Pañcamaṃ kumārakassapattherāpadānaṃ (535)
[125] |125.150| Ito satasahassamhi kappe uppajji nāyako
sabbalokahito dhīro padumuttaranāmako.
|125.151| Tadāhaṃ brāhmaṇo hutvā vissuto vedapāragū
divāvihāraṃ vicaraṃ addasaṃ lokanāyakaṃ.
|125.152| Catusaccaṃ pakāsentaṃ bodhayantaṃ sadevakaṃ
sasāvakaṃ 1- cittakathikaṃ vaṇṇayantaṃ mahājane.
|125.153| Tadā muditacittohaṃ nimantetvā tathāgataṃ
nānārattehi vatthehi alaṅkaritvāna maṇḍapaṃ.
|125.154| Nānāratanapajjotaṃ sasaṅghaṃ bhojayiṃ tahiṃ
bhojayitvāna sattāhaṃ nānaggarasabhojanaṃ.
|125.155| Nānācittehi pupphehi pūjayitvā sasāvakaṃ
nipacca pādamūlamhi taṃ ṭhānaṃ patthayiṃ ahaṃ.
|125.156| Tadā munivaro āha karuṇo 2- karuṇālayo
passathetaṃ dijavaraṃ padumānanalocanaṃ.
|125.157| Pītipāmujjabahulaṃ samuddhaggatanuruhaṃ 3-
hāsāvahaṃ 4- visālakkhaṃ mama 5- sāsanasālayaṃ.
|125.158| Mama pādamūle patitaṃ ekavattaṃ sumānasaṃ
esa pattheti taṃ ṭhānaṃ vicittakathikattanaṃ 6-.
|125.159| Satasahasse ito kappe okkākakulasambhavo
gotamo nāma nāmena satthā loke bhavissati.
|125.160| Tassa dhammesu dāyādo oraso dhammanimmito
kumārakassapo nāma hessati satthusāvako.
@Footnote: 1 Ma. Yu. vicittakathikānaggaṃ. 2 Ma. Yu. karuṇekarasāsayo. 3 Ma. Yu.
@samuggatatanūruhaṃ. ito paraṃ īdisameva. 4 Ma. hāsamhitavisālakkhaṃ. 5 Ma. Yu.
@6 Yu. vicittakathikatthadaṃ.
|125.161| Vicittapupphadussānaṃ ratanānañca vāhasā
vicittakathikānaṃ so aggattaṃ pāpuṇissati.
|125.162| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|125.163| Paribbhamiṃ bhavābhave raṅgamajjhe yathā naṭo
sākhāmigatrajo hutvā migiyā kucchimokkamiṃ.
|125.164| Tadā mayi kucchigate vajjhavāro 1- upaṭṭhito
sākhena cattā me mātā nigrodhaṃ saraṇaṃ gatā.
|125.165| Tena sā migarājena maraṇā parimocitā
pariccajitvāna sappāṇaṃ 2- mamevaṃ ovadī tadā.
|125.166| Nigrodhameva seveyya na sākhamūpasaṃvase
nigrodhasmiṃ mataṃ seyyo yañce sākhasmi jīvitaṃ.
|125.167| Tenānusiṭṭhā migayūthapena 3-
ahañca mātā catare 4- ca tassovādaṃ 5-
āgamma rammaṃ tusitādhivāsaṃ
gatā 6- pavāsaṃ sagharaṃ yatheva.
|125.168| Puno kassapadhīrassa atthamentamhi sāsane
āruyha selasikharaṃ yuñjitvā jinasāsanaṃ.
|125.169| Idāni 7- hi rājagahe jāto seṭṭhikule ahaṃ 8-
āpannagabbhā 9- me mātā pabbaji anagāriyaṃ.
@Footnote: 1 Yu. vajjhavāraṃ upaṭṭhitā. 2 Yu. saṃpāṇaṃ. 3 Yu. migayovādena. 4 Ma. ca
@tathetare ca. 5 Yu. tassovādena. 6 Yu. gato. 7 Ma. Yu. idānāhaṃ.
@8 Ma. Yu. ahuṃ. 9 Ma. āpannasattā.
|125.170| Sagabbhantaṃ viditvāna devadattamupānayuṃ
so avoca vināsetha pāpikaṃ bhikkhuniṃ imaṃ.
|125.171| Idānipi munindena jinena anukampitā
sukhinī jananī 1- mayhaṃ mātā bhikkhunūpassaye.
|125.172| Taṃ viditvā mahipālo kosalo maṃ aposayi
kumāraparihārena nāmenāhañca kassapo.
|125.173| Mahākassapamāgamma ahaṃ komārakassapo
vammikassadisaṃ 2- kāyaṃ sutvā buddhena desitaṃ.
|125.174| Tato cittaṃ vimucci me anupādāya sabbaso
pāyāsiṃ damayitvāhaṃ etadaggaṃ apāpuṇiṃ.
|125.175| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|125.176| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|125.177| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā kumārakassapo thero imā gāthāyo abhāsitthāti.
Kumārakassapattherassa apadānaṃ samattaṃ.
Catuvīsatimaṃ bhāṇavāraṃ.
@Footnote: 1 Ma. Yu. ajanī. 2 Ma. Yu. vammikasādisaṃ.
The Pali Tipitaka in Roman Character Volume 33 page 194-197.
https://84000.org/tipitaka/read/roman_item.php?book=33.1&item=125&items=1
Classified by [Item Number] :-
http://84000.org/tipitaka/read/roman_item.php?book=33.1&item=125&items=1&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=33.1&item=125&items=1
Compare with The Royal Version of Thai Tipitaka :-
https://84000.org/tipitaka/read/byitem.php?book=33.1&item=125&items=1
Study Atthakatha :-
https://84000.org/tipitaka/attha/attha.php?b=33.1&i=125
Contents of The Tipitaka Volume 33
https://84000.org/tipitaka/read/?index_33
https://84000.org/tipitaka/english/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
