Suttantapiṭake khuddakanikāyassa
khuddakapāṭho
---------
namo tassa bhagavato arahato sammāsambuddhassa.
Khuddakapāṭhe saraṇagamanaṃ
[1] Buddhaṃ saraṇaṃ gacchāmi dhammaṃ saraṇaṃ gacchāmi saṅghaṃ
saraṇaṃ gacchāmi . dutiyampi buddhaṃ saraṇaṃ gacchāmi dutiyampi dhammaṃ
saraṇaṃ gacchāmi dutiyampi saṅghaṃ saraṇaṃ gacchāmi . tatiyampi buddhaṃ
saraṇaṃ gacchāmi tatiyampi dhammaṃ saraṇaṃ gacchāmi tatiyampi saṅghaṃ
saraṇaṃ gacchāmi.
Saraṇagamanaṃ 1- niṭṭhitaṃ.
--------
Khuddakapāṭhe dasasikkhāpadaṃ
[2] Pāṇātipātā veramaṇī sikkhāpadaṃ samādiyāmi .
Adinnādānā veramaṇī sikkhāpadaṃ samādiyāmi . abrahmacariyā
veramaṇī sikkhāpadaṃ samādiyāmi . musāvādā veramaṇī sikkhāpadaṃ
samādiyāmi . surāmerayamajjapamādaṭṭhānā veramaṇī sikkhāpadaṃ
@Footnote: 1 Sī. Ma. saraṇattayaṃ.
Samādiyāmi . vikālabhojanā veramaṇī sikkhāpadaṃ samādiyāmi .
Naccagītavāditavisūkadassanā veramaṇī sikkhāpadaṃ samādiyāmi .
Mālāgandhavilepanadhāraṇamaṇḍanavibhūsanaṭṭhānā veramaṇī sikkhāpadaṃ
samādiyāmi . uccāsayanamahāsayanā veramaṇī sikkhāpadaṃ samādiyāmi .
Jātarūparajaṭapaṭiggahaṇā veramaṇī sikkhāpadaṃ samādiyāmi.
Dasasikkhāpadaṃ niṭṭhitaṃ.
---------
Khuddakapāṭhe dvattiṃsākāro
[3] Atthi imasmiṃ kāye kesā lomā nakhā dantā taco
maṃsaṃ nhārū aṭṭhī aṭṭhimiñjaṃ vakkaṃ hadayaṃ yakanaṃ kilomakaṃ pihakaṃ
papphāsaṃ antaṃ antaguṇaṃ udariyaṃ karīsaṃ [1]- pittaṃ semhaṃ pubbo
lohitaṃ sedo medo assu vasā khelo siṃghānikā lasikā muttaṃ
matthake matthaluṅganti.
Dvattiṃsākāro niṭṭhito.
-----------
Khuddakapāṭhe sāmaṇerapañhā
[4] Ekannāma kiṃ sabbe sattā āhāraṭṭhitikā . dve
nāma kiṃ nāmañca rūpañca . tīṇi nāma kiṃ tisso vedanā .
@Footnote: 1 Ma. matthaluṅgaṃ.
Cattāri nāma kiṃ cattāri ariyasaccāni . pañca nāma kiṃ
pañcupādānakkhandhā . cha nāma kiṃ cha ajjhattikāni āyatanāni .
Satta nāma kiṃ satta bojjhaṅgā . aṭṭha nāma kiṃ ariyo
aṭṭhaṅgiko maggo . nava nāma kiṃ nava sattāvāsā . dasa
nāma kiṃ dasahaṅgehi samannāgato arahāti vuccatīti.
Sāmaṇerapañhā 1- niṭṭhitā.
-----------
Khuddakapāṭhe maṅgalasuttaṃ
[5] Evamme sutaṃ . ekaṃ samayaṃ bhagavā sāvatthiyaṃ viharati
jetavane anāthapiṇḍikassa ārāme . atha kho aññatarā devatā
abhikkantāya rattiyā abhikkantavaṇṇā kevalakappaṃ jetavanaṃ
obhāsetvā yena bhagavā tenupasaṅkami upasaṅkamitvā bhagavantaṃ
abhivādetvā ekamantaṃ aṭṭhāsi ekamantaṃ ṭhitā kho sā devatā
bhagavantaṃ gāthāya ajjhabhāsi.
[6] |6.1| Bahū devā manussā ca maṅgalāni acintayuṃ
ākaṅkhamānā sotthānaṃ brūhi maṅgalamuttamaṃ.
|6.2| Asevanā ca bālānaṃ paṇḍitānañca sevanā
pūjā ca pūjanīyānaṃ 2- etammaṅgalamuttamaṃ.
|6.3| Paṭirūpadesavāso ca pubbe ca katapuññatā
@Footnote: 1 Ma. kumārapañhā . 2 Ma. pūjaneyyānaṃ.
Attasammāpaṇidhi ca etammaṅgalamuttamaṃ.
|6.4| Bāhusaccañca sippañca vinayo ca susikkhito
subhāsitā ca yā vācā etammaṅgalamuttamaṃ.
|6.5| Mātāpituupaṭṭhānaṃ puttadārassa saṅgaho
anākulā ca kammantā etammaṅgalamuttamaṃ.
|6.6| Dānañca dhammacariyā ca ñātakānañca saṅgaho
anavajjāni kammāni etammaṅgalamuttamaṃ.
|6.7| Āratī viratī pāpā majjapānā ca saññamo
appamādo ca dhammesu etammaṅgalamuttamaṃ.
|6.8| Gāravo ca nivāto ca santuṭṭhī ca kataññutā
kālena dhammassavanaṃ etammaṅgalamuttamaṃ.
|6.9| Khantī ca sovacassatā samaṇānañca dassanaṃ
kālena dhammasākacchā etammaṅgalamuttamaṃ.
|6.10| Tapo ca brahmacariyañca ariyasaccānadassanaṃ
nibbānasacchikiriyā ca etammaṅgalamuttamaṃ.
|6.11| Phuṭṭhassa lokadhammehi cittaṃ yassa na kampati
asokaṃ virajaṃ khemaṃ etammaṅgalamuttamaṃ.
|6.12| Etādisāni katvāna sabbatthamaparājitā
sabbattha sotthiṃ gacchanti tantesaṃ maṅgalamuttamanti.
Maṅgalasuttaṃ niṭṭhitaṃ.
Khuddakapāṭhe ratanasuttaṃ
[7] |7.1| Yānīdha bhūtāni samāgatāni
bhummāni vā yāni va antalikkhe.
Sabbeva bhūtā sumanā bhavantu
athopi sakkacca suṇantu bhāsitaṃ
|7.2| tasmā hi bhūtā nisāmetha sabbe
mettaṃ karotha mānusiyā pajāya.
Divā ca ratto ca haranti ye baliṃ
tasmā hi ne rakkhatha appamattā.
|7.3| Yaṃ kiñci vittaṃ idha vā huraṃ vā
saggesu vā yaṃ ratanaṃ paṇītaṃ
na no samaṃ atthi tathāgatena
idampi buddhe ratanaṃ paṇītaṃ.
Etena saccena suvatthi hotu.
|7.4| Khayaṃ virāgaṃ amataṃ paṇītaṃ
yadajjhagā sakyamunī samāhito
na tena dhammena samatthi kiñci
idampi dhamme ratanaṃ paṇītaṃ.
Etena saccena suvatthi hotu.
|7.5| Yambuddhaseṭṭho parivaṇṇayī suciṃ
samādhimānantarikaññamāhu
samādhinā tena samo na vijjati
idampi dhamme ratanaṃ paṇītaṃ.
Etena saccena suvatthi hotu.
|7.6| Ye puggalā aṭṭha sataṃ pasaṭṭhā
cattāri etāni yugāni honti
te dakkhiṇeyyā sugatassa sāvakā
etesu dinnāni mahapphalāni
idampi saṅghe ratanaṃ paṇītaṃ.
Etena saccena suvatthi hotu.
|7.7| Ye suppayuttā manasā daḷhena
nikkāmino gotamasāsanamhi
te pattipattā amataṃ vigayha
laddhā mudhā nibbutiṃ bhuñjamānā
idampi saṅghe ratanaṃ paṇītaṃ.
Etena saccena suvatthi hotu.
|7.8| Yathindakhīlo paṭhaviṃ sito siyā
catubbhi vātebhi asampakampiyo
tathūpamaṃ sappurisaṃ vadāmi
Yo ariyasaccāni avecca passati
idampi saṅghe ratanaṃ paṇītaṃ.
Etena saccena suvatthi hotu.
|7.9| Yerīyasaccāni 1- vibhāvayanti
gambhīrapaññena sudesitāni
kiñcāpi te honti bhusappamattā
na te bhavaṃ aṭṭhamamādiyanti
idampi saṅghe ratanaṃ paṇītaṃ.
Etena saccena suvatthi hotu.
|7.10| Sahāvassa dassanasampadāya
tayassu dhammā jahitā bhavanti
sakkāyadiṭṭhi vicikicchitañca
sīlabbataṃ vāpi yadatthi kiñci
|7.11| catūhapāyehi ca vippamutto
cha cābhiṭhānāni abhabbo kātuṃ
idampi saṅghe ratanaṃ paṇītaṃ.
Etena saccena suvatthi hotu.
|7.12| Kiñcāpi so kammaṃ karoti pāpakaṃ
kāyena vācāyuda cetasā vā
abhabbo so tassa paṭicchadāya
@Footnote: 1 idāni pāyato paṭhanti "ye ariyasaccāni vibhāvayantīti ."
Abhabbatā diṭṭhapadassa vuttā
idampi saṅghe ratanaṃ paṇītaṃ.
Etena saccena suvatthi hotu.
|7.13| Vanappagumbe yathā phussitagge
gimhānamāse paṭhamasmiṃ gimhe
tathūpamaṃ dhammavaraṃ adesayi
nibbānagāmiṃ paramaṃ hitāya
idampi buddhe ratanaṃ paṇītaṃ.
Etena saccena suvatthi hotu.
|7.14| Varo varaññū varado varāharo
anuttaro dhammavaraṃ adesayi
idampi buddhe ratanaṃ paṇītaṃ.
Etena saccena suvatthi hotu.
|7.15| Khīṇaṃ purāṇaṃ navaṃ natthi sambhavaṃ
virattacittāyatike bhavasmiṃ
te khīṇabījā aviruḷhichandā
nibbanti dhīrā yathāyampadīpo
idampi saṅghe ratanaṃ paṇītaṃ.
Etena saccena suvatthi hotu.
|7.16| Yānīdha bhūtāni samāgatāni
Bhummāni vā yāniva antalikkhe
tathāgataṃ devamanussapūjitaṃ
buddhaṃ namassāma suvatthi hotu.
|7.17| Yānīdha bhūtāni samāgatāni
bhummāni vā yāniva antalikkhe
tathāgataṃ devamanussapūjitaṃ
dhammaṃ namassāma suvatthi hotu.
|7.18| Yānīdha bhūtāni samāgatāni
bhummāni vā yāniva antalikkhe
tathāgataṃ devamanussapūjitaṃ
saṅghaṃ namassāma suvatthi hotu.
Ratanasuttaṃ niṭṭhitaṃ.
-------
Khuddakapāṭhe tirokuḍḍakaṇḍaṃ
[8] |8.1| (mattāsukhapariccāgā passe ce vipulaṃ sukhaṃ
caje mattāsukhaṃ dhīro sampassaṃ vipulaṃ sukhaṃ .)
|8.2| tirokuḍḍesu tiṭṭhanti sandhisiṅghāṭakesu ca
dvārabāhāsu tiṭṭhanti āgantvāna sakaṃ gharaṃ.
|8.3| Pahute 1- annapānamhi khajjabhojje upaṭṭhite
@Footnote: 1 Ma. pahūte.
Na tesaṃ koci sarati sattānaṃ kammapaccayā.
|8.4| Evaṃ dadanti ñātīnaṃ ye honti anukampakā
suciṃ paṇītaṃ kālena kappiyaṃ pānabhojanaṃ
idaṃ vo ñātīnaṃ hotu sukhitā hontu ñātayo.
|8.5| Te ca tattha samāgantvā ñātipetā samāgatā
pahute 1- annapānamhi sakkaccaṃ anumodare
|8.6| ciraṃ jīvantu no ñātī yesaṃ hetu labhāmhase.
Amhākañca katā pūjā dāyakā ca anipphalā.
|8.7| Na hi tattha kasi atthi gorakkhettha na vijjati
vaṇijjā tādisī natthi hiraññena kayākayaṃ.
Ito dinnena yāpenti petā kālakatā tahiṃ
|8.8| unnate 2- udakaṃ vuṭṭhaṃ yathā ninnaṃ pavattati
evameva ito dinnaṃ petānaṃ upakappati.
|8.9| Yathā vārivahā pūrā paripūrenti sāgaraṃ
evameva ito dinnaṃ petānaṃ upakappati.
|8.10| Adāsi me akāsi me ñātimittā sakhā ca me
petānaṃ dakkhiṇaṃ dajjā pubbe katamanussaraṃ.
|8.11| Na hi ruṇṇaṃ vā soko vā yāvaññā paridevanā
na taṃ petānamatthāya evaṃ tiṭṭhanti ñātayo.
|8.12| Ayañca kho dakkhiṇā dinnā saṅghamhi supatiṭṭhitā
@Footnote: 1 Ma. pahūte . 2 Ma. unname.
Dīgharattaṃ hitāyassa ṭhānaso upakappati.
|8.13| So ñātidhammo ca ayaṃ nidassito
petānapūjā ca katā uḷārā
balañca bhikkhūnamanuppadinnaṃ
tumhehi puññaṃ pasutaṃ anappakanti.
Tirokuḍḍakaṇḍaṃ niṭṭhitaṃ.
----------
Khuddakapāṭhe nidhikaṇḍaṃ
[9] |9.1| Nidhiṃ nidheti puriso gambhīre udakantike
atthe kicce samuppanne atthāya me bhavissati
|9.2| rājato vā duruttassa corato pīḷitassa vā
iṇassa vā pamokkhāya dubbhikkhe āpadāsu vā
etadatthāya lokasmiṃ nidhi nāma nidhiyyati.
|9.3| Tāvassunihito santo gambhīre udakantike
na sabbo sabbadā yeva tassa taṃ upakappati
|9.4| nidhi vā ṭhānā cavati saññā vāssa vimuyhati
nāgā vā apanāmenti yakkhā vāpi haranti naṃ
|9.5| appiyā vāpi dāyādā uddharanti apassato
yadā puññakkhayo hoti sabbametaṃ vinassati.
|9.6| Yassa dānena sīlena saññamena damena ca
nidhi sunihito hoti itthiyā purisassa vā
|9.7| cetiyamhi ca saṅghe vā puggale atithīsu vā
mātari pitari vāpi atho jeṭṭhamhi bhātari
|9.8| eso nidhi sunihito ajeyyo anugāmiko
pahāya gamanīyesu etaṃ ādāya gacchati.
|9.9| Asādhāraṇamaññesaṃ acoraharaṇo nidhi.
Kayirātha dhīro puññāni yo nidhi anugāmiko
|9.10| esa devamanussānaṃ sabbakāmadado nidhi
yaṃ yaṃ devābhipatthenti sabbametena labbhati
|9.11| suvaṇṇatā susaratā susaṇṭhānaṃ 1- surūpatā
ādhipaccaṃ parivāro sabbametena labbhati.
|9.12| Padesarajjaṃ issariyaṃ cakkavattisukhaṃ piyaṃ
devarajjampi dibbesu sabbametena labbhati.
|9.13| Mānussikā ca sampatti devaloke ca yā rati
yā ca nibbānasampatti sabbametena labbhati.
|9.14| Mittasampadamāgamma yoniso ce payuñjato
vijjāvimuttivasībhāvo sabbametena labbhati.
|9.15| Paṭisambhidā vimokkhā ca yā ca sāvakapāramī
paccekabodhi buddhabhūmi sabbametena labbhati.
@Footnote: 1 Ma. susaṇṭhānā.
|9.16| Evaṃ mahatthikā esā yadidaṃ puññasampadā
tasmā dhīrā pasaṃsanti paṇḍitā katapuññatanti.
Nidhikaṇḍaṃ niṭṭhitaṃ.
-------
Khuddakapāṭhe karaṇīyamettasuttaṃ
[10] |10.1| Karaṇīyamatthakusalena yantaṃ santaṃ padaṃ abhisamecca
sakko ujū ca suhujū ca suvaco cassa mudu anatimānī
|10.2| santussako ca subharo ca appakicco ca sallahukavutti
santindriyo ca nipako ca appagabbho kulesu ananugiddho.
|10.3| Na ca khuddaṃ samācare kiñci yena viññū pare upavadeyyuṃ.
Sukhino vā khemino hontu sabbe sattā bhavantu sukhitattā
|10.4| yekeci pāṇabhūtatthi tasā vā thāvarā vā anavasesā
dīghā vā ye mahantā vā majjhimā rassakā aṇukathūlā
|10.5| diṭṭhā vā ye 1- ca adiṭṭhā ye 1- ca dūre vasanti avidūre
bhūtā vā sambhavesī vā sabbe sattā bhavantu sukhitattā
|10.6| na paro paraṃ nikubbetha nātimaññetha katthaci naṃ 2- kiñci
byārosanā paṭīghasaññā nāññamaññassa dukkhamiccheyya.
|10.7| Mātā yathā niyaṃ puttaṃ āyusā ekaputtamanurakkhe
evampi sabbabhūtesu mānasambhāvaye aparimāṇaṃ
@Footnote: 1 Ma. ye va. 2 Ma. na kiñci.
|10.8| Mettañca sabbalokasmiṃ mānasambhāvaye aparimāṇaṃ
uddhaṃ adho ca tiriyañca asambādhaṃ averaṃ asapattaṃ
|10.9| tiṭṭhañcaraṃ nisinno vā sayāno vā yāva tassa vigatamiddho
etaṃ satiṃ adhiṭṭheyya brahmametaṃ vihāraṃ idhamāhu 1-.
|10.10| Diṭṭhiñca anupagamma sīlavā dassanena sampanno
kāmesu vineyya 2- gedhaṃ na hi jātu gabbhaseyyaṃ punaretīti.
Mettasuttaṃ niṭṭhitaṃ.
Khuddakapāṭho samatto.
-------
@Footnote: 1 Ma. vihāramidhamāhu . 2 Ma. vinaya.
Suttantapiṭake khuddakanikāyassa
dhammapadagāthā
---------
namo tassa bhagavato arahato sammāsambuddhassa.
Dhammapadagāthāya paṭhamo yamakavaggo
[11] /khu.dha./ |11.1| 1 Manopubbaṅgamā dhammā manoseṭṭhā manomayā
manasā ce paduṭṭhena bhāsati vā karoti vā
tato naṃ dukkhamanveti cakkaṃva vahato padaṃ.
|11.2| Manopubbaṅgamā dhammā manoseṭṭhā manomayā
manasā ce pasannena bhāsati vā karoti vā
tato naṃ sukhamanveti chāyāva anupāyinī.
|11.3| Akkocchi maṃ avadhi maṃ ajini maṃ ahāsi me
ye ca taṃ upanayhanti veraṃ tesaṃ na sammati.
|11.4| Akkocchi maṃ avadhi maṃ ajini maṃ ahāsi me
ye ca taṃ nūpanayhanti veraṃ tesūpasammati.
|11.5| Na hi verena verāni sammantīdha kudācanaṃ
averena ca sammanti esa dhammo sanantano.
|11.6| Pare ca na vijānanti mayamettha yamāmhase
ye ca tattha vijānanti tato sammanti medhagā.
|11.7| Subhānupassiṃ viharantaṃ indriyesu asaṃvutaṃ
bhojanamhi amattaññuṃ 1- kusītaṃ hīnavīriyaṃ
taṃ ve pasahati māro vāto rukkhaṃva dubbalaṃ.
|11.8| Asubhānupassiṃ viharantaṃ indriyesu susaṃvutaṃ
bhojanamhi ca mattaññuṃ saddhaṃ āraddhavīriyaṃ
taṃ ve nappasahati māro vāto selaṃva pabbataṃ.
|11.9| Anikkasāvo kāsāvaṃ yo vatthaṃ paridahessati
apeto damasaccena na so kāsāvamarahati.
|11.10| Yo ca vantakasāvassa sīlesu susamāhito
upeto damasaccena sa ve kāsāvamarahati.
|11.11| Asāre sāramatino sāre cāsāradassino
te sāraṃ nādhigacchanti micchāsaṅkappagocarā.
|11.12| Sārañca sārato ñatvā asārañca asārato
te sāraṃ adhigacchanti sammāsaṅkappagocarā.
|11.13| Yathā agāraṃ ducchannaṃ vuṭṭhī samativijjhati
evaṃ abhāvitaṃ cittaṃ rāgo samativijjhati.
|11.14| Yathā agāraṃ succhannaṃ vuṭṭhī na samativijjhati
evaṃ subhāvitaṃ cittaṃ rāgo na samativijjhati.
@Footnote: 1 Ma. cāmattaññuṃ.
|11.15| Idha socati pecca socati pāpakārī ubhayattha socati
so socati so vihaññati disvā kammakiliṭṭhamattano.
|11.16| Idha modati pecca modati katapuñño ubhayattha modati
so modati so pamodati disvā kammavisuddhimattano.
|11.17| Idha tappati pecca tappati pāpakārī ubhayattha tappati
pāpaṃ me katanti tappati bhiyyo tappati duggatiṃ gato.
|11.18| Idha nandati pecca nandati katapuñño ubhayattha nandati
puññaṃ me katanti nandati bhiyyo nandati sugatiṃ gato.
|11.19| Bahumpi ce sahitaṃ 1- bhāsamāno
na takkaro hoti naro pamatto
gopova gāvo gaṇayaṃ paresaṃ
na bhāgavā sāmaññassa hoti.
|11.20| Appampi ce sahitaṃ bhāsamāno
dhammassa hoti anudhammacārī
rāgañca dosañca pahāya mohaṃ
sammappajāno suvimuttacitto
anupādiyāno idha vā huraṃ vā
sa bhāgavā sāmaññassa hoti.
Yamakavaggo paṭhamo.
--------------
@Footnote: 1 Ma. saṃhita..
Dhammapadagāthāya dutiyo appamādavaggo
[12] |12.21| 2 Appamādo amataṃ padaṃ pamādo maccuno padaṃ
appamattā na mīyanti ye pamattā yathā matā
|12.22| etaṃ 1- visesato ñatvā appamādamhi paṇḍitā
appamāde pamodanti ariyānaṃ gocare ratā
|12.23| te jhāyino sātatikā niccaṃ daḷhaparakkamā
phusanti dhīrā nibbānaṃ yogakkhemaṃ anuttaraṃ.
|12.24| Uṭṭhānavato satimato sucikammassa nisammakārino
saññatassa ca dhammajīvino appamattassa yasobhivaḍḍhati.
|12.25| Uṭṭhānenappamādena saññamena damena ca
dīpaṃ kayirātha medhāvī yaṃ ogho nābhikīrati.
|12.26| Pamādamanuyuñjanti bālā dummedhino janā
appamādañca medhāvī dhanaṃ seṭṭhaṃva rakkhati.
|12.27| Mā pamādamanuyuñjetha mā kāmaratisanthavaṃ
appamatto hi jhāyanto pappoti vipulaṃ sukhaṃ.
|12.28| Pamādaṃ appamādena yadā nudati paṇḍito
paññāpāsādamāruyha asoko sokiniṃ pajaṃ
pabbataṭṭhova bhummaṭṭhe dhīro bāle avekkhati.
|12.29| Appamatto pamattesu suttesu bahujāgaro
@Footnote: 1 Ma. evaṃ.
Abalassaṃva sīghasso hitvā yāti sumedhaso.
|12.30| Appādena maghavā devānaṃ seṭṭhataṃ gato
appamādaṃ pasaṃsanti pamādo garahito sadā.
|12.31| Appamādarato bhikkhu pamāde bhayadassi vā
saññojanaṃ aṇuṃ thūlaṃ ḍahaṃ aggīva gacchati.
|12.32| Appamādarato bhikkhu pamāde bhayadassi vā
abhabbo parihānāya nibbānasseva santike.
Appamādavaggo dutiyo.
--------
Dhammapadagāthāya tatiyo cittavaggo
[13] |13.33| 3 Phandanaṃ capalaṃ cittaṃ durakkhaṃ dunnivārayaṃ
ujuṃ karoti medhāvī usukārova tejanaṃ
|13.34| vārijova thale khitto okamokataubbhato
pariphandatidaṃ cittaṃ māradheyyaṃ pahātave.
|13.35| Dunniggahassa lahuno yattha kāmanipātino
cittassa damatho sādhu cittaṃ dantaṃ sukhāvahaṃ.
|13.36| Sududdasaṃ sunipuṇaṃ yattha kāmanipātinaṃ
cittaṃ rakkhetha medhāvī cittaṃ guttaṃ sukhāvahaṃ.
|13.37| Dūraṅgamaṃ ekacaraṃ asarīraṃ guhāsayaṃ
Ye cittaṃ saññamessanti mokkhanti mārabandhanā.
|13.38| Anavaṭṭhitacittassa saddhammaṃ avijānato
pariplavapasādassa paññā na paripūrati
|13.39| anavassutacittassa ananvāhatacetaso
puññapāpapahīnassa natthi jāgarato bhayaṃ.
|13.40| Kumbhūpamaṃ kāyamidaṃ viditvā
nagarūpamaṃ cittamidaṃ thaketvā
yodhetha 1- māraṃ paññāvudhena
jitañca rakkhe anivesino 2- siyā.
|13.41| Aciraṃ vatayaṃ kāyo paṭhaviṃ adhisessati
chuḍḍo 3- apetaviññāṇo niratthaṃva kaliṅgaraṃ.
|13.42| Diso disaṃ yantaṃ kayirā verī vā pana verinaṃ
micchāpaṇihitaṃ cittaṃ pāpiyo naṃ tato kare.
|13.43| Na taṃ mātā pitā kayirā aññe vāpi ca ñātakā
sammāpaṇihitaṃ cittaṃ seyyaso naṃ tato kare.
Cittavaggo tatiyo.
---------
@Footnote: 1 Sī. yojetha . 2 sabbapotthakesu anivesanoti dissati . 3 Ma. Yu. chuddho.
Dhammapadagāthāya catuttho pupphavaggo
[14] |14.44| 4 Ko imaṃ paṭhaviṃ vijessati yamalokañca imaṃ sadevakaṃ
ko dhammapadaṃ sudesitaṃ kusalo pupphamiva pacessati.
|14.45| Sekho paṭhaviṃ vijessati yamalokañca imaṃ sadevakaṃ
sekho dhammapadaṃ sudesitaṃ kusalo pupphamiva pacessati.
|14.46| Pheṇūpamaṃ kāyamimaṃ viditvā
marīcidhammaṃ abhisambudhāno
chetvāna mārassa papupphakāni
adassanaṃ maccurājassa gacche.
|14.47| Pupphāni heva pacinantaṃ byāsattamanasaṃ naraṃ
suttaṃ gāmaṃ mahoghova maccu ādāya gacchati.
|14.48| Pupphāni heva pacinantaṃ byāsattamanasaṃ naraṃ
atittaṃ yeva kāmesu antako kurute vasaṃ.
|14.49| Yathāpi bhamaro pupphaṃ vaṇṇavantaṃ 1- aheṭhayaṃ
paleti rasamādāya evaṃ gāme munī care.
|14.50| Na paresaṃ vilomāni na paresaṃ katākataṃ
attano va avekkheyya katāni akatāni ca.
|14.51| Yathāpi ruciraṃ pupphaṃ vaṇṇavantaṃ agandhakaṃ
evaṃ subhāsitā vācā aphalā hoti akubbato.
@Footnote: 1 Po. Ma. Yu. vaṇṇagandhaṃ.
|14.52| Yathāpi ruciraṃ pupphaṃ vaṇṇavantaṃ sagandhakaṃ 1-
evaṃ subhāsitā vācā saphalā hoti sukubbato.
|14.53| Yathāpi puppharāsimhā kayirā mālāguḷe 2- bahū
evaṃ jātena maccena kattabbaṃ kusalaṃ bahuṃ.
|14.54| Na pupphagandho paṭivātameti
na candanaṃ tagaramallikā vā
satañca gandho paṭivātameti
sabbā disā sappuriso pavāyati.
|14.55| Candanaṃ tagaraṃ vāpi uppalaṃ atha vassikī
etesaṃ gandhajātānaṃ sīlagandho anuttaro.
|14.56| Appamatto ayaṃ gandho yvāyaṃ tagaracandanī
yo ca sīlavataṃ gandho vāti devesu uttamo.
|14.57| Tesaṃ sampannasīlānaṃ appamādavihārinaṃ
sammadaññā vimuttānaṃ māro maggaṃ na vindati.
|14.58| Yathā saṅkāradhānasmiṃ ujjhitasmiṃ mahāpathe
padumaṃ tattha jāyetha sucigandhaṃ manoramaṃ
|14.59| evaṃ saṅkārabhūtesu andhabhūte puthujjane
atirocati paññāya sammāsambuddhasāvako.
Pupphavaggo catuttho.
@Footnote: 1 Po. Ma. sugandhakaṃ . 2 Po. Ma. Yu. mālāguṇe.
Dhammapadagāthāya pañcamo bālavaggo
[15] |15.60| 5 Dīghā jāgarato ratti dīghaṃ santassa yojanaṃ
dīgho bālāna saṃsāro saddhammaṃ avijānataṃ.
|15.61| Carañce nādhigaccheyya seyyaṃ sadisamattano
ekacariyaṃ daḷhaṃ kayirā natthi bāle sahāyatā.
|15.62| Puttā matthi dhanamatthi iti bālo vihaññati
attā hi attano natthi kuto puttā kuto dhanaṃ.
|15.63| Yo bālo maññatī bālyaṃ paṇḍito vāpi tena so
bālo ca paṇḍitamānī sa ve bāloti vuccati.
|15.64| Yāvajīvampi ce bālo paṇḍitaṃ payirupāsati
na so dhammaṃ vijānāti dabbī sūparasaṃ yathā.
|15.65| Muhuttamapi ce viññū paṇḍitaṃ payirupāsati
khippaṃ dhammaṃ vijānāti jivhā sūparasaṃ yathā.
|15.66| Caranti bālā dummedhā amitteneva attanā
karontā pāpakaṃ kammaṃ yaṃ hoti kaṭukapphalaṃ.
|15.67| Na taṃ kammaṃ kataṃ sādhu yaṃ katvā anutappati
yassa assumukho rodaṃ vipākaṃ paṭisevati.
|15.68| Tañca kammaṃ kataṃ sādhu yaṃ katvā nānutappati
yassa patīto sumano vipākaṃ paṭisevati.
|15.69| Madhuvā maññatī bālo yāva pāpaṃ na paccati
yadā ca paccati pāpaṃ atha (bālo) dukkhaṃ nigacchati.
|15.70| Māse māse kusaggena bālo bhuñjetha bhojanaṃ
na so saṅkhātadhammānaṃ kalaṃ agghati soḷasiṃ.
|15.71| Na hi pāpaṃ kataṃ kammaṃ sajjukhīraṃva muccati
ḍahantaṃ bālamanveti bhasmācchannova pāvako.
|15.72| Yāvadeva anatthāya ñattaṃ bālassa jāyati
hanti bālassa sukkaṃsaṃ muddhaṃ assa vipātayaṃ.
|15.73| Asantaṃ bhāvamiccheyya 1- purekkhārañca bhikkhusu
āvāsesu ca issariyaṃ pūjā parakulesu ca
|15.74| mameva katamaññantu gihī pabbajitā ubho
mameva ativasā assu kiccākiccesu kismici
iti bālassa saṅkappo issā māno ca vaḍḍhati.
|15.75| Aññā hi lābhūpanisā aññā nibbānagāminī
evametaṃ abhiññāya bhikkhu buddhassa sāvako
sakkāraṃ nābhinandeyya vivekamanubrūhaye.
Bālavaggo pañcamo.
---------
@Footnote: 1 Po. Ma. Yu. bhāvanamiccheyya.
Dhammapadagāthāya chaṭṭho paṇḍitavaggo
[16] |16.76| 6 Nidhīnaṃva pavattāraṃ yaṃ passe vajjadassinaṃ
niggayhavādiṃ medhāviṃ tādisaṃ paṇḍitaṃ bhaje
tādisaṃ bhajamānassa seyyo hoti na pāpiyo.
|16.77| Ovadeyyānusāseyya asabbhā ca nivāraye
sataṃ hi so piyo hoti asataṃ hoti appiyo.
|16.78| Na bhaje pāpake mitte na bhaje purisādhame
bhajetha mitte kalyāṇe bhajetha purisuttame.
|16.79| Dhammapīti sukhaṃ seti vippasannena cetasā
ariyappavedite dhamme sadā ramati paṇḍito.
|16.80| Udakañhi nayanti nettikā
usukārā namayanti tejanaṃ
dāruṃ namayanti tacchakā
attānaṃ damayanti paṇḍitā.
|16.81| Selo yathā ekaghano vātena na samīrati
evaṃ nindāpasaṃsāsu na sammiñjanti 1- paṇḍitā.
|16.82| Yathāpi rahado gambhīro vippasanno anāvilo
evaṃ dhammāni sutvāna vippasīdanti paṇḍitā.
|16.83| Sabbattha ve sappurisā vajanti 2-
@Footnote: 1 Ma. Yu. samiñjanti . 2 Ma. Yu. cajanti.
Na kāmakāmā lapayanti santo
sukhena phuṭṭhā athavā dukkhena
na uccāvacaṃ paṇḍitā dassayanti.
|16.84| Na attahetu na parassa hetu
na puttamicche na dhanaṃ na raṭṭhaṃ
na iccheyya adhammena samiddhimattano
sa sīlavā paññavā dhammiko siyā.
|16.85| Appakā te manussesu ye janā pāragāmino
athāyaṃ itarā pajā tīramevānudhāvati.
|16.86| Ye ca kho sammadakkhāte dhamme dhammānuvattino
te janā pāramessanti maccudheyyaṃ suduttaraṃ.
|16.87| Kaṇhaṃ dhammaṃ vippahāya sukkaṃ bhāvetha paṇḍito
okā anokamāgamma viveke yattha dūramaṃ
|16.88| tatrābhiratimiccheyya hitvā kāme akiñcano
pariyodapeyya attānaṃ cittaklesehi paṇḍito.
|16.89| Yesaṃ sambodhiyaṅgesu sammā cittaṃ subhāvitaṃ
ādānapaṭinissagge anupādāya ye ratā
khīṇāsavā jutimanto te loke parinibbutā.
Paṇḍitavaggo chaṭṭho.
-----------
Dhammapadagāthāya sattamo arahantavaggo
[17] |17.90| 7 Gataddhino visokassa vippamuttassa sabbadhi
sabbaganthappahīnassa pariḷāho na vijjati.
|17.91| Uyyuñjanti satīmanto na nikete ramanti te
haṃsāva pallalaṃ hitvā okamokaṃ jahanti te.
|17.92| Yesaṃ sanniccayo 1- natthi ye pariññātabhojanā
suññato animitto ca vimokkho yesa gocaro
ākāseva sakuntānaṃ gati tesaṃ durannayā.
|17.93| Yassāsavā parikkhīṇā āhāre ca anissito
suññato animitto ca vimokkho yassa gocaro
ākāseva sakuntānaṃ padantassa durannayaṃ.
|17.94| Yassindriyāni samathaṅgatāni
assā yathā sārathinā sudantā
pahīnamānassa anāsavassa
devāpi tassa pihayanti tādino.
|17.95| Paṭhavīsamo no virujjhati
indakhīlūpamo tādi subbato
rahadova apetakaddamo
saṃsārā na bhavanti tādino.
@Footnote: 1 Ma. Yu. sannicayo.
|17.96| Santaṃ tassa manaṃ hoti santā vācā ca kamma ca
sammadaññā vimuttassa upasantassa tādino.
|17.97| Assaddho akataññū ca sandhicchedo ca yo naro
hatāvakāso vantāso sa ve uttamaporiso.
|17.98| Gāme vā yadi vā raññe ninne vā yadi vā thale
yattha arahanto viharanti taṃ bhūmirāmaṇeyyakaṃ.
|17.99| Ramaṇīyāni araññāni yattha na ramatī jano
vītarāgā ramessanti na te kāmagavesino.
Arahantavaggo sattamo.
----------
Dhammapadagāthāya aṭṭhamo sahassavaggo
[18] |18.100| 8 Sahassamapi ce vācā anatthapadasañhitā
ekaṃ atthapadaṃ seyyo yaṃ sutvā upasammati.
|18.101| Sahassamapi ce gāthā anatthapadasañhitā
ekaṃ gāthāpadaṃ seyyo yaṃ sutvā upasammati.
|18.102| Yo ca gāthāsataṃ bhāse anatthapadasañhitā
ekaṃ dhammapadaṃ seyyo yaṃ sutvā upasammati.
|18.103| Yo sahassaṃ sahassena saṅgāme mānuse jine
ekañca jeyyamattānaṃ sa ve saṅgāmajuttamo.
|18.104| Attā have jitaṃ seyyo yā cāyaṃ itarā pajā
attadantassa posassa niccaṃ saññatacārino
|18.105| neva devo na gandhabbo na māro saha brahmunā
jitaṃ apajitaṃ kayirā tathārūpassa jantuno.
|18.106| Māse māse sahassena yo yajetha sataṃ samaṃ
ekañca bhāvitattānaṃ muhuttamapi pūjaye
sā yeva pūjanā seyyo yañce vassasataṃ hutaṃ.
|18.107| Yo ca vassasataṃ jantu aggiṃ paricare vane
ekañca bhāvitattānaṃ muhuttamapi pūjaye
sā yeva pūjanā seyyo yañce vassasataṃ hutaṃ.
|18.108| Yaṅkiñci yiṭṭhaṃ va hutaṃ va loke
saṃvaccharaṃ yajetha puññapekkho
sabbaṃpi taṃ na catubhāgameti
abhivādanā ujugatesu seyyo.
|18.109| Abhivādanasīlissa niccaṃ vuḍḍhāpacāyino
cattāro dhammā vaḍḍhanti āyu vaṇṇo sukhaṃ balaṃ.
|18.110| Yo ca vassasataṃ jīve dussīlo asamāhito
ekāhaṃ jīvitaṃ seyyo sīlavantassa jhāyino.
|18.111| Yo ca vassasataṃ jīve duppañño asamāhito
ekāhaṃ jīvitaṃ seyyo paññavantassa jhāyino.
|18.112| Yo ca vassasataṃ jīve kusīto hīnavīriyo
ekāhaṃ jīvitaṃ seyyo viriyaṃ ārabhato daḷhaṃ.
|18.113| Yo ca vassasataṃ jīve apassaṃ udayabbayaṃ
ekāhaṃ jīvitaṃ seyyo passato udayabbayaṃ.
|18.114| Yo ca vassasataṃ jīve apassaṃ amataṃ padaṃ
ekāhaṃ jīvitaṃ seyyo passato amataṃ padaṃ.
|18.115| Yo ca vassasataṃ jīve apassaṃ dhammamuttamaṃ
ekāhaṃ jīvitaṃ seyyo passato dhammamuttamaṃ.
Sahassavaggo aṭṭhamo.
----------
The Pali Tipitaka in Roman Character Volume 25 page 1-30.
https://84000.org/tipitaka/read/roman_item.php?book=25&item=1&items=18
Classified by [Item Number] :-
http://84000.org/tipitaka/read/roman_item.php?book=25&item=1&items=18&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=25&item=1&items=18
Compare with The Royal Version of Thai Tipitaka :-
https://84000.org/tipitaka/read/byitem.php?book=25&item=1&items=18
Study Atthakatha :-
https://84000.org/tipitaka/attha/attha.php?b=25&i=1
Contents of The Tipitaka Volume 25
https://84000.org/tipitaka/read/?index_25
https://84000.org/tipitaka/english/?index_25
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
