AtthaPali Vol.10

5. Salayatanavagga 1. Anathapindikovadasuttavannana [383] Evamme sutanti anathapindikovadasuttam. Tattha balhagilanoti adhimattagilano maranaseyyam upagato. Amantesiti gahapatissa kira yava pada vahimsu, tava divase sakim va dvikkhattum va tikkhattum va buddhupatthanam akhandam akasi. Yattakam cassa satthu upatthanam ahosi, tattakamyeva mahatheranam. So ajja gamanapadassa pacchinnatta anutthanaseyyam upagato sasanam pesetukamo annataram purisam amantesi. Tenupasankamiti bhagavantam apucchitva suriyatthangamanavelaya upasankami. [384] Patikkamantiti osakkanti, tanuka bhavanti. Abhikkamantiti abhivaddhanti ottharanti, balavatiyo honti. Abhikkamosanam pannayati no patikkamoti yasmim hi samaye maranantika vedana uppajjati, uparivate jalitaggi viya hoti, yava usma na pariyadiyati, tava mahatapi upakkamena na sakka vupasametum, usmaya pana pariyadinnaya vupasamati. [385] Athayasma sariputto cintesi "ayam mahasetthissa vedana maranantika, na sakka patibahitum, avasesa katha niratthaka, dhammakathamassa kathessami"ti. Atha nam tam kathento tasma tihatiadimaha. Tattha tasmati yasma cakkhum tihi gahehi ganhanto uppannam maranantikam vedanam patibahitum samattho nama natthi, tasma. Na cakkhum upadiyissamiti cakkhum tihi gahehi na ganhissami. Na ca me cakkhunissitanti ^1- vinnanancapi me cakkhunissitam na bhavissati. Na rupanti hettha ayatanarupam kathitam, imasmim thane sabbampi kamabhavarupam kathento evamaha. @Footnote: ¹ cha.Ma. cakkhunissitam vinnananti [386] Na idhalokanti vasanatthanam va ghasacchadanam va na upadiyissamiti attho. Idam hi paccayesu aparitassanattham kathitam. Na paralokanti ettha pana manussalokam thapetva sesa paraloka nama. Idam "asukadevaloke nibbattitva asukatthane bhavissami, idam nama khadissami bhunjissami nivasessami parupissami"ti evarupaya paritassanaya pahanattham vuttam. Tampi na upadiyissami, na ca me tannissitam vinnanam bhavissatiti evam tihi gahehi parimocetva thero desanam arahattanikutena nitthapesi. [387] Oliyasiti attano sampattim disva arammanesu bajjhasi alliyasiti. Iti ayasma anando "ayampi nama gahapati evam saddho pasanno maranabhayassa bhayati, anno ko na bhayissati"ti mannamano tassa galham katva ovadam dento evamaha. Na ca me evarupi dhammikatha sutapubbati ayam upasako "satthu santikapi me evarupi dhammakatha na sutapubba"ti vadati, kim sattha evarupim sukhumam gambhirakatham na kathetiti. No na katheti, evam pana cha ajjhattikani ayatanani cha bahirani cha vinnanakaye cha phassakaye cha vedanakaye cha dhatuyo pancakkhandhe cattaro arupe idhalokaparalokam dassetva ditthasutamutavinnatavasena arahatte pakkhipitva kathitakatha etena na sutapubba, tasma evam vadati. Apicayam upasako danadhimutto danabhirato buddhanam santikam gacchanto tucchahattho na gatapubbo. Purebhattam gacchanto yagukhajjakadini gahapetva gacchati, pacchabhattam sappimadhuphanitadini. Tasmim asati valikam gahapetva gandhakutiparivene okirapeti, danam datva silam rakkhitva geham gato. Bodhisattagatiko kiresa upasako, tasma bhagava catuvisati samvaccharani upasakassa yebhuyyena danakathameva kathesi "upasaka idam danam nama bodhisattanam gatamaggo, mayhampi gatamaggo, maya satasahassakappadhikani cattari asankhyeyyani danam dinnam, tvam me gatamaggameva anugacchasi"ti. Dhammasenapatiadayo mahasavakapi Attano attano santikam agatakale danakathamevassa kathenti. Tenevaha na kho gahapati gihinam odatavasananam evarupi dhammikatha patibhatiti. Idam vuttam hoti:- gahapati gihinam nama khettavatthuhirannadasidasaputtabhariyadisu tibbo alayo tibbam nikantipariyutthanam, tesam "ettha alayo na katabbo, nikanti na katabba"ti katha na patibhati na ruccatiti. Yena bhagava tenupasankamiti kasma upasankami? tusitabhavane kirassa Nibbattamattakasseva tigavutappamanam suvannakkhandham viya vijjotamanam attabhavam uyyanavimanadisampattim ca disva "mahati ayam mayham sampatti, kim nu kho me manussapathe kammam katan"ti olokento tisu ratanesu adhikaram disva cintesi "pamadatthanamidam devattam nama, imaya hi me sampattiya modamanassa satisammosopi siya, handaham gantva mama jetavanassa ceva bhikkhusamghassa ca tathagatassa ca ariyamaggassa ca sariputtattherassa ca vannam kathetva tato agantva sampattim anubhavissami"ti. So tatha akasi. Tam dassetum atha kho anathapindikotiadi vuttam. Tattha isisamghanisevitanti bhikkhusamghanisevitam. Evam pathamagathaya jetavanassa vannam kathetva idani ariyamaggassa vannam kathento kammam vijja catiadimaha. Tattha kammanti maggacetana. Vijjati maggapanna. Dhammoti samadhipakkhiko dhammo. Silam jivitamuttamanti sile patitthitassa jivitam uttamanti dasseti. Atha va vijjati ditthisankapPo. Dhammoti vayamasatisamadhayo. Silanti vacakammantajiva. Jivitamuttamanti etasmim sile patitthitassa jivitam nama uttamam. Etena macca sujjhantiti etena atthangikena maggena satta visujjhanti. Tasmati yasma maggena sujjhanti, na gottadhanehi, tasma. Yoniso vicine dhammanti upayena samadhipakkhiyadhammam vicineyya. Evam tattha visujjhatiti evam tasmim ariyamagge visujjhati. Atha va yoniso vicine dhammanti upayena pancakkhandhadhammam vicineyya. Evam tattha visujjhatiti evam tesu catusu saccesu visujjhati. Idani sariputtattherassa vannam kathento sariputtovatiadimaha. Tattha sariputtovati avadharanavacanam. Etehi pannadihi sariputtova seyyoti vadati. Upasamenati kilesaupasamena. Parangatoti nibbanam gato. Yo koci nibbanam patto bhikkhu, so etavaparamo siya, na therena uttaritaro nama atthiti vadati. Sesam sabbattha uttanamevati. Papancasudaniya majjhimanikayatthakathaya anathapindikovadasuttavannana nitthita. -------------------

The Pali Atthakatha in Roman Book 10 page 234-237. http://84000.org/tipitaka/atthapali/read_rm.php?B=10&A=5954&modeTY=2 อรรถกถาบาลีอักษรไทย :- http://84000.org/tipitaka/atthapali/read_th.php?B=10&A=5954&modeTY=2 อ่านอรรถกถาแปลไทย :- http://84000.org/tipitaka/attha/attha.php?b=14&i=720 เนื้อความพระไตรปิฎกฉบับหลวง :- http://84000.org/tipitaka/read/r.php?B=14&A=9311 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=14&A=9280 The Pali Tipitaka in Roman Character :- http://84000.org/tipitaka/read/roman_read.php?B=14&A=9280 Contents of The Tipitaka Volume 14 http://84000.org/tipitaka/read/?index_14