paliTIPITAKA Volume 19 - Sutta Pitaka 11

[1061] Sāvatthīnidānaṃ . pañcimāni bhikkhave indriyāni bhāvitāni bahulīkatāni anuppannāni uppajjanti nāññatra tathāgatassa pātubhāvā arahato sammāsambuddhassa . katamāni pañca . saddhindriyaṃ viriyindriyaṃ satindriyaṃ samādhindriyaṃ paññindriyaṃ . imāni kho bhikkhave pañcindriyāni bhāvitāni bahulīkatāni anuppannāni uppajjanti nāññatra tathāgatassa pātubhāvā arahato sammāsambuddhassāti. [1062] Pañcimāni bhikkhave indriyāni bhāvitāni bahulīkatāni anuppannāni uppajjanti nāññatra sugatavinayā . katamāni pañca . Saddhindriyaṃ viriyindriyaṃ satindriyaṃ samādhindriyaṃ paññindriyaṃ . Imāni kho bhikkhave pañcindriyāni bhāvitāni bahulīkatāni anuppannāni uppajjanti nāññatra sugatavinayāti. Vaggo chaṭṭho. Tassuddānaṃ sālaṃ mallakaṃ sekkho ca pade sāre patiṭṭhito brahmasūkarakhātāyo uppāde apare duveti. --------- Bodhipakkhiyavaggo sattamo [1063] Sāvatthīnidānaṃ . pañcimāni bhikkhave indriyāni bhāvitāni bahulīkatāni saññojanānaṃ pahānāya ^1- saṃvattanti . katamāni pañca . Saddhindriyaṃ .pe. paññindriyaṃ . imāni kho bhikkhave pañcindriyāni bhāvitāni bahulīkatāni saññojanānaṃ pahānāya saṃvattantīti. [1064] Pañcimāni bhikkhave indriyāni bhāvitāni bahulīkatāni anusayasamugghātāya saṃvattanti . katamāni pañca . saddhindriyaṃ .pe. paññindriyaṃ . imāni kho bhikkhave pañcindriyāni bhāvitāni bahulīkatāni anusayasamugghātāya saṃvattantīti. [1065] Pañcimāni bhikkhave indriyāni bhāvitāni bahulīkatāni addhānapariññāya saṃvattanti . katamāni pañca . saddhindriyaṃ .pe. paññindriyaṃ . imāni kho bhikkhave pañcindriyāni bhāvitāni bahulīkatāni addhānapariññāya saṃvattantīti. [1066] Pañcimāni bhikkhave indriyāni bhāvitāni bahulīkatāni āsavānaṃ khayāya saṃvattanti . katamāni pañca . saddhindriyaṃ .pe. paññindriyaṃ . imāni kho bhikkhave pañcindriyāni bhāvitāni bahulīkatāni āsavānaṃ khayāya saṃvattantīti. [1067] Pañcimāni bhikkhave indriyāni bhāvitāni bahulīkatāni saññojanānaṃ pahānāya saṃvattanti anusayasamugghātāya saṃvattanti @Footnote: ¹ Ma. saṃñojanappahānāya. evamupari. Addhānapariññāya saṃvattanti āsavānaṃ khayāya saṃvattanti . Katamāni pañca . saddhindriyaṃ .pe. paññindriyaṃ . imāni kho bhikkhave pañcindriyāni bhāvitāni bahulīkatāni saññojanānaṃ pahānāya saṃvattanti anusayasamugghātāya saṃvattanti addhānapariññāya saṃvattanti āsavānaṃ khayāya saṃvattantīti. [1068] Pañcimāni bhikkhave indriyāni . katamāni pañca . Saddhindriyaṃ .pe. paññindriyaṃ . imāni kho bhikkhave pañcindriyāni. Imesaṃ kho bhikkhave pañcannaṃ indriyānaṃ bhāvitattā bahulīkatattā dvinnaṃ phalānaṃ aññataraṃ phalaṃ pāṭikaṅkhaṃ diṭṭheva dhamme aññā sati vā upādisese anāgāmitāti. [1069] Pañcimāni bhikkhave indriyāni . katamāni pañca . Saddhindriyaṃ .pe. paññindriyaṃ . imāni kho bhikkhave pañcindriyāni . imesaṃ kho bhikkhave pañcannaṃ indriyānaṃ bhāvitattā bahulīkatattā satta phalā sattānisaṃsā pāṭikaṅkhā . Katame satta phalā sattānisaṃsā . diṭṭheva dhamme paṭikacca aññaṃ ārādheti no ce diṭṭheva dhamme paṭikacca aññaṃ ārādheti atha maraṇakāle aññaṃ ārādheti no ce diṭṭheva dhamme paṭikacca aññaṃ ārādheti no ce maraṇakāle aññaṃ ārādheti . atha pañcannaṃ orambhāgiyānaṃ saññojanānaṃ parikkhayāya antarāparinibbāyī hoti upahaccaparinibbāyī hoti asaṅkhāraparinibbāyī hoti sasaṅkhāraparinibbāyī Hoti uddhaṃsoto hoti akaniṭṭhagāmī . imesaṃ kho bhikkhave pañcannaṃ indriyānaṃ bhāvitattā bahulīkatattā ime satta phalā sattānisaṃsā pāṭikaṅkhāti.

The Pali Tipitaka in Roman Character Volume 19 page 310-313. https://84000.org/tipitaka/read/roman_item.php?book=19&item=1061&items=9 Classified by [Item Number] :- http://84000.org/tipitaka/read/roman_item.php?book=19&item=1061&items=9&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=19&item=1061&items=9 Compare with The Royal Version of Thai Tipitaka :- https://84000.org/tipitaka/read/byitem.php?book=19&item=1061&items=9 Study Atthakatha :- https://84000.org/tipitaka/attha/attha.php?b=19&i=1061 Contents of The Tipitaka Volume 19 https://84000.org/tipitaka/read/?index_19 https://84000.org/tipitaka/english/?index_19