paliTIPITAKA Volume 2 - Vinaya Pitaka 2

page391.

Catutthasikkhāpadaṃ [592] Tena samayena buddho bhagavā kosambiyaṃ viharati ghositārāme . tena kho pana samayena āyasmā channo anācāraṃ ācarati . bhikkhū evamāhaṃsu mā āvuso channa evarūpaṃ akāsi netaṃ kappatīti . so anādariyaṃ paṭicca karotiyeva . ye te bhikkhū appicchā .pe. te ujjhāyanti khīyanti vipācenti kathaṃ hi nāma āyasmā channo anādariyaṃ karissatīti .pe. saccaṃ kira tvaṃ channa anādariyaṃ karosīti . saccaṃ bhagavāti . vigarahi buddho bhagavā kathaṃ hi nāma tvaṃ moghapurisa anādariyaṃ karissasi netaṃ moghapurisa appasannānaṃ vā pasādāya pasannānaṃ vā bhiyyobhāvāya .pe. evañca pana bhikkhave imaṃ sikkhāpadaṃ uddiseyyātha {592.1} anādariye pācittiyanti. [593] Anādariyaṃ nāma dve anādariyāni puggalānādariyañca dhammānādariyañca . puggalānādariyaṃ nāma upasampannena paññattena vuccamāno ayaṃ ukkhitto ^1- vā vambhito vā garahito vā imassa vacanaṃ akataṃ bhavissatīti . anādariyaṃ karoti āpatti pācittiyassa. {593.1} Dhammānādariyaṃ nāma upasampannena paññattena vuccamāno kathāyaṃ nasseyya vā vinasseyya vā antaradhāyeyya vāti taṃ vā na sikkhitukāmo anādariyaṃ karoti āpatti pācittiyassa. @Footnote: ¹ Ma. ukkhittako.

--------------------------------------------------------------------------------------------- page392.

[594] Upasampanne upasampannasaññī anādariyaṃ karoti āpatti pācittiyassa . upasampanne vematiko anādariyaṃ karoti āpatti pācittiyassa . upasampanne anupasampannasaññī anādariyaṃ karoti āpatti pācittiyassa. [595] Upasampannena ^1- appaññattena vuccamāno idaṃ na sallekhāya na dhūtattāya ^2- na pāsādikatāya na apacayāya na viriyārambhāya saṃvattatīti anādariyaṃ karoti āpatti dukkaṭassa . Anupasampannena paññattena vā appaññattena vā vuccamāno idaṃ na sallekhāya na dhūtattāya na pāsādikatāya na apacayāya na viriyārambhāya saṃvattatīti anādariyaṃ karoti āpatti dukkaṭassa. [596] Anupasampanne upasampannasaññī āpatti dukkaṭassa . Anupasampanne vematiko āpatti dukkaṭassa . anupasampanne anupasampannasaññī āpatti dukkaṭassa. [597] Anāpatti evaṃ amhākaṃ ācariyānaṃ uggaho paripucchāti bhaṇati ummattakassa ādikammikassāti. Catutthasikkhāpadaṃ niṭṭhitaṃ. ---------- @Footnote: ¹ Ma. ayaṃ pāṭho natthi . ² Ma. dhutattāya. evamuparipi.

The Pali Tipitaka in Roman Character Volume 2 page 391-392. http://84000.org/tipitaka/read/roman_item_s.php?book=2&item=592&items=6&pagebreak=1 Classified by [Item Number] :- http://84000.org/tipitaka/read/roman_item_s.php?book=2&item=592&items=6&pagebreak=1&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=2&item=592&items=6&pagebreak=1 Compare with The Royal Version of Thai Tipitaka :- http://84000.org/tipitaka/read/byitem_s.php?book=2&item=592&items=6&pagebreak=1 Study Atthakatha :- http://84000.org/tipitaka/attha/attha.php?b=2&i=592 The Pali Atthakatha in Thai :- http://84000.org/tipitaka/atthapali/read_th.php?B=2&A=9565 The Pali Atthakatha in Roman :- http://84000.org/tipitaka/atthapali/read_rm.php?B=2&A=9565 Contents of The Tipitaka Volume 2 http://84000.org/tipitaka/read/?index_2