Sonadandasuttam catuttham
[178] Evamme sutam. Ekam samayam bhagava angesu carikancaramano
mahata bhikkhusamghena saddhim pancamattehi bhikkhusatehi yena
campa tadavasari . tatra sudam bhagava campayam viharati gaggaraya
pokkharaniya tire.
[179] Tena kho pana samayena sonadando brahmano campam
ajjhavasati sattussadam satinakatthodakam sadhannam rajabhoggam ranna
magadhena seniyena bimbisarena dinnam rajadayam brahmadeyyam .
Assosum kho campeyyaka brahmanagahapatika samano khalu bho
gotamo sakyaputto sakyakula pabbajito angesu carikancaramano
mahata bhikkhusamghena saddhim pancamattehi bhikkhusatehi campam anuppatto
campayam viharati gaggaraya pokkharaniya tire tam kho pana bhavantam
gotamam evamkalyano kittisaddo abbhuggato itipi so bhagava
araham sammasambuddho vijjacaranasampanno sugato lokavidu anuttaro
purisadammasarathi sattha devamanussanam buddho bhagavati so imam lokam
sadevakam samarakam sabrahmakam sassamanabrahmanim pajam sadevamanussam
sayam abhinna sacchikatva pavedeti so dhammam deseti adikalyanam
majjhekalyanam pariyosanakalyanam sattham sabyanjanam kevalaparipunnam
parisuddham brahmacariyam pakaseti sadhu kho pana tatharupanam arahatam
Dassanam hotiti . athakho campeyyaka brahmanagahapatika campaya
nikkhamitva samghasamghiganibhuta yena gaggara pokkharani tenupasankamanti.
[180] Tena kho pana samayena sonadando brahmano uparipasade
divaseyyam upagato hoti . addasa kho sonadando brahmano
campeyyake brahmanagahapatike campaya nikkhamitva samghasamghiganibhute
yena gaggara pokkharani tenupasankamante disva khattam amantesi kim
nu kho bho khatte campeyyaka brahmanagahapatika campaya nikkhamitva
samghasamghiganibhuta yena gaggara pokkharani tenupasankamantiti . atthi kho
bho samano gotamo sakyaputto sakyakula pabbajito angesu carikancaramano
mahata bhikkhusamghena saddhim pancamattehi bhikkhusatehi campam anuppatto
campayam viharati gaggaraya pokkharaniya tire tam kho pana bhavantam gotamam
evamkalyano kittisaddo abbhuggato itipi so bhagava araham
sammasambuddho vijjacaranasampanno sugato lokavidu anuttaro
purisadammasarathi sattha devamanussanam buddho bhagavati tamete bhavantam
gotamam dassanaya upasankamantiti . tenahi bho khatte yena campeyyaka
brahmanagahapatika tenupasankami upasankamitva campeyyake
brahmanagahapatike evam vadesi sonadando bho brahmano evamaha
agamentu kira bhavanto sonadandopi brahmano samanam gotamam
dassanaya upasankamissatiti . evam bhoti kho so khatto sonadandassa
Brahmanassa patissutva yena campeyyaka brahmanagahapatika
tenupasankami upasankamitva campeyyake brahmanagahapatike
etadavoca sonadando bho brahmano evamaha agamentu kira
bhavanto sonadandopi brahmano samanam gotamam dassanaya
upasankamissatiti.
[181] Tena kho pana samayena nanaverajjakanam brahmananam
pancamattani brahmanasatani campayam pativasanti kenacideva
karaniyena . assosum kho te brahmana sonadando brahmano
samanam gotamam dassanaya upasankamissatiti . athakho te brahmana
yena sonadando brahmano tenupasankamimsu upasankamitva sonadandam
brahmanam etadavocum saccam kira bhavam sonadando samanam gotamam
dassanaya upasankamissatiti . evam kho me bho hoti ahampi samanam
gotamam dassanaya upasankamissamiti . ma bhavam sonadando
samanam gotamam dassanaya upasankami na arahati bhavam sonadando
samanam gotamam dassanaya upasankamitum sace bhavam sonadando samanam
gotamam dassanaya upasankamissati bhoto sonadandassa yaso hayissati
samanassa gotamassa yaso abhivaddhissati yampi bhoto sonadandassa
yaso hayissati samanassa gotamassa yaso abhivaddhissati imina
cangena na arahati bhavam sonadando samanam gotamam dassanaya
upasankamitum samano tveva gotamo arahati bhavantam sonadandam
Dassanaya upasankamitum bhavam hi sonadando ubhato sujato matito
ca pitito ca samsuddhagahaniko yava sattama pitamahayuga akkhitto
anupakkuttho jativadena yampi bhavam sonadando ubhato sujato
matito ca pitito ca samsuddhagahaniko yava sattama pitamahayuga
akkhitto anupakkuttho jativadena imina cangena na arahati bhavam
sonadando samanam gotamam dassanaya upasankamitum samano tveva
gotamo arahati bhavantam sonadandam dassanaya upasankamitum bhavam hi
sonadando addho mahaddhano mahabhogo .pe. bhavam hi sonadando
ajjhayako mantadharo tinnam vedanam paragu sanighanduketubhanam
sakkharappabhedanam itihasapancamanam padako veyyakarano
lokayatamahapurisalakkhanesu anavayo bhavam hi sonadando abhirupo
dassaniyo pasadiko paramaya vannapokkharataya samannagato
brahmavanni brahmavacchasi 1- akkhuddavakaso dassanaya bhavanhi
sonadando silava vuddhasili 2- vuddhasilena samannagato bhavam
hi sonadando kalyanavaco kalyanavakkarano poriya vacaya
samannagato vissatthaya anelagalaya atthassa vinnapaniya bhavam
hi sonadando bahunam acariyapacariyo tini manavakasatani mante
vaceti bahuka kho pana nanadisa nanajanapada manavaka
agacchanti bhoto sonadandassa santike mantatthika mante
@Footnote: 1 Si. brahmavanni brahmavaddhi. 2 Si. vuddhasili.
Adhiyitukama bhavanhi sonadando jinno vuddho mahallako
addhagato vayoanuppatto samano gotamo taruno ceva tarunapabbajito
ca bhavanhi sonadando ranno magadhassa seniyassa bimbisarassa
sakkato garukato manito pujito apacito bhavanhi sonadando
brahmanassa pokkharasatissa sakkato garukato manito pujito apacito
bhavanhi sonadando campam ajjhavasati sattussadam satinakatthodakam
sadhannam rajabhoggam ranna magadhena seniyena bimbisarena dinnam
rajadayam brahmadeyyam yampi bhavam sonadando campam ajjhavasati
sattussadam satinakatthodakam sadhannam rajabhoggam ranna magadhena
seniyena bimbisarena dinnam rajadayam brahmadeyyam imina cangena
na arahati bhavam sonadando samanam gotamam dassanaya upasankamitum
samano tveva gotamo arahati bhavantam sonadandam dassanaya
upasankamitunti.
[182] Evam vutte sonadando brahmano te brahmane
etadavoca tenahi bho mamapi sunatha yatha mayameva arahama tam
bhavantam gotamam dassanaya upasankamitum na tveva arahati so bhavam
gotamo amhakam dassanaya upasankamitum samano khalu bho gotamo
ubhato sujato matito ca pitito ca samsuddhagahaniko yava sattama
pitamahayuga akkhitto anupakkuttho jativadena yampi bho samano
gotamo ubhato sujato matito ca pitito ca samsuddhagahaniko yava
Sattama pitamahayuga akkhitto anupakkuttho jativadena imina
cangena na aharati so bhavam gotamo amhakam dassanaya upasankamitum
athakho mayameva arahama tam bhavantam gotamam dassanaya upasankamitum
{182.1} samano khalu bho gotamo mahantam natisamgham ohaya pabbajito
.pe. samano khalu bho gotamo pahutam hirannam suvannam ohaya pabbajito
bhumigatanca vehasatthanca samano khalu bho gotamo daharo va samano susu
kalakeso bhadrena yobbanena samannagato pathamena vayasa agarasma
anagariyam pabbajito samano khalu bho gotamo akamakanam matapitunam
assumukhanam rudantanam kesamassum oharetva kasayani vatthani
acchadetva agarasma anagariyam pabbajito samano khalu bho gotamo
abhirupo dassaniyo pasadiko paramaya vannapokkharataya samannagato
brahmavanni brahmavacchasi akkhuddavakaso dassanaya samano khalu bho
gotamo silava ariyasili kusalasili kusalasilena samannagato samano khalu
bho gotamo kalyanavaco kalyanavakkarano poriya vacaya
samannagato vissatthaya anelagalaya atthassa vinnapaniya samano
khalu bho gotamo bahunam acariyapacariyo samano khalu bho gotamo
khinakamarago vigatacapallo samano khalu bho gotamo kammavadi
kiriyavadi apapapurekkharo brahmannaya pajaya samano khalu bho
gotamo uccakula pabbajito abhinnakhattiyakula samano khalu bho gotamo
Addha 1- kula pabbajito mahaddhana mahabhoga samanam khalu bho
gotamam tirorattha tirojanapada sampucchitum agacchanti samanam khalu
bho gotamam anekani devatasahassani panehi saranangatani samanam
khalu bho gotamam evamkalyano kittisaddo abbhuggato itipi so
bhagava araham sammasambuddho vijjacaranasampanno sugato lokavidu
anuttaro purisadammasarathi sattha devamanussanam buddho bhagavati
{182.2} samano khalu bho gotamo dvattimsamahapurisalakkhanehi
samannagato samano khalu bho gotamo ehisagatavadi sakhilo 2- sammodako
abbhakutiko uttanamukho pubbabhasi samano khalu bho gotamo catunnam
parisanam sakkato garukato manito pujito apacito samanam khalu bho gotamam
bahu deva ca manussa ca abhippasanna samano khalu bho gotamo yasmim
game va nigame va pativasati na tasmim game va nigame va amanussa
manusse vihethenti samano khalu bho gotamo samghiganiganacariyo
puthutitthakaranam aggamakkhayati yatha kho pana bho etesam
samanabrahmananam yatha va tatha va yaso samudagacchati na hevam
samanassa gotamassa yaso samudagato athakho anuttaraya
vijjacaranasampadaya samanassa gotamassa yaso samudagato samanam
khalu bho gotamam raja magadho seniyo bimbisaro saputto sabhariyo
@Footnote: 1 addhatipi addhakulatipi addhakulatipi patho. 2 Si. ehisahatavadi
@sukhilo.
Sapariso samacco panehi saranangato samanam khalu bho gotamam
raja pasenadikosalo saputto sabhariyo sapariso samacco panehi
saranangato samanam khalu bho gotamam brahmano pokkharasati saputto
sabhariyo sapariso samacco panehi saranangato samano khalu bho
gotamo ranno magadhassa seniyassa bimbisarassa sakkato garukato
manito pujito apacito samano khalu bho gotamo ranno pasenadikosalassa
sakkato garukato manito pujito apacito samano khalu bho gotamo
brahmanassa pokkharasatissa sakkato garukato manito
pujito apacito samano khalu bho gotamo campam anuppatto campayam
viharati gaggaraya pokkharaniya tire ye kho pana bho keci samana
va brahmana va amhakam gamakkhettam agacchanti atithino te
honti atithino panamhehi sakkatabba garukatabba manetabba
pujetabba apacetabba yampi bho samano gotamo campam anuppatto
campayam viharati gaggaraya pokkharaniya tire atithismakam samano
gotamo atithi kho panamhehi sakkatabbo garukatabbo manetabbo
pujetabbo apacitabbo imina cangena na arahati so bhavam gotamo
amhakam dassanaya upasankamitum athakho mayameva arahama tam bhavantam
gotamam dassanaya upasankamitum ettake kho aham bhoto gotamassa
vanne pariyapunami no ca kho so bhavam gotamo ettakavanno
aparimanavanno hi so bhavam gotamoti.
[183] Evam vutte te brahmana sonadandam brahmanam
etadavocum yatha kho bhavam sonadando samanassa gotamassa vanne
bhasati ito cepi so bhavam gotamo yojanasate viharati alameva
saddhena kulaputtena dassanaya upasankamitum api putosenati 1-. Tenahi
bho sabbe va mayam samanam gotamam dassanaya upasankamissamati.
{183.1} Athakho sonadando brahmano mahata brahmanaganena
saddhim yena gaggara pokkharani tenupasankami . athakho sonadandassa
brahmanassa tirovanasandagatassa evam cetaso parivitakko udapadi
ahanceva kho pana samanam gotamam panham puccheyyam tatra ce mam
samano gotamo evam vadeyya na kho esa brahmana panho
evam pucchitabbo evam namesa brahmana panho pucchitabboti
tena mam ayam parisa paribhaveyya balo sonadando brahmano
abyatto nasakkhi samanam gotamam yoniso panham pucchitunti yam kho
panayam parisa paribhaveyya yasopi tassa hayetha yassa kho pana yaso
hayetha bhogapi tassa hayeyyum yasoladdha kho panamhakam bhoga
manceva pana samano gotamo panham puccheyya tassa caham panhassa
veyyakaranena cittam na aradheyyam tatra ce mam samano gotamo
evam vadeyya na kho esa brahmana panho evam byakatabbo
evam namesa brahmana panho byakatabboti tena mam ayam parisa
@Footnote: 1 Si. putamsenati.
Paribhaveyya balo sonadando brahmano abyatto nasakkhi
samanassa gotamassa panhassa veyyakaranena cittam aradhetunti
yam kho panayam parisa paribhaveyya yasopi tassa hayetha yassa kho
pana yaso hayetha bhogapi tassa hayeyyum yasoladdha kho panamhakam
bhoga ahanceva kho pana evam samipagato samano adisva va
samanam gotamam nivatteyyam tena mam ayam parisa paribhaveyya balo
sonadando brahmano abyatto manathaddho bhito no visahi
samanam gotamam dassanaya upasankamitum kathanhi nama evam samipagato
samano adisva samanam gotamam nivattissatiti yam kho panayam parisa
paribhaveyya yasopi tassa hayetha yassa kho pana yaso hayetha bhogapi
tassa hayeyyum yasoladdha kho panamhakam bhogati.
[184] Athakho sonadando brahmano yena bhagava tenupasankami
upasankamitva bhagavata saddhim sammodi sammodaniyam katham saraniyam
vitisaretva ekamantam nisidi . campeyyakapi kho brahmanagahapatika
appekacce bhagavantam abhivadetva ekamantam nisidimsu appekacce
bhagavata saddhim sammodimsu sammodaniyam katham saraniyam vitisaretva
ekamantam nisidimsu appekacce yena bhagava tenanjalimpanametva
ekamantam nisidimsu appekacce namagottam savetva ekamantam nisidimsu
appekacce tunhibhuta ekamantam nisidimsu . tatra sudam sonadando
brahmano etadeva bahulamanuvitakkento nisinno hoti ahanceva
Kho pana samanam gotamam panham puccheyyam tatra ce mam samano
gotamo evam vadeyya na kho esa brahmana panho evam
pucchitabbo evam namesa brahmana panho pucchitabboti tena mam
ayam parisa paribhaveyya balo sonadando brahmano abyatto
nasakkhi samanam gotamam yoniso panham pucchitunti yam kho panayam
parisa paribhaveyya yasopi tassa hayetha yassa kho pana yaso
hayetha bhogapi tassa hayeyyum yasoladdha kho panamhakam bhoga
manceva kho pana samano gotamo panham puccheyya tassa caham
panhassa veyyakaranena cittam na aradheyyam tatra ce mam samano
gotamo evam vadeyya na kho esa brahmana panho evam
byakatabbo evam namesa brahmana panho byakatabboti
tena mam ayam parisa paribhaveyya balo sonadando brahmano
abyatto nasakkhi samanassa gotamassa panhassa veyyakaranena
cittam aradhetunti yam kho panayam parisa paribhaveyya yasopi tassa
hayetha yassa kho pana yaso hayetha bhogapi tassa hayeyyum
yasoladdha kho panamhakam bhoga aho vata mam samano gotamo
sake acariyake tevijjake mam panham puccheyya addha va tassaham
cittam aradheyya panhassa veyyakaranenati.
[185] Athakho bhagavato sonadandassa brahmanassa cetasa
cetoparivitakkamannaya etadahosi vihannati kho ayam sonadando
Brahmano sakena cittena yananunaham sonadandam brahmanam sake
acariyake tevijjake panham puccheyyanti . athakho bhagava sonadandam
brahmanam etadavoca katihi pana brahmana angehi samannagatam
brahmana brahmanam pannapenti brahmanosmiti ca vadamano
samma vadeyya na ca pana musavadam apajjeyyati . athakho
sonadandassa brahmanassa etadahosi yam vata no ahosi icchitam
yam akankhitam yam adhippetam yam abhipatthitam aho vata mam samano
gotamo sake acariyake tevijjake panham puccheyya addha va
tassaham cittam aradheyyam panhassa veyyakaranena tatra ce mam
samano gotamo sake acariyake tevijjake panham pucchati addha
va tassaham cittam aradhessami panhassa veyyakaranenati.
[186] Athakho sonadando brahmano abbhunnametva kayam
anuviloketva parisam bhagavantam etadavoca pancahi bho gotama angehi
samannagatam brahmana brahmanam pannapenti brahmanosmiti ca
vadamano samma vadeyya na ca pana musavadam apajjeyya katamehi
pancahi idha bho gotama brahmano ubhato sujato hoti matito
ca pitito ca samsuddhagahaniko yava sattama pitamahayuga akkhitto
anupakkuttho jativadena ajjhayako ca hoti mantadharo tinnam
vedanam paragu sanighanduketubhanam sakkharappabhedanam itihasapancamanam
padako veyyakarano lokayatamahapurisalakkhanesu anavayo abhirupo
Ca hoti dassaniyo pasadiko paramaya vannapokkharataya samannagato
brahmavanni brahmavacchasi akkhuddavakaso dassanaya silava ca
hoti vuddhasili vuddhasilena samannagato pandito ca hoti medhavi
pathamo va dutiyo va pujam pagganhantanam imehi kho bho gotama
pancahi angehi samannagatam brahmana brahmanam pannapenti
brahmanosmiti ca vadamano samma vadeyya na ca pana musavadam
apajjeyyati.
[187] Imesam pana brahmana pancannam anganam sakka ekam
angam thapayitva catuhi angehi samannagatam brahmanam pannapetum
brahmanosmiti ca vadamano samma vadeyya na ca pana musavadam
apajjeyyati . sakka bho gotama imesam hi bho gotama pancannam
anganam vannam thapayama kim hi vanno karissati yato kho bho gotama
brahmano ubhato sujato hoti matito ca pitito ca samsuddhagahaniko
yava sattama pitamahayuga akkhitto anupakkuttho jativadena
ajjhayako ca hoti mantadharo tinnam vedanam paragu sanighanduketubhanam
sakkharappabhedanam itihasapancamanam padako veyyakarano
lokayatamahapurisalakkhanesu anavayo silava ca hoti vuddhasili
vuddhasilena samannagato pandito ca hoti medhavi pathamo va
dutiyo va pujam pagganhantanam imehi kho bho gotama catuhi angehi
samannagatam brahmana brahmanam pannapenti brahmanosmiti ca
Vadamano samma vadeyya na ca pana musavadam apajjeyyati.
[188] Imesam pana brahmana catunnam anganam sakka ekam
angam thapayitva tihi angehi samannagatam brahmanam pannapetum
brahmanosmiti ca vadamano samma vadeyya na ca pana musavadam
apajjeyyati . sakka bho gotama imesam hi bho gotama catunnam
anganam mante thapayama kim hi manta karissanti yato kho bho
gotama brahmano ubhato sujato hoti matito ca pitito ca
samsuddhagahaniko yava sattama pitamahayuga akkhitto anupakkuttho
jativadena silava ca hoti vuddhasili vuddhasilena samannagato
pandito ca hoti medhavi pathamo va dutiyo va pujam pagganhantanam
imehi kho bho gotama tihi angehi samannagatam brahmana
brahmanam pannapenti brahmanosmiti ca vadamano samma vadeyya
na ca pana musavadam apajjeyyati.
[189] Imesam pana brahmana tinnam anganam sakka ekam
angam thapayitva dvihi angehi samannagatam brahmanam pannapetum
brahmanosmiti ca vadamano samma vadeyya na ca pana musavadam
apajjeyyati . sakka bho gotama imesam hi bho gotama tinnam
anganam jatim thapayama kim hi jati karissati yato kho bho gotama
brahmano silava ca hoti vuddhasili vuddhasilena samannagato
pandito ca hoti medhavi pathamo va dutiyo va pujam pagganhantanam
Imehi kho bho gotama dvihi angehi samannagatam brahmana
brahmanam pannapenti brahmanosmiti ca vadamano samma vadeyya
na ca pana musavadam apajjeyyati.
[190] Evam vutte te brahmana sonadandam brahmanam
etadavocum ma bhavam sonadando evam avaca ma bhavam sonadando
evam avaca apavadati bhavam sonadando vannam apavadati mante
apavadati jatim ekamsena bhavam sonadando samanassayeva gotamassa
vadam anupakkhandatiti.
{190.1} Athakho bhagava te brahmane etadavoca sace
kho tumhakam brahmananam evam hoti appassuto ca sonadando
brahmano akalyanavakkarano ca sonadando brahmano
duppanno ca sonadando brahmano na ca pahoti sonadando
brahmano samanena gotamena saddhim asmim vacane patimantetunti
titthatu sonadando brahmano tumhe maya saddhim mantavho sace
pana tumhakam brahmananam evam hoti bahussuto ca sonadando
brahmano kalyanavakkarano ca sonadando brahmano pandito
ca sonadando brahmano pahoti ca sonadando brahmano
samanena gotamena saddhim asmim vacane patimantetunti titthatha tumhe
sonadando brahmano maya saddhim patimantetuti.
[191] Evam vutte sonadando brahmano bhagavantam etadavoca
titthatu bhavam gotamo tunhi bhavam gotamo hotu ahameva tesam
Sahadhammena pativacanam karissamiti . athakho sonadando te brahmane
etadavoca ma bhavanto evam avacuttha ma bhavanto evam avacuttha
apavadati bhavam sonadando brahmano vannam apavadati mante
apavadati jatim ekamsena bhavam sonadando brahmano samanasseva
gotamassa vadam anupakkhandatiti naham bho apavadami vannam va
mante va jatim vati.
[192] Tena kho pana samayena sonadandassa brahmanassa
bhagineyyo angako nama manavako tassam parisayam nisinno
hoti . athakho sonadando brahmano te brahmane etadavoca
passanti no bhonto imam angakam manavakam amhakam bhagineyyanti .
Evam bho angako kho bho manavako abhirupo dassaniyo pasadiko
paramaya vannapokkharataya samannagato brahmavanni brahmavacchasi
akkhuddavakaso dassanaya nassa imissam parisayam samasamo atthi
vannena thapetva samanam gotamam . angako kho manavako ajjhayako
mantadharo tinnam vedanam paragu sanighanduketubhanam sakkharappabhedanam
itihasapancamanam padako veyyakarano lokayatamahapurisalakkhanesu
anavayo ahamassa mante vaceta angako kho manavako ubhato sujato
matito ca pitito ca samsuddhagahaniko yava sattama pitamahayuga
akkhitto anupakkuttho jativadena ahamassa matapitaro
janami angako kho manavako panampi haneyya adinnampi
Adiyeyya paradarampi gaccheyya musapi bhaseyya majjampi piveyya
etthadani kim vanno karissati kim manta kim jati yato kho bho
brahmano silava ca hoti vuddhasili vuddhasilena samannagato
pandito ca hoti medhavi pathamo va dutiyo va pujam pagganhantanam
imehi kho bho dvihi angehi samannagatam brahmana brahmanam
pannapenti brahmanosmiti ca vadamano samma vadeyya na ca
pana musavadam apajjeyyati.
[193] Imesam pana brahmana dvinnam anganam sakka ekam
angam thapayitva ekena angena samannagatam brahmanam pannapetum
brahmanosmiti ca vadamano samma vadeyya na ca pana musavadam
apajjeyyati . no hidam bho gotama silaparidhota hi bho gotama
panna pannaparidhotam silam yattha silam tattha panna yattha panna
tattha silam silavato panna pannavato silam silapannananca pana
lokasmim aggamakkhayati seyyathapi bho gotama hatthena va hattham
dhoveyya padena va padam dhoveyya evameva kho bho gotama
silaparidhota panna pannaparidhotam silam yattha silam tattha panna
yattha panna tattha silam silavato panna pannavato silam
silapannananca pana lokasmim aggamakkhayatiti.
[194] Evametam brahmana evametam brahmana silaparidhota
hi brahmana panna pannaparidhotam silam yattha silam tattha
Panna yattha panna tattha silam silavato panna pannavato
silam silapannananca pana lokasmim aggamakkhayati seyyathapi
brahmana hatthena va hattham dhoveyya padena va padam dhoveyya
evameva kho brahmana silaparidhota panna pannaparidhotam silam
yattha silam tattha panna yattha panna tattha silam silavato panna
pannavato silam silapannananca pana lokasmim aggamakkhayatiti
katamam pana tam brahmana silam katama pana sa pannati .
Ettakaparama ca mayam bho gotama kismim atthe sadhu vata bhavantamyeva
gotamam patibhatu etassa bhasitassa atthoti.
[195] Tenahi brahmana sunahi sadhukam manasikarohi bhasissamiti.
Evam bhoti kho sonadando brahmano bhagavato paccassosi . bhagava
etadavoca idha brahmana tathagato loke uppajjati araham
sammasambuddho .pe. (yatha samannaphale evam vittharetabbam)
.pe. evam kho pana brahmana bhikkhu silasampanno hoti . idampi
kho tam brahmana silam . pathamam jhanam upasampajja viharati . dutiyam
jhanam . tatiyam jhanam . catuttham jhanam upasampajja viharati .pe.
Nanadassanaya cittam abhiniharati abhininnameti .pe. idampissa
hoti pannaya .pe. naparam itthattayati pajanati . idampissa
hoti pannaya. Ayam kho sa brahmana pannati.
[196] Evam vutte sonadando brahmano bhagavantam etadavoca
Abhikkantam bho gotama abhikkantam bho gotama seyyathapi bho gotama
nikkujjitam va ukkujjeyya paticchannam va vivareyya mulhassa va
maggam acikkheyya andhakare va telapajjotam dhareyya cakkhumanto
rupani dakkhantiti evameva bhota gotamena anekapariyayena dhammo
pakasito esaham bhavantam gotamam saranam gacchami dhammanca bhikkhusamghanca
upasakam mam bhavam gotamo dharetu ajjatagge panupetam saranangatam
adhivasetu ca me bhavam gotamo svatanaya bhattam saddhim bhikkhusamghenati.
Adhivasesi bhagava tunhibhavena . athakho sonadando brahmano
bhagavato adhivasanam viditva utthayasana bhagavantam abhivadetva
padakkhinam katva pakkami.
[197] Athakho sonadando brahmano tassa rattiya accayena
sake nivesane panitam khadaniyam bhojaniyam patiyadapetva bhagavato
kalam arocapesi kalo bho gotama nitthitam bhattanti . athakho
bhagava pubbanhasamayam nivasetva pattacivaramadaya saddhim bhikkhusamghena
yena sonadandassa brahmanassa nivesanam tenupasankami upasankamitva
pannatte asane nisidi . athakho sonadando brahmano
buddhappamukham bhikkhusamgham panitena khadaniyena bhojaniyena sahattha
santappesi sampavaresi.
[198] Athakho sonadando brahmano bhagavantam bhuttavim
onitapattapanim annataram nicam asanam gahetva ekamantam nisidi.
{198.1} Ekamantam nisinno kho sonadando brahmano
bhagavantam etadavoca ahanceva kho pana bho gotama parisagato samano
asana vutthahitva bhavantam gotamam abhivadeyyam tena mam sa parisa
paribhaveyya yam kho pana sa parisa paribhaveyya yasopi tassa hayetha yassa
kho pana yaso hayetha bhogapi tassa hayeyyum yasoladdha kho panamhakam
bhoga ahanceva kho pana ko gotama parisagato samano anjalim
pagganheyyam asana me tam bhavam gotamo paccutthanam dharetu ahanceva
kho pana bho gotama parisagato samano vetthanam omunceyyam sirasa me
tam bhavam gotamo abhivadanam dharetu ahanceva kho pana bho gotama yanagato
samano yana paccorohitva bhavantam gotamam abhivadeyyam tena mam
sa parisa paribhaveyya yam kho pana sa parisa paribhaveyya yasopi tassa
hayetha yassa kho pana yaso hayetha bhogapi tassa hayeyyum yasoladdha
kho panamhakam bhoga ahanceva kho pana bho gotama yanagato samano
patodalatthim abbhunnameyyam yana me tam bhavam gotamo paccorohanam
dharetu ahanceva kho pana bho gotama yanagato samano chattam
apanameyyam sirasa me tam bhavam gotamo abhivadanam dharetuti .
Athakho bhagava sonadandam brahmanam dhammiya kathaya sandassetva
samadapetva samuttejetva sampahamsetva utthayasana pakkamiti.
Sonadandasuttam catuttham nitthitam.
-------------
The Pali Tipitaka in Roman Character Volume 9 page 142-161.
http://84000.org/tipitaka/read/roman_item_s.php?book=9&item=178&items=21&modeTY=2
Classified by [Item Number] :-
http://84000.org/tipitaka/read/roman_item_s.php?book=9&item=178&items=21&modeTY=2&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=9&item=178&items=21&modeTY=2
Compare with The Royal Version of Thai Tipitaka :-
http://84000.org/tipitaka/read/byitem_s.php?book=9&item=178&items=21&modeTY=2
Study Atthakatha :-
http://84000.org/tipitaka/attha/attha.php?b=9&i=178
The Pali Atthakatha in Thai :-
http://84000.org/tipitaka/atthapali/read_th.php?B=4&A=6585
The Pali Atthakatha in Roman :-
http://84000.org/tipitaka/atthapali/read_rm.php?B=4&A=6585
Contents of The Tipitaka Volume 9
http://84000.org/tipitaka/read/?index_9
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
