tehi vattabbo mā āyasmā attānaṃ avacanīyaṃ akāsi vacanīyameva āyasmā attānaṃ karotu āyasmāpi bhikkhū vadetu sahadhammena bhikkhūpi āyasmantaṃ vakkhanti sahadhammena evaṃ saṃvaḍḍhā hi tassa bhagavato parisā yadidaṃ aññamaññavacanena aññamaññavuṭṭhāpanenāti . dutiyampi vattabbo tatiyampi vattabbo . sace paṭinissajjati iccetaṃ kusalaṃ no ce paṭinissajjati āpatti dukkaṭassa . sutvā na vadanti āpatti dukkaṭassa . so bhikkhu saṅghamajjhaṃpi ākaḍḍhitvā vattabbo mā āyasmā attānaṃ avacanīyaṃ akāsi vacanīyameva āyasmā attānaṃ karotu āyasmāpi bhikkhū vadetu sahadhammena bhikkhūpi āyasmantaṃ vakkhanti sahadhammena evaṃ saṃvaḍḍhā hi tassa bhagavato parisā yadidaṃ Aññamaññavacanena aññamaññavuṭṭhāpanenāti . dutiyampi vattabbo tatiyampi vattabbo . sace paṭinissajjati iccetaṃ kusalaṃ no ce paṭinissajjati āpatti dukkaṭassa. [612] So bhikkhu samanubhāsitabbo . evañca pana bhikkhave samanubhāsitabbo. Byattena bhikkhunā baṭibalena saṅgho ñāpetabbo {612.1} suṇātu me bhante saṅgho ayaṃ itthannāmo bhikkhu bhikkhūhi sahadhammikaṃ vuccamāno attānaṃ avacanīyaṃ karoti. So taṃ vatthuṃ nappaṭinissajjati. Yadi saṅghassa pattakallaṃ saṅgho itthannāmaṃ bhikkhuṃ samanubhāseyya tassa vatthussa paṭinissaggāya. Esā ñatti. {612.2} Suṇātu me bhante saṅgho ayaṃ itthannāmo bhikkhu bhikkhūhi sahadhammikaṃ vuccamāno attānaṃ avacanīyaṃ karoti. So taṃ vatthuṃ nappaṭinissajjati. Saṅgho itthannāmaṃ bhikkhuṃ samanubhāsati tassa vatthussa paṭinissaggāya . Yassāyasmato khamati itthannāmassa bhikkhuno samanubhāsanā tassa vatthussa paṭinissaggāya so tuṇhassa yassa nakkhamati so bhāseyya. {612.3} Dutiyampi etamatthaṃ vadāmi .pe. Tatiyampi etamatthaṃ vadāmi. Suṇātu me bhante saṅgho ayaṃ itthannāmo bhikkhu bhikkhūhi sahadhammikaṃ vuccamāno attānaṃ avacanīyaṃ karoti. So taṃ vatthuṃ nappaṭinissajjati. Saṅgho itthannāmaṃ bhikkhuṃ samanubhāsati tassa vatthussa paṭinissaggāya. Yasmāyasmato khamati itthannāmassa bhikkhuno samanubhāsanā tassa vatthussa paṭinissaggāya So tuṇhassa yassa nakkhamati so bhāseyya. {612.4} Samanubhaṭṭho saṅghena itthannāmo bhikkhu tassa vatthussa paṭinissaggāya. Khamati saṅghassa tasmā tuṇhī. Evametaṃ dhārayāmīti. [613] Ñattiyā dukkaṭaṃ dvīhi kammavācāhi thullaccayā kammavācāpariyosāne āpatti saṅghādisesassa. Saṅghādisesaṃ ajjhāpajjantassa ñattiyā dukkaṭaṃ dvīhi kammavācāhi thullaccayā paṭippassambhanti . Saṅghādisesoti .pe. Tenapi vuccati saṅghādisesoti. [614] Dhammakamme dhammakammasaññī nappaṭinissajjati āpatti saṅghādisesassa . dhammakamme vematiko nappaṭinissajjati āpatti saṅghādisesassa . dhammakamme adhammakammasaññī nappaṭinissajjati āpatti saṅghādisesassa . adhammakamme dhammakammasaññī āpatti dukkaṭassa . adhammakamme vematiko āpatti dukkaṭassa . adhammakamme adhammakammasaññī āpatti dukkaṭassa. [615] Anāpatti asamanubhāsantassa paṭinissajjantassa ummattakassa ādikammikassāti. Dvādasamasaṅghādisesaṃ niṭṭhitaṃ. ---------- Terasamasaṅghādisesaṃ [616] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena assajipunabbasukā nāma kiṭāgirismiṃ āvāsikā honti alajjino pāpabhikkhū . Te evarūpaṃ anācāraṃ ācaranti mālāvacchaṃ ropentipi ropāpentipi siñcantipi siñcāpentipi ocinantipi ocināpentipi ganthentipi ganthāpentipi ekatovaṇṭikamālaṃ karontipi kārāpentipi ubhatovaṇṭikamālaṃ karontipi kārāpentipi mañjarikaṃ karontipi kārāpentipi vidhutikaṃ karontipi kārāpentipi vaṭaṃsakaṃ karontipi kārāpentipi āveḷaṃ karontipi kārāpentipi uracchadaṃ karontipi kārāpentipi. {616.1} Te kulitthīnaṃ kuladhītānaṃ kulakumārikānaṃ kulasuṇhānaṃ kuladāsīnaṃ ekatovaṇṭikamālaṃ harantipi harāpentipi ubhatovaṇṭikamālaṃ harantipi harāpentipi mañjārikaṃ harantipi harāpentipi vidhutikaṃ harantipi harāpentipi vaṭaṃsakaṃ harantipi harāpentipi āveḷaṃ harantipi harāpentipi uracchadaṃ harantipi harāpentipi . te kulitthīhi kuladhītāhi kulakumārīhi kulasuṇhāhi kuladāsīhi saddhiṃ ekabhājanepi bhuñjanti ekathālakepi pivanti ekāsanepi nisīdanti ekamañcepi tuvaṭṭenti ekattharaṇāpi tuvaṭṭenti ekapāvuraṇāpi tuvaṭṭenti ekattharaṇapāvuraṇāpi tuvaṭṭenti vikālepi bhuñjanti majjaṃpi pivanti mālāgandhavilepanaṃpi dhārenti naccantipi gāyantipi Vādentipi lāsentipi naccantiyāpi naccanti naccantiyāpi gāyanti naccantiyāpi vādenti naccantiyāpi lāsenti gāyantiyāpi naccanti gāyantiyāpi gāyanti gāyantiyāpi vādenti gāyantiyāpi lāsenti vādentiyāpi naccanti vādentiyāpi gāyanti vādentiyāpi vādenti vādentiyāpi lāsenti lāsentiyāpi naccanti lāsentiyāpi gāyanti lāsentiyāpi vādenti lāsentiyāpi lāsenti aṭṭhapadepi kīḷanti dasapadepi kīḷanti ākāsepi kīḷanti parihārapathepi kīḷanti santikāyapi kīḷanti khalikāyapi kīḷanti ghaṭikāyapi ^1- kīḷanti salākahatthenapi kīḷanti akkhenapi kīḷanti paṅkacīrenapi ^2- kīḷanti vaṅkakenapi kīḷanti mokkhacikāyapi kīḷanti ciṅgulakenapi kīḷanti pattāḷhakenapi kīḷanti rathakenapi kīḷanti dhanukenapi kīḷanti akkharikāyapi kīḷanti manesikāyapi kīḷanti yathāvajjenapi kīḷanti hatthismimpi sikkhanti assasmimpi sikkhanti rathasmimpi sikkhanti dhanusmimpi sikkhanti tharusmimpi sikkhanti hatthissapi purato dhāvanti assassapi purato dhāvanti rathassapi purato dhāvanti dhāvantipi ādhāvantipi usseḷhentipi apphoṭentipi ^3- nibbujjhantipi muṭṭhīhipi yujjhanti raṅgamajjhepi saṅghāṭiṃ pattharitvā naccantiṃ ^4- evaṃ vadenti ^5- idha bhagini naccassūti nalāṭikaṃpi denti vividhampi anācāraṃ ācaranti. [617] Tena kho pana samayena aññataro bhikkhu kāsīsu vassaṃ vuttho @Footnote: ¹ Yu. Ma. Rā. ghaṭikenapi. ² Yu. Ma. paṅgacīrenapi. @³ Yu. appoṭhentipi. ⁴ Yu. naccakiṃ. ⁵ Yu. Ma. Rā. vadanti. Sāvatthiṃ gacchanto bhagavantaṃ dassanāya yena kiṭāgiri tadavasari . Athakho so bhikkhu pubbaṇhasamayaṃ nivāsetvā pattacīvaramādāya kiṭāgiriṃ piṇḍāya pāvisi pāsādikena abhikkantena paṭikkantena ālokitena vilokitena sammiñjitena pasāritena okkhittacakkhu iriyāpathasampanno . Manussā taṃ bhikkhuṃ passitvā evamāhaṃsu kvāyaṃ abalabalo viya mandamando viya bhākuṭikabhākuṭiko viya ko imassa upagatassa piṇḍakaṃpi dassati amhākaṃ pana ayyā assajipunabbasukā saṇhā sakhilā sukhasambhāsā mihitapubbaṅgamā ehisvāgatavādino abbhākuṭikā uttānamukhā pubbabhāsino tesaṃ kho nāma piṇḍo dātabboti. {617.1} Addasā kho aññataro upāsako taṃ bhikkhuṃ kiṭāgirismiṃ piṇḍāya carantaṃ disvāna yena so bhikkhu tenupasaṅkami upasaṅkamitvā taṃ bhikkhuṃ abhivādetvā etadavoca api bhante piṇḍo labbhatīti . na kho āvuso piṇḍo labbhatīti . ehi bhante gharaṃ gamissāmāti . Athakho so upāsako taṃ bhikkhuṃ gharaṃ netvā bhojetvā etadavoca kahaṃ bhante ayyo gamissatīti . sāvatthiṃ kho ahaṃ āvuso gamissāmi bhagavantaṃ dassanāyāti . tenahi bhante mama vacanena bhagavato pāde sirasā vanda evañca vadehi duṭṭho bhante kiṭāgirismiṃ āvāso assajipunabbasukā nāma kiṭāgirismiṃ āvāsikā alajjino pāpabhikkhū te evarūpaṃ anācāraṃ ācaranti mālāvacchaṃ ropentipi ropāpentipi siñcantipi siñcāpentipi ocinantipi ocināpentipi ganthentipi Ganthāpentipi ekatovaṇṭikamālaṃ karontipi kārāpentipi ubhatovaṇṭikamālaṃ karontipi kārāpentipi .pe. vividhampi anācāraṃ ācaranti yepi te bhante manussā pubbe saddhā ahesuṃ pasannā tepi etarahi assaddhā appasannā yānipi tāni saṅghassa pubbe dānapathāni tānipi etarahi upacchinnāni riñcanti pesalā bhikkhū nivasanti pāpabhikkhū sādhu bhante bhagavā kiṭāgiriṃ bhikkhū pahiṇeyya yathāyaṃ kiṭāgirismiṃ āvāso saṇṭhaheyyāti . evamāvusoti kho so bhikkhu tassa upāsakassa paṭissutvā ^1- yena sāvatthī tena pakkāmi anupubbena yena sāvatthī jetavanaṃ anāthapiṇḍikassa ārāmo yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi.

The Pali Tipitaka in Roman Character Volume 1 page 412-418. https://84000.org/tipitaka/read/roman_item.php?book=1&item=611&items=7 Classified by [Item Number] :- http://84000.org/tipitaka/read/roman_item.php?book=1&item=611&items=7&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=1&item=609&items=7 Compare with The Royal Version of Thai Tipitaka :- https://84000.org/tipitaka/read/byitem.php?book=1&item=609&items=7 Study Atthakatha :- https://84000.org/tipitaka/attha/attha.php?b=1&i=609 Contents of The Tipitaka Volume 1 https://84000.org/tipitaka/read/?index_1 https://84000.org/tipitaka/english/?index_1