AtthaPali Vol.50

180. 8. Manipujakattherapadanavannana orena himavantassatiadikam ayasmato manipujakattherassa apadanam. Ayampi thero purimabuddhesu katadhikaro tattha tattha bhave vivattupanissayani punnani upacinanto padumuttarassa bhagavato kale ekasmim kule nibbatto gharavasam santhapetva tatthadinavam disva gharavasam pahaya tapasapabbajjam pabbajitva himavantaorabhage ekissa nadiya samipe pannasalam karetva vasanto vivekakamataya tassanukampaya ca tattha upagatam padumuttaram bhagavantam disva pasannamanaso manipallankam bhagavato pujesi. Bhagava tassa pasadavaddhanatthaya tattha nisidi. So bhiyyoso mattaya pasanno nibbanadhigamatthaya patthanam akasi. Bhagava anumodanam vatva pakkami. So tena punnena devamanussesu samsaranto sabbattha pujito sukham anubhavitva imasmim buddhuppade savatthiyam vibhavasampanne kule nibbatto gharavasam vasanto ekadivasam satthu dhammadesanam sutva patiladdhasaddho pabbajitva nacirasseva araha ahosi. [34] So ekadivasam attana katakusalam saritva sanjatasomanasso pubbacaritapadanam pakasento orena himavantassatiadimaha. Tattha orenati Himavantassa aparam bhagam vihaya orena, bhummatthe karanavacanam, orasmim disabhageti attho. Nadika sampavattathati apakatanamadheyya eka nadi sam sutthu pavattani vahani sandamana ahositi attho. Tassa canupakhettamhiti tassa nadiya anupakhettamhi tirasamipeti attho. Sayambhu vasate tadati yada aham manipallankam pujesim, tada anacariyako hutva sayameva buddhabhuto bhagava vasate viharatiti attho. [35] Manim paggayha pallankanti maninti cittam aradheti somanassam karotiti mani, atha va mati pamanam karoti abharananti mani, atha va marantapi rajayuvarajadayo tam na pariccajanti tadatthaya sangamam karontiti mani, tam manim manimayam pallankam manoramam sadhu cittam sutthu vicittam paggayha gahetva buddhasetthassa abhiropayim pujesinti attho. Sesam sabbam uttanatthamevati. Manipujakattherapadanavannana nitthita. -------------

The Pali Atthakatha in Roman Book 50 page 221-222. http://84000.org/tipitaka/atthapali/read_rm.php?B=50&A=4764&modeTY=2 อรรถกถาบาลีอักษรไทย :- http://84000.org/tipitaka/atthapali/read_th.php?B=50&A=4764&modeTY=2 อ่านอรรถกถาแปลไทย :- http://84000.org/tipitaka/attha/attha.php?b=32&i=180 เนื้อความพระไตรปิฎกฉบับหลวง :- http://84000.org/tipitaka/read/r.php?B=32&A=4632 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=32&A=5582 The Pali Tipitaka in Roman Character :- http://84000.org/tipitaka/read/roman_read.php?B=32&A=5582 Contents of The Tipitaka Volume 32 http://84000.org/tipitaka/read/?index_32