PaliRoman Vol.33

page59.

Catutthaṃ bhallātakadāyakattherāpadānaṃ (444) [34] |34.22| Suvaṇṇavaṇṇaṃ sambuddhaṃ dvattiṃsavaralakkhaṇaṃ pavanaggena gacchantaṃ sālarājaṃva phullitaṃ. |34.23| Tiṇasantharaṃ paññāpetvā buddhaseṭṭhaṃ ayācahaṃ anukampatu maṃ buddho bhikkhaṃ icchāmi dātave. |34.24| Anukampako kāruṇiko atthadassī mahāyaso mama saṅkappamaññāya oruyha ^1- mama assame. |34.25| Orohitvāna sambuddho nisīdi paṇṇasanthare bhallātakaṃ gahetvāna buddhaseṭṭhassadāsahaṃ. |34.26| Mama nijjhāyamānassa paribhuñji tadā jino tattha cittaṃ pasādetvā abhivandiṃ tadā jinaṃ. |34.27| Aṭṭhārase kappasate yaṃ phalaṃ adadiṃ tadā duggatiṃ nābhijānāmi phaladānassidaṃ phalaṃ. |34.28| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. |34.29| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |34.30| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. @Footnote: ¹ Ma. Yu. orūhi.

--------------------------------------------------------------------------------------------- page60.

Itthaṃ sudaṃ āyasmā bhallātakadāyako thero imā gāthāyo abhāsitthāti. Bhallātakadāyakattherassa apadānaṃ samattaṃ.

The Pali Tipitaka in Roman Character Volume 33 page 59-60. https://84000.org/tipitaka/read/roman_read.php?B=33&A=1160&pagebreak=1 Compare with The Pali Tipitaka in Thai Character :- https://84000.org/tipitaka/read/pali_read.php?B=33&A=1160&pagebreak=1 Compare with The Royal Version of Thai Tipitaka :- https://84000.org/tipitaka/read/byitem.php?book=33.1&item=34&items=1 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=33&siri=34 Study Atthakatha :- https://84000.org/tipitaka/attha/attha.php?b=33&i=34 Contents of The Tipitaka Volume 33 https://84000.org/tipitaka/read/?index_33 https://84000.org/tipitaka/english/?index_33