AtthaPali Vol.38

Kakkarujatakam kayena yo navahareti idam sattha veluvane viharanto devadattam arabbha kathesi. Tassa hi sangham bhinditva tathagatassa ^1- aggasavakehi saddhim parisaya pakkantaya unhalohitam mukhato ugganchi. Atha bhikkhu dhammasabhayam katham samutthapesum avuso devadatto musavadam katva sangham bhinditva idani gilano hutva mahadukkham anubhotiti. Sattha agantva kayanuttha bhikkhave etarahi kathaya sannisinnati pucchitva imaya namati vutte na bhikkhave idaneva pubbepesa musavadiyeva na cesa idaneva musavadam katva sangham bhinditva gilano hutva mahadukkham anubhoti pubbepi anubhosiyevati vatva atitam ahari. Atite baranasiyam brahmadatte rajjam karente bodhisatto tavatimsabhavane annataro devaputto ahosi. Tena kho pana samayena baranasiyam mahaussavo ahosi. Bahu naga supanna ca bhummatthaka ca devata agantva ussavam olokayimsu. Tavatimsabhavanatopi cattaro devaputta kakkaruni nama dibbapupphani tehi katacumbitakam pilandhitva ussavadassanam agamimsu. Dvadasayojanikam nagaram tesam pupphanam gandhena ekagandham ahosi. Manussa imani pupphani kena pilandhaniti upadharenta vicaranti. Te devaputta @Footnote: ¹ gatassa. Amhe ete upadharentiti natva rajangane uppatitva mahantena devanubhavena akase atthamsu. Mahajano sannipati. Rajapi setthiuparajadayopi agamimsu. Atha ne kataradevalokato sami agacchathati pucchimsu. Tavatimsadevalokato agacchamati. Kena kammena agatatthati. Ussavadassanatthayati. Kim pupphani nametaniti. Dibbani kakkarupupphani namati. Sami tumhe devaloke annani pilandheyyatha imani amhakam dethati. Devaputta imani dibbapupphani mahanubhavani devananneva anucchavikani manussaloke lamakanam duppannanam hinadhimuttikanam dussilanam ananucchavikani ye pana manussa imehi ca gunehi samannagata tesam etani anucchavikaniti. Evanca pana vatva tesu jetthakadevaputto pathamam gathamaha kayena yo navahare vacaya na musa bhane yaso laddha na majjeyya save kakkarumarahatiti. Tassattho kayena parassa santakam tinasalakampi navaharati vacaya ca jivitam pariccajamanopi musavadam na bhaneyya. Desanasisamevetam. Kayadvaravacidvaramanodvarehi pana yo dasapi akusalakammapathe na karotiti ayamettha adhippayo. Yaso laddhati issariyampi labhitva yo issariyamadamatto satim osajjetva papakammam na karoti save evarupo imehi gunehi yutto puggalo imam dibbapuppham arahati tasma yo imehi gunehi samannagato So imani pupphani yacitum arahati dassamassati. Tam sutva purohito cintesi mayham imesu gunesu ekopi natthi musavadam pana katva etani pupphani gahetva pilandhisusami evam mam mahajano gunasampanno ayanti janissatiti. So aham etehi gunehi samannagatomhiti vatva tani pupphani (aharati) aharapetva pilandhitva dutiyam devaputtam yaci. So dutiyam gathamaha dhammena vittameseyya na nikatya dhanam hare bhoge laddha na majjeyya save kakkarumarahatiti. Tassattho dhammena parisuddhajivena suvannarajatadivittam pariyeseyya na nikatyati na vancanaya dhanam hareyya vatthabharanadike bhoge labhitva pamadam na majjeyya evarupo imani pupphani arahatiti. Purohito aham etehi gunehi samannagatomhiti vatva aharapetva pilandhitva tatiyam devaputtam yaci. So tatiyam gathamaha yassa cittam ahaliddam saddha ca aviragini eko sadhum na bhunjeyya save kakkarumarahatiti. Tassattho yassa puggalassa cittam ahaliddam haliddarago viya khippam na virajjati thirapemam hoti saddha ca aviraginiti kammam va vipakam va okappaniyassa va puggalassa vacanam sutva saddahitva appamattakeneva na virajjati na bhijjati yo yacake Va anne va samvibhagarahe puggale bahi akatva ekova sadhurasabhojanam na bhunjati nesam samvibhajitva bhunjati so imani pupphani arahatiti. Purohito aham etehi gunehi samannagatomhiti vatva tani pupphani aharapetva pilandhitva catuttham devaputtam yaci. So catuttham gathamaha sammukha va tirokkha va yo sante na paribhasati yathavadi tathakari save kakkarumarahatiti. Tassattho yo puggalo sammukha va parammukha va siladigunayutte sante uttamapanditapurise na akkosati na paribhasati yam vacaya vadati tadeva kayena karoti so imani pupphani arahatiti. Purohito aham etehi gunehi samannagatomhiti vatva tanipi aharapetva pilandhi. Cattaro devaputta cattari pupphacumbitakani purohitassa datva devalokameva gata. Tesam gatakale purohitassa sise mahati vedana uppajji. Tinhena sikharena nimmathitam viya ayapattena ^1- pilitam viya sisam ahosi. So vedanapatto aparaparam parivattamano mahasaddena viravi kimetanti ca vutte aham mamantare avijjamaneyeva gune atthiti musavadam katva te devaputte imani pupphani yacim niharathetani mama @Footnote: ¹ ayayantena. Sisatoti aha. Tani harantapi niharitum nasakkhimsu. Ayapattena bandhani pupphani viya ahesum. Atha nam ukkhipitva geham nayimsu. Tassa tattha viravantassa satta divasa vitivatta. Raja amacce amantetva dussilabrahmano marissati kim karomati aha. Deva puna ussavam karema devaputta punagacchissantiti. Raja puna ussavam karesi. Devaputta punagantva sakalanagaram pupphagandhena ekagandham katva tatheva rajangane atthamsu. Mahajano sannipatitva dussilabrahmanam anetva tesam purato uttanam nipajjapesi. So jivitam me detha samiti devaputte yaci. Te devaputta tuyham lamakassa dussilassa papadhammassa ananucchavikanetani pupphani tvam ime vancissamiti sanni ahosi aho attano te musavadaphalam laddhanti tam mahajanassa majjhe garahitva sisato pupphacumbitakam apanetva mahajanassovadam datva sakatthanameva agamamsu. Sattha imam dhammadesanam aharitva jatakam samodhanesi tada brahmano devadatto ahosi tesu devaputtesu eko kassapo eko moggallano eko sariputto jetthakadevaputto pana ahamevati. Kakkarujatakam chattham -----------

The Pali Atthakatha in Roman Book 38 page 335-339. http://84000.org/tipitaka/atthapali/read_rm.php?B=38&A=6957&modeTY=2 อรรถกถาบาลีอักษรไทย :- http://84000.org/tipitaka/atthapali/read_th.php?B=38&A=6957&modeTY=2 อ่านอรรถกถาแปลไทย :- http://84000.org/tipitaka/attha/attha.php?b=27&i=602 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=2967 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=2928 The Pali Tipitaka in Roman Character :- http://84000.org/tipitaka/read/roman_read.php?B=27&A=2928 Contents of The Tipitaka Volume 27 http://84000.org/tipitaka/read/?index_27