PaliRoman Vol.33

Dvādasamo sujātabuddhavaṃso [13] |13.1| Tattheva maṇḍakappamhi sujāto nāma nāyako sīhahanu usabhakkhandho ^2- appameyyo durāsado. |13.2| Candova vimalo suddho sataraṃsīva patāpavā ^3- evaṃ sobhati sambuddho jalanto siriyā sadā ^4-. |13.3| Pāpuṇitvāna sambuddho kevalaṃ bodhimuttamaṃ sumaṅgalamhi nagare dhammacakkaṃ pavattayi. @Footnote: ¹ Ma. sādhuhi. Yu. tādihi. ² Ma. sabhakkhandho. ³ Yu. tāpavā. ⁴ Yu. pabhā. |13.4| Desento ^1- pavaraṃ dhammaṃ sujāto lokanāyako asītikoṭī abhisamiṃsuṃ paṭhame dhammadesane. |13.5| Yadā sujāto amitayaso deve vassamupāgami sattattiṃsasatasahassānaṃ dutiyābhisamayo ahu. |13.6| Yadā sujāto asamo ^2- upagañchi pitu santikaṃ saṭṭhisatasahassānaṃ tatiyābhisamayo ahu. |13.7| Sannipātā tayo āsuṃ sujātassa mahesino khīṇāsavānaṃ vimalānaṃ santacittāna tādinaṃ. |13.8| Abhiññābalappattānaṃ appattānaṃ bhavābhave saṭṭhisatasahassāni ^3- paṭhamaṃ sannipatiṃsu te. |13.9| Punāparaṃ sannipāte tidivorohaṇe jine paññāsasatasahassānaṃ dutiyo āsi samāgamo. |13.10| Upasaṅkamma ^4- naravusabhaṃ ^5- tassa yo aggasāvako catūhi satasahassehi sambuddhaṃ upasaṅkami. |13.11| Ahantena samayena catudīpamhi issaro antalikkhacaro āsiṃ cakkavatti mahabbalo. ^[6]- |13.12| Catudīpe mahārajjaṃ ratane satta uttame buddhe niyyādayitvāna pabbajiṃ tassa santike. |13.13| Ārāmikā janapade uṭṭhānaṃ paṭipiṇḍiya @Footnote: ¹ Ma. Yu. desente ... sujāte lokanāyake. ² Po. Ma. Yu. asamasamo. ³ Yu. @saṭṭhisatasahassānaṃ. ⁴ Ma. Yu. upasaṅkamanto. ⁵ Ma. narāsabhaṃ. Yu. naravasabhaṃ. @⁶ Ma. loke acchariyaṃ disvā abbhūtaṃ lomahaṃsanaṃ upagantvāna vandiṃ so sujātaṃ @lokanāyakaṃ. Yu. ... upagantvāna vandayiṃ .... Upanenti bhikkhusaṅghassa paccayaṃ sayanāsanaṃ. |13.14| Sopi maṃ tadā ^1- byākāsi dasasahassamhi issaro tiṃsakappasahassānaṃ ^2- ayaṃ buddho bhavissati. |13.15| Ahu kapilavhayā rammā nikkhamitvā tathāgato padhānaṃ padahitvāna katvā dukkarakārikaṃ. |13.16| Ajapālarukkhamūlasmiṃ nisīditvā tathāgato tattha pāyāsaṃ paggayha nerañjaramupehiti. |13.17| Nerañjarāya tīramhi pāyāsaṃ adi so jino paṭiyattavaramaggena bodhimūlamhi ehiti. |13.18| Tato padakkhiṇaṃ katvā bodhimaṇḍaṃ anuttaraṃ assattharukkhamūlamhi bujjhissati mahāyaso. |13.19| Imassa janikā mātā māyā nāma bhavissati pitā suddhodano nāma ayaṃ hessati gotamo. |13.20| Anāsavā vītarāgā santacittā samāhitā kolito upatisso ca aggā hessanti sāvakā ānando nāmupaṭṭhāko upaṭṭhissatimaṃ jinaṃ. |13.21| Khemā uppalavaṇṇā ca aggā hessanti sāvikā anāsavā vītarāgā santacittā samāhitā. |13.22| Bodhi tassa bhagavato assatthoti pavuccati citto ca hatthāḷavako aggā hessantupaṭṭhakā. @Footnote: ¹ Ma. Yu. buddho. ² Po. Ma. Yu. tiṃsakappasahassamhi. |13.23| Nandamātā ca uttarā aggā hessantupaṭṭhikā āyu vassasataṃ tassa gotamassa yasassino. |13.24| Idaṃ sutvāna vacanaṃ asamassa mahesino āmoditā naramarū buddhavījaṅkuro ayaṃ. |13.25| Ukkuṭṭhisaddā vattanti apphoṭenti hasanti ca katañjalī namassanti dasasahassī sadevakā. |13.26| Yadimassa lokanāthassa virajjhissāma sāsanaṃ anāgatamhi addhāne hessāma sammukhā imaṃ. |13.27| Yathā manussā nadiṃ tarantā paṭititthaṃ virajjhiya heṭṭhātitthaṃ gahetvāna uttaranti mahānadiṃ. |13.28| Evameva mayaṃ sabbe yadi muñcāmimaṃ jinaṃ anāgatamhi addhāne hessāma sammukhā imaṃ. |13.29| Tassāpi vacanaṃ sutvā bhiyyo hāsaṃ jane ahaṃ adhiṭṭhahiṃ vattaṃ uggaṃ dasapāramipūriyā. |13.30| Suttantaṃ vinayañcāpi navaṅgasatthusāsanaṃ sabbaṃ pariyāpuṇitvāna sobhayiṃ jinasāsanaṃ. |13.31| Tatthappamatto viharanto brahmaṃ bhāvetvā bhāvanaṃ abhiññāsu pāramiṃ gantvā brahmalokamagañchihaṃ. |13.32| Sumaṅgalaṃ nāma nagaraṃ uggato nāma khattiyo mātā pabhāvatī nāma sujātassa mahesino. |13.33| Navavassasahassāni agāraṃ ajjhāvasi so siri upasiri cando ^1- tayo pāsādamuttamā. |13.34| Tevīsatisahassāni nāriyo samalaṅkatā sirinandā nāma nārī upaseno nāma atrajo. |13.35| Nimitte caturo disvā assayānena nikkhami anūnanavamāsāni padhānaṃ padahī jino. |13.36| Brahmunā yācito santo sujāto ^2- lokanāyako vattacakko mahāvīro sumaṅgaluyyānamuttame. |13.37| Sudassano sudevo ca ahesuṃ aggasāvakā nārado nāmupaṭṭhāko sujātassa mahesino. |13.38| Nāgā ^3- nāgasamānā ca ahesuṃ aggasāvikā bodhi tassa bhagavato mahāveḷūti vuccati. |13.39| So ca rukkho ghanakkhandho ^4- acchiddo hoti pattiko uju vaṃso brahā hoti dassaneyyo manoramo. |13.40| Ekakkhandho pavaḍḍhitvā tato sākhā ca ^5- bhijjati yathā subandho morahattho evaṃ sobhati so dumo. |13.41| Na tassa kaṇṭhakā honti nāpi chiddaṃ mahā ahu vitiṇṇasākho aviraḷo sandacchāyo ^6- manoramo. |13.42| Sudatto ceva citto ca ahesuṃ aggupaṭṭhakā subhaddā ceva padumā ca ahesuṃ aggupaṭṭhikā. @Footnote: ¹ Ma. nando. Yu. nandā. ² Yu. sujāte. ³ Ma. Yu. nāgā ca nāgasamālā ca. @⁴ Po. Yu. ghanaruciro. ⁵ Ma. Yu. pabhijjati. ⁶ Yu. sannacchāyo. |13.43| Paññāsaratano āsi uccattanena so jino sabbākāravarūpeto sabbaguṇamupāgato. |13.44| Tassa pabhā asamasamā niddhāvati samantato appamāṇo atuliyo ^1- upamehi ^2- anūpamo. |13.45| Navutivassasahassāni āyu vijjati tāvade tāvatā tiṭṭhamāno so tāresi janataṃ bahuṃ. |13.46| Yathāpi sāgare ummi gagane tārakā yathā evaṃ tadā pāvacanaṃ arahantehi cittakaṃ ^3-. |13.47| [tevijjā ^4- chaḷabhiññāhi balappattehi tādihi samākulamidaṃ āsi arahantehi tādibhi]. |13.48| So ca buddho asamasamo guṇāni ca tāni atuliyāni sabbaṃ samantarahitaṃ nanu rittā sabbasaṅkhārāti. |13.49| Sujāto jinavaro buddho selārāmamhi nibbuto tattheva ^5- cetiyo satthu tīṇi gāvutamuggatoti. Sujātabuddhavaṃso dvādasamo.

The Pali Tipitaka in Roman Character Volume 33 page 485-490. https://84000.org/tipitaka/read/roman_read.php?B=33&A=9990 Compare with The Pali Tipitaka in Thai Character :- https://84000.org/tipitaka/read/pali_read.php?B=33&A=9990 Compare with The Royal Version of Thai Tipitaka :- https://84000.org/tipitaka/read/byitem.php?book=33.2&item=13&items=1 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=33&siri=204 Study Atthakatha :- https://84000.org/tipitaka/attha/attha.php?b=33&i=193 The Pali Atthakatha in Thai :- https://84000.org/tipitaka/atthapali/read_th.php?B=51&A=6523 The Pali Atthakatha in Roman :- https://84000.org/tipitaka/atthapali/read_rm.php?B=51&A=6523 Contents of The Tipitaka Volume 33 https://84000.org/tipitaka/read/?index_33 https://84000.org/tipitaka/english/?index_33