[139] |139.251| Imamhi bhaddake kappe brahmabandhu mahāyaso
kassapo nāma nāmena uppajji vadataṃ varo.
|139.252| Tadāhaṃ pabbajitvāna tassa buddhassa sāsane
yāvajīvaṃ caritvāna brahmacaraṃ 1- tato cuto.
|139.253| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|139.254| Tato cuto araññamhi kapoto āsahaṃ tahiṃ
vasate guṇasampanno bhikkhu jhānarato sadā.
|139.255| Mettacitto kāruṇiko sadā pamuditānano
upekkhako mahāvīro appamaññāsu kovido.
|139.256| Vinīvaraṇasaṅkappo sabbasattahitāsayo
vissaṭṭho na cirenāsiṃ tasmiṃ sugatasāvake.
|139.257| Upecca pādamūlamhi nisinnassa tadāssame
kadāci āmisaṃ 2- deti dhammaṃ desesi cekadā.
@Footnote: 1 Ma. brahmacāraṃ. Yu. brahmaceraṃ. 2 Ma. sāmisaṃ.
|139.258| Tadā vipulapemena upāsitvā jinatrajaṃ
tato cuto gato saggaṃ pavāso sagharaṃ yathā.
|139.259| Saggā cuto manussesu nibbatto puññakammunā
agāraṃ chaḍḍayitvāna pabbajiṃ bahuso ahaṃ.
|139.260| Samaṇo tāpaso dijo 1- paribbājo tathevahaṃ
hutvā vasiṃ araññamhi anekasatayo 2- ahaṃ.
|139.261| Pacchime ca bhave dāni ramme kāpilavatthave
vacchagotto dijo tassa jāyāya ahamokkamiṃ.
|139.262| Mātu me dohaḷo āsi tirokucchigatassa me
jāyamānasamīpamhi vanavāsāya nicchayo.
|139.263| Tato me ajani mātā ramaṇīye vanantare
gabbhato nikkhamantaṃ maṃ kāsāyena paṭiggahuṃ.
|139.264| Tato kumāro siddhattho jāto sakyakuladdhajo
tassa mitto piyo āsiṃ saṃvissaṭṭho sumāniyo 3-.
|139.265| Sattasārehi nikkhante 4- ohāya vipulaṃ yasaṃ
ahaṃpi pabbajitvāna himavantaṃ upāgamiṃ.
|139.266| Vanālayaṃ bhāvaniyaṃ kassapaṃ dhutavādakaṃ 5-
disvā sutvā jinuppādaṃ upesiṃ narasārathiṃ.
|139.267| So me dhammaṃ adesesi sabbatthaṃ sampakāsayaṃ
tatohaṃ pabbajitvāna vanameva punokkamaṃ 6-.
@Footnote: 1 Ma. Yu. vippo. 2 Ma. Yu. anekasataso. 3 Yu. sumānigo.
@4 Ma. nikkhanto. 5 Ma. dhutavādikaṃ. 6 Ma. punāgamaṃ. Yu. punāgamiṃ.
|139.268| Tatthappamatto viharaṃ chaḷabhiññā apassayiṃ
aho suladdhalābhomhi sumittenānukampito.
|139.269| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|139.270| Svāgataṃ vata me āsi buddhaseṭṭhassa santike
tisso vijjā anuppattā kataṃ buddhassa sāsanaṃ.
|139.271| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā vanavaccho thero imā gāthāyo abhāsitthāti.
Vanavacchattherassa apadānaṃ samattaṃ.
Dasamaṃ cūḷasugandhattherāpadānaṃ (550)
The Pali Tipitaka in Roman Character Volume 33 page 246-248.
http://84000.org/tipitaka/read/roman_item_s.php?book=33&item=139&items=1&mode=bracket
Classified by content :-
http://84000.org/tipitaka/read/roman_item_s.php?book=33&item=139&items=1
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=139&items=1&mode=bracket
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=139&items=1&mode=bracket
Study Atthakatha :-
http://84000.org/tipitaka/attha/attha.php?b=33&i=139
The Pali Atthakatha in Thai :-
http://84000.org/tipitaka/atthapali/read_th.php?B=50&A=7106
The Pali Atthakatha in Roman :-
http://84000.org/tipitaka/atthapali/read_rm.php?B=50&A=7106
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
