Ekūnavīsatimo kuṭajapupphiyavaggo
paṭhamaṃ kuṭajapupphiyattherāpadānaṃ (181)
[183] |183.1| Suvaṇṇavaṇṇaṃ sambuddhaṃ sataraṃsīva uttamaṃ 1-
disaṃ anuvilokentaṃ gacchantaṃ anilañjase.
|183.2| Kuṭajaṃ pupphitaṃ disvā saṃvitthakasamotthakaṃ 2-
rukkhato ocinitvāna phussassa abhiropayiṃ.
|183.3| Dvenavute ito kappe yaṃ pupphaṃ abhiropayiṃ
duggatiṃ nābhijānāmi buddhapūjāyidaṃ phalaṃ.
|183.4| Ito sattarase kappe tayo āsiṃsu 3- pupphitā
sattaratanasampannā cakkavattī mahabbalā.
|183.5| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā kuṭajapupphiyo thero imā gāthāyo
abhāsitthāti.
Kuṭajapupphiyattherassa apadānaṃ samattaṃ.
Dutiyaṃ bandhujīvakattherāpadānaṃ (182)
[184] |184.6| Sobhito 4- nāma sambuddho sayambhū sabbhivaṇṇito
samādhiṃ so samāpanno nisīdi pabbatantare.
@Footnote: 1 Ma. Yu. uggataṃ. 2 Ma. saṃvitathatasamotthataṃ. Yu. haṃ vitthatasamotthaṭaṃ.
@3 Ma. tayo āsuṃ supupphitā. 4 Ma. Yu. siddhattho.
|184.7| Jātassare gavesanto dakajaṃ pupphamuttamaṃ
bandhujīvakapupphāni addasaṃ samanantaraṃ.
|184.8| Ubhohatthehi paggayha upagacchiṃ mahāmuniṃ
pasannacitto sumano sobhitassābhiropayiṃ 1-.
|184.9| Catunavute ito kappe yaṃ pupphamabhiropayiṃ
duggatiṃ nābhijānāmi buddhapūjāyidaṃ phalaṃ.
|184.10| Ito catuddase kappe eko āsiṃ janādhipo
samuddakappo nāmena cakkavatti mahabbalo.
|184.11| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā bandhujīvako thero imā gāthāyo
abhāsitthāti.
Bandhujīvakattherassa apadānaṃ samattaṃ.
Tatiyaṃ kotumbariyattherāpadānaṃ (183)
[185] |185.12| Kaṇikāraṃva jotantaṃ nisinnaṃ pabbatantare
appameyyaṃva udadhiṃ uddhataṃ 2- dharaṇiṃ yathā.
|185.13| Puretaṃ 3- devasaṅghena nisabhājāniyaṃ yathā.
Haṭṭho haṭṭhena cittena upagañchiṃ naruttamaṃ.
@Footnote: 1 Ma. Yu. siddhatthassābhiropayiṃ. 2 Ma. vitthataṃ. 3 Ma. pūjitaṃ. Yu. paretaṃ.
|185.14| Satta pupphāni paggayha kotumbaraṃ samākulaṃ
buddhassa abhiropesiṃ sikhino lokabandhuno.
|185.15| Ekattiṃse ito kappe yaṃ pupphamabhiropayiṃ
duggatiṃ nābhijānāmi buddhapūjāyidaṃ phalaṃ.
|185.16| Ito vīsatikappamhi mahānelasanāmako
eko āsiṃ mahātejo cakkavatti mahabbalo.
|185.17| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā kotumbariyo thero imā gāthāyo
abhāsitthāti.
Kotumbariyattherassa apadānaṃ samattaṃ.
Catutthaṃ pañcahatthiyattherāpadānaṃ (184)
[186] |186.18| Tisso nāmāsi bhagavā lokajeṭṭho narāsabho
purakkhato sāvakehi rathiyaṃ paṭipajjatha.
|186.19| Pañca uppalahatthā ca catuoṭṭhapitā 1- mayā
āhutiṃ dātukāmohaṃ puttomhi 2- hitasiddhiyā.
|186.20| Suvaṇṇavaṇṇaṃ sambuddhaṃ gacchantaṃ antarāpaṇe
buddharaṃsīhi 3- phuṭṭhomhi 4- pūjesiṃ dipaduttamaṃ.
@Footnote: 1 Ma. cāturā ṭhapitā mayā. Yu. caturoṭṭhapitā mayā. 2 Ma. paggaṇhiṃ vatasiddhiyā.
@Yu. mūgomhi .... 3 Yu. buddharaṃsābhi ghuṭṭhomhi. 4 Ma. phuṭṭhosmi.
|186.21| Dvenavute ito kappe yaṃ pupphamabhiropayiṃ
duggatiṃ nābhijānāmi buddhapūjāyidaṃ phalaṃ.
|186.22| Ito terasakappamhi pañca sulabhasammatā 1-
sattaratanasampannā cakkavattī mahabbalā.
|186.23| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā pañcahatthiyo thero imā gāthāyo
abhāsitthāti.
Pañcahatthiyattherassa apadānaṃ samattaṃ.
Pañcamaṃ isimuggadāyakattherāpadānaṃ (185)
[187] |187.24| Udentaṃ sataraṃsīva pītaraṃsīva 2- bhāṇumaṃ
kakudhaṃ vilasantaṃva padumuttaranāyakaṃ.
|187.25| Isimuggaṃ 3- nimantetvā madhukhudde anīlake
pāsādepi 4- ṭhito santo adāsiṃ lokabandhuno.
|187.26| Aṭṭhasatasahassāni ahesuṃ buddhasāvakā
sabbesaṃ patta pūrentaṃ tato vāpi 5- bahūtaraṃ.
|187.27| Tena cittappasādena sukkamūlena codito
kappānaṃ satasahassaṃ duggatiṃ nūpapajjahaṃ.
@Footnote: 1 Ma. pañca susabhasammatā. Yu. pañcāsu sabhāsammatā. 2 Yu. uggataṃ iva ....
@3 Ma. isimuggāni pisitvā. Yu. isimuggā nisandetvā. 4 Ma. Yu. ... va.
@5 Ma. Yu. cāpi.
|187.28| Cattāḷīsamhi sahasse kappānaṃ aṭṭhatiṃsate
mahisamantanāmā 1- te cakkavattī mahabbalā.
|187.29| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā isimuggadāyako thero imā gāthāyo
abhāsitthāti.
Isimuggadāyakattherassa apadānaṃ samattaṃ.
Chaṭṭhaṃ bodhiupaṭṭhāyakattherāpadānaṃ (186)
[188] |188.30| Nagare rammavatiyā āsiṃ murajavādako 2-
niccupaṭṭhānayuttomhi gatohaṃ bodhimuttamaṃ.
|188.31| Sāyaṃ pātaṃ upaṭṭhitvā sukkamūlena codito
aṭṭhārase kappasate duggatiṃ nūpapajjahaṃ.
|188.32| Pañcadase kappasate itohosiṃ 3- janādhipo
damatho 4- nāma nāmena cakkavatti mahabbalo.
|188.33| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā bodhiupaṭṭhāyako 5- thero imā gāthāyo
abhāsitthāti.
Bodhiupaṭṭhāyakattherassa apadānaṃ samattaṃ.
@Footnote: 1 Ma. isimuggasanāmā te. 2 Yu. murajanāmako. 3 Yu. rājāhosiṃ.
@4 Ma. murajo .... 5 Ma. bodhiupaṭṭhāko.
Sattamaṃ ekacintikattherāpadānaṃ (187)
[189] |189.34| Yadā devo devakāyā cavate āyusaṅkhayā
tayo saddā niccharanti devānaṃ anumodataṃ.
|189.35| Ito bho sugatiṃ gaccha manussānaṃ sahabyataṃ
manussabhūto saddhamme labha saddhaṃ anuttaraṃ.
|189.36| Sā te saddhā niviṭṭhassa 1- mūlajātā patiṭṭhitā
yāvajīvaṃ asaṃhirā saddhamme supavedite.
|189.37| Kāyena kusalaṃ katvā vācāya kusalaṃ bahuṃ
manasā kusalaṃ katvā abyāpajjhaṃ nirūpadhiṃ.
|189.38| Tato upacitaṃ puññaṃ katvā dānena taṃ bahuṃ
aññepi macce saddhamme brahmacariye nivesaya.
|189.39| Imāya anukampāya devadevaṃ 2- yathāvidū
bhavantaṃ anumodanti ehi deva punappunaṃ.
|189.40| Saṃviggohaṃ 3- tadā āsiṃ devasaṅghe samāgate
kaṃsu nāma ahaṃ yoniṃ gamissāmi ito cuto.
|189.41| Mama saṃvegamaññāya samaṇo bhāvitindriyo
mamuddharitukāmo so āgacchi mama santike.
|189.42| Sumano nāma nāmena padumuttarasāvako
atthadhammānusāsitvā saṃvejesi mamaṃ tadā.
@Footnote: 1 Ma. niviṭṭhāssa. Yu. naviṭṭhāya. 2 Ma. devādevaṃ. 3 Ma. saṃvego me tadā āsi.
@Yu. saṃviggomhi tadā āsiṃ.
|189.43| Tassāhaṃ vacanaṃ sutvā buddhe cittaṃ pasādayiṃ
abhivādetvāpi 1- sambuddhaṃ tattha kālaṃ kato ahaṃ.
|189.44| Upapajjiṃ sa tattheva sukkamūlena codito
kappānaṃ satasahassaṃ duggatiṃ nūpapajjahaṃ.
|189.45| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ekacintiko thero imā gāthāyo
abhāsitthāti.
Ekacintikattherassa apadānaṃ samattaṃ.
Aṭṭhamaṃ tikaṇṇipupphiyattherāpadānaṃ (188)
[190] |190.46| Devabhūto ahaṃ santo accharāhi purakkhato
pubbakammaṃ saritvāna buddhaseṭṭhaṃ anussariṃ.
|190.47| Tikaṇṇipupphaṃ paggayha sakaṃ cittaṃ pasādayiṃ
buddhamhi 2- abhiropesiṃ vipassimhi narāsabhe.
|190.48| Ekanavute ito kappe yaṃ pupphaṃ abhiropayiṃ
duggatiṃ nābhijānāmi buddhapūjāyidaṃ phalaṃ.
|190.49| Tesattatimhito kappe caturosuṃ 3- ramuttamā
sattaratanasampannā cakkavattī mahabbalā.
@Footnote: 1 Ma. Yu. taṃ dhīraṃ abhivādetvā. 2 Yu. buddhassa. 3 Yu. caturāsuṃ naruttamā.
@Ma. caturāsuṃ ramuttamā.
|190.50| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā tikaṇṇipupphiyo thero imā gāthāyo
abhāsitthāti.
Tikaṇṇipupphiyattherassa apadānaṃ samattaṃ.
Navamaṃ ekacāriyattherāpadānaṃ (189)
[191] |191.51| Tāvatiṃsesu devesu mahāghoso tadā ahu
buddho ca loke nibbāti mayañcamha sarāgino.
|191.52| Tesaṃ saṃvegajātānaṃ sokasallasamaṅginaṃ
sabalena upatthaddho agamaṃ buddhasantike.
|191.53| Mandāravaṃ gahetvāna saṅgīti 1- abhinimmitaṃ
parinibbānakālamhi 2- buddhassa abhiropayiṃ.
|191.54| Sabbe devānumodiṃsu accharāyo ca me tadā
kappānaṃ satasahassaṃ duggatiṃ nūpapajjahaṃ.
|191.55| Saṭṭhikappasahassamhi ito soḷasa te janā
mahāmallajanā nāma cakkavattī mahabbalā.
|191.56| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
@Footnote: 1 Yu. saṃhitaṃ. 2 Ma. parinibbutakālamhi.
Itthaṃ sudaṃ āyasmā ekacāriyo thero imā gāthāyo
abhāsitthāti.
Ekacāriyattherassa apadānaṃ samattaṃ.
Dasamaṃ tivaṇṭipupphiyattherāpadānaṃ (190)
[192] |192.57| Abhibhuṃ 1- theraṃ panijjhāma sabbe saṅgamma te mayaṃ 2-
tesaṃ nijjhāyamānānaṃ pariḷāho ajāyatha.
|192.58| Sunando nāma nāmena buddhassa sāvako tadā
dhammadassissa munino āgañchi mama santike.
|192.59| Ye me paṭṭhacarā āsuṃ te me pupphaṃ aduṃ tadā
tāhaṃ pupphaṃ gahetvāna sāvake abhiropayiṃ .
|192.60| Sohaṃ kālaṃ kato tattha punāpi upapajjahaṃ
aṭṭhārase kappasate vinipātaṃ na gañchahaṃ.
|192.61| Teraseto kappasate aṭṭhāsuṃ dhūmaketuno
sattaratanasampannā cakkavattī mahabbalā.
|192.62| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā tivaṇṭipupphiyo thero imā gāthāyo
abhāsitthāti.
Tivaṇṭipupphiyattherassa apadānaṃ samattaṃ.
@Footnote: 1 Ma. abhibhūtaṃ panijjhanti. Yu. abhibhuṃ vo panijjhanti. 2 Ma. ... mamaṃ.
Uddānaṃ
kuṭajā 1- bandhujīvī ca kotumbarikahatthiyo
isimuggo ca bodhi ca ekacintī tikaṇṇiko
ekacārī tivaṇṭī ca gāthā saṭṭhī 2- pakittitāti.
Kuṭajapupphiyavaggo ekūnavīsatimo.
------------------
The Pali Tipitaka in Roman Character Volume 32 page 282-291.
http://84000.org/tipitaka/read/roman_item_s.php?book=32&item=183&items=10
Classified by [Item Number] :-
http://84000.org/tipitaka/read/roman_item_s.php?book=32&item=183&items=10&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=32&item=183&items=10
Compare with The Royal Version of Thai Tipitaka :-
http://84000.org/tipitaka/read/byitem_s.php?book=32&item=183&items=10
Study Atthakatha :-
http://84000.org/tipitaka/attha/attha.php?b=32&i=183
The Pali Atthakatha in Thai :-
http://84000.org/tipitaka/atthapali/read_th.php?B=50&A=4829
The Pali Atthakatha in Roman :-
http://84000.org/tipitaka/atthapali/read_rm.php?B=50&A=4829
Contents of The Tipitaka Volume 32
http://84000.org/tipitaka/read/?index_32
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
