AtthaPali Vol.10

7. Anuruddhasuttavannana [230] Evamme sutanti anuruddhasuttam. Tattha evamahamsuti tassa upasakassa aphasukakalo ahosi, tada upasankamitva evamahamsu. Apannakanti aviradhitam. Ekatthati appamanati va mahaggatati va jhanameva cittekatgatayeva evam vuccatiti imam sandhaya evamaha. [231] Yavata ekam rukkhamulam mahaggatanti pharitva adhimuccitva viharatiti ekarukkhamulapamanatthanam kasinanimittena ottharitva tasmim kasinanimitte mahaggatajjhanam pharitva adhimuccitva viharati. Mahaggatanti panassa abhogo natthi, kevalam mahaggatajjhanappavattivasena panetam vuttam. Esa nayo sabbattha. Imina kho etam gahapati pariyayenati imina karanena. Ettha hi appamanati vuttanam brahmaviharanam nimittam na vattati, ugghatanam na jayati, tani jhanani abhinnanam va nirodhassa va padakani na honti, vipassanapadakani pana vattapadakani bhavokkamanani ca honti. "mahaggata"ti vuttanam pana kasinajjhananam nimittam vattati, ugghatanam jayati, samatikkama honti, abhinnapadakani nirodhapadakani vattapadakani bhavokkamanani ca honti. Evamime dhamma nanattha, appamana mahaggatati evam nanabyanjana ca. [232] Idani mahaggatasamapattito niharitva bhavupapattikaranam dassento catasso kho imatiadimaha. Parittabhati pharitva janantassa ayamabhogo atthi, parittabhesu pana devesu nibbattikaranam jhanam bhavento evam vutto. Esa nayo sabbattha. Parittabha siya sankilitthabha honti siya parisuddhabha, appamanabha siya sankilitthabha honti siya parisuddhabha. Katham? suppamatte va saravamatte va kasinaparikammam katva parittabhe samapattim nibbattetva pancahakarehi acinnavasibhavo paccanikadhammanam sutthu aparisodhitatta dubbalameva samapattim valanjitva appagunajjhane thito kalam Katva parittabhesu nibbattati, vanno panassa paritto ceva hoti sankilittho ca. Pancahi panakarehi acinnavasibhavo paccanikadhammanam sutthu parisodhitatta suvisuddham samapattim valanjitva pagunajjhane thito kalam katva parittabhesu nibbattati, vanno panassa paritto ceva hoti parisuddho ca, evam parittabha siya sankilitthabha honti siya parisuddhabha. Kasine pana vipulaparikammam katva samapattim nibbattetva pancahakarehi acinnavasibhavoti sabbam purimasadisameva veditabbam. Evam appamanabha siya sankilitthabha honti siya parisuddhabhati. Vannananattanati sariravannassa nanattam. No ca abhananattanti alokananattam na pannayatiti. Accinanattanti digharassaanuthulavasena acciya nanattam. Yattha yatthati uyyanavimanakapparukkhanaditirapokkharanitiresu yattha yattha. Abhinivisantiti vasanti. Abhiramantiti ramanti na ukkanthanti. Kajenati yagubhattatelaphanitamacchamamsakajesu yena kenaci kajena. "kacena"tipi patho, ayameva attho. Pitakenati pacchiya. Tattha tatthevati sappimadhuphanitadinam sulabhatthanato lonaputimacchadinam ussannatthanam nita "pubbe amhakam vasanatthanam phasukam, tattha sukham vasimha, idha lonam va no ^1- badhati, putimacchagandho va sisarogam uppadeti"ti evam cittam anuppadetva tattha tattheva ramanti. [234] Abhati abhasampanna. Tadangenati tassa bhavupapattiya angena, bhavupapattikaranenati attho. Idani tam karanam pucchanto ko nu kho bhantetiadimaha. Kayadutthullanti kayalasiyabhavo. Jhayatoti jalato. [235] Digharattam kho meti thero kira paramiyo purento isipabbajjam pabbajitva samapattim nibbattetva nirantaram tini attabhavasatani brahmaloke patilabhi, tam sandhayevamaha ^2- vuttampi cetam:- @Footnote: ¹ Si. lonavato ² cha.Ma. tam sandhayetam "avokinnam tini satam yam pabbajim isipabbajim asankhatam gavesanto pubbe sancaritam maman"ti. Sesam sabbattha uttanamevati. Papancasudaniya majjhimanikayatthakathaya anuruddhasuttavannana nitthita. -------------

The Pali Atthakatha in Roman Book 10 page 145-147. http://84000.org/tipitaka/atthapali/read_rm.php?B=10&A=3691&modeTY=2 อรรถกถาบาลีอักษรไทย :- http://84000.org/tipitaka/atthapali/read_th.php?B=10&A=3691&modeTY=2 อ่านอรรถกถาแปลไทย :- http://84000.org/tipitaka/attha/attha.php?b=14&i=420 เนื้อความพระไตรปิฎกฉบับหลวง :- http://84000.org/tipitaka/read/r.php?B=14&A=5819 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=14&A=5670 The Pali Tipitaka in Roman Character :- http://84000.org/tipitaka/read/roman_read.php?B=14&A=5670 Contents of The Tipitaka Volume 14 http://84000.org/tipitaka/read/?index_14