|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
Alambusājātakaṃ
athābravīti idaṃ satthā jetavane viharanto purāṇadutiyikāpalobhanaṃ
ārabbha kathesi. Vatthu indriyajātake vitthāritameva.
Satthā pana taṃ bhikkhuṃ saccaṃ kira tvaṃ bhikkhu ukkaṇṭhitosīti
pucchitvā saccaṃ bhanteti vutte kena ukkaṇṭhāpitosīti vatvā
purāṇadutiyikāyāti vutte bhikkhu esā itthī tuyhaṃ anatthakārikā
tvaṃ etaṃ nissāya jhānaṃ nāsetvā tīṇi saṃvaccharāni sammuḷho
visaññī nipajjitvā uppannāya saññāya mahāparidevaṃ paridevīti
vatvā atītaṃ āhari.
Atīte bārāṇasiyaṃ brahmadatte rajjaṃ kārente bodhisatto
kāsikaraṭṭhe brāhmaṇakule nibbattetvā vayappatto sabbasippesu
nipphattiṃ patvā isipabbajjaṃ pabbajitvā araññāyatane vanamūlaphalāhāro
yāpesi. Athekā migī tassa passāvaṭṭhāne sambhavamissakaṃ
tiṇaṃ khāditvā udakaṃ pīvi. Ettakeneva ca tasmiṃ paṭibaddhacittā
gabbhaṃ paṭilabhitvā tato paṭṭhāya katthaci agantvā assamassa
sāmanteyeva vicarati. Mahāsatto parigaṇhanto taṃ kāraṇaṃ
aññāsi. Sā aparabhāge manussadārakaṃ vijāyi. Mahāsatto taṃ
puttasinehena paṭijaggi. Isisiṅgotissa nāmaṃ akāsi. Atha naṃ
mahāsatto viññutappattaṃ pabbājetvā attano mahallakakāle taṃ
Ādāya nārīvanaṃ gantvā tāta imasmiṃ himavante imehi pupphehi
sadisā itthiyo nāma honti tā attano vasaṃ gate mahāvināsaṃ
pāpenti tāsaṃ vasaṃ nāma gantuṃ na vaṭṭatīti ovaditvā aparabhāge
brahmalokaparāyano ahosi. Isisiṅgopi jhānakīḷaṃ kīḷantova
himavantappadese vāsaṃ kappesi ghoratapo paramajitindriyo ahosi.
Athassa sīlatejena sakkassa bhavanaṃ kampi. Sakko āvajjento taṃ
kāraṇaṃ ñatvā ayaṃ maṃ sakkattā cāveyya ekaṃ accharaṃ
pesetvā sīlamassa bhindāpessāmīti sakaladevalokaṃ upaparikkhanto
attano aḍḍhateyyakoṭisaṅkhātānaṃ paricārikānaṃ majjhe ekaṃ alambusaṃ
nāma accharaṃ ṭhapetvā aññaṃ tassa sīlaṃ bhindituṃ samatthaṃ adisvā
taṃ pakkosāpetvā tassa sīlabhedaṃ kātuṃ āṇāpesi.
Tamatthaṃ āvikaronto satthā paṭhamaṃ gāthamāha
athābravi brahā indo vatrabhū jayataṃ pitā
devakaññaṃ parābhetvā sudhammāyaṃ alambusanti.
Tattha brahāti mahā. Vatrabhūti vatrassa nāma asurassa
abhibhavitvā. Jayataṃ pitāti jayantānaṃ jayappattānaṃ sesānaṃ
tettiṃsāya devaputtānaṃ pitukiccasādhanena pitā. Parābhetvāti hadayaṃ
bhinditvā olokento viya taṃ paṭibalā ayanti ñatvāti
attho. Sudhammāyanti sudhammāya devasabhāya paṇḍukambalasilāsane
nisinno taṃ alambusaṃ pakkosāpetvā idamāha
Misse devā taṃ yācanti tāvatiṃsā saindakā
isipalobhike gaccha isisiṅgaṃ alambuseti.
Tattha misseti taṃ ālapati. Idañca tassā nāmaṃ sabbā
panitthiyo purise kilesamissanena missanato missāti vuccanti.
Tena sādhāraṇena guṇanāmenālapanto evamāha. Isipalobhiketi
isīnaṃ palobhanasamatthe. Isisiṅganti tassa kira matthake migasiṅgākārena
dve cūḷā uṭṭhahiṃsu tasmā evaṃ vuccati.
Iti sakko gaccha isisiṅgaṃ upasaṅkamitvā attano vasaṃ ānetvā
sīlamassa bhindāti alambusaṃ āṇāpesi.
Purāyaṃ amhe nācceti vatvā brahmacariyavā
nibbānābhirato buddho tassa maggāni āvara
iti vacanaṃ āha.
Tattha purāyanti ayaṃ tāpaso vatasampanno ca brahmacariyavā
ca so ca kho panesa dīghāyukatāya nibbānasaṅkhāte
magge abhirato guṇavuḍḍhiyā ca buddho tasmā yāva esa amhe
nātikkamati na abhibhavitvā imamhā ṭhānā cāveti tāvadeva
tvaṃ gantvā tassa devalokagamanāni maggāni āvara yathā idha
nāgacchati evaṃ karohīti attho.
Taṃ sutvā alambusā gāthādvayamāha
devarāja kimeva tvaṃ mameva tuvaṃ sikkhasi
isipalobhike gaccha santi aññāpi accharā.
Mādisiyo pavarā ceva asoke nandane vane
tāsaṃpi hotu pariyāyo tāpi yantu palobhikāti.
Tattha kimeva tvanti kiṃ nāmetaṃ tvaṃ karosīti dīpeti. Mameva
tuvaṃ sikkhasīti imasmiṃ sakale devaloke mameva tuvaṃ kiṃ sikkhasi
aññaṃ na passasīti adhippāyena vadati. Sakāro panettha
byañjanasandhikaro. Isipalobhike gacchāti kiṃkāraṇā maññeva evaṃ
vadesīti adhippāyo. Pavarā cevāti mayā uttaritarā ceva.
Asoketi sokarahite. Nandaneti nandijanake. Pariyāyoti gamanavāro.
Tato sakko tisso gāthāyo abhāsi
addhā hi saccaṃ bhaṇasi santi aññāpi accharā
tādisiyo pavarā ceva asoke nandane vane.
Na tā evaṃ pajānanti pāricariyaṃ pumaṃ gatā
yādisaṃ tvaṃ pajānāsi nāri sabbaṅgasobhane.
Tvameva gaccha kalyāṇi itthīnaṃ pavarā casi
taveva vaṇṇarūpena vasamānāpayissasīti.
Tattha pumaṃ gatāti purisaṃ upasaṅkantā samānā purisapalobhinipāricariyaṃ
na jānanti. Vaṇṇarūpenāti sarīravaṇṇena ceva rūpasampattiyā ca.
Vasamānāpayissasīti taṃ tāpasaṃ attano vasaṃ ānessasi.
Taṃ sutvā alambusā dve gāthā abhāsi
navāhaṃ na gamissāmi devarājena pesitā
vibhemi cetaṃ āsāduṃ uggatejo hi brāhmaṇo.
Aneke nirayaṃ pattā isimāsādiyā janā
āpannā mohasaṃsāraṃ tasmā lomāni haṃsayeti.
Tattha navāhanti nave ahaṃ. Vibhemīti bhāyāmi. Āsādunti
āsādituṃ. Idaṃ vuttaṃ hoti nāhaṃ deva tayā pesitā na
gamissāmi apicāhaṃ taṃ isisiṅgaṃ sīlabhedanatthāya allīyituṃ bhāyāmi
uggatejo hi soti. Āsādiyāti āsādetvā. Mohasaṃsāranti
mohena saṃsāraṃ mohena isiṃ palobhetvā saṃsāraṃ āpannā
vaṭṭadukkhe patiṭṭhitā sattā gaṇanapathaṃ atikkantā. Tasmāti tena
kāraṇenāhaṃ. Lomāni haṃsayeti lomāni uṭṭhapemi. Tassa kirāhaṃ
sīlaṃ bhindissāmīti cintayamānāya me lomāni haṃsantīti vadati.
Idaṃ vatvāna pakkāmi accharā kāmavaṇṇinī
missā missetumicchantī isisiṅgaṃ alambusā.
Sā ca taṃ vanamoggayha isisiṅgena rakkhitaṃ
bimbajālarattasañchannaṃ samantā aḍḍhayojanaṃ.
Pātova pātarāsamhi udayasamayaṃ paṭi
aggiṭṭhaṃ parimajjantaṃ isisiṅgaṃ upāgamīti
imā abhisambuddhagāthā.
Tattha pakkāmīti tenahi devarāja āvajjeyyāsi manti attano
sayanagabbhaṃ pavisitvā alaṅkaritvā isisiṅgaṃ kilesena missetuṃ icchantī
pakkāmi. Bhikkhave sā accharā tassa assamaṃ gatāti. Bimbajāla-
rattasañchannanti rattakuravakavanena sañchannaṃ. Pātova pātarāsamhīti
Bhikkhave pātarāsavelāya pātova pageyeva. Kīvapageti. Udayasamayaṃ
paṭīti suriyuggamanavelāyameva. Aggiṭṭhanti aggisālaṃ. Rattiṃ
padhānamanuyuñjitvā pātova nahātvā udakakiccaṃ katvā paṇṇasālāya
thokaṃ jhānasukhena vītināmetvā nikkhamitvā aggisālaṃ sammajjantaṃ taṃ
isisiṅgaṃ upāgami itthīvilāsaṃ dassentī tassa purato aṭṭhāsi.
Atha naṃ tāpaso pucchanto āha
kā nu vijjurivābhāsi osadhī viya tārakā
vicittahatthābharaṇā āmuttamaṇikuṇḍalā.
Ādiccavaṇṇasaṅkāsā hemacandanagandhinī
saññatūru mahāmāyā kumārī cārudassanā.
Vilākā mudukā suddhā pādā te supatiṭṭhitā
kamanā kāmanīyā te harantiyeva me mano.
Anupubbā ca te ūrū nāganāsasamūpamā
vimaṭṭhā tuyhaṃ sussoṇī akkhassa phalakaṃ yathā.
Uppalasseva kiñjakkhā nābhi te sādhusaṇṭhitā
purā kaṇhañjanasseva dūrato paṭidissati.
Duvidhā jātā urajā avaṇṭā sādhupaccudā
payodharā appatītā aḍḍhalābusamā thanā.
Dīghā kambutalābhāsā gīvā eṇeyyakā yathā
paṇḍarāvaraṇā vaggu catutthamanasannibhā.
Uddhaggā ca adhaggā ca dumaggaparimajjitā
duvijā nelasambhūtā dantā tava sudassanā.
Apaṇḍarā lohitantā jiñjukaphalasannibhā
āyatā ca visālā ca nettā tava sudassanā.
Nātidīghā susamaṭṭhā kanakabyā samocitā
uttamaṅgaruhā tuyhaṃ kesā candanagandhikā.
Yāvatā kasigorakkhā vāṇijānañca yā gati
isīnañca parakkantaṃ saññatānaṃ tapassinaṃ.
Na te samasamaṃ passe asmiṃ paṭhavimaṇḍale
ko vā tvaṃ kassa vā putto kathaṃ jānemu taṃ mayanti.
Tattha vicittahatthābharaṇāti vicittehi hatthābharaṇehi samannāgatā.
Hemacandanagandhinīti suvaṇṇavaṇṇacandanagandhavilepanā. Saññatūrūti
suvaṭṭitaghanaūru sampannaūrulakkhaṇā. Vilākāti saṅkhittamajjhā.
Mudukāti mudu sukhumālā. Suddhāti nimmalā. Supatiṭṭhitāti samaṃ
paṭhaviṃ phusantā suṭṭhu patiṭṭhitā. Kamanāti gacchamānā. Kāmanīyāti
kantā kāmetabbayuttakā. Harantiyeva me manoti ete evarūpena
paramena itthīvilāsena caṅkamantiyā tava pādā mama cittaṃ harantiyeva.
Vimaṭṭhāti visālā. Sussoṇīti sundarasoṇī. Akkhassāti
suvaṇṇassa phalakaṃ viya visālā te soṇīti vadati. Uppalasseva
kiñjakkhāti nīluppalakaṇṇikā viya. Kaṇhañjanassevāti sukhumakaṇhalomācitattā
evamāha. Duvidhāti gāthaṃ thane vaṇṇayanto āha.
Te hi dve hutvā ure jātā vaṇṭassa abhāvā avaṇṭā ure
laggā eva hutvā suṭṭhu nikkhantattā sādhupaccudā payassa dhāraṇato
payodharā. Appatītāti nappatītā amilātatāya vā anabbhunnatatāya
vā na anto paviṭṭhāti appatītā. Suvaṇṇaphalake ṭhapitasuvaṇṇamayā
vaṭṭālābuno aḍḍhena sadisatāya aḍḍhalābusamā thanā. Eṇeyyakā
yathāti eṇimigassa hi dīghā ca vaṭṭā ca gīvā sobhati evaṃ
tava thokaṃ dīghā. Kambutalābhāsāti suvaṇṇāliṅgatalasannibhā gīvāti
attho. Paṇḍarāvaraṇāti dantāvaraṇā. Catutthamanasannibhāti
catutthamano vuccati catutthamanavatthubhūtā jivhā. Abhirattabhāvena
jivhāsadisaṃ te oṭṭhapariyosānanti vadati. Uddhaggāti uparimadantā.
Adhaggāti heṭṭhimadantā. Dumaggaparimajjitāti dantakaṭṭhaparimajjitā
parisuddhā. Duvijāti dvijā. Nelasambhūtāti niddosesu
hanumaṃsapariyosānesu saṃbhūtā. Apaṇḍarāti kaṇhā. Lohitantāti
rattapariyantā. Jiñjukaphalasannibhāti rattaṭṭhāne jiñjukaphalasadisā.
Sudassanāti passantānaṃ atittikarā pañcapasādasamannāgatā. Nātidīghāti
pamāṇayuttā. Susamaṭṭhāti suṭṭhu samaṭṭhā. Kanakabyā samocitāti
kanakabyā vuccati suvaṇṇaphalikā tāya gandhatelaṃ ādāya pariharitā
suracitā. Kasigorakkhāti iminā kasiñca gorakkhañca nissāya
jīvanakasatte dasseti. Yā gatīti yattakā nipphatti. Parakkantanti
yattakaṃ isīnaṃ parakkantaṃ vitthārīkatā imasmiṃ himavante yattakā
isayo vasantīti attho. Na te samasamanti tesu sabbesu ekaṃpi
Rūpalīlāvilāsādisamatāya tayā samaṃ na passāmi. Ko vā tvanti
idaṃ tassā itthībhāvaṃ jānanto purisavohāravasena pucchati.
Sā evaṃ pādato paṭṭhāya yāva kesā attano vaṇṇaṃ bhāsante
tāpase alambusā tuṇhī hutvā tassā kathāya yathānusandhiṃ gatāya
tassa sammuḷhabhāvaṃ ñatvā gāthamāha
na pañhakālo bhaddante kassapevaṃ gate sati
ehi samma ramissāma ubho asmāka assame
ehi taṃ upaguyhissaṃ ratīnaṃ kusalo bhavāti.
Tattha kassapevaṃ gate satīti kassapagotta evaṃ tava citte
pavatte sati pañhakālo na hoti. Sammāti piyavacanamālapanametaṃ.
Ratīnanti pañcakāmaguṇaratīnaṃ.
Evaṃ vatvā alambusā cintesi nāyaṃ mayi ṭhitāya hatthapāsaṃ
gamissati gacchantī viya gamissāmīti. Sā itthīmāyākusalatāya
tāpasaṃ upasaṅkamitvā āgatamaggābhimukhī pāyāsi.
Tamatthaṃ pakāsento satthā āha
idaṃ vatvāna pakkāmi accharā kāmavaṇṇinī
missā missetumicchantī isisiṅgaṃ alambusāti.
Atha naṃ tāpaso gacchantaṃ disvā ayaṃ gacchatīti attano
dandhaparakkamaṃ mandagamanaṃ chinditvā vegena dhāvitvā kesesu hatthena
parāmasi.
Tamatthaṃ pakāsento satthā āha
So ca vegena nikkhamma chetvā dandhaparakkamaṃ
tamuttamāsu veṇīsu ajjhappatto parāmasi.
Tamudāvatta kalyāṇī palissaji susobhanī
cavi tamhi brahmacariyā yathā taṃ atha tositā.
Manasā agamā indaṃ vasantaṃ nandane vane
tassā saṅkappamaññāya maghavā devakuñjaro
pallaṅkaṃ pāhiṇi khippaṃ suvaṇṇaṃ sopavāhanaṃ.
Sauracchadapaññāsaṃ sahassapaṭiyatthataṃ
tamenaṃ tattha dhāresi ure katvāna sobhanā.
Yathā ekamuhuttaṃva tīṇi vassāni dhārayi
vimado tīhi vassehi pabujjhitvāna brāhmaṇo.
Addasāsi haritarukkhe samantā aggiyāyanaṃ
navapattavanaṃ phullaṃ kokilagaṇaghositaṃ.
Samantā sa viloketvā rudaṃ assūni vattayi
na juhe na jape mante aggihuttaṃ pahāpitaṃ.
Ko nu me pāricariyāya pubbe cittaṃ palobhayi
araññe me viharato yo me tejāhasambhutaṃ
nānāratanaparipuṇṇaṃ nāvaṃva gaṇhi aṇṇaveti.
Tattha ajjhappattoti sampatto. Tamudāvatta kalyāṇīti taṃ
kese parāmasetvā ṭhitaṃ isiṃ udāvattitvā nivattitvā
kalyāṇadassanā sā suṭṭhusobhanā. Palassajīti āliṅgi. Cavi tamhi
Brahmacariyā yathā taṃ atha tositāti bhikkhave tassa isino tāvadeva
jhānaṃ antaradhāyi tasmiṃ tamhā jhānā brahmacariyā cavite yathā
taṃ sakkena patthitaṃ tatheva ahosi. Atha sakkassa patthanāya
samiddhabhāvaṃ viditvā sā devakaññā pesitā tassa tena brahmacariyavināsena
sañjanitapītipāmojjāti attho. Manasā agamāti sā taṃ
āliṅgitvā ṭhitā aho vata sakko pallaṅkaṃ passeyyāti evaṃ
pavattena manasā indaṃ agamā. Nandaneti nandijananasamatthatāya
nandanavanasaṅkhāte tāvatiṃsabhavane vasantaṃ. Devakuñjaroti devaseṭṭho.
Pāhiṇīti pesehi. Pahiṇītipi pāṭho. Sopavāhananti saparivāraṃ.
Sauracchadapaññāsanti paññāsāya uracchadehi paṭicchāditaṃ.
Sahassapaṭiyatthatanti sahassadibbakojavatthataṃ. Tamenaṃ tatthāti taṃ isisiṅgaṃ
tattha dibbapallaṅke nisinnā sā ure katvā dhāresīti. Tīṇi
vassānīti ekamuhuttaṃ viya manussagaṇanāya tīṇi vassāni taṃ ure
nipajjāpetvā tattha nisinnā dhāresi. Vimadoti nimmado
vigatavisaññabhāvo. So hi tīṇi saṃvaccharāni visañño sayitvā pacchā
paṭiladdhasañño pabujjhi. Tasmiṃ pabujjhamāne hatthādiphandanaṃ disvāva
alambusā tassa pabujjhanabhāvaṃ ñatvā pallaṅkamantaradhāpetvā sayaṃpi
antarahitā aṭṭhāsi. Addasāsīti assamapadaṃ olokento kena
nu khomhi sīlavināsaṃ pāpitoti cintetvā mahantena saddena paridevamāno
addasāsi. Haritarukkheti aggiyāyanasaṅkhātaṃ aggisālaṃ samantā
parivāretvā ṭhite haritapattarukkhe. Navapattavananti taruṇehi
Navapattehi sañchannaṃ vanaṃ. Rudanti paridevanto. Na juhe na jape
manteti ayamassa paridevanagāthā. Pahāpitanti hāpitaṃ. Pakāro
upasaggamattaṃ. Pāricariyāyāti konu kilesapāricariyāya ito pubbe
mama cittaṃ palobhayīti paridevati. Yo me tejāhasaṃbhūtanti hakāro
nipātamattaṃ. Yo mama samaṇatejena saṃbhūtaṃ jhānaguṇaṃ nānāratanapuṇṇaṃ
mahaṇṇave nāvaṃ viya gaṇhi vināsaṃ pāpesi ko nāmesoti
paridevati.
Taṃ sutvā alambusā cintesi sacāhaṃ na kathessāmi ayaṃ
me abhisapissati handassa kathessāmīti. Sā dissamānena kāyena
ṭhatvā gāthamāha
ahante pāricariyāya devarājena pesitā
avadhi cittaṃ cittena pamādā tvaṃ na bujjhasīti.
So tassā kathaṃ sutvā pitarā dinnaṃ ovādaṃ saritvā pituvacanaṃ
akatvā mahāvināsaṃ pattomhīti paridevanto catasso gāthāyo abhāsi
imāni kira maṃ tāto kassapo anusāsati
kamalāsarisitthiyo tāyo bujjhesi māṇava.
Ure gaṇḍāyo bujjhesi tāyo bujjhesi māṇava
iccānusāsimaṃ tāto yathā maṃ anukampako.
Tassāhaṃ vacanaṃ nākaṃ pitu buddhassa sāsanaṃ
araññe nimmanussamhi savājja jhāyāmi ekako.
Sohaṃ tathā karissāmi dhiratthu jīvitena me
puna vā tādiso hessaṃ maraṇaṃ me bhavissatīti.
Tattha imānīti imāni vacanāni. Kamalāsarisitthiyoti kamalā
vuccati nārīphalakā tāsaṃ pupphasadisā itthiyo. Tāyo bujjhesīti
māṇava tāyo jāneyyāsi ñatvā dassanapathaṃ agantvā
palāpeyyāsīti yāni evarūpāni vacanāni tadā maṃ tāto anusāsati
imāni kira tānīti. Ure gaṇḍāyoti uramhi dvīhi gaṇḍehi
samannāgatāyo. Tāyo bujjhesīti māṇava tāyo attano vasaṅgate
vināsaṃ pāpentīti jāneyyāsīti. Nākanti na kariṃ. Jhāyāmīti
pajjhāyāmi paridevāmi. Dhiratthu jīvitena meti dhiratthu garahitaṃ mama
jīvitaṃ jīvitena me ko attho. Puna vāti tathā karissāmi
yathā puna vā tādiso bhavissāmi naṭṭhaṃ jhānaṃ uppādetvā
vītarāgo bhavissāmi maraṇaṃ vā me bhavissatīti.
So kāmarāgaṃ pahāya puna jhānaṃ uppādesi. Athassa samaṇatejaṃ
disvā jhānassa ca uppāditabhāvaṃ ñatvā alambusā bhītā khamāpesi.
Tamatthaṃ pakāsento satthā dve gāthā abhāsi
tassa tejañca viriyañca dhitiṃ ñatvā suvaḍḍhitaṃ
sirasā aggahī pāde isisiṅgaṃ alambusā.
Mā me kujjha mahāvīra mā me kujjha mahāise
mahā attho mayā ciṇṇo tidasānaṃ yasassinaṃ
tayāpi kampitaṃ āsi sabbaṃ devapuraṃ tadāti.
Atha naṃ so khamāmi te bhadde yathāsukhaṃ gacchāhīti visajjento
gāthamāha
tāvatiṃsā ca ye devā tidasānañca vāsavo
tvañca bhadde sukhī hohi gaccha kaññe yathāsukhanti.
Sā taṃ vanditvā teneva suvaṇṇapallaṅkena devapuraṃ gatā.
Tamatthaṃ pakāsento satthā tisso gāthāyo abhāsi
tassa pāde gahetvāna katvā ca naṃ padakkhiṇaṃ
añjaliṃ paggahetvāna tamhā ṭhānā apakkami.
Yo tassā āsi pallaṅko sovaṇṇo sopavāhano
sauracchadapaññāso sahassapaṭiyatthato
tameva pallaṅkamāruyha agā devāna santike.
Tamokkamiva āyantiṃ jalantiṃ vijjutaṃ yathā
patīto sumano vitto devindo adadā varanti.
Tattha okkamivāti dīpakaṃ viya. Patītoti ādīhi tuṭṭhākārova
dassito. Adadā varanti āgantvā vanditvā ṭhitāya tuṭṭho
varaṃ adadā adāsi.
Sā tassa santike varaṃ gaṇhantī osānagāthamāha
varañce me ado sakka sabbabhūtānamissara
na isipalobhikā gacche etaṃ sakka varaṃ vareti.
Tassattho sakka devarāja sace me tvaṃ varaṃ ado puna
Isipalobhikāya na gaccheyyaṃ mā maṃ etadatthāya pahiṇeyyāsi
etaṃ varaṃ varemīti.
Satthā tassa bhikkhuno imaṃ dhammadesanaṃ āharitvā saccāni
pakāsetvā jātakaṃ samodhānesi. Saccapariyosāne so bhikkhu
sotāpattiphale patiṭṭhahi. Tadā alambusā porāṇadutiyikā ahosi.
Isisiṅgo ukkaṇṭhito bhikkhu pitā mahāisi pana ahamevāti.
Alambusājātakaṃ niṭṭhitaṃ.
Tatiyaṃ.
-----------------
The Pali Atthakatha in Roman Book 41 page 396-410.
http://84000.org/tipitaka/atthapali/read_rm.php?B=41&A=8146
อรรถกถาบาลีอักษรไทย :-
http://84000.org/tipitaka/atthapali/read_th.php?B=41&A=8146
อ่านอรรถกถาแปลไทย :-
http://84000.org/tipitaka/attha/attha.php?b=27&i=2478
เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=10324
พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=11235
The Pali Tipitaka in Roman Character :-
http://84000.org/tipitaka/read/roman_read.php?B=27&A=11235
Contents of The Tipitaka Volume 27
http://84000.org/tipitaka/read/?index_27
        |
|
บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]