[355] |355.850| 2 Taṃ maṃ padhānapahitattaṃ nadiṃ nerañjarampati
viparakkamma jhāyantaṃ yogakkhemassa pattiyā
|355.851| namucī karuṇaṃ vācaṃ bhāsamāno upāgami
kīso tvamasi dubbaṇṇo santike maraṇaṃ tava.
|355.852| Sahassabhāgo maraṇassa ekaṃso tava jīvitaṃ
jīvato 1- jīvitaṃ seyyo jīvaṃ puññāni kāhasi.
|355.853| Carato ca te brahmacariyaṃ aggihutañca jūhato
pahūtaṃ cīyate puññaṃ kiṃ padhānena kāhasi.
|355.854| Duggo maggo padhānāya dukkaro durabhisambhavo
imā gāthā bhaṇaṃ māro aṭṭhā buddhassa santike.
|355.855| Taṃ tathāvādinaṃ māraṃ bhagavā etadabravi
pamattabandhu pāpima yenatthena idhāgato
|355.856| aṇumattopi 2- puññena attho mayhaṃ na vijjati
yesañca attho puññena te māro vattumarahati.
|355.857| Atthi saddhā tapo 3- viriyaṃ paññā ca mama vijjati
evaṃ maṃ pahitattaṃpi kiṃ jīvamanupucchasi.
|355.858| Nadīnampi sotāni ayaṃ vāto visosaye
@Footnote: 1 Ma. Yu. jīva bho. 2 Yu. aṇumattenapi. 3 Ma. tathā. Yu. tato.
Kiñca me pahitattassa lohitaṃ nūpasussaye.
|355.859| Lohite sussamānamhi pittaṃ semhañca sussati
maṃsesu khīyamānesu bhiyyo cittaṃ pasīdati
bhiyyo sati ca paññā ca samādhi mama tiṭṭhati.
|355.860| Tassa mevaṃ viharato pattassuttamavedanaṃ
kāme 1- nāpekkhate cittaṃ passa sattassa suddhataṃ.
|355.861| Kāmā te paṭhamā senā dutiyārati vuccati
tatiyā khuppipāsā te catutthī taṇhā pavuccati
|355.862| pañcamaṃ thīnamiddhante chaṭṭhā bhīrū pavuccati
sattamī 2- vicikicchā te makkho thambho te aṭṭhamo
|355.863| lābho siloko sakkāro micchā laddho ca yo yaso
yo cattānaṃ samukkaṃse pare ca avajānati
|355.864| esā namuci te senā kaṇhassābhippahārinī
na naṃ asūro jināti jetvā ca labhate sukhaṃ.
|355.865| Esa muñjaṃ parihare dhiratthu mama 3- jīvitaṃ
saṅgāme me mataṃ seyyo yañce jīve parājito.
|355.866| Pagāḷhā ettha na dissanti eke samaṇabrāhmaṇā
tañca maggaṃ na jānanti yena gacchanti subbatā.
|355.867| Samantā dhajiniṃ disvā yuttaṃ māraṃ savāhanaṃ
yuddhāya paccugacchāmi mā maṃ ṭhānā acāvayi.
@Footnote: 1 Ma. Yu. kāmesu . 2 Po. sattamā . 3 Yu. idha.
|355.868| Yante taṃ nappasahati senaṃ loko sadevako
tante paññāya vecchāmi 1- āmaṃ pakkaṃva 2- amhanā.
|355.869| Vasiṃ 3- karitvā saṅkappaṃ satiñca supatiṭṭhitaṃ
raṭṭhā raṭṭhaṃ vicarissaṃ sāvake vinayaṃ puthū.
|355.870| Te appamattā pahitattā mama sāsanakārakā
akāmassa te gamissanti yattha gantvā na socare.
|355.871| Satta vassāni bhagavantaṃ anubandhiṃ padāpadaṃ
otāraṃ nādhigacchissaṃ sambuddhassa sirīmato.
|355.872| Medavaṇṇaṃva pāsāṇaṃ vāyaso anupariyagā
apettha muduṃ vindema api assādanā siyā.
|355.873| Aladdhā tattha assādaṃ vāyasetto apakkami
kākova selaṃ āsajja nibbijjāpema gotamaṃ.
|355.874| Tassa sokaparetassa viṇā kacchā abhassatha
tato so dummano yakkho tatthevantaradhāyathāti.
Padhānasuttaṃ dutiyaṃ.
-----------
Suttanipāte tatiyassa mahāvaggassa tatiyaṃ subhāsitasuttaṃ
[356] 3 Evamme sutaṃ . ekaṃ samayaṃ bhagavā sāvatthiyaṃ
viharati jetavane anāthapiṇḍikassa ārāme . tatra kho bhagavā
@Footnote: 1 Ma. bhecchāmi. Yu. gacchāmi. 2 Ma. Yu. pattaṃ . 3 Ma. vasīkaritvā.
Bhikkhū āmantesi bhikkhavoti . bhadanteti te bhikkhū bhagavato
paccassosuṃ . bhagavā etadavoca catūhi bhikkhave aṅgehi samannāgatā
vācā subhāsitā hoti na dubbhāsitā anavajjā ca ananuvajjā ca
viññūnaṃ katamehi catūhi idha [1]- subhāsitaññeva bhāsati no
dubbhāsitaṃ dhammaññeva bhāsati no adhammaṃ piyaññeva bhāsati
no appiyaṃ saccaññeva bhāsati no alikaṃ . imehi kho
bhikkhave catūhi aṅgehi samannāgatā vācā subhāsitā hoti na 2-
dubbhāsitā anavajjā ca ananuvajjā ca viññūnanti.
Idamavoca bhagavā idaṃ vatvāna sugato
athāparaṃ etadavoca satthā
subhāsitaṃ uttamamāhu santo
dhammaṃ bhaṇe na 3- adhammaṃ taṃ dutiyaṃ
piyaṃ bhaṇe na appiyaṃ 3- taṃ tatiyaṃ
saccaṃ bhaṇe nālikantaṃ catutthanti.
[357] Atha kho āyasmā vaṅgīso uṭṭhāyāsanā ekaṃsaṃ
cīvaraṃ katvā yena bhagavā tenañjalimpaṇāmetvā bhagavantaṃ
etadavoca paṭibhāti maṃ bhagavā paṭibhāti maṃ sugatāti . paṭibhātu
taṃ vaṅgīsāti bhagavā avoca . atha kho āyasmā vaṅgīso [4]- sammukhā
sāruppāhi gāthāhi abhitthavi
|357.875| tameva vācaṃ bhāseyya yāyattānaṃ na tāpaye
@Footnote: 1 Ma. Yu. bhikkhave bhikkhu. 2 Ma. no . 3 Ma. Yu. nādhammaṃ nāppayaṃ.
@4 Ma. Yu. bhagavantaṃ.
Pare ca na vihiṃseyya sā ve vācā subhāsitā.
|357.876| Piyavācameva bhāseyya yā vācā patinanditā
yaṃ anādāya pāpāni paresaṃ bhāsate piyaṃ.
|357.877| Saccaṃ ve amatā vācā esa dhammo sanantano
sacce atthe ca dhamme ca ahu santo patiṭṭhitā.
|357.878| Yaṃ buddho bhāsati vācaṃ khemaṃ nibbānapattiyā
dukkhassantakiriyāya sā ve vācānamuttamāti.
Subhāsitasuttaṃ tatiyaṃ.
------------
Suttanipāte tatiyassa mahāvaggassa catutthaṃ sundarikasuttaṃ
[358] 4 Evamme sutaṃ . ekaṃ samayaṃ bhagavā kosalesu viharati
sundarikāya nadiyā tīre . tena kho pana samayena sundarikabhāradvājo
brāhmaṇo sundarikāya nadiyā tīre aggiṃ juhati aggihutaṃ
paricarati . atha kho sundarikabhāradvājo brāhmaṇo aggiṃ juhitvā
aggihutaṃ paricaritvā uṭṭhāyāsanā samantā catuddisā anuvilokesi
ko nu kho imaṃ habyasesaṃ bhuñjeyyāti. Addasā kho sundarikabhāradvājo
brāhmaṇo bhagavantaṃ avidūre aññatarasmiṃ rukkhamūle sasīsaṃ pārutaṃ
nisinnaṃ disvāna vāmena hatthena habyasesaṃ gahetvā dakkhiṇena
hatthena kamaṇḍaluṃ [1]- yena bhagavā tenupasaṅkami.
{358.4} Atha kho bhagavā sundarikabhāradvājassa brāhmaṇassa padasaddena
@Footnote: 1 Ma. Yu. gahetvā.
Sīsaṃ vivari . atha kho sundarikabhāradvājo brāhmaṇo muṇḍo
ayaṃ bhavaṃ muṇḍako ayaṃ bhavanti tato puna nivattitukāmo ahosi .
Atha kho sundarikabhāradvājassa brāhmaṇassa etadahosi muṇḍāpi
hidhekacce brāhmaṇā bhavanti yannūnāhaṃ upasaṅkamitvā jātiṃ
puccheyyanti . atha kho sundarikabhāradvājo brāhmaṇo yena bhagavā
tenupasaṅkami upasaṅkamitvā bhagavantaṃ etadavoca kiṃjacco bhavanti .
Atha kho bhagavā sundarikabhāradvājaṃ brāhmaṇaṃ gāthāya 1- ajjhabhāsi
[359] |359.879| Na brāhmaṇo nomhi na rājaputto
na vessāyano uda koci nomhi
gottaṃ pariññāya puthujjanānaṃ
akiñcano manta carāmi loke
|359.880| saṅghāṭivāsī agaho carāmi
nivuttakeso abhinibbutatto
alimpamāno idha māṇavehi
akallaṃ 2- maṃ (brāhmaṇa) pucchasi gottapañhaṃ
|359.881| pucchanti ve bho brāhmaṇā brāhmaṇehi
saha brāhmaṇo no bhavanti.
|359.882| Brāhmaṇo ce tvaṃ brūsi mañca brūsi abrāhmaṇaṃ
taṃ taṃ sāvittiṃ pucchāmi tipadaṃ catuvīsatakkharaṃ.
@Footnote: 1 Ma. Yu. gāthāhi . 2 Po. Yu. akalla.
|359.883| Kiṃ nissitā isayo manujā
khattiyā brāhmaṇā devatānaṃ
yaññamakappiṃsu puthūdha loke.
|359.884| Yadantagū vedagū yaññakāle
yassāhutiṃ labhe tassijjheti brūmi.
|359.885| Addhā hi tassa hutamijjhe (ti brāhmaṇo)
yaṃ tādisaṃ vedaguṃ addasāma
tumhādisānañhi adassanena
añño jano bhuñjati pūraḷāsaṃ.
|359.886| Tasmā tiha tvaṃ brāhmaṇa atthena
atthiko upasaṅkamma puccha
santaṃ vidhūmaṃ anighaṃ nirāsaṃ
appevidha abhivinde sumedhaṃ
|359.887| yaññe ratohaṃ 1- (bho gotama) yaññaṃ yiṭṭhukāmo 2-
nāhaṃ pajānāmi anusāsatu maṃ bhavaṃ
yattha hutaṃ ijjhate brūhi metaṃ.
Tena hi tvaṃ brāhmaṇa odahassu sotaṃ
dhammaṃ te desissāmi
|359.888| mā jātiṃ puccha 3- caraṇañca puccha
kaṭṭhā have jāyati jātavedo
@Footnote: 1 Yu. ratāhaṃ . 2 Yu. yaṭṭhukāmo . 3 Ma. pucchi.
Nīcākulīnopi munī dhitīmā
ājāniyo hoti hirīnisedho.
|359.889| Saccena danto damasā upeto
vedantagū vūsitabrahmacariyo
kālena tamhi habyaṃ pavecche
yo brāhmaṇo puññapekkho yajetha.
|359.890| Ye kāme hitvā agahā caranti
susaññatattā tasaraṃva ujjuṃ 1-
kālena tesu habyaṃ pavecche
yo brāhmaṇo puññapekkho yajetha.
|359.891| Ye vītarāgā susamāhitindriyā
candova rāhugahaṇā pamutto 2-
kālena tesu habyaṃ pavecche
yo brāhmaṇo puññapekkho yajetha.
|359.892| Āsajjamānā vicaranti loke
sadā satā hitvā mamāyitāni
kālena tesu habyaṃ pavecche
yo brāhmaṇo puññapekkho yajetha.
|359.893| Yo kāme hitvā abhibhuyyacārī
yo vedi jātīmaraṇassa antaṃ
parinibbuto udakarahadova sīto
tathāgato arahati pūraḷāsaṃ.
@Footnote: 1 Po. Yu. ujju. 2 Po. Ma. Yu. pamuttā.
|359.894| Samo samehi visamehi dūre
tathāgato hoti anantapañño
anūpalitto idha vā huraṃ vā
tathāgato arahati pūraḷāsaṃ.
|359.895| Yamhi na māyā vasatī na māno
yo vītalobho amamo nirāso
panunnakodho abhinibbutatto
yo brāhmaṇo sokamalaṃ ahāsi
tathāgato arahati pūraḷāsaṃ.
|359.896| Nivesanaṃ yo manaso ahāsi
pariggahā yassa na santi keci
anupādiyāno idha vā huraṃ vā
tathāgato arahati pūraḷāsaṃ.
|359.897| Samāhito yo udatāri oghaṃ
dhammañca ñāsi 1- paramāya diṭṭhiyā
khīṇāsavo antimadehadhārī
tathāgato arahati pūraḷāsaṃ.
|359.898| Bhavāsavā yassa vacī kharā ca
vidhūpitā atthagatā na santi
sa vedagū sabbadhi vippamutto
@Footnote: 1 Ma. dhammaṃ caññāsi.
Tathāgato arahati pūraḷāsaṃ.
|359.899| Saṅgātigo yassa na santi saṅgā
yo mānasattesu amānasatto
dukkhaṃ pariññāya sakhettavatthuṃ
tathāgato arahati pūraḷāsaṃ.
|359.900| Āsaṃ anissāya vivekadassī
paravediyaṃ diṭṭhimupātivatto
ārammaṇā yassa na santi keci
tathāgato arahati pūraḷāsaṃ.
|359.901| Paroparā yassa samecca dhammā
vidhūpitā atthagatā na santi
santo upādānakkhaye vimutto
tathāgato arahati pūraḷāsaṃ.
|359.902| Saṃyojanaṃ jātikhayantadassī
yo pānudī rāgapathaṃ asesaṃ
suddho niddoso vimalo akāmo 1-
tathāgato arahati pūraḷāsaṃ.
|359.903| Yo attanāttānaṃ 2- nānupassati
samāhito ujugato ṭhitatto
sa ve anejo akhilo 3- akaṅkho
@Footnote: 1 Ma. Yu. akāco . 2 Ma. attano attānaṃ. 3 Po. avilo.
Tathāgato arahati pūraḷāsaṃ.
|359.904| Mohantarā yassa na santi keci
sabbesu dhammesu ca ñāṇadassī
sarīrañca antimaṃ dhāreti
patto ca sambodhimanuttaraṃ sivaṃ
ettāvatā yakkhassa suddhi
(tathāgato 1- arahati pūraḷāsaṃ .)
|359.905| hutañca mayhaṃ hutamatthu saccaṃ
yaṃ tādisaṃ vedagunaṃ alatthaṃ
brahmā hi sakkhi paṭigaṇhātu me bhagavā
bhuñjatu me bhagavā pūraḷāsaṃ.
|359.906| Gāthābhigītaṃ me abhojaneyyaṃ
samphassataṃ brāhmaṇa nesa dhammo
gāthābhigītaṃ panudanti buddhā
dhamme sati brāhmaṇa vuttiresā.
|359.907| Aññena ca kevalinaṃ mahesiṃ
khīṇāsavaṃ kukkuccavūpasantaṃ
annena pānena upaṭṭhahassu
khettañhi taṃ puññapekkhassa hoti.
@Footnote: 1 Yu. ayaṃ pāṭho dissati.
|359.908| Sādhāhaṃ bhagavā tathā vijaññaṃ
yo dakkhiṇaṃ bhuñjeyya mādisassa
yaṃ yaññakāle pariyesamāno
pappuyya tava sāsanaṃ.
|359.909| Sārambhā yassa vigatā cittaṃ yassa anāvilaṃ
vippamutto ca kāmehi thīnaṃ yassa panūditaṃ
|359.910| sīmantānaṃ vinetāraṃ jātimaraṇakovidaṃ
muniṃ moneyyasampannaṃ tādisaṃ yaññamāgataṃ
|359.911| bhakuṭiṃ vinayitvāna pañjalikā namassatha
pūjetha annapānena evaṃ ijjhanti dakkhiṇā.
|359.912| Buddho bhavaṃ arahati pūraḷāsaṃ puññakkhettamanuttaraṃ
āyāgo sabbalokasmiṃ 1- bhoto dinnaṃ mahapphalanti.
[360] Atha kho sundarikabhāradvājo brāhmaṇo bhagavantaṃ
etadavoca abhikkantaṃ bho gotama abhikkantaṃ bho gotama
seyyathāpi bho gotama nikkujjitaṃ vā ukkujjeyya paṭicchannaṃ vā
vivareyya mūḷhassa vā maggaṃ ācikkheyya andhakāre vā
telapajjotaṃ dhāreyya cakkhumanto rūpāni dakkhantīti evamevaṃ
bhotā gotamena anekapariyāyena dhammo pakāsito esāhaṃ bhavantaṃ
gotamaṃ saraṇaṃ gacchāmi dhammañca bhikkhusaṅghañca labheyyāhaṃ bhoto
gotamassa santike pabbajjaṃ labheyyaṃ upasampadanti . alattha
@Footnote: 1 Ma. Yu. sabbalokassa.
Kho sundarikabhāradvājo brāhmaṇo bhagavato santike pabbajjaṃ
alattha upasampadaṃ . .pe. aññataro kho panāyasmā
sundarikabhāradvājo arahataṃ ahosīti.
Sundarikabhāradvājasuttaṃ catutthaṃ.
-------------
Suttanipāte tatiyassa mahāvaggassa pañcamaṃ māghasuttaṃ
[361] 5 Evamme sutaṃ . ekaṃ samayaṃ bhagavā rājagahe
viharati gijjhakūṭe pabbate . atha kho māgho māṇavo yena
bhagavā tenupasaṅkami upasaṅkamitvā bhagavatā saddhiṃ sammodi
sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ
nisinno kho māgho māṇavo bhagavantaṃ etadavoca ahañhi bho
gotama dāyako dānapati vadaññū yācayogo dhammena bhoge
pariyesāmi dhammena bhoge pariyesitvā dhammaladdhehi bhogehi
dhammādhigatehi ekassapi dadāmi dvinnampi dadāmi tiṇṇampi dadāmi
catunnampi dadāmi pañcannampi dadāmi channampi dadāmi
sattannampi dadāmi aṭṭhannampi dadāmi navannampi dadāmi
dasannampi dadāmi vīsāyapi dadāmi tiṃsāyapi dadāmi cattāḷīsāyapi
dadāmi paññāsāyapi dadāmi satassapi dadāmi bhiyyopi dadāmi
kaccāhaṃ 1- bho gotama evaṃ dadanto evaṃ yajento 2- bahuṃ puññaṃ
@Footnote: 1 Po. sakkaccāhaṃ. 2 Ma. Yu. sabbattha yajantoti dissati.
Pasavāmīti.
{361.1} Taggha tvaṃ māṇava evaṃ dadanto evaṃ yajento
bahuṃ puññaṃ pasavasi . yo kho māṇava dāyako dānapati vadaññū
yācayogo dhammena bhoge pariyesati dhammena bhoge pariyesitvā
dhammaladdhehi bhogehi dhammādhigatehi ekassapi dadāti .pe. satassapi
dadāti bhiyyopi dadāti bahuṃ so puññaṃ pasavatīti . atha kho māgho
māṇavo bhagavantaṃ gāthāya ajjhabhāsi
[362] |362.913| Pucchāmahaṃ gotamaṃ vadaññuṃ (iti māgho māṇavo)
kāsāyavāsiṃ agahaṃ 1- carantaṃ
yo yācayogo dānapatī gahaṭṭho
puññatthiko yajati puññapekkho
dadaṃ paresaṃ idha annapānaṃ
kathaṃ hutaṃ yajamānassa sujjhe.
|362.914| (yo) yācayogo dānapatī gahaṭṭho (māghāti bhagavā)
puññatthiko yajati puññapekkho
dadaṃ paresaṃ idha annapānaṃ
ārādhaye dakkhiṇeyyehi tādi.
|362.915| (yo) yācayogo dānapatī gahaṭṭho (iti māgho māṇavo)
puññatthiko yajati puññapekkho
dadaṃ paresaṃ idha annapānaṃ
akkhāhi me bhagavā dakkhiṇeyye.
@Footnote: 1 Po. abhiṇhaṃ. Yu. agihaṃ.
|362.916| Ye ve alaggā 1- vicaranti loke
akiñcanā kevalino yatattā
kālena tesu habyaṃ pavecche
yo brāhmaṇo puññapekkho yajetha.
|362.917| Ye sabbasaṃyojanabandhanacchidā
dantā vimuttā anighā nirāsā
kālena tesu habyaṃ pavecche
yo brāhmaṇo puññapekkho yajetha.
|362.918| Ye sabbasaññojanavippamuttā
dantā vimuttā anighā nirāsā
kālena tesu habyaṃ pavecche.
|362.919| Rāgañca dosañca pahāya mohaṃ
khīṇāsavā vūsitabrahmacariyā
kālena tesu habyaṃ pavecche.
|362.920| Yesu na māyā vasatī na māno
khīṇāsavā vūsitabrahmacariyā
kālena tesu habyaṃ pavecche.
|362.921| Ye vītalobhā amamā nirāsā
khīṇāsavā vūsitabrahmacariyā
kālena tesu habyaṃ pavecche.
@Footnote: 1 Ma. Yu. asattā.
|362.922| Ye ve na taṇhāsu upātipannā 1-
vitareyya oghaṃ amamā caranti
kālena tesu habyaṃ pavecche.
|362.923| Yesaṃ [2]- taṇhā natthi kuhiñci loke
bhavābhavāya idha vā huraṃ vā
kālena tesu habyaṃ pavecche.
|362.924| Ye kāme hitvā agahā caranti
susaññatattā tasaraṃva ujjuṃ
kālena tesu habyaṃ pavecche.
|362.925| Ye vītarāgā susamāhitindriyā
candova rāhugahaṇā pamutto
kālena tesu habyaṃ pavecche.
|362.926| Samitāvino vītarāgā akopā
yesaṃ gatī natthi idha vippahāya
kālena tesu habyaṃ pavecche.
|362.927| Jahetvā jātimaraṇaṃ asesaṃ
kathaṅkathaṃ sabbamupātivattā
kālena tesu habyaṃ pavecche.
|362.928| Ye attadīpā vicaranti loke
akiñcanā sabbadhi vippamuttā
@Footnote: 1 Po. ye vītataṇhāsu upātivattā. 2 Yu. tu.
Kālena tesu habyaṃ pavecche.
|362.929| Ye hettha jānanti yathātathā idaṃ
ayamantimā natthi punabbhavoti
kālena tesu habyaṃ pavecche.
|362.930| Yo vedagū jhānarato satīmā
sambodhipatto saraṇaṃ bahunnaṃ
kālena tesu habyaṃ pavecche
yo brāhmaṇo puññapekkho yajetha.
|362.931| Addhā amoghā mama pucchanā ahu
akkhāsi me bhagavā dakkhiṇeyye
tvaṃ hettha jānāsi yathātathā idaṃ
tathā hi te vidito esa dhammo.
|362.932| (yo) yācayogo dānapatī gahaṭṭho (iti māgho māṇavo)
puññatthiko yajati puññapekkho
dadaṃ paresaṃ idha annapānaṃ
akkhāhi me bhagavā yaññasampadaṃ.
|362.933| Yajassu yajamāno māghāti bhagavā
sabbattha ca vippasādehi cittaṃ
ārammaṇaṃ yajamānassa yañño
ettha patiṭṭhāya jahāti dosaṃ
|362.934| So vītarāgo ca vineyya dosaṃ
mettacittaṃ bhāvayaṃ appamāṇaṃ
rattindivaṃ satataṃ appamatto
sabbā disā pharate appamaññaṃ.
|362.935| Ko sujjhatī muñcati bajjhatī ca
kenattanā gacchati brahmalokaṃ
ajānato me muni brūhi puṭṭho
bhagavā hi me sakkhi brahmajja diṭṭho
tvañhi 1- no brahmasamosi saccaṃ
kathaṃ upapajjati brahmalokaṃ (jutima 2-).
|362.936| Yo yajati tividhaṃ yaññasampadaṃ (māghāti bhagavā)
ārādhaye dakkhiṇeyyehi tādi
evaṃ yajitvā sammā yācayogo
upapajjati brahmalokanti brūmīti.
[363] Evaṃ vutte māgho māṇavo bhagavantaṃ etadavoca
abhikkantaṃ bho gotama .pe. Ajjatagge pāṇupetaṃ saraṇaṅgatanti.
Māghasuttaṃ pañcamaṃ
----------
@Footnote: 1 Ma. tuvaṃ. 2 Yu. jutīmā.
Suttanipāte tatiyassa mahāvaggassa chaṭṭhaṃ sabhiyasuttaṃ
[364] 6 Evamme sutaṃ . ekaṃ samayaṃ bhagavā rājagahe
viharati veḷuvane kalandakanivāpe . tena kho pana samayena sabhiyassa
paribbājakassa purāṇasālohitāya devatāya pañhā udiṭṭhā honti
yo te sabhiya samaṇo vā brāhmaṇo vā ime pañhe puṭṭho
byākaroti tassa santike brahmacariyaṃ careyyāsīti.
{364.1} Atha kho sabhiyo paribbājako tassā devatāya
santike [1]- pañhe uggahetvā ye te samaṇabrāhmaṇā saṅghino
gaṇino gaṇācariyā ñātā yasassino titthakarā sādhusammatā
bahujanassa seyyathīdaṃ pūraṇo kassapo makkhali gosālo ajito
kesakambalo 2- pakuddho 3- kaccāyano sañjayo veḷaṭṭhaputto 4-
nigantho nāṭaputto te upasaṅkamitvā te pañhe pucchati . te
sabhiyena paribbājakena pañhe puṭṭhā na sampāyanti asampāyantā
kopañca dosañca appaccayañca pātukaronti api ca sabhiyaṃ 5-
paribbājakaṃ paṭipucchanti.
{364.2} Atha kho sabhiyassa paribbājakassa etadahosi ye kho
te bhonto samaṇabrāhmaṇā saṅghino gaṇino gaṇācariyā ñātā
yasassino titthakarā sādhusammatā bahujanassa seyyathīdaṃ pūraṇo kassapo
.pe. nigantho nāṭaputto te mayā pañhe puṭṭhā na sampāyanti
asampāyantā kopañca dosañca appaccayañca pātukaronti
@Footnote: 1 Po. Ma. Yu. etthantare teti dissati. 2 Yu. kesakambali. 3 Ma. pakudho
@kaccāno. Yu. pakudho. 4 Ma. belaṭṭhaputto. Yu. belaṭṭhiputto.
@5 Ma. Yu. sabhiyaññeva.
Api ca maññevettha paṭipucchanti yannūnāhaṃ hīnāyāvattitvā
kāme paribhuñjeyyanti . atha kho sabhiyassa paribbājakassa
etadahosi ayaṃ 1- kho samaṇo gotamo saṅghī ceva gaṇī ca
gaṇācariyo ñāto yasassī titthakaro sādhusammato bahujanassa .
Yannūnāhaṃ samaṇaṃ gotamaṃ upasaṅkamitvā ime pañhe puccheyyanti.
{364.3} Atha kho sabhiyassa paribbājakassa etadahosi ye 2- kho
te bhonto samaṇabrāhmaṇā jiṇṇā vuḍḍhā mahallakā addhagatā vayo
anuppattā therā rattaññū cirapabbajitā saṅghino gaṇino gaṇācariyā
ñātā yasassino titthakarā sādhusammatā bahujanassa seyyathīdaṃ
pūraṇo kassapo .pe. nigantho nāṭaputto tepi 3- mayā pañhe
puṭṭhā na sampāyanti asampāyantā kopañca dosañca
appaccayañca pātukaronti api ca maññevettha paṭipucchanti .
Kiṃ pana me samaṇo gotamo ime pañhe puṭṭho byākarissati .
Samaṇo hi gotamo daharo ceva jātiyā navo ca pabbajjāyāti.
{364.4} Atha kho sabhiyassa paribbājakassa etadahosi samaṇo kho
gotamo 4- daharoti na uññātabbo na paribhotabbo 5- daharopi
ce samaṇo hoti so ca mahiddhiko hoti mahānubhāvo . yannūnāhaṃ
samaṇaṃ gotamaṃ upasaṅkamitvā ime pañhe puccheyyanti.
@Footnote: 1 Ma. ayampi. 2 Ma. yepi. 3 Yu. pisaddo natthi. 4 Ma. ayaṃ pāṭho
@natthi. 5 ito paraṃ marammapotthake daharopi cesa samaṇo gotamo mahiddhiko
@hoti mahānubhāvoti dissati.
{364.5} Atha kho sabhiyo paribbājako yena rājagahaṃ tena cārikaṃ pakkāmi
anupubbena cārikañcaramāno yena rājagahaṃ veḷuvanaṃ kalandakanivāpo
yena bhagavā tenupasaṅkami upasaṅkamitvā bhagavatā saddhiṃ sammodi
sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ
nisinno kho sabhiyo paribbājako bhagavantaṃ gāthāya ajjhabhāsi
[365] |365.937| Kaṅkhī vecikicchī āgamaṃ (iti sabhiyo)
pañhe pucchituṃ abhikaṅkhamāno
tesantakaro bhavāhi pañhe me puṭṭho
anupubbaṃ anudhammaṃ byākarohi me.
|365.938| Dūrato āgatosi sabhiyāti bhagavā
pañhe pucchituṃ abhikaṅkhamāno
tesantakaro bhavāmi pañhe te puṭṭho
anupubbaṃ anudhammaṃ byākaromi te.
|365.939| Puccha maṃ sabhiya pañhaṃ yaṅkiñci manasicchasi
tassa tasseva pañhassa ahaṃ antaṃ karomi teti.
[366] Atha kho sabhiyassa paribbājakassa etadahosi acchariyaṃ vata bho
abbhūtaṃ vata bho yaṃ vatāhaṃ aññesu samaṇabrāhmaṇesu okāsakamma-
mattampi nālatthaṃ tamme idaṃ samaṇena gotamena okāsakammaṃ
katanti attamano pamudito 1- udaggo pītisomanassajāto
@Footnote: 1 Yu. modito.
Bhagavantaṃ pañhaṃ apucchi
|366.940| kiṃpattinamāhu bhikkhunaṃ (iti sabhiyo)
sorataṃ kena kathañca dantamāhu
buddhoti kathaṃ pavuccati
puṭṭho me bhagavā byākarohi 1-.
|366.941| Pajjena katena attanā (sabhiyāti bhagavā)
parinibbānagato vitiṇṇakaṅkho
vibhavañca bhavañca vippahāya
vusitavā khīṇapunabbhavo sa bhikkhu.
|366.942| Sabbattha upekkhako satīmā
na so hiṃsati kañci sabbaloke
tiṇṇo samaṇo anāvilo
ussadā yassa na santi sorato so
|366.943| yassindriyāni bhāvitāni
ajjhattaṃ bahiddhā ca sabbaloke
nibbijjimaṃ 2- parañca lokaṃ
kālaṃ kaṅkhati bhāvito sa danto.
|366.944| Kappāni viceyya kevalāni
saṃsāraṃ dubhayaṃ 3- cutūpapātaṃ
@Footnote: 1 Yu. vayākarohi. 2 Ma. nibbijja imaṃ . 3 vaṇṇanāyaṃ tadubhayaṃ.
Vigatarajamanaṅgaṇaṃ visuddhaṃ
pattaṃ jātikkhayaṃ tamāhu buddhanti.
[367] Atha kho sabhiyo paribbājako bhagavato bhāsitaṃ
abhinanditvā anumoditvā attamano pamudito 1- udaggo
pītisomanassajāto bhagavantaṃ uttariṃ pañhaṃ apucchi
|367.945| kiṃpattinamāhu brāhmaṇaṃ (iti sabhiyo)
samaṇaṃ kena kathañca nhātakoti
nāgoti kathaṃ pavuccati
puṭṭho me bhagavā byākarohi.
|367.946| Bāhetvā 2- sabbapāpakāni (sabhiyāti bhagavā)
vimalo sādhusamāhito ṭhitatto
saṃsāramaticca kevalī so
anissito 3- tādi pavuccate sa 4- brahmā.
|367.947| Samitāvi pahāya puññapāpaṃ
virajo ñatvā imaṃ parañca lokaṃ
jātimaraṇaṃ upātivatto
samaṇo tādi pavuccate tathattā.
|367.948| Ninnahāya sabbapāpakāni
ajjhattañca 5- bahiddhā ca sabbaloke
@Footnote: 1 Yu. pamodito. 2 Po. Ma. bāhitvā. 3 Ma. Yu. asito. 4 Yu. ayaṃ
@pāṭho natthi. 5 Ma. casaddo natthi.
Devamanussesu kappiyesu
kappaṃ neti tamāhu nhātakoti.
|367.949| Āguṃ na karoti kiñci loke
sabbasaṃyoge visajja bandhanāni
sabbattha na sajjatī vippamutto 1-
nāgo tādi pavuccate tathattāti.
[368] Atha kho sabhiyo paribbājako .pe. bhagavantaṃ uttariṃ
pañhaṃ apucchi
|368.950| kaṃ khettajinaṃ vadanti buddhā (iti sabhiyo)
kusalaṃ kena kathañca paṇḍitoti
muni nāma kathaṃ pavuccati
puṭṭho me bhagavā byākarohi.
|368.951| Khettāni viceyya kevalāni (sabhiyāti bhagavā)
dibbaṃ 2- mānusakañca brahmakhettaṃ
(sabba) khettamūlabandhanā pamutto
khettajino tādi pavuccate tathattā.
|368.952| Kosāni viceyya kevalāni
dibbaṃ mānusakañca brahmakosaṃ
(sabba) kosamūlabandhanā pamutto
kusalo tādi pavuccate tathattā.
@Footnote: 1 Ma. Yu. vimutto. 2 Po. dibyaṃ. Yu. divayaṃ.
|368.953| Dubhayāni viceyya paṇḍarāni
ajjhattaṃ bahiddhā ca suddhapañño
kaṇhasukkaṃ upātivatto
paṇḍito tādi pavuccate tathattā.
|368.954| Asatañca satañca ñatvā dhammaṃ
ajjhattaṃ bahiddhā ca sabbaloke
devamanussehi pūjiyo 1- so
saṅgajālamaticca so munīti.
[369] Atha sabhiyo kho paribbājako .pe. bhagavantaṃ uttariṃ
pañhaṃ apucchi
|369.955| kiṃpattinamāhu vedaguṃ (iti sabhiyo)
anuviditaṃ kena kathañca viriyavāti
ājāniyo kinti nāma hoti
puṭṭho me bhagavā byākarohi.
|369.956| Vedāni viceyya kevalāni (sabhiyāti bhagavā)
samaṇānaṃ yānipatthi 2- brāhmaṇānaṃ
sabbavedanāsu vītarāgo
sabbaṃ vedamaticca vedagū so.
|369.957| Anuvicca papañcanāmarūpaṃ
@Footnote: 1 pūjitotipi pāṭho. Po. Ma. pūjaniyo. 2 Po. yānimatthi. Ma. yānidhatthi.
Ajjhattaṃ bahiddhā ca rogamūlaṃ
(sabba) rogamūlabandhanā pamutto
anuvidito tādi pavuccate tathattā.
|369.958| Virato sabbapāpakehi
nirayadukkhamaticca viriyavā so
so viriyavā padhānavā
dhīro tādi pavuccate tathattā.
|369.959| Yassassu lūnāni 1- bandhanāni
ajjhattaṃ bahiddhā ca saṅgamūlaṃ
sabbasaṅgamūlabandhanā pamutto
ājāniyo tādi pavuccate tathattā.
[370] Atha kho sabhiyo paribbājako .pe. bhagavantaṃ uttariṃ
pañhaṃ apucchi
|370.960| kiṃpattinamāhu sottiyaṃ (iti sabhiyo)
ariyaṃ kena kathañca caraṇavāti
paribbājako kinti nāma hoti
puṭṭho me bhagavā byākarohi.
|370.961| Sutavā sabbadhammaṃ abhiññāya loke (sabhiyāti bhagavā)
sāvajjānavajjaṃ yadatthi kiñci
abhibhuṃ akathaṅkathiṃ vimuttaṃ
@Footnote: 1 Po. Ma. lulāni. Yu. lutāni.
Anīghaṃ sabbadhimāhu sottiyoti.
|370.962| Chetvā ālayāni āsavāni 1-
vidvā so na upeti gabbhaseyyaṃ
saññaṃ tividhaṃ panujja paṅkaṃ
kappaṃ neti tamāhu ariyoti.
|370.963| Yo idha caraṇesu pattipatto
kusalo sabbadā ajāni 2- dhammaṃ
sabbattha na sajjatī vimuttacitto
paṭighā yassa na santi caraṇavā so.
|370.964| Dukkhavepakkaṃ yadatthi kammaṃ
uddhaṃ adho tiriyañcāpi 3- majjhe
paribbājayitvā 4- pariññacārī
māyaṃ mānamathopi lobhakodhaṃ
pariyantamakāsi nāmarūpaṃ
taṃ paribbājakamāhu pattipattanti.
[371] Atha kho sabhiyo paribbājako bhagavato bhāsitaṃ abhinanditvā
anumoditvā attamano udaggo pamudito pītisomanassajāto uṭṭhāyāsanā
ekaṃsaṃ uttarāsaṅgaṃ karitvā yena bhagavā tenañjalimpaṇāmetvā
bhagavantaṃ sammukhā sāruppāhi gāthāhi abhitthavi
@Footnote: 1 Ma. Yu. āsavāni ālayāni. 2 Po. Ma. ājānāti. 3 Po. Ma. tiriyaṃ vāpi.
@4 Yu. parivajjayitvā.
|371.965| Yāni ca tīṇi yāni ca saṭṭhi 1-
samaṇappavādanissitāni 2- bhūripañña
saññakkharasaññanissitāni
osaraṇāni vineyya oghatamagā.
|371.966| Antagūsi pāragūsi 3- dukkhassa
arahāsi (sammāsambuddho) khīṇāsavaṃ taṃ 4- maññe
jutimā matimā pahutapañño
dukkhassantakaraṃ 5- atāresi maṃ.
|371.967| Yaṃ me kaṅkhitamaññāsi vicikicchaṃ 6- maṃ atārayi
namo te (muni) monapathesu pattipatta
akhilādiccabandhu 7- soratosi.
|371.968| Yā me kaṅkhā pure āsi tamme byākāsi cakkhumā
addhā munīsi sambuddho natthi nīvaraṇā tava.
|371.969| Upāyāsā ca te sabbe viddhastā vinaḷīkatā
sītibhūto damappatto dhitimā saccanikkamo.
|371.970| Tassa te nāganāgassa mahāvīrassa bhāsato
sabbe devā anumodanti ubho nāradapabbatā.
|371.971| Namo te purisājañña namo te purisuttama
sadevakasmiṃ lokasmiṃ natthi te paṭipuggalo.
@Footnote: 1 Po. tesaṭṭhī. 2 Ma. Yu. samaṇappavādasitāni. 3 Ma. Yu. pāragū.
@4 Po. khīṇāsavanti maññe . 5 Ma. Yu. dukkhassantakara. 6 Po. vicikicchā.
@Ma. vicikiccā maṃ tārayi . 7 Ma. Yu. akhilaādiccabandhu.
|371.972| Tuvaṃ buddho tuvaṃ satthā tuvaṃ mārābhibhū muni
tuvaṃ anusaye chetvā tiṇṇo tāresimaṃ pajaṃ.
|371.973| Upadhī te samatikkantā āsavā te padālitā
sīhosi anupādāno pahīnabhayabheravo
|371.974| puṇḍarīkaṃ yathā vaggu toye na upalimpati
evaṃ puññe ca pāpe ca ubhaye tvaṃ na limpasi
pāde vīra pasārehi sabhiyo vandati satthunoti.
[372] Atha kho sabhiyo paribbājako bhagavato pādesu sirasā
nipatitvā bhagavantaṃ etadavoca abhikkantaṃ bhante abhikkantaṃ bhante
seyyathāpi bhante nikkujjitaṃ vā ukkujjeyya paṭicchannaṃ vā
vivareyya mūḷhassa vā maggaṃ ācikkheyya andhakāre vā telapajjotaṃ
dhāreyya cakkhumanto rūpāni dakkhantīti evamevaṃ bhagavatā
anekapariyāyena dhammo pakāsito esāhaṃ bhagavantaṃ saraṇaṃ gacchāmi
dhammañca bhikkhusaṅghañca labheyyāhaṃ bhante bhagavato santike
pabbajjaṃ labheyyaṃ upasampadanti.
{372.1} Yo kho sabhiya aññatitthiyapubbo imasmiṃ dhammavinaye
ākaṅkhati pabbajjaṃ ākaṅkhati upasampadaṃ so cattāro māse
parivasati catunnaṃ māsānaṃ accayena parivuṭṭhaparivāsaṃ 1-
āraddhacittā bhikkhū pabbājenti upasampādenti bhikkhubhāvāya
api cettha 2- puggalavemattatā viditāti . sace bhante
aññatitthiyapubbā imasmiṃ dhammavinaye ākaṅkhantā pabbajjaṃ
@Footnote: 1 Po. Ma. Yu. ayaṃ pāṭho natthi. 2 Po. Ma. Yu. apica mettha.
Ākaṅkhantā upasampadaṃ cattāro māse parivasanti catunnaṃ māsānaṃ
accayena parivuṭṭhaparivāse āraddhacittā bhikkhū pabbājenti
upasampādenti bhikkhubhāvāya . ahaṃ cattāri vassāni parivasāmi
catunnaṃ vassānaṃ accayena parivuṭṭhaparivāsaṃ āraddhacittā bhikkhū
pabbājentu upasampādentu bhikkhubhāvāyāti . alattha kho sabhiyo
paribbājako bhagavato santike pabbajjaṃ alattha upasampadaṃ.
{372.2} Acirupasampanno kho panāyasmā sabhiyo eko vūpakaṭṭho
appamatto ātāpī pahitatto viharanto na cirasseva yassatthāya
kulaputtā sammadeva agārasmā anagāriyaṃ pabbajanti tadanuttaraṃ
brahmacariyapariyosānaṃ diṭṭheva dhamme sayaṃ abhiññā sacchikatvā
upasampajja vihāsi khīṇā jāti vusitaṃ brahmacariyaṃ kataṃ karaṇīyaṃ nāparaṃ
itthattāyāti abbhaññāsi . aññataro kho panāyasmā sabhiyo
arahataṃ ahosīti.
Sabhiyasuttaṃ chaṭṭhamaṃ.
-----------
Suttanipāte tatiyassa mahāvaggassa sattamaṃ selasuttaṃ
[373] 7 Evamme sutaṃ . ekaṃ samayaṃ bhagavā aṅguttarāpesu
cārikaṃ caramāno mahatā bhikkhusaṅghena saddhiṃ aḍḍhaterasehi 1- bhikkhusatehi
yena āpaṇaṃ nāma aṅguttarāpānaṃ nigamo tadavasari .
@Footnote: 1 ayaṃ pāṭho aḍḍhateḷasaitipi aḍḍhatelasaitipi valañjiyati.
Assosi kho keṇiyo jaṭilo samaṇo khalu bho gotamo sakyaputto sakyakulā
pabbajito aṅguttarāpesu cārikaṃ caramāno mahatā bhikkhusaṅghena
saddhiṃ aḍḍhaterasehi bhikkhusatehi āpaṇaṃ anuppatto . taṃ
kho pana bhavantaṃ gotamaṃ evaṃ kalyāṇo kittisaddo abbhuggato
itipi so bhagavā arahaṃ sammāsambuddho vijjācaraṇasampanno sugato
lokavidū anuttaro purisadammasārathi satthā devamanussānaṃ buddho
bhagavā 1- so imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ
pajaṃ sadevamanussaṃ sayaṃ abhiññā sacchikatvā pavedeti so dhammaṃ
deseti ādikalyāṇaṃ majjhekalyāṇaṃ pariyosānakalyāṇaṃ
sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāseti
sādhu kho pana tathārūpānaṃ arahataṃ dassanaṃ hotīti.
{373.1} Atha kho keṇiyo jaṭilo yena bhagavā tenupasaṅkami
upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ
vītisāretvā ekamantaṃ nisīdi . ekamantaṃ nisinnaṃ kho keṇiyaṃ jaṭilaṃ
bhagavā dhammiyā kathāya sandassesi samādapesi samuttejesi sampahaṃsesi.
Atha kho keṇiyo jaṭilo bhagavatā dhammiyā kathāya sandassito
samādapito samuttejito sampahaṃsito bhagavantaṃ etadavoca adhivāsetu
me bhavaṃ gotamo svātanāya bhattaṃ saddhiṃ bhikkhusaṅghenāti.
[374] Evaṃ vutte bhagavā keṇiyaṃ jaṭilaṃ etadavoca mahā
kho keṇiya bhikkhusaṅgho aḍḍhaterasāni bhikkhusatāni tvañca [2]-
@Footnote: 1 Ma. bhagavāti . 2 Yu. kho.
Brāhmaṇesu abhippasannoti . dutiyampi kho keṇiyo jaṭilo bhagavantaṃ
etadavoca kiñcāpi bho gotama mahā bhikkhusaṅgho aḍḍhaterasāni
bhikkhusatāni ahañca brāhmaṇesu abhippasanno adhivāsetu me bhavaṃ
gotamo svātanāya bhattaṃ saddhiṃ bhikkhusaṅghenāti . dutiyampi kho
bhagavā keṇiyaṃ jaṭilaṃ etadavoca mahā kho keṇiya bhikkhusaṅgho
aḍḍhaterasāni bhikkhusatāni tvañca brāhmaṇesu abhippasannoti.
{374.1} Tatiyampi kho keṇiyo jaṭilo bhagavantaṃ etadavoca
kiñcāpi bho gotama mahā bhikkhusaṅgho aḍḍhaterasāni bhikkhusatāni
ahañca brāhmaṇesu abhippasanno adhivāsetu me bhavaṃ gotamo
svātanāya bhattaṃ saddhiṃ bhikkhusaṅghenāti . adhivāsesi bhagavā
tuṇhībhāvena . atha kho keṇiyo jaṭilo bhagavato adhivāsanaṃ viditvā
uṭṭhāyāsanā yena sako assamo tenupasaṅkami upasaṅkamitvā
mittāmacce ñātisālohite āmantesi suṇantu me bhonto 1-
mittāmaccā ñātisālohitā samaṇo me gotamo nimantito
svātanāya bhattaṃ saddhiṃ bhikkhusaṅghena yena me kāyaveyyāvaṭikaṃ
kareyyāthāti . evaṃ bhoti kho keṇiyassa jaṭilassa mittāmaccā
ñātisālohitā keṇiyassa jaṭilassa paṭissutvā appekacce
uddhanāni khaṇanti appekacce kaṭṭhāni phālenti appekacce
bhājanāni dhovanti appekacce udakamaṇikaṃ patiṭṭhāpenti appekacce
āsanāni paññāpenti . keṇiyo pana jaṭilo sāmaṃ yeva
@Footnote: 1 Po. Ma. bhavanto.
Maṇḍalamālaṃ paṭiyādeti.
[375] Tena kho pana samayena selo brāhmaṇo āpaṇe paṭivasati
tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ
itihāsapañcamānaṃ padako veyyākaraṇo lokāyatamahāpurisalakkhaṇesu
anavayo tīṇi ca māṇavakasatāni mante vāceti . tena kho pana
samayena keṇiyo jaṭilo sele brāhmaṇe abhippasanno hoti .
Atha kho selo brāhmaṇo tīhi māṇavakasatehi parivuto jaṅghāvihāraṃ
anucaṅkamamāno anuvicaramāno yena keṇiyassa jaṭilassa assamo
tenupasaṅkami.
{375.1} Addasā kho selo brāhmaṇo keṇiyassa 1- jaṭilassa
assame appekacce uddhanāni khaṇante .pe. appekacce āsanāni
paññāpente keṇiyaṃ pana jaṭilaṃ sāmaṃ yeva maṇḍalamālaṃ paṭiyādentaṃ
disvāna keṇiyaṃ jaṭilaṃ etadavoca kiṃ nu kho bhoto keṇiyassa āvāho
vā bhavissati vivāho vā bhavissati mahāyañño vā paccupaṭṭhito rājā
vā māgadho seniyo bimbisāro nimantito svātanāya saddhiṃ
balakāyenāti.
{375.2} Na me bho sela āvāho vā bhavissati napi 2- vivāho
bhavissati napi rājā māgadho seniyo bimbisāro nimantito svātanāya
saddhiṃ balakāyena . api ca kho me mahāyañño paccupaṭṭhito
atthi samaṇo gotamo sakyaputto sakyakulā pabbajito
aṅguttarāpesu cārikaṃ caramāno mahatā bhikkhusaṅghena saddhiṃ
@Footnote: 1 Yu. keṇiyassamiye jaṭile . 2 Po. Ma. vivāho vā nāpi rājā.
Aḍḍhaterasehi bhikkhusatehi āpaṇaṃ anuppatto taṃ kho pana bhavantaṃ
gotamaṃ evaṃ kalyāṇo kittisaddo abbhuggato itipi so bhagavā
.pe. buddho bhagavāti . so me nimantito svātanāya bhattaṃ
saddhiṃ bhikkhusaṅghenāti . buddhoti bho keṇiya vadesi . buddhoti
bho sela vadāmi . buddhoti bho keṇiya vadesi . buddhoti bho
sela vadāmīti.
{375.3} Atha kho selassa brāhmaṇassa etadahosi ghosopi
kho eso dullabho lokasmiṃ yadidaṃ buddhoti . āgatāni kho pana
asmākaṃ 1- mantesu dvattiṃsa 2- mahāpurisalakkhaṇāni yehi
samannāgatassa mahāpurisassa dveva gatiyo bhavanti anaññā sace
agāraṃ ajjhāvasati rājā hoti cakkavattī dhammiko dhammarājā
cāturanto vijitāvī janapadatthāvariyappatto sattaratanasamannāgato
tassimāni sattaratanāni bhavanti seyyathīdaṃ cakkaratanaṃ hatthiratanaṃ
assaratanaṃ maṇiratanaṃ itthiratanaṃ gahapatiratanaṃ pariṇāyakaratanameva
sattamaṃ . parosahassaṃ kho panassa puttā bhavanti 3- sūrā viraṅgarūpā
parasenappamaddanā . so imaṃ paṭhaviṃ sāgarapariyantaṃ adaṇḍena
asatthena dhammena abhivijiya ajjhāvasati . sace kho pana agārasmā
anagāriyaṃ pabbajati arahaṃ hoti sammāsambuddho loke
vivaṭacchado 4- . kahaṃ pana bho keṇiya etarahi so bhavaṃ gotamo
@Footnote: 1 Po. panasmākaṃ. Ma. panamhākaṃ. 2 battiṃsātipi pāṭho. 3 Po. santi.
@4 itisaddo idha bhavituṃ vaṭṭati.
Viharati arahaṃ sammāsambuddhoti.
The Pali Tipitaka in Roman Character Volume 25 page 408-442.
https://84000.org/tipitaka/read/roman_item.php?book=25&item=355&items=21&mode=bracket
Classified by content :-
https://84000.org/tipitaka/read/roman_item.php?book=25&item=355&items=21
Compare with The Pali Tipitaka in Thai Character :-
https://84000.org/tipitaka/read/pali_item.php?book=25&item=355&items=21&mode=bracket
Compare with The Royal Version of Thai Tipitaka :-
https://84000.org/tipitaka/read/byitem.php?book=25&item=355&items=21&mode=bracket
Study Atthakatha :-
https://84000.org/tipitaka/attha/attha.php?b=25&i=355
Contents of The Tipitaka Volume 25
https://84000.org/tipitaka/read/?index_25
https://84000.org/tipitaka/english/?index_25
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
