AtthaPali Vol.15

5. Paññattisuttavaṇṇanā [15] Pañcame aggapaññattiyoti uttamapaññattiyo. Attabhāvīnanti attabhāvavantānaṃ. Yadidaṃ rāhu asurindoti yo esa rāhu asurindo ayaṃ aggo nāma. ^3- Ettha rāhu kira asurindo cattāri yojanasahassāni aṭṭha ca yojanasatāni ucco, bāhantaramassa dvādasa yojanasatāni, hatthatalapādatalānaṃ puthulato ^4- tīṇi yojanasatāni. Aṅgulipabbāni paṇṇāsa yojanāni, bhamukantaramassa ^5- paṇṇāsayojanaṃ, nalāṭaṃ tiyojanasataṃ, sīsaṃ navayojanasataṃ. Kāmabhogīnaṃ yadidaṃ rājā mandhātāti yo esa rājā mandhātā nāma, ^6- ayaṃ dibbepi mānusakepi kāme paribhuñjanakānaṃ sattānaṃ aggo nāma. Esa hi asaṅkheyyāyukesu manussesu nibbattitvā icchiticchitakkhaṇe hiraññavassaṃ vassāpento mānusake kāme dīgharattaṃ paribhuñji. Devaloke pana yāva chattiṃsāya indānaṃ āyuppamāṇaṃ, tāva paṇīte kāme paribhuñjīti kāmabhogīnaṃ aggo nāma jāto. Ādhipateyyānanti adhipatiṭṭhānaṃ jeṭṭhakaṭṭhānaṃ kārentānaṃ. ^7- Tathāgato aggamakkhāyatīti lokiyalokuttarehi guṇehi tathāgato aggo seṭṭho uttamo akkhāyati. Iddhiyā yasasā jalanti dibbasampattisamiddhiyā ca parivārasaṅkhātena yasasā ca jalantānaṃ. Uddhaṃ tiriyaṃ apācīnanti upari ca majjhe ca heṭṭhā ca. Yāvatā jagato gatīti yattakā lokassa nipphatti. ^8- @Footnote: ¹ visuddhi. 1/226 asubhakammaṭṭhānaniddesa ² Ma. saṃvarādināmena pabhedanipphādakaṃ, @cha. gāthāya saṃvarādinipphādakaṃ ³ cha.Ma. aggoti ⁴ cha.Ma. puthulatā @⁵ cha.Ma. bhamukantaraṃ ⁶ Ma. eva ⁷ cha.Ma. karontānaṃ ⁸ cha.Ma. lokanipphatti

The Pali Atthakatha in Roman Book 15 page 293. http://84000.org/tipitaka/atthapali/read_rm.php?B=15&A=6777 อรรถกถาบาลีอักษรไทย :- http://84000.org/tipitaka/atthapali/read_th.php?B=15&A=6777 อ่านอรรถกถาแปลไทย :- http://84000.org/tipitaka/attha/attha.php?b=20&i=147 เนื้อความพระไตรปิฎกฉบับหลวง :- http://84000.org/tipitaka/read/r.php?B=20&A=644 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=20&A=628 The Pali Tipitaka in Roman Character :- http://84000.org/tipitaka/read/roman_read.php?B=20&A=628 Contents of The Tipitaka Volume 20 http://84000.org/tipitaka/read/?index_20