[712] Parāmāsasampayutto dhammo parāmāsasampayuttassa dhammassa
Adhipatipaccayena paccayo: ārammaṇādhipati sahajātādhipati .
Ārammaṇādhipati: rāgaṃ garuṃ katvā assādeti abhinandati taṃ garuṃ
katvā rāgo uppajjati parāmāsasampayutte khandhe garuṃ katvā
assādeti abhinandati taṃ garuṃ katvā rāgo uppajjati .
Sahajātādhipati: parāmāsasamyuttādhipati sampayuttakānaṃ khandhānaṃ
adhipatipaccayena paccayo.
{712.1} Parāmāsasampayutto dhammo parāmāsavippayuttassa
dhammassa adhipatipaccayena paccayo: ārammaṇādhipati
sahajātādhipati . ārammaṇādhipati: parāmāsasampayutte khandhe garuṃ
katvā assādeti abhinandati taṃ garuṃ katvā parāmāsavippayutto
rāgo uppajjati . Sahajātādhipati: parāmāsasampayuttādhipati cittasamuṭṭhānānaṃ
rūpānaṃ adhipatipaccayena paccayo.
{712.2} Parāmāsasampayutto dhammo parāmāsasampayuttassa ca
parāmāsavippayuttassa ca dhammassa adhipatipaccayena paccayo: sahajātādhipati:
parāmāsasampayuttādhipati sampayuttakānaṃ khandhānaṃ cittasamuṭṭhānānañca
rūpānaṃ adhipatipaccayena paccayo.
{712.3} Parāmāsavippayutto dhammo parāmāsavippayuttassa
dhammassa adhipatipaccayena paccayo: ārammaṇādhipati sahajātādhipati .
Ārammaṇādhipati: dānaṃ ... sīlaṃ ... uposathakammaṃ katvā taṃ garuṃ
katvā paccavekkhati assādeti abhinandati taṃ garuṃ katvā
parāmāsavippayutto rāgo uppajjati pubbe ... jhānā ...
Ariyā maggā vuṭṭhahitvā maggaṃ garuṃ ... Phalaṃ ... Nibbānaṃ ... Nibbānaṃ
Gotrabhussa vodānassa maggassa phalassa adhipatipaccayena paccayo
cakkhuṃ ... vatthuṃ ... parāmāsavippayutte khandhe garuṃ katvā assādeti
abhinandati taṃ garuṃ katvā parāmāsavippayutto rāgo uppajjati .
Sahajātādhipati: parāmāsavippayuttādhipati sampayuttakānaṃ khandhānaṃ
cittasamuṭṭhānānañca rūpānaṃ adhipatipaccayena paccayo.
{712.4} Parāmāsavippayutto dhammo parāmāsasampayuttassa
dhammassa adhipatipaccayena paccayo: ārammaṇādhipati: dānaṃ ... Sīlaṃ ...
Uposathakammaṃ katvā taṃ garuṃ katvā assādeti abhinandati taṃ garuṃ katvā
parāmāsasampayutto rāgo uppajjati pubbe ... Jhānā ... Cakkhuṃ ...
Vatthuṃ ... parāmāsavippayutte khandhe garuṃ katvā assādeti abhinandati
taṃ garuṃ katvā parāmāsasampayutto rāgo uppajjati.
[713] Parāmāsasampayutto dhammo parāmāsasampayuttassa dhammassa
anantarapaccayena paccayo: purimā purimā parāmāsasampayuttā khandhā
pacchimānaṃ pacchimānaṃ parāmāsasampayuttānaṃ khandhānaṃ anantarapaccayena
paccayo . parāmāsasampayutto dhammo parāmāsavippayuttassa dhammassa
anantarapaccayena paccayo: parāmāsasampayuttā khandhā vuṭṭhānassa
anantarapaccayena paccayo . parāmāsavippayutto dhammo
parāmāsavippayuttassa dhammassa anantarapaccayena paccayo: purimā purimā
parāmāsavippayuttā khandhā pacchimānaṃ pacchimānaṃ parāmāsavippayuttānaṃ
khandhānaṃ anulomaṃ phalasamāpattiyā anantarapaccayena paccayo .
Parāmāsavippayutto dhammo parāmāsasampayuttassa dhammassa anantarapaccayena
paccayo: āvajjanā parāmāsasampayuttānaṃ khandhānaṃ anantarapaccayena
paccayo. Samanantarapaccayena paccayo:.
[714] Parāmāsasampayutto dhammo parāmāsasampayuttassa dhammassa
sahajātapaccayena paccayo: pañca . aññamaññapaccayena paccayo:
dve. Nissayapaccayena paccayo: satta.
[715] Parāmāsasampayutto dhammo parāmāsasampayuttassa dhammassa
upanissayapaccayena paccayo: ārammaṇūpanissayo anantarūpanissayo
pakatūpanissayo .pe. pakatūpanissayo: parāmāsasampayutto rāgo ...
Moho ... patthanā parāmāsasampayuttassa rāgassa mohassa patthanāya
upanissayapaccayena paccayo.
{715.1} Parāmāsasampayutto dhammo parāmāsavippayuttassa
dhammassa upanissayapaccayena paccayo: ārammaṇūpanissayo
anantarūpanissayo pakatūpanissayo .pe. pakatūpanissayo:
parāmāsasampayuttaṃ rāgaṃ upanissāya dānaṃ deti .pe. samāpattiṃ
uppādeti mānaṃ jappeti .pe. parāmāsasampayuttaṃ mohaṃ ...
Patthanaṃ upanissāya dānaṃ deti samāpattiṃ uppādeti mānaṃ jappeti
pāṇaṃ hanati .pe. saṅghaṃ bhindati parāmāsasampayutto rāgo
moho patthanā saddhāya .pe. paññāya rāgassa dosassa
mohassa mānassa patthanāya kāyikassa sukhassa phalasamāpattiyā
upanissayapaccayena paccayo.
{715.2} Parāmāsavippayutto dhammo
Parāmāsavippayuttassa dhammassa upanissayapaccayena paccayo:
ārammaṇūpanissayo anantarūpanissayo pakatūpanissayo .pe.
Pakatūpanissayo: saddhaṃ upanissāya dānaṃ deti .pe. samāpattiṃ
uppādeti mānaṃ jappeti sīlaṃ ... .pe. paññaṃ rāgaṃ mānaṃ ...
Patthanaṃ upanissāya dānaṃ deti .pe. samāpattiṃ uppādeti
pāṇaṃ hanati .pe. saṅghaṃ bhindati kāyikaṃ sukhaṃ ... senāsanaṃ
upanissāya dānaṃ deti .pe. saṅghaṃ bhindati saddhā .pe.
Paññā rāgo māno patthanā kāyikaṃ sukhaṃ senāsanaṃ saddhāya
paññāya rāgassa mānassa patthanāya kāyikassa sukhassa phalasamāpattiyā
upanissayapaccayena paccayo.
{715.3} Parāmāsavippayutto dhammo parāmāsasampayuttassa
dhammassa upanissayapaccayena paccayo: ārammaṇūpanissayo anantarūpanissayo
pakatūpanissayo .pe. pakatūpanissayo: saddhaṃ upanissāya rāgo uppajjati
sīlaṃ .pe. senāsanaṃ upanissāya patthanā saddhā .pe. senāsanaṃ
parāmāsasampayuttassa rāgassa patthanāya upanissayapaccayena paccayo.
[716] Parāmāsavippayutto dhammo parāmāsavippayuttassa dhammassa
purejātapaccayena paccayo: ārammaṇapurejātaṃ vatthupurejātaṃ .
Ārammaṇapurejātaṃ: cakkhuṃ ... vatthuṃ aniccato ... Vipassati assādeti
abhinandati taṃ ārabbha parāmāsavippayutto rāgo vicikicchā uddhaccaṃ
domanassaṃ uppajjati dibbena cakkhunā rūpaṃ passati dibbāya sotadhātuyā
Saddaṃ suṇāti rūpāyatanaṃ cakkhuviññāṇassa phoṭṭhabbāyatanaṃ
kāyaviññāṇassa purejātapaccayena paccayo . vatthupurejātaṃ:
cakkhāyatanaṃ cakkhuviññāṇassa kāyāyatanaṃ kāyaviññāṇassa vatthu
parāmāsavippayuttānaṃ khandhānaṃ purejātapaccayena paccayo .
Parāmāsavippayutto dhammo parāmāsasampayuttassa dhammassa purejātapaccayena
paccayo: ārammaṇapurejātaṃ vatthupurejātaṃ . ārammaṇapurejātaṃ:
cakkhuṃ ... vatthuṃ assādeti abhinandati taṃ ārabbha parāmāsasampayutto
rāgo uppajjati . vatthupurejātaṃ: vatthu parāmāsasampayuttānaṃ
khandhānaṃ purejātapaccayena paccayo.
[717] Parāmāsasampayutto dhammo parāmāsavippayuttassa dhammassa
pacchājātapaccayena paccayo: . saṅkhittaṃ . parāmāsavippayutto
dhammo parāmāsavippayuttassa dhammassa pacchājātapaccayena paccayo:.
Saṅkhittaṃ.
[718] Parāmāsasampayutto dhammo parāmāsasampayuttassa dhammassa
āsevanapaccayena paccayo: dve.
[719] Parāmāsasampayutto dhammo parāmāsasampayuttassa dhammassa
kammapaccayena paccayo: parāmāsasampayuttā cetanā sampayuttakānaṃ
khandhānaṃ kammapaccayena paccayo . parāmāsasampayutto dhammo
parāmāsavippayuttassa dhammassa kammapaccayena paccayo: sahajātā
nānākhaṇikā . sahajātā: parāmāsasampayuttā cetanā cittasamuṭṭhānānaṃ
Rūpānaṃ kammapaccayena paccayo . nānākhaṇikā: parāmāsasampayuttā
cetanā vipākānaṃ khandhānaṃ kaṭattā ca rūpānaṃ
kammapaccayena paccayo . mūlaṃ pucchitabbaṃ parāmāsasampayuttā
cetanā sampayuttakānaṃ khandhānaṃ cittasamuṭṭhānānañca rūpānaṃ kammapaccayena
paccayo.
{719.1} Parāmāsavippayutto dhammo parāmāsavippayuttassa
dhammassa kammapaccayena paccayo: sahajātā nānākhaṇikā .
Sahajātā: parāmāsavippayuttā cetanā sampayuttakānaṃ
khandhānaṃ cittasamuṭṭhānānañca rūpānaṃ kammapaccayena paccayo .
Nānākhaṇikā: parāmāsavippayuttā cetanā vipākānaṃ khandhānaṃ kaṭattā ca
rūpānaṃ kammapaccayena paccayo . vipākapaccayena paccayo: ekaṃ .
Āhārapaccayena paccayo: cattāri . indriyapaccayena paccayo:
cattāri . jhānapaccayena paccayo: cattāri . maggapaccayena
paccayo: cattāri. Sampayuttapaccayena paccayo: dve.
[720] Parāmāsasampayutto dhammo parāmāsavippayuttassa dhammassa
vippayuttapaccayena paccayo: sahajātaṃ pacchājātaṃ . saṅkhittaṃ .
Parāmāsavippayutto dhammo parāmāsavippayuttassa dhammassa
vippayuttapaccayena paccayo: sahajātaṃ purejātaṃ pacchājātaṃ .
Saṅkhittaṃ . parāmāsavippayutto dhammo parāmāsasampayuttassa
dhammassa vippayuttapaccayena paccayo: purejātaṃ: vatthu parāmāsasampayuttānaṃ
khandhānaṃ vippayuttapaccayena paccayo.
[721] Parāmāsasampayutto dhammo parāmāsasampayuttassa dhammassa
atthipaccayena paccayo: parāmāsasampayutto eko khandho tiṇṇannaṃ
khandhānaṃ atthipaccayena paccayo: dve khandhā .... Parāmāsasampayutto
dhammo parāmāsavippayuttassa dhammassa atthipaccayena
paccayo: parāmāsasampayuttā khandhā cittasamuṭṭhānānaṃ rūpānaṃ atthipaccayena
paccayo . mūlaṃ kātabbaṃ parāmāsasampayutto dhammo
parāmāsasampayuttassa ca parāmāsavippayuttassa ca dhammassa atthipaccayena
paccayo: parāmāsasampayutto eko khandho tiṇṇannaṃ
khandhānaṃ cittasamuṭṭhānānañca rūpānaṃ atthipaccayena paccayo.
{721.1} Parāmāsavippayutto dhammo parāmāsavippayuttassa
dhammassa atthipaccayena paccayo: sahajātaṃ purejātaṃ pacchājātaṃ āhāraṃ
indriyaṃ . saṅkhittaṃ . parāmāsavippayutto dhammo parāmāsasampayuttassa
dhammassa atthipaccayena paccayo: purejātaṃ: cakkhuṃ ... Vatthuṃ assādeti
abhinandati taṃ ārabbha rāgo diṭṭhi uppajjati vatthu parāmāsasampayuttānaṃ
khandhānaṃ atthipaccayena paccayo . parāmāsasampayutto
ca parāmāsavippayutto ca dhammā parāmāsasampayuttassa
dhammassa atthipaccayena paccayo: sahajātaṃ purejātaṃ . sahajāto:
parāmāsasampayutto eko khandho ca vatthu ca tiṇṇannaṃ khandhānaṃ
atthipaccayena paccayo dve khandhā ....
{721.2} Parāmāsasampayutto ca parāmāsavippayutto
ca dhammā parāmāsavippayuttassa dhammassa
Atthipaccayena paccayo: sahajātaṃ pacchājātaṃ āhāraṃ indriyaṃ .
Sahajātā: parāmāsasampayuttā khandhā ca mahābhūtā ca cittasamuṭṭhānānaṃ
rūpānaṃ atthipaccayena paccayo . pacchājātā: parāmāsasampayuttā
khandhā ca kaḷaḷiṃkāro āhāro ca imassa kāyassa atthipaccayena
paccayo pacchājātā: parāmāsampayuttā khandhā ca
rūpajīvitindriyañca kaṭattārūpānaṃ atthipaccayena paccayo.
[722] Hetuyā cattāri ārammaṇe cattāri adhipatiyā
pañca anantare cattāri samanantare cattāri sahajāte pañca
aññamaññe dve nissaye satta upanissaye cattāri purejāte
dve pacchājāte dve āsevane dve kamme cattāri
vipāke ekaṃ āhāre cattāri indriye cattāri jhāne
cattāri magge cattāri sampayutte dve vippayutte tīṇi
atthiyā satta natthiyā cattāri vigate cattāri avigate satta.
[723] Parāmāsasampayutto dhammo parāmāsasampayuttassa
dhammassa ārammaṇapaccayena paccayo: sahajātapaccayena paccayo:
upanissayapaccayena paccayo:. Parāmāsasampayutto dhammo parāmāsavippayuttassa
dhammassa ārammaṇapaccayena paccayo: sahajātapaccayena
paccayo: upanissayapaccayena paccayo: pacchājātapaccayena
paccayo: kammapaccayena paccayo: . parāmāsasampayutto
dhammo parāmāsasampayuttassa ca parāmāsavippayuttassa ca dhammassa
Sahajātapaccayena paccayo:.
{723.1} Parāmāsavippayutto dhammo parāmāsavippayuttassa
dhammassa ārammaṇapaccayena paccayo: sahajātapaccayena
paccayo: upanissayapaccayena paccayo: purejātapaccayena
paccayo: pacchājātapaccayena paccayo: kammapaccayena
paccayo: āhārapaccayena paccayo: indriyapaccayena paccayo: .
Parāmāsavippayutto dhammo parāmāsasampayuttassa dhammassa ārammaṇapaccayena
paccayo: sahajātapaccayena paccayo: upanissayapaccayena
paccayo: purejātapaccayena paccayo:.
{723.2} Parāmāsasampayutto ca parāmāsavippayutto ca dhammā
parāmāsasampayuttassa dhammassa sahajātapaccayena paccayo:
purejātapaccayena paccayo: parāmāsasampayutto ca
parāmāsavippayutto ca dhammā parāmāsavippayuttassa
dhammassa sahajātapaccayena paccayo: pacchājātapaccayena paccayo:
āhārapaccayena paccayo: indriyapaccayena paccayo:.
[724] Nahetuyā satta naārammaṇe satta naadhipatiyā
satta naanantare satta nasamanantare satta nasahajāte pañca
naaññamaññe pañca nanissaye pañca naupanissaye satta
napurejāte cha napacchājāte satta sabbattha satta namagge
satta nasampayutte pañca navippayutte cattāri noatthiyā
cattāri nonatthiyā satta novigate satta noavigate cattāri.
[725] Hetupaccayā naārammaṇe cattāri ... Naadhipatiyā cattāri
Naanantare cattāri nasamanantare cattāri namaññamaññe dve naupanissaye
cattāri sabbattha cattāri namagge cattāri nasampayutte
dve navippayutte dve nonatthiyā cattāri novigate cattāri.
[726] Nahetupaccayā ārammaṇe cattāri ... adhipatiyā pañca
anulomamātikā kātabbā ... Avigate satta.
Parāmāsasampayuttadukaṃ niṭṭhitaṃ.
-----------
Parāmāsaparāmaṭṭhadukaṃ
paṭiccavāro
[727] Parāmāsañcevaparāmaṭṭhañca dhammaṃ paṭicca
parāmaṭṭhocevanocaparāmāso dhammo uppajjati hetupaccayā: parāmāsaṃ paṭicca
sampayuttakā khandhā cittasamuṭṭhānañca rūpaṃ . parāmaṭṭhañcevanocaparāmāsaṃ
dhammaṃ paṭicca parāmaṭṭhocevanocaparāmāso dhammo
uppajjati hetupaccayā: parāmaṭṭhañcevanocaparāmāsaṃ ekaṃ khandhaṃ
paṭicca tayo khandhā cittasamuṭṭhānañca rūpaṃ dve khandhe ... Paṭisandhikkhaṇe
yāva ajjhattikā mahābhūtā . parāmaṭṭhañcevanocaparāmāsaṃ
dhammaṃ paṭicca parāmāsocevaparāmaṭṭhoca dhammo uppajjati
hetupaccayā: parāmaṭṭhecevanocaparāmāse khandhe paṭicca parāmāso.
{727.1} Parāmaṭṭhañcevanocaparāmāsaṃ dhammaṃ paṭicca
parāmāsocevaparāmaṭṭhoca parāmaṭṭhocevanocaparāmāso
ca dhammā uppajjanti hetupaccayā:
Parāmaṭṭhañcevanocaparāmāsaṃ ekaṃ khandhaṃ paṭicca tayo khandhā parāmāso
ca cittasamuṭṭhānañca rūpaṃ dve khandhe .... Parāmāsañcevaparāmaṭṭhañca
parāmaṭṭhañcevanocaparāmāsañca dhammaṃ paṭicca
parāmaṭṭhocevanocaparāmāso dhammo uppajjati hetupaccayā:
parāmaṭṭhañcevanocaparāmāsaṃ ekaṃ khandhañca parāmāsañca paṭicca
tayo khandhā cittasamuṭṭhānañca rūpaṃ dve khandhe ... . saṅkhittaṃ .
Sabbe vārā yathā parāmāsadukaṃ evaṃ kātabbaṃ ninnānākaraṇaṃ.
Pañhāvāro
[728] Parāmaṭṭhocevanocaparāmāso dhammo parāmaṭṭhassaceva-
nocaparāmāsassa dhammassa hetupaccayena paccayo: parāmaṭṭhāceva-
nocaparāmāsā hetū sampayuttakānaṃ khandhānaṃ cittasamuṭṭhānānañca
rūpānaṃ hetupaccayena paccayo paṭisandhi . parāmaṭṭhocevanocaparāmāso
dhammo parāmāsassacevaparāmaṭṭhassaca dhammassa hetupaccayena
paccayo: parāmaṭṭhācevanocaparāmāsā hetū parāmāsassa
hetupaccayena paccayo . parāmaṭṭhocevanocaparāmāso dhammo
parāmāsassacevaparāmaṭṭhassaca parāmaṭṭhassacevanocaparāmāsassa ca
dhammassa hetupaccayena paccayo: parāmaṭṭhācevanocaparāmāsā hetū
sampayuttakānaṃ khandhānaṃ parāmāsassa ca cittasamuṭṭhānānañca rūpānaṃ
hetupaccayena paccayo.
[729] Parāmāsocevaparāmaṭṭhoca dhammo parāmāsassacevaparāmaṭṭhassaca
Dhammassa ārammaṇapaccayena paccayo: tīṇi ārabbha
kātabbā parāmāsadukasadisā . parāmaṭṭhocevanocaparāmāso
dhammo parāmaṭṭhassacevanocaparāmāsassa dhammassa ārammaṇapaccayena
paccayo: dānaṃ ... sīlaṃ ... uposathakammaṃ katvā taṃ paccavekkhati
assādeti abhinandati taṃ ārabbha rāgo vicikicchā uddhaccaṃ
domanassaṃ uppajjati pubbe ... Jhānā ... Ariyā gotrabhuṃ paccavekkhanti
vodānaṃ paccavekkhanti pahīne kilese ... vikkhambhite
kilese ... Pubbe ... Cakkhuṃ ... Vatthuṃ ... Parāmaṭṭhecevanocaparāmāse
khandhe aniccato ... domanassaṃ uppajjati dibbena cakkhunā rūpaṃ
passati yāva āvajjanāya sabbaṃ kātabbaṃ.
{729.1} Parāmaṭṭhocevanocaparāmāso dhammo parāmāsassaceva-
parāmaṭṭhassaca dhammassa ārammaṇapaccayena paccayo: dānaṃ ... Sīlaṃ ...
Uposathakammaṃ ... Pubbe ... Jhānā ... Cakkhuṃ ... Vatthuṃ ... Parāmaṭṭheceva-
nocaparāmāse khandhe assādeti abhinandati taṃ ārabbha diṭṭhi ....
Parāmaṭṭhocevanocaparāmāso dhammo parāmāsassacevaparāmaṭṭhassaca
parāmaṭṭhassacevanocaparāmāsassa ca dhammassa ārammaṇapaccayena
paccayo: dānaṃ ... sīlaṃ ... Uposathakammaṃ ... Pubbe ... Jhānā ...
Cakkhuṃ ... vatthuṃ ... parāmaṭṭhecevanocaparāmāse khandhe aniccato
... vipassati assādeti abhinandati taṃ ārabbha parāmāso
ca sampayuttakā ca khandhā uppajjanti . evaṃ itarepi tīṇi
ārabbha kātabbā . imaṃ dukaṃ parāmāsadukasadisaṃ .
Lokuttaraṃ yamhi na labbhati tamhi na kātabbaṃ.
Parāmāsaparāmaṭṭhadukaṃ niṭṭhitaṃ.
-------------
Parāmāsavippayuttaparāmaṭṭhadukaṃ
paṭiccavāro4
[730] Parāmāsavippayuttaṃparāmaṭṭhaṃ dhammaṃ paṭicca
parāmāsavippayuttoparāmaṭṭho dhammo uppajjati hetupaccayā:
parāmāsavippayuttaṃparāmaṭṭhaṃ ekaṃ khandhaṃ paṭicca tayo khandhā
cittasamuṭṭhānañca rūpaṃ dve khandhe ... . parāmāsavippayuttaṃaparāmaṭṭhaṃ
dhammaṃ paṭicca parāmāsavippayuttoaparāmaṭṭho dhammo uppajjati
hetupaccayā:.
Saṅkhittaṃ.
Yathā cūḷantaraduke lokiyadukaṃ evaṃ kātabbaṃ ninnānākaraṇaṃ.
Parāmāsavippayuttaparāmaṭṭhadukaṃ niṭṭhitaṃ.
Anulomadukapaṭṭhānaṃ purimaṃ
The Pali Tipitaka in Roman Character Volume 42 page 415-428.
https://84000.org/tipitaka/read/roman_item.php?book=42&item=712&items=19
Classified by [Item Number] :-
http://84000.org/tipitaka/read/roman_item.php?book=42&item=712&items=19&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=42&item=712&items=19
Compare with The Royal Version of Thai Tipitaka :-
https://84000.org/tipitaka/read/byitem.php?book=42&item=712&items=19
Study Atthakatha :-
https://84000.org/tipitaka/attha/attha.php?b=42&i=712
Contents of The Tipitaka Volume 42
https://84000.org/tipitaka/read/?index_42
https://84000.org/tipitaka/english/?index_42
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
