บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ThaiVersion PaliThai PaliRoman |
[833] Yassa dukkhasaccaṃ uppajjati tassa samudayasaccaṃ uppajjatīti: sabbesaṃ upapajjantānaṃ pavatte taṇhāvippayuttacittassa uppādakkhaṇe tesaṃ dukkhasaccaṃ uppajjati no ca tesaṃ samudayasaccaṃ uppajjati taṇhāya uppādakkhaṇe tesaṃ dukkhasaccañca uppajjati samudayasaccañca uppajjati . yassa vā pana samudayasaccaṃ uppajjati tassa dukkhasaccaṃ uppajjatīti: āmantā. [834] Yassa dukkhasaccaṃ uppajjati tassa maggasaccaṃ uppajjatīti: Sabbesaṃ upapajjantānaṃ pavatte maggavippayuttacittassa uppādakkhaṇe tesaṃ dukkhasaccaṃ uppajjati no ca tesaṃ maggasaccaṃ uppajjati pañcavokāre maggassa uppādakkhaṇe tesaṃ dukkhasaccañca uppajjati maggasaccañca uppajjati . yassa vā pana maggasaccaṃ uppajjati tassa dukkhasaccaṃ uppajjatīti: arūpe maggassa uppādakkhaṇe tesaṃ maggasaccaṃ uppajjati no ca tesaṃ dukkhasaccaṃ uppajjati pañcavokāre maggassa uppādakkhaṇe tesaṃ maggasaccañca uppajjati dukkhasaccañca uppajjati. [835] Yassa samudayasaccaṃ uppajjati tassa maggasaccaṃ uppajjatīti: no . yassa vā pana maggasaccaṃ uppajjati tassa samudayasaccaṃ uppajjatīti: no. [836] Yattha dukkhasaccaṃ uppajjati tattha samudayasaccaṃ uppajjatīti: asaññasatte tattha dukkhasaccaṃ uppajjati no ca tattha samudayasaccaṃ uppajjati catuvokāre pañcavokāre tattha dukkhasaccañca uppajjati samudayasaccañca uppajjati . yattha vā pana samudayasaccaṃ uppajjati tattha dukkhasaccaṃ uppajjatīti: āmantā. [837] Yattha dukkhasaccaṃ uppajjati tattha maggasaccaṃ uppajjatīti: apāye asaññasatte tattha dukkhasaccaṃ uppajjati no ca tattha maggasaccaṃ uppajjati avasese catuvokāre pañcavokāre tattha dukkhasaccañca uppajjati maggasaccañca uppajjati . yattha vā pana Maggasaccaṃ uppajjati tattha dukkhasaccaṃ uppajjatīti: āmantā. [838] Yattha samudayasaccaṃ uppajjati tattha maggasaccaṃ uppajjatīti: apāye tattha samudayasaccaṃ uppajjati no ca tattha maggasaccaṃ uppajjati avasese catuvokāre pañcavokāre tattha samudayasaccañca uppajjati maggasaccañca uppajjati . yattha vā pana maggasaccaṃ uppajjati tattha samudayasaccaṃ uppajjatīti: āmantā. [839] Yassa yattha dukkhasaccaṃ uppajjati tassa tattha samudayasaccaṃ uppajjatīti: yassakampi yassayatthakampi sadisaṃ vitthāretabbaṃ. [840] Yassa dukkhasaccaṃ nuppajjati tassa samudayasaccaṃ nuppajjatīti: āmantā . yassa vā pana samudayasaccaṃ nuppajjati tassa dukkhasaccaṃ nuppajjatīti: sabbesaṃ upapajjantānaṃ pavatte taṇhāvippayuttacittassa uppādakkhaṇe tesaṃ samudayasaccaṃ nuppajjati no ca tesaṃ dukkhasaccaṃ nuppajjati sabbesaṃ cavantānaṃ pavatte cittassa bhaṅgakkhaṇe arūpe maggassa ca phalassa ca uppādakkhaṇe tesaṃ samudayasaccañca nuppajjati dukkhasaccañca nuppajjati.The Pali Tipitaka in Roman Character Volume 38 page 281-283. https://84000.org/tipitaka/read/roman_item.php?book=38&item=833&items=8&mode=bracket Classified by content :- https://84000.org/tipitaka/read/roman_item.php?book=38&item=833&items=8 Compare with The Pali Tipitaka in Thai Character :- https://84000.org/tipitaka/read/pali_item.php?book=38&item=833&items=8&mode=bracket Compare with The Royal Version of Thai Tipitaka :- https://84000.org/tipitaka/read/byitem.php?book=38&item=833&items=8&mode=bracket Study Atthakatha :- https://84000.org/tipitaka/attha/attha.php?b=38&i=833 Contents of The Tipitaka Volume 38 https://84000.org/tipitaka/read/?index_38 https://84000.org/tipitaka/english/?index_38
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]