paliTIPITAKA Volume 19 - Sutta Pitaka 11

[1044] Ekadhamme patiṭṭhitassa bhikkhave bhikkhuno pañcindriyāni bhāvitāni honti subhāvitāni. Katamasmiṃ ekadhamme. Appamāde. [1045] Katamo ca bhikkhave appamādo . idha bhikkhave bhikkhu cittaṃ rakkhati āsavesu ca sāsavesu ca dhammesu . tassa cittaṃ rakkhato āsavesu ca sāsavesu ca dhammesu saddhindriyaṃpi bhāvanāpāripūriṃ gacchati viriyindriyaṃpi bhāvanāpāripūriṃ gacchati satindriyaṃpi bhāvanāpāripūriṃ gacchati samādhindriyaṃpi bhāvanāpāripūriṃ gacchati paññindriyaṃpi bhāvanāpāripūriṃ gacchati. [1046] Evaṃpi kho bhikkhave ekadhamme patiṭṭhitassa bhikkhuno pañcindriyāni bhāvitāni honti subhāvitānīti. [1047] Evamme sutaṃ ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhe paṭhamābhisambuddho . atha Kho bhagavato rahogatassa paṭisallīnassa evaṃ cetaso parivitakko udapādi pañcindriyāni bhāvitāni bahulīkatāni amatogadhāni honti amataparāyanāni amatapariyosānāni . katamāni pañca . saddhindriyaṃ bhāvitaṃ bahulīkataṃ amatogadhaṃ hoti amataparāyanaṃ amatapariyosānaṃ . Viriyindriyaṃ satindriyaṃ samādhindriyaṃ paññindriyaṃ bhāvitaṃ bahulīkataṃ amatogadhaṃ hoti amataparāyanaṃ amatapariyosānaṃ . imāni pañcindriyāni bhāvitāni bahulīkatāni amatogadhāni honti amataparāyanāni amatapariyosānānīti.

The Pali Tipitaka in Roman Character Volume 19 page 306-307. https://84000.org/tipitaka/read/roman_item.php?book=19&item=1044&items=4 Classified by [Item Number] :- http://84000.org/tipitaka/read/roman_item.php?book=19&item=1044&items=4&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=19&item=1044&items=4 Compare with The Royal Version of Thai Tipitaka :- https://84000.org/tipitaka/read/byitem.php?book=19&item=1044&items=4 Study Atthakatha :- https://84000.org/tipitaka/attha/attha.php?b=19&i=1044 Contents of The Tipitaka Volume 19 https://84000.org/tipitaka/read/?index_19 https://84000.org/tipitaka/english/?index_19