PaliRoman Vol.23

[69] Ekaṃ samayaṃ bhagavā kosalesu cārikaṃ carati mahatā bhikkhusaṅghena saddhiṃ addasā kho bhagavā addhānamaggapaṭipanno aññatarasmiṃ padese mahantaṃ aggikkhandhaṃ ādittaṃ sampajjalitaṃ sañjotibhūtaṃ ^3- disvā maggā okkamma aññatarasmiṃ rukkhamūle paññatte āsane nisīdi nisajja kho bhagavā bhikkhū āmantesi passatha no tumhe bhikkhave amuṃ mahantaṃ aggikkhandhaṃ ādittaṃ sampajjalitaṃ sañjotibhūtanti . Evaṃ bhante. {69.1} Taṃ kiṃ maññatha bhikkhave katamaṃ nu kho varaṃ yaṃ amuṃ mahantaṃ aggikkhandhaṃ ādittaṃ sampajjalitaṃ sañjotibhūtaṃ āliṅgitvā ^4- upanisīdeyya vā upanipajjeyya vā yaṃ vā khattiyakaññaṃ vā brāhmaṇakaññaṃ vā gahapatikaññaṃ vā mudutalūnahatthapādaṃ āliṅgitvā upanisīdeyya vā upanipajjeyya vāti . etadeva bhante varaṃ yaṃ khattiyakaññaṃ vā brāhmaṇakaññaṃ vā gahapatikaññaṃ vā mudutalūnahatthapādaṃ āliṅgitvā upanisīdeyya vā upanipajjeyya vā dukkhañhetaṃ bhante yaṃ amuṃ mahantaṃ aggikkhandhaṃ ādittaṃ sampajjalitaṃ sañjotibhūtaṃ āliṅgitvā upanisīdeyya vā upanipajjeyya vāti . ārocayāmi vo bhikkhave paṭivedayāmi @Footnote: ¹ Ma. parihāyanti . ² Ma. pūtikāni bhavantīti . ³ Ma. sajotibhūtaṃ. evamuparipi. @⁴ Ma. āliṅgetvā. evamuparipi.

--------------------------------------------------------------------------------------------- page130.

Vo bhikkhave yathā etadeva tassa varaṃ dussīlassa pāpadhammassa asucisaṅkassarasamācārassa paṭicchannakammantassa assamaṇassa samaṇapaṭiññassa abrahmacārissa brahmacāripaṭiññassa antopūtissa avassutassa kasambujātassa yaṃ amuṃ mahantaṃ aggikkhandhaṃ ādittaṃ sampajjalitaṃ sañjotibhūtaṃ āliṅgitvā upanisīdeyya vā upanipajjeyya vā taṃ kissa hetu tatonidānañhi so bhikkhave maraṇaṃ vā nigaccheyya maraṇamattaṃ vā dukkhaṃ natveva tappaccayā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjeyya {69.2} yañca kho so bhikkhave dussīlo pāpadhammo asucisaṅkassara- samācāro paṭicchannakammanto assamaṇo samaṇapaṭiñño abrahmacārī brahmacāripaṭiñño antopūti avassuto kasambujāto khattiyakaññaṃ vā brāhmaṇakaññaṃ vā gahapatikaññaṃ vā mudutalūnahatthapādaṃ āliṅgitvā upanisīdati vā upanipajjati vā tañhi tassa bhikkhave hoti dīgharattaṃ ahitāya dukkhāya kāyassa bhedā parammaraṇā apāyaṃ duggatiṃ vinipātaṃ nirayaṃ upapajjati. {69.3} Taṃ kiṃ maññatha bhikkhave katamaṃ nu kho varaṃ yaṃ balavā puriso daḷhāya vālarajjuyā ubho jaṅghā veṭhetvā ghaṃseyya sā chaviṃ chindeyya chaviṃ chetvā cammaṃ chindeyya cammaṃ chetvā maṃsaṃ chindeyya maṃsaṃ chetvā nhāruṃ chindeyya nhāruṃ chetvā aṭṭhiṃ chindeyya aṭṭhiṃ chetvā aṭṭhimiñjaṃ āhacca tiṭṭheyya yaṃ vā khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā abhivādanaṃ sādiyeyyāti .

--------------------------------------------------------------------------------------------- page131.

Etadeva bhante varaṃ yaṃ khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā abhivādanaṃ sādiyeyya dukkhañhetaṃ bhante yaṃ balavā puriso daḷhāya vālarajjuyā ubho jaṅghā veṭhetvā ghaṃseyya sā chaviṃ chindeyya .pe. Aṭṭhimiñjaṃ āhacca tiṭṭheyyāti. {69.4} Ārocayāmi vo bhikkhave paṭivedayāmi vo bhikkhave yathā etadeva tassa varaṃ dussīlassa .pe. kasambujātassa yaṃ balavā puriso daḷhāya vālarajjuyā ubho jaṅghā veṭhetvā ghaṃseyya sā chaviṃ chindeyya .pe. aṭṭhimiñjaṃ āhacca tiṭṭheyya taṃ kissa hetu tatonidānañhi so bhikkhave maraṇaṃ vā nigaccheyya maraṇamattaṃ vā dukkhaṃ natveva tappaccayā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjeyya yañca kho so bhikkhave dussīlo .pe. kasambujāto khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā abhivādanaṃ sādiyati tañhi tassa bhikkhave hoti dīgharattaṃ ahitāya dukkhāya kāyassa bhedā parammaraṇā apāyaṃ duggatiṃ vinipātaṃ nirayaṃ upapajjati. {69.5} Taṃ kiṃ maññatha bhikkhave katamaṃ nu kho varaṃ yaṃ balavā puriso tiṇhāya sattiyā teladhotāya paccorasmiṃ pahareyya yaṃ vā khattiya- mahāsālānaṃ vā brāhmaṇamahāsālānaṃ vā gahapatimahāsālānaṃ vā añjalikammaṃ sādiyeyyāti . Etadeva bhante varaṃ yaṃ khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā añjalikammaṃ sādiyeyya dukkhañhetaṃ bhante yaṃ balavā puriso tiṇhāya

--------------------------------------------------------------------------------------------- page132.

Sattiyā teladhotāya paccorasmiṃ pahareyyāti. {69.6} Ārocayāmi vo bhikkhave paṭivedayāmi vo bhikkhave yathā etadeva tassa varaṃ dussīlassa .pe. kasambujātassa yaṃ balavā puriso tiṇhāya sattiyā teladhotāya paccorasmiṃ pahareyya taṃ kissa hetu tatonidānañhi so bhikkhave maraṇaṃ vā nigaccheyya maraṇamattaṃ vā dukkhaṃ natveva tappaccayā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjeyya yañca kho so bhikkhave dussīlo .pe. Kasambujāto khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā añjalikammaṃ sādiyati tañhi tassa bhikkhave hoti dīgharattaṃ ahitāya dukkhāya kāyassa bhedā parammaraṇā apāyaṃ duggatiṃ vinipātaṃ nirayaṃ upapajjati. {69.7} Taṃ kiṃ maññatha bhikkhave katamaṃ nu kho varaṃ yaṃ balavā puriso tattena ayopaṭṭena ādittena sampajjalitena sañjotibhūtena kāyaṃ sampaliveṭheyya yaṃ vā khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā saddhādeyyaṃ cīvaraṃ paribhuñjeyyāti . Etadeva bhante varaṃ yaṃ khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā saddhādeyyaṃ cīvaraṃ paribhuñjeyya dukkhañhetaṃ bhante yaṃ balavā puriso tattena ayopaṭṭena ādittena sampajjalitena sañjotibhūtena kāyaṃ sampaliveṭheyyāti. {69.8} Ārocayāmi vo bhikkhave paṭivedayāmi vo bhikkhave yathā etadeva tassa varaṃ dussīlassa .pe. Kasambujātassa yaṃ balavā puriso tattena ayopaṭṭena

--------------------------------------------------------------------------------------------- page133.

Ādittena sampajjalitena sañjotibhūtena kāyaṃ sampaliveṭheyya taṃ kissa hetu tatonidānañhi so bhikkhave maraṇaṃ vā nigaccheyya maraṇamattaṃ vā dukkhaṃ na tveva tappaccayā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjeyya yañca kho so bhikkhave dussīlo .pe. kasambujāto khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā saddhādeyyaṃ cīvaraṃ paribhuñjati tañhi tassa bhikkhave hoti dīgharattaṃ ahitāya dukkhāya kāyassa bhedā parammaraṇā apāyaṃ duggatiṃ vinipātaṃ nirayaṃ upapajjati. {69.9} Taṃ kiṃ maññatha bhikkhave katamaṃ nu kho varaṃ yaṃ balavā puriso tattena ayosaṅkunā ādittena ^1- sampajjalitena sañjotibhūtena ^1- mukhaṃ vivaritvā tattaṃ lohagulaṃ ādittaṃ sampajjalitaṃ sañjotibhūtaṃ mukhe pakkhipeyya taṃ tassa oṭṭhampi daheyya mukhampi daheyya jivhampi daheyya kaṇṭhampi daheyya urampi daheyya antampi antaguṇampi ādāya adhobhāgā nikkhameyya yaṃ vā khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā saddhādeyyaṃ piṇḍapātaṃ paribhuñjeyyāti . Etadeva bhante varaṃ yaṃ khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā saddhādeyyaṃ piṇḍapātaṃ paribhuñjeyya dukkhañhetaṃ bhante yaṃ balavā puriso tattena ayosaṅkunā ādittena sampajjalitena sañjotibhūtena mukhaṃ vivaritvā tattaṃ lohagulaṃ ādittaṃ sampajjalitaṃ sañjotibhūtaṃ mukhe pakkhipeyya taṃ tassa oṭṭhampi daheyya mukhampi daheyya @Footnote: ¹ Ma. ime tayo pāṭhā natthi. evamuparipi.

--------------------------------------------------------------------------------------------- page134.

Jivhampi daheyya kaṇṭhampi daheyya urampi dadeyya antampi antaguṇampi ādāya adhobhāgā nikkhameyyāti. {69.10} Ārocayāmi vo bhikkhave paṭivedayāmi vo bhikkhave yathā etadeva tassa varaṃ dussīlassa .pe. kasambujātassa yaṃ balavā puriso tattena ayosaṅkunā ādittena sampajjalitena sañjotibhūtena mukhaṃ vivaritvā tattaṃ lohagulaṃ ādittaṃ sampajjalitaṃ sañjotibhūtaṃ mukhe pakkhipeyya taṃ tassa oṭṭhampi daheyya mukhampi daheyya jivhampi daheyya kaṇṭhampi daheyya urampi daheyya antampi antaguṇampi ādāya adhobhāgā nikkhameyya taṃ kissa hetu tatonidānañhi so bhikkhave maraṇaṃ vā nigaccheyya maraṇamattaṃ vā dukkhaṃ natveva tappaccayā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjeyya yañca kho so bhikkhave dussīlo .pe. kasambujāto khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā saddhādeyyaṃ piṇḍapātaṃ paribhuñjati tañhi tassa bhikkhave hoti dīgharattaṃ ahitāya dukkhāya kāyassa bhedā parammaraṇā apāyaṃ duggatiṃ vinipātaṃ nirayaṃ upapajjati. {69.11} Taṃ kiṃ maññatha bhikkhave katamaṃ nu kho varaṃ yaṃ balavā puriso sīse vā gahetvā khandhe vā gahetvā tattaṃ ayomañcaṃ vā ayopīṭhaṃ vā ādittaṃ sampajjalitaṃ sañjotibhūtaṃ abhinisīdāpeyya vā abhinipajjāpeyya vā yaṃ vā khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā saddhādeyyaṃ mañcapīṭhaṃ paribhuñjeyyāti . etadeva bhante varaṃ yaṃ

--------------------------------------------------------------------------------------------- page135.

Khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā saddhādeyyaṃ mañcapīṭhaṃ paribhuñjeyya dukkhañhetaṃ bhante yaṃ balavā puriso sīse vā gahetvā khandhe vā gahetvā tattaṃ ayomañcaṃ vā ayopīṭhaṃ vā ādittaṃ sampajjalitaṃ sañjotibhūtaṃ abhinisīdāpeyya vā abhinipajjāpeyya vāti. {69.12} Ārocayāmi vo bhikkhave paṭivedayāmi vo bhikkhave yathā etadeva tassa varaṃ dussīlassa .pe. Kasambujātassa yaṃ balavā puriso sīse vā gahetvā khandhe vā gahetvā tattaṃ ayomañcaṃ vā ayopīṭhaṃ vā ādittaṃ sampajjalitaṃ sañjotibhūtaṃ abhinisīdāpeyya vā abhinipajjāpeyya vā taṃ kissa hetu tatonidānañhi so bhikkhave maraṇaṃ vā nigaccheyya maraṇamattaṃ vā dukkhaṃ na tveva tappaccayā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjeyya yañca kho so bhikkhave dussīlo .pe. Kasambujāto khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā saddhādeyyaṃ mañcapīṭhaṃ paribhuñjati tañhi tassa bhikkhave hoti dīgharattaṃ ahitāya dukkhāya kāyassa bhedā parammaraṇā apāyaṃ duggatiṃ vinipātaṃ nirayaṃ upapajjati. {69.13} Taṃ kiṃ maññatha bhikkhave katamaṃ nu kho varaṃ yaṃ balavā puriso uddhaṃpādaṃ adhosiraṃ gahetvā tattāya lohakumbhiyā pakkhipeyya ādittāya sampajjalitāya sañjotibhūtāya so tattha pheṇuddehakaṃ paccamāno sakimpi uddhaṃ gaccheyya sakimpi adho gaccheyya sakimpi tiriyaṃ gaccheyya yaṃ vā khattiyamahāsālānaṃ vā brāhmaṇamahāsālānaṃ vā gahapatimahāsālānaṃ

--------------------------------------------------------------------------------------------- page136.

Vā saddhādeyyaṃ vihāraṃ paribhuñjeyyāti . etadeva bhante varaṃ yaṃ khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā saddhādeyyaṃ vihāraṃ paribhuñjeyya dukkhañhetaṃ bhante yaṃ balavā puriso uddhaṃpādaṃ adhosiraṃ gahetvā tattāya lohakumbhiyā pakkhipeyya ādittāya sampajjalitāya sañjotibhūtāya so tattha pheṇuddehakaṃ paccamāno sakimpi uddhaṃ gaccheyya sakimpi adho gaccheyya sakimpi tiriyaṃ gaccheyyāti. {69.14} Ārocayāmi vo bhikkhave paṭivedayāmi vo bhikkhave yathā etadeva tassa varaṃ dussīlassa .pe. kasambujātassa yaṃ balavā puriso uddhaṃpādaṃ adhosiraṃ gahetvā tattāya lohakumbhiyā pakkhipeyya ādittāya sampajjalitāya sañjotibhūtāya so tattha pheṇuddehakaṃ paccamāno sakimpi uddhaṃ gaccheyya sakimpi adho gaccheyya sakimpi tiriyaṃ gaccheyya taṃ kissa hetu tatonidānañhi so bhikkhave maraṇaṃ vā nigaccheyya maraṇamattaṃ vā dukkhaṃ na tveva tappaccayā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjeyya yañca kho so bhikkhave dussīlo .pe. kasambujāto khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā saddhādeyyaṃ vihāraṃ paribhuñjati tañhi tassa bhikkhave hoti dīgharattaṃ ahitāya dukkhāya kāyassa bhedā parammaraṇā apāyaṃ duggatiṃ vinipātaṃ nirayaṃ upapajjati tasmātiha bhikkhave evaṃ sikkhitabbaṃ yesañca mayaṃ paribhuñjāma cīvarapiṇḍapāta- senāsanagilānapaccayabhesajjaparikkhārānaṃ ^1- tesaṃ te kārā @Footnote: ¹ Ma. -parikkhāraṃ.

--------------------------------------------------------------------------------------------- page137.

Mahapphalā bhavissanti mahānisaṃsā amhākañcevāyaṃ pabbajjā avañjhā bhavissati saphalā saudrayāti evañhi vo bhikkhave sikkhitabbaṃ attatthaṃ vā bhikkhave sampassamānena alameva appamādena sampādetuṃ paratthaṃ vā bhikkhave sampassamānena alameva appamādena sampādetuṃ ubhayatthaṃ vā bhikkhave sampassamānena alameva appamādena sampādetunti. {69.15} Idamavoca bhagavā imasmiñca pana veyyākaraṇasmiṃ bhaññamāne saṭṭhimattānaṃ bhikkhūnaṃ uṇhaṃ lohitaṃ mukhato uggañchi saṭṭhimattā bhikkhū sikkhaṃ paccakkhāya hīnāyāvattiṃsu dukkaraṃ bhagavā sudukkaraṃ bhagavāti . saṭṭhimattānaṃ bhikkhūnaṃ anupādāya āsavehi cittāni vimucciṃsūti.