paliTIPITAKA Volume 18 - Sutta Pitaka 10

[213] Ekaṃ samayaṃ bhagavā sakyesu ^1- viharati devadahannāma sakyānaṃ ^2- nigamo . tatra kho bhagavā bhikkhū āmantesi nāhaṃ bhikkhave sabbesaññeva bhikkhūnaṃ chasu phassāyatanesu appamādena karaṇīyanti vadāmi . na ca panāhaṃ bhikkhave sabbesaññeva bhikkhūnaṃ chasu phassāyatanesu nāppamādena karaṇīyanti vadāmi . ye te bhikkhave bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaññojanā sammadaññā vimuttā tesāhaṃ bhikkhave bhikkhūnaṃ chasu phassāyatanesu nāppamādena karaṇīyanti vadāmi . taṃ kissa hetu . Kathantesaṃ ^3- appamādena abhabbā tena ^4- pamajjituṃ . ye ca kho te bhikkhave bhikkhū sekhā ^5- appattamānasā anuttaraṃ yogakkhemaṃ patthayamānāva ^6- viharanti . tesāhaṃ bhikkhave bhikkhūnaṃ chasu phassāyatanesu appamādena karaṇīyanti vadāmi . taṃ kissa hetu . santi bhikkhave cakkhuviññeyyā rūpā manoramāpi amanoramāpi tyāssa phussa phussa cittaṃ na pariyādāya tiṭṭhanti cetaso apariyādānā āraddhaṃ hoti viriyaṃ asallīnaṃ upaṭṭhitā sati appamuṭṭhā ^7- passaddho kāyo asāraddho samāhitaṃ cittaṃ ekaggaṃ. {213.1} Imaṃ khvāhaṃ bhikkhave appamādaphalaṃ sampassamāno tesaṃ bhikkhūnaṃ @Footnote: ¹ Ma. Yu. sakkesu. ² Yu. sakkānaṃ nigame. ³ Ma. Yu. kataṃ. ⁴ te. @⁵ sekkhāti vā pāṭho . ⁶ Ma. Yu. vasaddo natthi. ⁷ Ma. Yu. asammuṭṭhā. @evamuparipi. Chasu phassāyatanesu appamādena karaṇīyanti vadāmi .pe. santi bhikkhave jivhāviññeyyā rasā manoramāpi amanoramāpi tyāssa phussa phussa cittaṃ na pariyādāya tiṭṭhanti cetaso apariyādānā āraddhaṃ hoti viriyaṃ asallīnaṃ upaṭṭhitā sati appamuṭṭhā passaddho kāyo asāraddho samāhitaṃ cittaṃ ekaggaṃ . imaṃ khvāhaṃ bhikkhave appamādaphalaṃ sampassamāno tesaṃ bhikkhūnaṃ chasu phassāyatanesu appamādena karaṇīyanti vadāmīti .pe. santi bhikkhave manoviññeyyā dhammā manoramāpi amanoramāpi tyāssa phussa phussa cittaṃ na pariyādāya tiṭṭhanti cetaso apariyādānā āraddhaṃ hoti viriyaṃ asallīnaṃ upaṭṭhitā sati appamuṭṭhā passaddho kāyo asāraddho samāhitaṃ cittaṃ ekaggaṃ . imaṃ khvāhaṃ bhikkhave appamādaphalaṃ sampassamāno tesaṃ bhikkhūnaṃ chasu phassāyatanesu appamādena karaṇīyanti vadāmīti. Paṭhamaṃ.

The Pali Tipitaka in Roman Character Volume 18 page 157-158. http://84000.org/tipitaka/read/roman_item_s.php?book=18&item=213&items=1&mode=bracket Classified by content :- http://84000.org/tipitaka/read/roman_item_s.php?book=18&item=213&items=1 Compare with The Pali Tipitaka in Thai Character :- http://84000.org/tipitaka/read/pali_item_s.php?book=18&item=213&items=1&mode=bracket Compare with The Royal Version of Thai Tipitaka :- http://84000.org/tipitaka/read/byitem_s.php?book=18&item=213&items=1&mode=bracket Study Atthakatha :- http://84000.org/tipitaka/attha/attha.php?b=18&i=213 The Pali Atthakatha in Thai :- http://84000.org/tipitaka/atthapali/read_th.php?B=13&A=1107 The Pali Atthakatha in Roman :- http://84000.org/tipitaka/atthapali/read_rm.php?B=13&A=1107 Contents of The Tipitaka Volume 18 http://84000.org/tipitaka/read/?index_18