Paccayavāro
[310] Upādā dhammaṃ paccayā noupādā dhammo uppajjati
hetupaccayā: vatthuṃ paccayā noupādā khandhā paṭisandhikkhaṇe
.pe. noupādā dhammaṃ paccayā noupādā dhammo uppajjati
hetupaccayā: tīṇi . noupādāmūlake tīṇipi paṭiccasadisā
ninnānākaraṇā . upādā ca noupādā ca dhammaṃ paccayā noupādā
dhammo uppajjati hetupaccayā: noupādā ekaṃ khandhañca vatthuñca
paccayā tayo khandhā dve khandhe ... Paṭisandhi.
[311] Upādā dhammaṃ paccayā noupādā dhammo uppajjati
ārammaṇapaccayā: cakkhāyatanaṃ paccayā cakkhuviññāṇaṃ kāyāyatanaṃ
paccayā kāyaviññāṇaṃ vatthuṃ paccayā noupādā khandhā paṭisandhi .
Noupādā dhammaṃ paccayā noupādā dhammo uppajjati
ārammaṇapaccayā: ekaṃ paṭiccasadisaṃ . upādā ca noupādā ca
dhammaṃ paccayā noupādā dhammo uppajjati ārammaṇapaccayā:
Cakkhuviññāṇasahagataṃ ekaṃ khandhañca cakkhāyatanañca paccayā tayo
khandhā dve khandhe ... kāyaviññāṇasahagataṃ ... noupādā ekaṃ
khandhañca vatthuñca paccayā tayo khandhā dve khandhe ... Paṭisandhi.
Saṅkhittaṃ.
[312] Hetuyā pañca ārammaṇe tīṇi adhipatiyā pañca
anantare tīṇi samanantare tīṇi sahajāte pañca aññamaññe
pañca nissaye pañca upanissaye tīṇi purejāte tīṇi āsevane
tīṇi kamme pañca. Evaṃ gaṇetabbaṃ. Avigate pañca.
[313] Upādā dhammaṃ paccayā noupādā dhammo uppajjati
nahetupaccayā: cakkhāyatanaṃ paccayā cakkhuviññāṇaṃ kāyāyatanaṃ
paccayā kāyaviññāṇaṃ vatthuṃ paccayā ahetukā noupādā khandhā
ahetukapaṭisandhikkhaṇe vatthuṃ paccayā vicikicchāsahagato uddhacca-
sahagato moho . noupādā dhammaṃ paccayā noupādā dhammo
uppajjati nahetupaccayā: ahetukaṃ noupādā ekaṃ khandhaṃ paccayā
tayo khandhā noupādā ca cittasamuṭṭhānaṃ rūpaṃ dve khandhe ... Ahetuka-
paṭisandhikkhaṇe ekaṃ mahābhūtaṃ yāva asaññasattā vicikicchāsahagate
uddhaccasahagate khandhe paccayā vicikicchāsahagato uddhaccasahagato
moho.
{313.1} Tīṇipi paṭiccasadisā ninnānākaraṇaṃ . upādā ca
noupādā ca dhammaṃ paccayā noupādā dhammo uppajjati nahetupaccayā:
cakkhuviññāṇasahagataṃ ekaṃ khandhañca cakkhāyatanañca paccayā tayo khandhā
Dve khandhe ... kāyaviññāṇasahagataṃ ... noupādā ekaṃ khandhañca
vatthuñca paccayā tayo khandhā dve khandhe ... Paṭisandhikkhaṇe
vicikicchāsahagate uddhaccasahagate khandhe ca vatthuñca paccayā
vicikicchāsahagato uddhaccasahagato moho . ... naārammaṇapaccayā:
tīṇi naāsevanapaccayā: pañca.
[314] Upādā dhammaṃ paccayā noupādā dhammo uppajjati
nakammapaccayā: vatthuṃ paccayā noupādā cetanā . noupādā dhammaṃ
paccayā noupādā dhammo uppajjati nakammapaccayā: noupādā
khandhe paccayā sampayuttakā cetanā bāhiraṃ ... Āhārasamuṭṭhānaṃ ...
Utusamuṭṭhānaṃ ... dve mahābhūte paccayā dve mahābhūtā. Noupādā
dhammaṃ paccayā upādā dhammo uppajjati nakammapaccayā: bāhire ...
Āhārasamuṭṭhāne ... utusamuṭṭhāne mahābhūte paccayā upādārūpaṃ .
Noupādā dhammaṃ paccayā upādā ca noupādā ca dhammā uppajjanti
nakammapaccayā: bāhiraṃ ... āhārasamuṭṭhānaṃ ... utusamuṭṭhānaṃ ekaṃ
mahābhūtaṃ paccayā tayo mahābhūtā upādā ca rūpaṃ dve .... Upādā
ca noupādā ca dhammaṃ paccayā noupādā dhammo uppajjati
nakammapaccayā: noupādā khandhe ca vatthuñca paccayā noupādā
cetanā . ... navipākapaccayā: pañca naāhārapaccayā: tīṇi
naindriyapaccayā: tīṇi.
[315] Upādā dhammaṃ paccayā noupādā dhammo uppajjati
Najhānapaccayā: cakkhāyatanaṃ paccayā cakkhuviññāṇaṃ kāyāyatanaṃ
paccayā kāyaviññāṇaṃ . noupādā dhammaṃ paccayā noupādā
dhammo uppajjati najhānapaccayā: pañcaviññāṇasahagataṃ ekaṃ
khandhaṃ paccayā tayo khandhā dve khandhe ... Bāhiraṃ ... Āhārasamuṭṭhānaṃ
... utusamuṭṭhānaṃ ... asaññasattānaṃ dve mahābhūte paccayā dve
mahābhūtā . noupādā dhammaṃ paccayā upādā dhammo uppajjati
najhānapaccayā: bāhire ... āhārasamuṭṭhāne ... Utusamuṭṭhāne ...
Asaññasattānaṃ mahābhūte paccayā upādā kaṭattārūpaṃ.
{315.1} Noupādā dhammaṃ paccayā upādā ca noupādā ca
dhammā uppajjanti najhānapaccayā: bāhiraṃ ... āhārasamuṭṭhānaṃ ...
Utusamuṭṭhānaṃ ... asaññasattānaṃ ekaṃ mahābhūtaṃ paccayā tayo mahābhūtā
upādā ca kaṭattārūpaṃ dve .... Upādā ca noupādā ca dhammaṃ paccayā
noupādā dhammo uppajjati najhānapaccayā: cakkhuviññāṇasahagataṃ
ekaṃ khandhañca cakkhāyatanañca paccayā tayo khandhā dve khandhe ....
... Namaggapaccayā: pañca nasampayuttapaccayā: tīṇi navippayuttapaccayā:
tīṇi nonatthipaccayā: tīṇi novigatapaccayā: tīṇi.
[316] Nahetuyā pañca naārammaṇe tīṇi naadhipatiyā
pañca nakamme pañca navipāke pañca naāhāre tīṇi
naindriye tīṇi najhāne pañca namagge pañca nasampayutte
tīṇi navippayutte tīṇi nonatthiyā tīṇi novigate tīṇi .
Evaṃ itare dve gaṇanāpi nissayavāropi kātabbā.
Saṃsaṭṭhavāro
[317] Noupādā dhammaṃ saṃsaṭṭho noupādā dhammo uppajjati
hetupaccayā: noupādā ekaṃ khandhaṃ saṃsaṭṭhā tayo khandhā dve khandhe
saṃsaṭṭhā dve khandhā paṭisandhikkhaṇe .pe. Saṅkhittaṃ.
[318] Hetuyā ekaṃ ārammaṇe ekaṃ adhipatiyā ekaṃ sabbattha ekaṃ
avigate ekaṃ.
[319] Noupādā dhammaṃ saṃsaṭṭho noupādā dhammo uppajjati
nahetupaccayā: ahetukaṃ noupādā ekaṃ khandhaṃ saṃsaṭṭhā tayo khandhā
dve khandhe ... ahetukapaṭisandhikkhaṇe vicikicchāsahagate uddhaccasahagate
khandhe saṃsaṭṭho vicikicchāsahagato uddhaccasahagato moho. Saṅkhittaṃ.
[320] Nahetuyā ekaṃ naadhipatiyā ekaṃ napurejāte ekaṃ napacchā-
jāte ekaṃ naāsevane ekaṃ nakamme ekaṃ navipāke ekaṃ najhāne
ekaṃ namagge ekaṃ navippayutte ekaṃ . evaṃ itare dve gaṇanāpi
sampayuttavāropi kātabbā.
Pañhāvāro
[321] Noupādā dhammo noupādā dhammassa hetupaccayena
paccayo: noupādā hetū sampayuttakānaṃ khandhānaṃ noupādā ca
cittasamuṭṭhānānaṃ rūpānaṃ hetupaccayena paccayo paṭisandhikkhaṇe
.pe. noupādā dhammo upādā dhammassa hetupaccayena paccayo:
Noupādā hetū upādā cittasamuṭṭhānānaṃ rūpānaṃ hetupaccayena
paccayo paṭisandhikkhaṇe .pe. noupādā dhammo upādā ca
noupādā ca dhammassa hetupaccayena paccayo: noupādā hetū
sampayuttakānaṃ khandhānaṃ upādā ca noupādā ca cittasamuṭṭhānānaṃ
rūpānaṃ hetupaccayena paccayo paṭisandhikkhaṇe .pe.
[322] Upādā dhammo noupādā dhammassa ārammaṇapaccayena
paccayo: cakkhuṃ ... Kāyaṃ rūpe rase ... Vatthuṃ aniccato .pe. Domanassaṃ
uppajjati dibbena cakkhunā rūpaṃ passati dibbāya sotadhātuyā saddaṃ
suṇāti rūpāyatanaṃ cakkhuviññāṇassa rasāyatanaṃ jivhāviññāṇassa
ārammaṇapaccayena paccayo upādā khandhā iddhividhañāṇassa pubbe-
nivāsānussatiñāṇassa anāgataṃsañāṇassa āvajjanāya ārammaṇa-
paccayena paccayo.
{322.1} Noupādā dhammo noupādā dhammassa ārammaṇa-
paccayena paccayo: dānaṃ ... Sīlaṃ ... Uposathakammaṃ katvā taṃ paccavekkhati
assādeti abhinandati taṃ ārabbha rāgo uppajjati .pe. domanassaṃ
uppajjati pubbe .pe. jhānā .pe. ariyā maggā vuṭṭhahitvā maggaṃ
paccavekkhanti phalaṃ ... nibbānaṃ ... Nibbānaṃ gotrabhussa vodānassa
maggassa phalassa āvajjanāya ārammaṇapaccayena paccayo ariyā pahīne
kilese paccavekkhanti vikkhambhite kilese ... Pubbe .pe. Phoṭṭhabbe ...
Noupādā khandhe aniccato .pe. domanassaṃ uppajjati cetopariyañāṇena
Noupādācittasamaṅgissa cittaṃ jānāti ākāsānañcāyatanaṃ
viññāṇañcāyatanassa ākiñcaññāyatanaṃ nevasaññānāsaññāyatanassa
phoṭṭhabbāyatanaṃ kāyaviññāṇassa ārammaṇapaccayena paccayo
noupādā khandhā iddhividhañāṇassa cetopariyañāṇassa pubbe-
nivāsānussatiñāṇassa yathākammupagañāṇassa anāgataṃsañāṇassa
āvajjanāya ārammaṇapaccayena paccayo.
[323] Upādā dhammo noupādā dhammassa adhipatipaccayena
paccayo: ārammaṇādhipati: cakkhuṃ ... Kāyaṃ rūpe rase ... Vatthuṃ garuṃ katvā
assādeti abhinandati taṃ garuṃ katvā rāgo uppajjati diṭṭhi uppajjati.
Noupādā dhammo noupādā dhammassa adhipatipaccayena paccayo:
ārammaṇādhipati sahajātādhipati . ārammaṇādhipati: dānaṃ ... sīlaṃ ...
Uposathakammaṃ katvā taṃ garuṃ katvā paccavekkhati assādeti abhinandati
taṃ garuṃ katvā rāgo uppajjati diṭṭhi uppajjati pubbe suciṇṇāni ...
Jhānā vuṭṭhahitvā jhānaṃ ... Ariyā maggā vuṭṭhahitvā maggaṃ garuṃ katvā
... phalaṃ ... nibbānaṃ ... nibbānaṃ gotrabhussa vodānassa maggassa
phalassa adhipatipaccayena paccayo phoṭṭhabbe ... Noupādā khandhe garuṃ
katvā assādeti abhinandati taṃ garuṃ katvā rāgo uppajjati diṭṭhi uppajjati.
Sahajātādhipati: noupādā adhipati sampayuttakānaṃ khandhānaṃ noupādā ca
cittasamuṭṭhānānaṃ rūpānaṃ adhipatipaccayena paccayo . noupādā dhammo
Upādā dhammassa adhipatipaccayena paccayo: sahajātādhipati: noupādā
adhipati upādā cittasamuṭṭhānānaṃ rūpānaṃ adhipatipaccayena paccayo .
Noupādā dhammo upādā ca noupādā ca dhammassa adhipatipaccayena
paccayo: sahajātādhipati: noupādā adhipati sampayuttakānaṃ khandhānaṃ
upādā ca noupādā ca cittasamuṭṭhānānaṃ rūpānaṃ adhipatipaccayena
paccayo.
[324] Noupādā dhammo noupādā dhammassa anantarapaccayena
paccayo: purimā purimā noupādā khandhā pacchimānaṃ pacchimānaṃ
noupādā khandhānaṃ anantarapaccayena paccayo anulomaṃ gotrabhussa
phalasamāpattiyā anantarapaccayena paccayo . ... samanantarapaccayena
paccayo: sahajātapaccayena paccayo: paṭiccasadisaṃ . ... aññamañña-
paccayena paccayo: paṭiccasadisaṃ. ... Nissayapaccayena paccayo: paccayavāre
nissayasadisaṃ.
[325] Upādā dhammo noupādā dhammassa upanissayapaccayena
paccayo: ārammaṇūpanissayo pakatūpanissayo .pe. pakatūpanissayo:
cakkhusampadaṃ ... kāyasampadaṃ vaṇṇasampadaṃ gandhasampadaṃ rasasampadaṃ ...
Bhojanaṃ upanissāya dānaṃ deti .pe. saṅghaṃ bhindati cakkhusampadā ...
Kāyasampadā vaṇṇasampadā gandhasampadā rasasampadā ... bhojanaṃ
saddhāya phalasamāpattiyā upanissayapaccayena paccayo . noupādā
dhammo noupādā dhammassa upanissayapaccayena paccayo: ārammaṇūpanissayo
Anantarūpanissayo pakatūpanissayo .pe. pakatūpanissayo: saddhaṃ
upanissāya dānaṃ deti .pe. samāpattiṃ uppādeti mānaṃ jappeti
diṭṭhiṃ gaṇhāti sīlaṃ ... saddhaṃ .pe. patthanaṃ kāyikaṃ sukhaṃ kāyikaṃ dukkhaṃ
utuṃ ... senāsanaṃ upanissāya dānaṃ deti .pe. saṅghaṃ bhindati saddhā
.pe. senāsanaṃ saddhāya .pe. phalasamāpattiyā upanissayapaccayena
paccayo.
[326] Upādā dhammo noupādā dhammassa purejātapaccayena
paccayo: ārammaṇapurejātaṃ vatthupurejātaṃ . ārammaṇapurejātaṃ:
cakkhuṃ .pe. vatthuṃ aniccato .pe. domanassaṃ uppajjati dibbena
cakkhunā rūpaṃ passati dibbāya sotadhātuyā saddaṃ suṇāti rūpāyatanaṃ
cakkhuviññāṇassa rasāyatanaṃ jivhāviññāṇassa . vatthupurejātaṃ:
cakkhāyatanaṃ cakkhuviññāṇassa kāyāyatanaṃ ... vatthu noupādā khandhānaṃ
purejātapaccayena paccayo . noupādā dhammo noupādā dhammassa
purejātapaccayena paccayo: ārammaṇapurejātaṃ: phoṭṭhabbe aniccato
.pe. domanassaṃ uppajjati phoṭṭhabbāyatanaṃ kāyaviññāṇassa
purejātapaccayena paccayo . upādā ca noupādā ca dhammā
noupādā dhammassa purejātapaccayena paccayo: ārammaṇapurejātaṃ
vatthupurejātaṃ . phoṭṭhabbāyatanañca vatthu ca noupādā khandhānaṃ
purejātapaccayena paccayo phoṭṭhabbāyatanañca kāyāyatanañca
kāyaviññāṇassa purejātapaccayena paccayo.
The Pali Tipitaka in Roman Character Volume 43 page 188-196.
https://84000.org/tipitaka/read/roman_item.php?book=43&item=310&items=17
Classified by [Item Number] :-
http://84000.org/tipitaka/read/roman_item.php?book=43&item=310&items=17&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=43&item=310&items=17
Compare with The Royal Version of Thai Tipitaka :-
https://84000.org/tipitaka/read/byitem.php?book=43&item=310&items=17
Study Atthakatha :-
https://84000.org/tipitaka/attha/attha.php?b=43&i=310
Contents of The Tipitaka Volume 43
https://84000.org/tipitaka/read/?index_43
https://84000.org/tipitaka/english/?index_43
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
