AtthaPali Vol.16

26. 6. Upasampadāvagga 1-3. Upasampādetabbasuttādivaṇṇanā [251-253] Chaṭṭhassa paṭhame upasampādetabbanti upajjhāyena hutvā upasampādetabbaṃ. Dutiye nissayo dātabboti ācariyena hutvā nissayo dātabbo. Tatiye sāmaṇero upaṭṭhāpetabboti upajjhāyena hutvā sāmaṇero gahetabbo. Iti imāni tīṇipi suttāni paṭhamabodhiyaṃ khīṇāsavavasena vuttāni. Catutthādīni anupadavaṇṇanāto uttānatthāneva. 1. Samutipeyyālādivaṇṇanā [272] Bhattuddesakādīnaṃ vinicchayakathā samantapāsādikāya vinayaṭṭhakathāya vuttanayeneva veditabbāti. Sammato na pesetabboti pakatiyā sammato "gaccha bhattāni uddisāhī"ti na pesetabbo. [273-285] Sāṭiyaggāhāpakoti vassikasāṭikāya gāhāpako. Pattaggāhāpakoti "yo ca tassā bhikkhuparisāya pattapariyanto, so ca tassa bhikkhuno padātabbo"ti ettha vuttapattaggāhāpako. [293-302] Ājīvakoti naggaparibbājako. Nigaṇṭhoti purimabhāgapaṭicchanno. Muṇḍasāvakoti nigaṇṭhasāvako. Jaṭilakoti tāpaso. Paribbājakoti channaparibbājako. Māgaṇḍikādayopi titthiyāeva. Etesaṃ pana sīlesu paripūrakāritāya abhāvena sukkapakkho na gahito. Sesamettha uttānamevāti. Manorathapūraṇiyā aṅguttaranikāyaṭṭhakathāya pañcakanipātavaṇṇanā niṭṭhitā. --------------------

The Pali Atthakatha in Roman Book 16 page 94. http://84000.org/tipitaka/atthapali/read_rm.php?B=16&A=2087 อรรถกถาบาลีอักษรไทย :- http://84000.org/tipitaka/atthapali/read_th.php?B=16&A=2087 อ่านอรรถกถาแปลไทย :- http://84000.org/tipitaka/attha/attha.php?b=22&i=251 เนื้อความพระไตรปิฎกฉบับหลวง :- http://84000.org/tipitaka/read/r.php?B=22&A=6404 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=22&A=6340 The Pali Tipitaka in Roman Character :- http://84000.org/tipitaka/read/roman_read.php?B=22&A=6340 Contents of The Tipitaka Volume 22 http://84000.org/tipitaka/read/?index_22