AtthaPali Vol.32

186. 9. Rāmaṇeyyakattheragāthāvaṇṇanā cihacihābhinaditeti āyasmato rāmaṇeyyakattherassa gāthā. Kā uppatti? ayampi purimabuddhesu katādhikāro tattha tattha bhave puññāni upacinanto sikhissa bhagavato kāle kulagehe nibbattitvā viññutaṃ patto bhagavantaṃ disvā pasannamānaso pupphehi pūjaṃ akāsi. So tena puññakammena devaloke nibbatto aparāparaṃ puññāni katvā sugatīsueva parivattento imasmiṃ buddhuppāde sāvatthiyaṃ ibbhakule ^1- nibbattitvā vayappatto jetavanapaṭiggahaṇe ^2- sañjātappasādo pabbajitvā cariyānukūlaṃ kammaṭṭhānaṃ gahetvā araññe viharati. Tassa attano sampattiyā pabbajitasāruppāya ca ^3- paṭipattiyā pāsādikabhāvato rāmaṇeyyakotveva samaññā ahosi. Athekadivasaṃ māro theraṃ bhiṃsāpetukāmo bheravasaddaṃ akāsi. Taṃ sutvā thero thirapakatitāya tena asantasanto "māro ayan"ti ñatvā tattha anādaraṃ dassento:- ^4- "cihacihābhinadite sippikābhirutehi ca na me taṃ phandati cittaṃ ekattanirataṃ hi me"ti gāthaṃ abhāsi. ^4- @Footnote: ¹ Sī. iddhe kule ² Sī. jetavanapaṭiggahaṇakāle ³ Ma. pabbajitasāruppāyeva @^4-4 cha.Ma. "cihacihābhinadite"ti gāthaṃ abhāsi [49] Tattha cihacihābhinaditeti cihacihāti abhiṇhaṃ pavattasaddatāya "cihacihā"ti laddhanāmānaṃ vaṭṭakānaṃ abhinādanimittaṃ, viravahetūti attho. Sippikābhirutehi cāti sippikā vuccanati devakā paranāmakā gelaññena chātakisadārakākārā sākhāmigā. "mahākalandakā"ti keci. Sippikānaṃ abhirutehi mahāviravehi, hetumhi cetaṃ karaṇavacanaṃ, taṃ hetūti attho. Na me taṃ phandati cittanti mama cittaṃ na phandati na calati. ^1- Idaṃ vuttaṃ hoti:- imasmiṃ araññe viravahetu sippikābhirutahetu viya pāpima tava vissarakaraṇahetu mama cittaṃ kammaṭṭhānato na paripatatīti. Tattha kāraṇamāha "ekattanirataṃ hi me"ti. Hisaddo hetuattho, yasmā mama cittaṃ gaṇasaṅgaṇikaṃ pahāya ekatte ekībhāve, bahiddhā vā vikkhepaṃ pahāya ekatte ekaggatāya, ekatte ekasabhāve vā nibbāne nirataṃ abhirataṃ, tasmā kammaṭṭhānato na phandati na lavatīti, ^2- imaṃ kira gāthaṃ vadantoeva thero vipassanaṃ vaḍḍhetvā arahattaṃ pāpuṇi. Tena vuttaṃ apadāne ^3- :- "suvaṇṇavaṇṇo bhagavā sataraṃsī patāpavā caṅkamanaṃ samāruḷho mettacitto sikhīsabho. Pasannacitto sumano vanditvā ñāṇamuttamaṃ minelapupphaṃ paggayha buddhassa abhiropayiṃ. Ekatiṃse ito kappe yaṃ pupphamabhipūjayiṃ duggatiṃ nābhijānāmi buddhapūjāyidaṃ ^4- phalaṃ. Ekūnatiṃsakappamhi sumeghaghananāmako ^5- sattaratanasampanno cakkavattī mahabbalo. Kilesā jhāpitā mayhaṃ .pe. kataṃ buddhassa sāsanan"ti. @Footnote: ¹ cha.Ma. na cavati ² cha.Ma. na cavatīti ³ khu.apa. 32/5/278 minelapupphiyattherāpadāna @⁴ Sī. pupphapūjāyidaṃ ⁵ Sī. sumeghayasanāmako Ayameva ca therassa aññābyākaraṇagāthā ahosi. Rāmaṇeyyakattheragāthāvaṇṇanā niṭṭhitā. --------------

The Pali Atthakatha in Roman Book 32 page 187-189. http://84000.org/tipitaka/atthapali/read_rm.php?B=32&A=4202 อรรถกถาบาลีอักษรไทย :- http://84000.org/tipitaka/atthapali/read_th.php?B=32&A=4202 อ่านอรรถกถาแปลไทย :- http://84000.org/tipitaka/attha/attha.php?b=26&i=186 เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=5266 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=5517 The Pali Tipitaka in Roman Character :- http://84000.org/tipitaka/read/roman_read.php?B=26&A=5517 Contents of The Tipitaka Volume 26 http://84000.org/tipitaka/read/?index_26