paliTIPITAKA Volume 23 - Sutta Pitaka 15

[250] 46 Sandiṭṭhiko dhammo sandiṭṭhiko dhammoti āvuso vuccati kittāvatā nu kho āvuso sandiṭṭhiko dhammo vutto bhagavatāti. {250.1} Idhāvuso bhikkhu vivicceva kāmehi .pe. paṭhamajjhānaṃ upasampajja viharati ettāvatāpi kho āvuso sandiṭṭhiko dhammo vutto bhagavatā pariyāyena .pe. {250.2} Puna caparaṃ āvuso bhikkhu sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati paññāyapassa disvā āsavā parikkhīṇā honti ettāvatāpi kho āvuso sandiṭṭhiko dhammo vutto bhagavatā nippariyāyenāti. [251] 47 Sandiṭṭhikaṃ nibbānaṃ sandiṭṭhikaṃ nibbānanti āvuso vuccati kittāvatā nu kho āvuso sandiṭṭhikaṃ nibbānaṃ vuttaṃ bhagavatāti. {251.1} Idhāvuso bhikkhu vivicceva kāmehi .pe. paṭhamajjhānaṃ upasampajja viharati ettāvatāpi kho āvuso sandiṭṭhikaṃ nibbānaṃ vuttaṃ bhagavatā pariyāyena .pe. {251.2} Puna caparaṃ āvuso bhikkhu sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati paññāyapassa disvā āsavā parikkhīṇā honti ettāvatāpi kho āvuso sandiṭṭhikaṃ nibbānaṃ vuttaṃ bhagavatā nippariyāyenāti. [252] 48 Nibbānaṃ nibbānanti āvuso vuccati .pe. [253] 49 Parinibbānaṃ parinibbānanti .pe. [254] 50 Tadaṅganibbānaṃ tadaṅganibbānanti āvuso vuccati .pe. [255] 51 Diṭṭhadhammanibbānaṃ diṭṭhadhammanibbānanti āvuso vuccati kittāvatā nu kho āvuso diṭṭhadhammanibbānaṃ vuttaṃ bhagavatāti. Idhāvuso bhikkhu vivicceva kāmehi .pe. paṭhamajjhānaṃ upasampajja viharati ettāvatāpi kho āvuso diṭṭhadhammanibbānaṃ vuttaṃ bhagavatā Pariyāyena .pe. {255.1} Puna caparaṃ āvuso bhikkhu sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati paññāyapassa disvā āsavā parikkhīṇā honti ettāvatāpi kho āvuso diṭṭhadhammanibbānaṃ vuttaṃ bhagavatā nippariyāyenāti. Pañcālavaggo pañcamo. Tassuddānaṃ pañcālo kāmahesañca ^1- ubho ^2- sandiṭṭhikā dve nibbānaṃ parinibbānaṃ tadaṅgadiṭṭhadhammikena cāti. Navakanipāte paṇṇāsako samatto. ------------ @Footnote: ¹ Ma. samubādho kāyasakkhipaññā . ² Ma. ubhatobhāgo.

The Pali Tipitaka in Roman Character Volume 23 page 474-476. https://84000.org/tipitaka/read/roman_item.php?book=23&item=250&items=6 Classified by [Item Number] :- http://84000.org/tipitaka/read/roman_item.php?book=23&item=250&items=6&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=23&item=250&items=6 Compare with The Royal Version of Thai Tipitaka :- https://84000.org/tipitaka/read/byitem.php?book=23&item=250&items=6 Study Atthakatha :- https://84000.org/tipitaka/attha/attha.php?b=23&i=250 Contents of The Tipitaka Volume 23 https://84000.org/tipitaka/read/?index_23 https://84000.org/tipitaka/english/?index_23