PaliRoman Vol.37

[68] Rūpadhātuyā rūpī puggaloti . āmantā . kāmadhātuyā kāmī puggaloti. Na hevaṃ vattabbe .pe. [69] Rūpadhātuyā rūpino sattāti . āmantā . kāmadhātuyā kāmino sattāti. Na hevaṃ vattabbe .pe. [70] Arūpadhātuyā arūpī puggaloti . āmantā . Kāmadhātuyā kāmī puggaloti. Na hevaṃ vattabbe .pe. [71] Arūpadhātuyā arūpino sattāti . āmantā. Kāmadhātuyā kāmino sattāti. Na hevaṃ vattabbe .pe. [72] Rūpadhātuyā rūpī puggalo arūpadhātuyā arūpī puggalo Atthi ca koci rūpadhātuyā cuto arūpadhātuṃ upapajjatīti . āmantā. Rūpī puggalo ucchinno arūpī puggalo jātoti . na hevaṃ vattabbe .pe. [73] Rūpadhātuyā rūpino sattā arūpadhātuyā arūpino sattā atthi ca koci rūpadhātuyā cuto arūpadhātuṃ upapajjatīti . āmantā. Rūpī satto ucchinno arūpī satto jātoti . na hevaṃ vattabbe .pe. [74] Kāyoti vā sarīranti vā sarīranti vā kāyoti vā kāyaṃ appiyaṃ karitvā ese se ekaṭṭhe same sabhāge tajjāteti. Āmantā . puggaloti vā jīvoti vā jīvoti vā puggaloti vā puggalaṃ appiyaṃ karitvā ese se ekaṭṭhe same sabhāge tajjāteti. Āmantā . añño kāyo añño puggaloti . āmantā . Aññaṃ jīvaṃ aññaṃ sarīranti. Na hevaṃ vattabbe. {74.1} Ājānāhi niggahaṃ hañci kāyoti vā sarīranti vā sarīranti vā kāyoti vā kāyaṃ appiyaṃ karitvā ese se ekaṭṭhe same sabhāge tajjāte puggaloti vā jīvoti vā jīvoti vā puggaloti vā puggalaṃ appiyaṃ karitvā ese se ekaṭṭhe same sabhāge tajjāte añño kāyo añño puggalo tena vata re vattabbe aññaṃ jīvaṃ aññaṃ sarīranti yaṃ tattha vadesi vattabbe kho kāyoti vā sarīranti vā sarīranti vā kāyoti vā kāyaṃ appiyaṃ karitvā Ese se ekaṭṭhe same sabhāge tajjāte puggaloti vā jīvoti vā jīvoti vā puggaloti vā puggalaṃ appiyaṃ karitvā ese se ekaṭṭhe same sabhāge tajjāte añño kāyo añño puggalo no ca vattabbe aññaṃ jīvaṃ aññaṃ sarīranti micchā {74.2} no ce pana vattabbe aññaṃ jīvaṃ aññaṃ sarīranti no vata re vattabbe kāyoti vā sarīranti vā sarīranti vā kāyoti vā kāyaṃ appiyaṃ karitvā ese se ekaṭṭhe same sabhāge tajjāte puggaloti vā jīvoti vā jīvoti vā puggaloti vā puggalaṃ appiyaṃ karitvā ese se ekaṭṭhe same sabhāge tajjāte añño kāyo añño puggaloti yaṃ tattha vadesi vattabbe kho kāyoti vā sarīranti vā sarīranti vā kāyoti vā kāyaṃ appiyaṃ karitvā ese se ekaṭṭhe same sabhāge tajjāte puggaloti vā jīvoti vā jīvoti vā puggaloti vā puggalaṃ appiyaṃ karitvā ese se ekaṭṭhe same sabhāge tajjāte añño kāyo añño puggalo no ca vattabbe aññaṃ jīvaṃ aññaṃ sarīranti micchā .pe. [75] Kāyoti vā sarīranti vā sarīranti vā kāyoti vā kāyaṃ appiyaṃ karitvā ese se ekaṭṭhe same sabhāge tajjāteti. Āmantā . vuttaṃ bhagavatā atthi puggalo attahitāya paṭipannoti . āmantā . añño kāyo añño puggaloti . Na hevaṃ vattabbe. {75.1} Ājānāhi paṭikammaṃ hañci kāyoti vā Sarīranti vā sarīranti vā kāyoti vā kāyaṃ appiyaṃ karitvā ese se ekaṭṭhe same sabhāge tajjāte vuttaṃ bhagavatā atthi puggalo attahitāya paṭipanno tena vata re vattabbe añño kāyo añño puggaloti yaṃ tattha vadesi vattabbe kho kāyoti vā sarīranti vā sarīranti vā kāyoti vā kāyaṃ appiyaṃ karitvā ese se ekaṭṭhe same sabhāge tajjāte vuttaṃ bhagavatā atthi puggalo attahitāya paṭipanno no ca vattabbe añño kāyo añño puggaloti micchā {75.2} no ce pana vattabbe añño kāyo añño puggaloti no vata re vattabbe kāyoti vā sarīranti vā sarīranti vā kāyoti vā kāyaṃ appiyaṃ karitvā ese se ekaṭṭhe same sabhāge tajjāte vuttaṃ bhagavatā atthi puggalo attahitāya paṭipannoti yaṃ tattha vadesi vattabbe kho kāyoti vā sarīranti vā sarīranti vā kāyoti vā kāyaṃ appiyaṃ karitvā ese se ekaṭṭhe same sabhāge tajjāte vuttaṃ bhagavatā atthi puggalo attahitāya paṭipanno no ca vattabbe añño kāyo añño puggaloti micchā .pe. Saṅkhittaṃ. Paññattānuyogo.

The Pali Tipitaka in Roman Character Volume 37 page 36-39. https://84000.org/tipitaka/read/roman_read.php?B=37&A=743 Compare with The Pali Tipitaka in Thai Character :- https://84000.org/tipitaka/read/pali_read.php?B=37&A=743 Compare with The Royal Version of Thai Tipitaka :- https://84000.org/tipitaka/read/byitem.php?book=37&item=68&items=8 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=37&siri=14 Study Atthakatha :- https://84000.org/tipitaka/attha/attha.php?b=37&i=68 The Pali Atthakatha in Thai :- https://84000.org/tipitaka/atthapali/read_th.php?B=55&A=3230 The Pali Atthakatha in Roman :- https://84000.org/tipitaka/atthapali/read_rm.php?B=55&A=3230 Contents of The Tipitaka Volume 37 https://84000.org/tipitaka/read/?index_37 https://84000.org/tipitaka/english/?index_37