paliTIPITAKA Volume 37 - Abhidhamma Pitaka 4

[166] Na vattabbaṃ puggalo upalabbhati sacchikaṭṭhaparamaṭṭhenāti . Āmantā . nanu mātā atthīti . āmantā . hañci mātā atthi tena vata re vattabbe puggalo upalabbhati sacchikaṭṭhaparamaṭṭhenāti. Na vattabbaṃ puggalo upalabbhati sacchikaṭṭhaparamaṭṭhenāti . Āmantā . nanu pitā atthi .pe. bhātā atthi bhaginī atthi khattiyo atthi brāhmaṇo atthi vesso atthi suddo atthi gahaṭṭho atthi pabbajito atthi devo atthi manusso atthīti . Āmantā . hañci manusso atthi tena vata re vattabbe puggalo upalabbhati sacchikaṭṭhaparamaṭṭhenāti. [167] Mātā atthīti katvā tena ca kāraṇena puggalo upalabbhati sacchikaṭṭhaparamaṭṭhenāti . āmantā . atthi koci na mātā hutvā mātā hotīti . āmantā . atthi koci na puggalo hutvā puggalo hotīti . na hevaṃ vattabbe .pe. atthi koci na pitā hutvā .pe. na bhātā hutvā na bhaginī hutvā na khattiyo hutvā na brāhmaṇo hutvā na vesso hutvā na suddo hutvā na gahaṭṭho hutvā na pabbajito hutvā na devo hutvā na manusso hutvā manusso hotīti . āmantā .

--------------------------------------------------------------------------------------------- page71.

Atthi koci na puggalo hutvā puggalo hotīti . na hevaṃ vattabbe .pe. [168] Mātā atthīti katvā tena ca kāraṇena puggalo upalabbhati sacchikaṭṭhaparamaṭṭhenāti . āmantā . atthi koci mātā hutvā na mātā hotīti . āmantā . atthi koci puggalo hutvā na puggalo hotīti . na hevaṃ vattabbe .pe. atthi koci pitā hutvā bhātā hutvā bhaginī hutvā khattiyo hutvā brāhmaṇo hutvā vesso hutvā suddo hutvā gahaṭṭho hutvā pabbajito hutvā devo hutvā manusso hutvā na manusso hotīti . āmantā . atthi koci puggalo hutvā na puggalo hotīti. Na hevaṃ vattabbe .pe. [169] Na vattabbaṃ puggalo upalabbhati sacchikaṭṭhaparamaṭṭhenāti . Āmantā . nanu sotāpanno atthīti . āmantā . hañci sotāpanno atthi tena vata re vattabbe puggalo upalabbhati sacchikaṭṭhaparamaṭṭhenāti . na vattabbaṃ puggalo upalabbhati sacchikaṭṭha- paramaṭṭhenāti . āmantā . nanu sakadāgāmī atthi .pe. Anāgāmī atthi .pe. arahā atthi .pe. ubhatobhāgavimutto atthi paññāvimutto atthi kāyasakkhī atthi diṭṭhippatto atthi saddhāvimutto atthi dhammānusārī atthi saddhānusārī atthīti . āmantā . hañci saddhānusārī atthi tena vata re

--------------------------------------------------------------------------------------------- page72.

Vattabbe puggalo upalabbhati sacchikaṭṭhaparamaṭṭhenāti. [170] Sotāpanno atthīti katvā tena ca kāraṇena puggalo upalabbhati sacchikaṭṭhaparamaṭṭhenāti . āmantā . atthi koci na sotāpanno hutvā sotāpanno hotīti . āmantā . atthi koci na puggalo hutvā puggalo hotīti . na hevaṃ vattabbe .pe. Atthi koci na sakadāgāmī hutvā na anāgāmī hutvā na arahā hutvā na ubhatobhāgavimutto hutvā na paññāvimutto hutvā na kāyasakkhī hutvā na diṭṭhippatto hutvā na saddhāvimutto hutvā na dhammānusārī hutvā na saddhānusārī hutvā saddhānusārī hotīti . āmantā . atthi koci na puggalo hutvā puggalo hotīti. Na hevaṃ vattabbe .pe. [171] Sotāpanno atthīti katvā tena ca kāraṇena puggalo upalabbhati sacchikaṭṭhaparamaṭṭhenāti . āmantā . atthi koci sotāpanno hutvā na sotāpanno hotīti . āmantā . atthi koci puggalo hutvā na puggalo hotīti . na hevaṃ vattabbe .pe. atthi koci sakadāgāmī hutvā anāgāmī hutvā na anāgāmī hotīti . āmantā . atthi koci puggalo hutvā na puggalo hotīti. Na hevaṃ vattabbe .pe. [172] Na vattabbaṃ puggalo upalabbhati sacchikaṭṭhaparamaṭṭhenāti . Āmantā . nanu cattāro purisayugā aṭṭha purisapuggalā atthīti .

--------------------------------------------------------------------------------------------- page73.

Āmantā . hañci cattāro purisayugā aṭṭha purisapuggalā atthi tena vata re vattabbe puggalo upalabbhati sacchikaṭṭhaparamaṭṭhenāti. [173] Cattāro purisayugā aṭṭha purisapuggalā atthīti katvā tena ca kāraṇena puggalo upalabbhati sacchikaṭṭhaparamaṭṭhenāti . Āmantā . cattāro purisayugā aṭṭha purisapuggalā buddhapātubhāvā pātubhavantīti . āmantā . puggalo buddhapātubhāvā pātubhavatīti . Na hevaṃ vattabbe .pe. puggalo buddhapātubhāvā pātubhavatīti . Āmantā . buddhassa bhagavato parinibbute ucchinno puggalo natthi puggaloti. Na hevaṃ vattabbe .pe. [174] Puggalo upalabbhati sacchikaṭṭhaparamaṭṭhenāti . āmantā. Puggalo saṅkhatoti . na hevaṃ vattabbe .pe. puggalo asaṅkhatoti. Na hevaṃ vattabbe .pe. {174.1} Puggalo nevasaṅkhato nāsaṅkhatoti . Na hevaṃ vattabbe .pe. puggalo nevasaṅkhato nāsaṅkhatoti . āmantā . saṅkhatañca asaṅkhatañca ṭhapetvā atthaññā tatiyā koṭīti . na hevaṃ vattabbe .pe. saṅkhatañca asaṅkhatañca ṭhapetvā atthaññā tatiyā koṭīti . Āmantā . nanu vuttaṃ bhagavatā dvemā bhikkhave dhātuyo katamā dve saṅkhatā ca dhātu asaṅkhatā ca dhātu imā kho bhikkhave dve dhātuyoti attheva suttantoti . āmantā . tena hi na vattabbaṃ saṅkhatañca asaṅkhatañca ṭhapetvā atthaññā tatiyā koṭīti . puggalo nevasaṅkhato nāsaṅkhatoti. Āmantā.

--------------------------------------------------------------------------------------------- page74.

Aññaṃ saṅkhataṃ aññaṃ asaṅkhataṃ añño puggaloti . na hevaṃ vattabbe .pe. khandhā saṅkhatā nibbānaṃ asaṅkhataṃ puggalo nevasaṅkhato nāsaṅkhatoti . āmantā . aññe khandhā aññaṃ nibbānaṃ añño puggalo. Na hevaṃ vattabbe .pe. {174.2} Rūpaṃ saṅkhataṃ nibbānaṃ asaṅkhataṃ puggalo nevasaṅkhato nāsaṅkhatoti . āmantā . aññaṃ rūpaṃ aññaṃ nibbānaṃ añño puggaloti . na hevaṃ vattabbe .pe. vedanā .pe. saññā .pe. Saṅkhārā .pe. viññāṇaṃ saṅkhataṃ nibbānaṃ asaṅkhataṃ puggalo nevasaṅkhato nāsaṅkhatoti . āmantā . aññaṃ viññāṇaṃ aññaṃ nibbānaṃ añño puggaloti. Na hevaṃ vattabbe .pe. [175] Puggalassa uppādo paññāyati vayo paññāyati ṭhitassa aññathattaṃ paññāyatīti . āmantā . puggalo saṅkhatoti . Na hevaṃ vattabbe .pe. vuttaṃ bhagavatā tīṇimāni bhikkhave saṅkhatassa saṅkhatalakkhaṇāni saṅkhatānaṃ bhikkhave dhammānaṃ uppādo paññāyati vayo paññāyati ṭhitānaṃ aññathattaṃ paññāyatīti ^1- puggalassa uppādo paññāyati vayo paññāyati ṭhitassa aññathattaṃ paññāyati tena hi puggalo saṅkhatoti . puggalassa na uppādo paññāyati na vayo paññāyati na ṭhitassa aññathattaṃ paññāyatīti . Āmantā . puggalo asaṅkhatoti . na hevaṃ vattabbe .pe. @Footnote: ¹ aṃ. tika. 193 saṃsandanaṃ.

--------------------------------------------------------------------------------------------- page75.

Vuttaṃ bhagavatā tīṇimāni bhikkhave asaṅkhatassa asaṅkhatalakkhaṇāni asaṅkhatānaṃ bhikkhave dhammānaṃ na uppādo paññāyati na vayo paññāyati na ṭhitānaṃ aññathattaṃ paññāyatīti puggalassa na uppādo paññāyati na vayo paññāyati na ṭhitassa aññathattaṃ paññāyati tena hi puggalo asaṅkhatoti. [176] Parinibbuto puggalo atthatthamhi natthatthamhīti . Atthatthamhīti . parinibbuto puggalo sassatoti . na hevaṃ vattabbe .pe. natthatthamhīti . parinibbuto puggalo ucchinnoti . na hevaṃ vattabbe .pe.

The Pali Tipitaka in Roman Character Volume 37 page 70-75. https://84000.org/tipitaka/read/roman_item.php?book=37&item=166&items=11&pagebreak=1 Classified by [Item Number] :- http://84000.org/tipitaka/read/roman_item.php?book=37&item=166&items=11&pagebreak=1&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=37&item=166&items=11&pagebreak=1 Compare with The Royal Version of Thai Tipitaka :- https://84000.org/tipitaka/read/byitem.php?book=37&item=166&items=11&pagebreak=1 Study Atthakatha :- https://84000.org/tipitaka/attha/attha.php?b=37&i=166 Contents of The Tipitaka Volume 37 https://84000.org/tipitaka/read/?index_37 https://84000.org/tipitaka/english/?index_37