ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
 PaliThai   PaliRoman 
First LinkPrevious Linkแสดงหมายเลขหน้า
ในกรณี :- 
   บรรทัดแรกของแต่ละหน้าNext LinkLast Link chage to ENGLISH letter
TIPITAKA Volume 10 : PALI ROMAN Sutta Pitaka Vol 2 : Sutta. Tī. Ma.

                         Mahāsamayasuttaṃ
     [235]   Evamme  sutaṃ  .  ekaṃ  samayaṃ  bhagavā  sakkesu  viharati
kapilavatthusmiṃ    mahāvane    mahatā    bhikkhusaṅghena   saddhiṃ   pañcamattehi
bhikkhusatehi   sabbeheva   arahantehi   .  dasahi  ca  lokadhātūhi  devatā
yebhuyyena   sannipatitā   honti   bhagavantaṃ   dassanāya   bhikkhusaṅghañca .
Athakho   catunnaṃ   suddhāvāsakāyikānaṃ  devānaṃ  1-  etadahosi  ayaṃ  kho
bhagavā   sakkesu   viharati   kapilavatthusmiṃ   mahāvane  mahatā  bhikkhusaṅghena
saddhiṃ    pañcamattehi   bhikkhusatehi   sabbeheva   arahantehi   dasahi   ca
lokadhātūhi   devatā   yebhuyyena  sannipatitā  honti  bhagavantaṃ  dassanāya
bhikkhusaṅghañca    yannūna    mayampi    yena    bhagavā   tenupasaṅkameyyāma
upasaṅkamitvā bhagavato santike paccekagāthaṃ 2- bhāseyyāmāti.
     {235.1}  Athakho  tā  devatā  seyyathāpi  nāma  balavā  puriso
sammiñjitaṃ  vā  bāhaṃ  pasāreyya  pasāritaṃ  vā bāhaṃ sammiñjeyya evameva
suddhāvāsesu  devesu  antarahitā  bhagavato  purato  pāturahaṃsu  .  athakho
tā   devatā   bhagavantaṃ   abhivādetvā  ekamantaṃ  aṭṭhaṃsu  .  ekamantaṃ
ṭhitā kho ekā devatā bhagavato santike imaṃ gāthaṃ abhāsi
     [236] Mahāsamayo pavanasmiṃ
                devakāyā samāgatā
@Footnote: 1 Ma. devatānaṃ. 2 pāyato evaṃ. paccekagāthātipi pāṭhena pana bhavitabbaṃ. Ma.
@paccekaṃ gāthaṃ.
                Āgatamha imaṃ dhammasamayaṃ
                dakkhitāyeva 1- aparājitasaṅghanti.
     [237] Athakho aparā devatā bhagavato santike imaṃ gāthaṃ abhāsi
                tatra bhikkhavo samādahaṃsu
                cittaṃ attano ujukamakaṃsu
                sārathīva nettāni gahetvā
                indriyāni rakkhanti paṇḍitāti.
     [238] Athakho aparā devatā bhagavato santike imaṃ gāthaṃ abhāsi
                chetvā khīlaṃ chetvā palīghaṃ
                indakhīlaṃ ohaccamanejā 2-
                te caranti suddhā vimalā
                cakkhumatā sudantā susūnāgāti 3-.
     [239] Athakho aparā devatā bhagavato santike imaṃ gāthaṃ abhāsi
                ye keci buddhaṃ saraṇaṃ gatāse
                na te gamissanti apāyabhūmiṃ 4-
                pahāya mānusaṃ dehaṃ
                devakāyaṃ paripūressantīti.
     [240]   Athakho   bhagavā   bhikkhū  āmantesi  yebhuyyena  bhikkhave
dasasu   lokadhātūsu   devatā   sannipatitā   honti   tathāgataṃ   dassanāya
@Footnote: 1 Ma. Yu. dakkhitāye. 2 Ma. Yu. ūhaccamanejā. 3 Ma. Yu. susunāgāti.
@4 sabbattha pāyato apāyanti pāṭho dissati.
Bhikkhusaṅghañca    yepi   te   bhikkhave   ahesuṃ   atītamaddhānaṃ   arahanto
sammāsambuddhā    tesampi   bhagavantānaṃ   etaparamāyeva   1-   devatā
sannipatitā   ahesuṃ   seyyathāpi   mayhaṃ   etarahi   yepi  te  bhikkhave
bhavissanti     anāgatamaddhānaṃ     arahanto    sammāsambuddhā    tesampi
bhagavantānaṃ    etaparamāyeva    2-    devatā   sannipatitā   bhavissanti
seyyathāpi   mayhaṃ  etarahi  ācikkhissāmi  bhikkhave  devakāyānaṃ  nāmāni
kittayissāmi    bhikkhave    devakāyānaṃ   nāmāni   desissāmi   bhikkhave
devakāyānaṃ   nāmāni   taṃ   suṇātha  sādhukaṃ  manasikarotha  bhāsissāmīti .
Evambhanteti kho te bhikkhū bhagavato paccassosuṃ. Bhagavā etadavoca
     [241] Silokamanukassāmi            yattha bhummā tadassitā
                ye sitā girigabbharaṃ            pahitattā samāhitā.
                Puthū sīhāva sallīnā           lomahaṃsābhisambhuno
                odātamanasā suddhā         vippasannamanāvilā 3-.
                Bhiyyo pañcasate ñatvā   vane kāpilavatthave
                tato āmantayi satthā        sāvake sāsane rate
                devakāyā abhikkantā       te vijānātha bhikkhavo
                te ca ātappamakaruṃ            sutvā buddhassa sāsanaṃ.
                Tesampāturahu ñāṇaṃ        amanussāna dassanaṃ
                appeke satamaddakkhuṃ        sahassaṃ atha sattariṃ.
                Sataṃ eke sahassānaṃ          amanussānamaddasuṃ
@Footnote: 1-2 Ma. etaṃparamāyeva. 3 Yu. vippasannāmanāvilā.
                Appekenantamaddakkhuṃ       disā sabbā phuṭā ahuṃ.
                Tañca sabbaṃ abhiññāya    vavakkhitvāna 1- cakkhumā
                tato āmantayi satthā       sāvake sāsane rate
                devakāyā abhikkantā       te vijānātha bhikkhavo
                ye vohaṃ kittayissāmi        girāhi anupubbaso.
                Sattasahassā va 2- yakkhā   bhummā kāpilavatthavā
                iddhimanto jutimanto 3-   vaṇṇavanto yasassino
                modamānā abhikkāmuṃ        bhikkhūnaṃ samitiṃ vanaṃ.
                Chasahassā hemavatā           yakkhā nānattavaṇṇino
                iddhimanto jutimanto        vaṇṇavanto yasassino
                modamānā abhikkāmuṃ        bhikkhūnaṃ samitiṃ vanaṃ.
                Sātāgirā tisahassā        yakkhā nānattavaṇṇino
                iddhimanto jutimanto        vaṇṇavanto yasassino
                modamānā abhikkāmuṃ        bhikkhūnaṃ samitiṃ vanaṃ.
                Iccete soḷasasahassā     yakkhā nānattavaṇṇino
                iddhimanto jutimanto        vaṇṇavanto yasassino
                modamānā abhikkāmuṃ        bhikkhūnaṃ samitiṃ vanaṃ.
                Vessāmittā pañcasatā    yakkhā nānattavaṇṇino
                iddhimanto jutimanto        vaṇṇavanto yasassino
@Footnote: 1 vavatthitvānāti vā pāṭho. 2 Ma. te. 3 Sī. Yu. sabbattha jutīmanto.
                Modamānā abhikkāmuṃ       bhikkhūnaṃ samitiṃ vanaṃ.
                Kumbhīro rājagahiko             vepullassa nivesanaṃ
                bhiyyo 1- naṃ satasahassaṃ      yakkhānaṃ payirupāsati.
                Kumbhīro rājagahiko             sopāga samitiṃ vanaṃ.
     [242] Purimañca disaṃ rājā          dhataraṭṭho pasāsati
                gandhabbānaṃ ādhipati         mahārājā yasassi so.
                Puttāpi tassa bahavo         indanāmā mahabbalā 2-
                iddhimanto jutimanto        vaṇṇavanto yasassino
                modamānā abhikkāmuṃ        bhikkhūnaṃ samitiṃ vanaṃ.
                Dakkhiṇañca disaṃ rājā       virūḷho tappasāsati 3-
                kumbhaṇḍānaṃ ādhipati       mahārājā yasassi so.
                Puttāpi tassa bahavo         indanāmā mahabbalā
                iddhimanto jutimanto        vaṇṇavanto yasassino
                modamānā abhikkāmuṃ        bhikkhūnaṃ samitiṃ vanaṃ.
                Pacchimañca disaṃ rājā        virūpakkho pasāsati
                nāgānaṃ ādhipati               mahārājā yasassi so.
                Puttāpi tassa bahavo        indanāmā mahabbalā
                iddhimanto jutimanto        vaṇṇavanto yasassino
@Footnote: 1 bhīyotipi pāṭho. 2 aṭṭhakathāyaṃ sabbavāresu mahābalāti pāṭho. 3 Ma. Yu. taṃ
@pasāsati. ito paraṃ īdisameva.
                Modamānā abhikkāmuṃ        bhikkhūnaṃ samitiṃ vanaṃ.
                Uttarañca disaṃ rājā         kuvero tappasāsati
                yakkhānaṃ ādhipati              mahārājā yasassi so.
                Puttāpi tassa bahavo        indanāmā bahabbalā
                iddhimanto jutimanto        vaṇṇavanto yasassino
                modanānā abhikkāmuṃ        bhikkhūnaṃ samitiṃ vanaṃ.
                Purimadisaṃ dhataraṭṭho             dakkhiṇena virūḷhako
                pacchimena virūpakkho            kuvero uttaraṃ disaṃ
                cattāro te mahārājā      samantā caturo disā
                daddallamānā 1- aṭṭhaṃsu  vane kāpilavatthave.
     [243] Tesaṃ māyāvino dāsā     āgū 2- vañcanikā saṭhā
                māyā kuṭeṇḍu veṭeṇḍu 3-   viṭū 4- ca viṭuṭo 5- saha
                candano kāmaseṭṭho ca       kinnughaṇḍu 6- nighaṇḍu ca.
                Panādo opamañño ca      devasuto ca mātali
                cittaseno ca gandhabbo      naḷorājā janosabho 7-
                āgū 8- pañcasikho ceva     timbarū suriyavacchasā 9-.
                Ete caññe ca rājāno    gandhabbā saha rājubhi
                modamānā abhikkāmuṃ        bhikkhūnaṃ samitiṃ vanaṃ.
                Athāgū 10- nābhasā nāgā    vesālā saha tacchakā
@Footnote: 1 dadaḷhamānātipi pāṭho. 2 Ma. āguṃ. Sī. Yu. āguṃ. ito paraṃ īdisameva.
@3 mā. viṭeṇḍu. 4 Ma. Yu. viṭucca. 5 Yu. viṭucco. 6 Ma. kinni ghaṇḍu.
@7 Ma. Yu. janessabho. 8 Ma. āgā. Yu. āgu. 9 Sī. Yu. suriyavaccasā.
@10 Ma. athāguṃ. Yu. athāgu. evamīdisesu padesu.
                Kambalassatarā āgū          pāyāgā saha ñātibhi
                yāmunā dhataraṭṭhā ca          āgū nāgā yasassino
                erāvaṇo mahānāgo        sopāga samitiṃ vanaṃ.
     [244] Ye nāgarāje sahasā haranti
                  dibbā dijā pakkhi visuddhacakkhū
                  vehāyasā 1- te vanamajjhapattā
                  citrā supaṇṇā iti tesa nāmaṃ
                  abhayantadā nāgarājānamāsī
                  supaṇṇato khemamakāsi buddho
                  saṇhāhi vācāhi upavhayantā
                  nāgā supaṇṇā saraṇamakaṃsu buddhaṃ.
                Jitā vajirahatthena              samuddaṃ asurā sitā
                bhātaro vāsavassete         iddhimanto yasassino.
                Kālakañjā mahābhismā 2-   asurā dānaveghasā
                vepacitti sucitti ca            pahārādo namucī saha.
                Satañca baliputtānaṃ          sabbe verocanāmakā
                sannayhitvā baliṃ senaṃ 3-  rāhubhaddamupāgamuṃ
                samayodāni bhaddante        bhikkhūnaṃ samitiṃ vanaṃ.
     [245] Āpo ca devā paṭhavī ca      tejo vāyo tadāgamuṃ
                varuṇā vāruṇā 4- devā   somo ca yasasā saha.
@Footnote: 1 Sī. Yu. vehāsayā. 2 Sī. Yu. mahābhiṃsā. 3 Ma. balisenaṃ.
@4 Ma. vāraṇā vāraṇā devā.
                Mettākaruṇākāyikā        āgū devā yasassino
                dasete dasadhā kāyā          sabbe nānattavaṇṇino
                iddhimanto jutimanto         vaṇṇavanto yasassino
                modamānā abhikkāmuṃ        bhikkhūnaṃ samitiṃ vanaṃ.
                Veṇḍū 1- ca devā sahalī ca  asamā ca duve yamā
                candassūpanisā devā         candamāgū purakkhitā.
                Suriyassūpanisā devā          suriyamāgū  purakkhitā
                nakkhattāni purakkhatvā       āgū mandavalāhakā
                vasūnaṃ vāsavo seṭṭho           sakko pāga 2- purindado.
                Dasete dasadhā kāyā          sabbe nānattavaṇṇino
                iddhimanto jutimanto         vaṇṇavanto yasassino
                modamānā abhikkāmuṃ        bhikkhūnaṃ samitiṃ vanaṃ.
                Athāgū sahabhū devā            jalamaggisikhāriva
                ariṭṭhakā ca rojā ca           ummāpupphanibhāsino
                varuṇā sahadhammā ca           accutā ca anejakā
                sūleyyarucirā āgū            āgū vāsavanesino.
                Dasete dasadhā kāyā         sabbe nānattavaṇṇino
                iddhimanto jutimanto        vaṇṇavanto yasassino
                modamānā abhikkāmuṃ        bhikkhūnaṃ samitiṃ vanaṃ.
                Samānā mahāsamānā        mānusā mānusuttamā
@Footnote: 1 Ma. veṇḍu devā sahali ca. 2 Ma. pāgā.
                Khiḍḍāpadūsikā 1- āgū    āgū manopadūsikā 2-
                athāgū harayo devā            ye ca lohitavāsino
                pāragā mahāpāragā         āgū devā yasassino.
                Dasete dasadhā kāyā         sabbe nānattavaṇṇino
                iddhimanto jutimanto        vaṇṇavanto yasassino
                modamānā abhikkāmuṃ        bhikkhūnaṃ samitiṃ vanaṃ.
                Sukkā karumhā 3- aruṇā   āgū veghanasā saha.
                Odātagayhā pāmokkhā    āgū devā vicakkhaṇā
                sadāmattā hāragajā         missakā ca yasassino
                thanayaṃ āgā 4- pajunno    yo disā abhivassati.
                Dasete dasadhā kāyā         sabbe nānattavaṇṇino
                iddhimanto jutimanto        vaṇṇavanto yasassino
                modamānā abhikkāmuṃ        bhikkhūnaṃ samitiṃ vanaṃ.
                Khemiyā tusitā yāmā        kaṭṭhakā ca yasassino
                lambitakā 5- lāmaseṭṭhā  jotināmā ca āsavā
                nimmānaratino āgū           athāgū paranimmitā.
                Dasete dasadhā kāyā         sabbe nānattavaṇṇino
                iddhimanto jutimanto        vaṇṇavanto yasassino
                modamānā abhikkāmuṃ       bhikkhūnaṃ samitiṃ vanaṃ.
@Footnote: 1 Ma. khiḍḍāpadosikā. 2 Ma. manopadosikā. 3 Ma. karumbhā. 4 yebhuyyena āgūti
@pāṭho dissati. 5 Ma. Yu. lambītakā.
                Saṭṭhete devanikāyā        sabbe nānattavaṇṇino
                nāmanvayena āgañchuṃ       ye caññe sadisā saha
                pavutthajātimakkhīlaṃ 1-        oghatiṇṇamanāsavaṃ
                dakkhemoghataraṃ nāgaṃ           candaṃva asitātitaṃ 2-.
     [246] Subrahmā paramatto ca      puttā iddhimato saha
                sanaṅkumāro tisso ca         sopāga samitiṃ vanaṃ.
                Sahassabrahmalokānaṃ         mahābrahmābhitiṭṭhati
                upapanno jutimanto          bhismākāyo yasassi so.
                Dasettha issarā āgū        paccekavasavattino
                tesañca majjhato āgā 3-    hārito parivārito.
                Te ca sabbe abhikkante     sinde 4- deve sabrahmake
                mārasenā abhikkāmi         passa kaṇhassa mandiyaṃ.
                Etha gaṇhatha bandhatha          rāgena bandhamatthu vo
                samantā parivāretha            mā vo muñcittha koci naṃ.
                Iti tattha mahāseno          kaṇhasenaṃ apesayi
                pāṇinā talamāhacca         saraṃ katvāna bheravaṃ.
                Yathā pāvussako megho      thanayanto savijjuko
                tadā so paccudāvatti       saṅkuddho asayaṃvase 5-.
                Tañca sabbaṃ abhiññāya    vavakkhitvāna 6- cakkhumā
@Footnote: 1 Ma. pavuṭṭhajātimalilaṃ. Sī. Yu. pavutthajātiṃ akhilaṃ. 2 asitātiganti vā pāṭho.
@Yu. asitātikaṃ. 3 pāyato āgūti pāco dissati. 4 Ma. sainde. Yu. saindadeve.
@5 Sī. Yu. vasī. 6 Ma. vavatthitvāna.
                Tato āmantayi satthā        sāvake sāsane rate
                mārasenā abhikkantā       te vijānātha bhikkhavo
                te ca ātappamakaruṃ            sutvā buddhassa sāsanaṃ.
                Vītarāgehi pakkāmuṃ            nesaṃ lomampi 1- iñjayuṃ
                sabbe vijitasaṅgāmā         bhayātītā yasassino
                modanti saha bhūtehi            sāvakā te janesutāti.
                        Mahāsamayasuttaṃ niṭṭhitaṃ sattamaṃ.
                                   ----------
@Footnote: 1 Ma. lomāpi.



             The Pali Tipitaka in Roman Character Volume 10 page 287-297. http://84000.org/tipitaka/read/roman_read.php?B=10&A=6068              Compare with The Pali Tipitaka in Thai Character :- http://84000.org/tipitaka/read/pali_read.php?B=10&A=6068&w=              Compare with The Royal Version of Thai Tipitaka :- http://84000.org/tipitaka/read/byitem.php?book=10&item=235&items=12              Compare with The MCU Version of Thai Tipitaka :- http://84000.org/tipitaka/pitaka_item/m_siri.php?B=10&siri=7              Study Atthakatha :- http://84000.org/tipitaka/attha/attha.php?b=10&i=235              Contents of The Tipitaka Volume 10 http://84000.org/tipitaka/read/?index_10

First LinkPrevious Linkแสดงหมายเลขหน้า
ในกรณี :- 
   บรรทัดแรกของแต่ละหน้าNext LinkLast Link chage to ENGLISH letter

บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ DhammaPerfect@yahoo.com