TIPITAKA Volume 32 : PALI ROMAN
Sutta Pitaka Vol 24 : Sutta. Khu. Apa(1)

                Navamaṃ sopākattherāpadānaṃ (19)
     [21] |21.111| Pabbhāraṃ sodhayantassa     pavare 2- pabbatuttame
                       siddhattho nāma bhagavā          āgacchi mama santikaṃ.
@Footnote: 1 Ma. Yu. addhe. 2 Ma. vipine.
      |21.112| Buddhaṃ upagataṃ disvā         lokajeṭṭhassa tādino
                       santharaṃ paññāpetvāna 1-   pupphāsanamadāsahaṃ.
      |21.113| Pupphāsane nisīditvā       siddhattho lokanāyako
                       mamañca gatimaññāya       aniccataṃ udāhari.
      |21.114| Aniccā vata saṅkhārā        uppādavayadhammino
                       uppajjitvā nirujjhanti    tesaṃ vūpasamo sukho.
      |21.115|  Idaṃ vatvāna sabbaññū    lokajeṭṭho narāsabho
                       nabhe 2- abbhuggami dhīro    haṃsarājāva ambare.
      |21.116| Sakaṃ diṭṭhiṃ jahitvāna          bhāvayāniccasaññahaṃ
                       ekāhaṃ bhāvayitvāna         tattha kālakato ahaṃ.
      |21.117|  Dve sampattī anubhotvā     sukkamūlena codito
                       pacchimabbhavasampatto 3-     sāpākayonupāgamiṃ.
      |21.118| Agārā abhinikkhamma          pabbajiṃ anagāriyaṃ
                       jātiyā sattavassohaṃ        arahattaṃ apāpuṇiṃ.
      |21.119| Āraddhaviriyo pahitatto      sīlesu susamāhito
                       tosetvāna mahānāgaṃ       alatthaṃ upasampadaṃ.
      |21.120| Catunavute ito kappe         yaṃ kammamakariṃ tadā
                       duggatiṃ nābhijānāmi         pupphadānassidaṃ phalaṃ.
      |21.121| Catunavute ito kappe         yaṃ saññaṃ bhāvayiṃ tadā
                       taṃ saññaṃ bhāvayantassa     patto me āsavakkhayo.
@Footnote: 1 Ma. santharitvāna. 2 Ma. Yu. nabhaṃ abbhuggami vīro. 3 Ma. Yu. pacchime
@bhave samupatte.
      |21.122| Paṭisambhidā catasso        vimokkhāpica aṭṭhime
                       chaḷabhiññā sacchikatā      kataṃ buddhassa sāsananti.
        Itthaṃ sudaṃ āyasmā sopāko thero imā gāthāyo
abhāsitthāti.
                     Sopākattherassa apadānaṃ samattaṃ.


             The Pali Tipitaka in Roman Character Volume 32 page 90-92.
https://84000.org/tipitaka/read/roman_item.php?book=32&item=21&items=1
             Classified by [Item Number] :-
http://84000.org/tipitaka/read/roman_item.php?book=32&item=21&items=1&mode=bracket
             Compare with The Pali Tipitaka in Thai Character :-
https://84000.org/tipitaka/read/pali_item.php?book=32&item=21&items=1
             Compare with The Royal Version of Thai Tipitaka :-
https://84000.org/tipitaka/read/byitem.php?book=32&item=21&items=1
             Study Atthakatha :-
https://84000.org/tipitaka/attha/attha.php?b=32&i=21
             Contents of The Tipitaka Volume 32
https://84000.org/tipitaka/read/?index_32
https://84000.org/tipitaka/english/?index_32