Atthakatha Book 27 : PALI ROMAN
Iti.A. (paramatthadī.)

                         5. Makkhasuttavaṇṇanā
       [5] Pañcame makkhanti paraguṇamakkhanaṃ. Yadipi hi so gūthaṃ gahetvā paraṃ
paharanto viya attano karaṃ paṭhamataraṃ makkhatiyeva. Tathāpi paresaṃ guṇamakkhanādhippāyena
pavattetabbatāya "paraguṇamakkhano"ti vuccati. Tathā hi so udakapuñchanamiva viya
nhātassa sarīragataṃ udakaṃ paresaṃ guṇe makkheti puñchati vināseti, parehi hi
katānaṃ mahantānampi kārānaṃ khepanato dhaṃsanato makkhoti vuccati. So
paraguṇamakkhaṇalakkhaṇo, tesaṃ vināsanaraso, tadavacchādanapaccupaṭṭhāno. Atthato pana
paresaṃ guṇamakkhanākārena pavatto domanassasahagatacitatuppādoti daṭṭhabbaṃ.
Pajahathāti tattha vuttappabhedaṃ dosaṃ ca vuttanayaṃ ādīnavaṃ pahāne cassa ānisaṃsaṃ
@Footnote: 1 Sī. pūtibhāvapadaṭaṭhānoti
Paccavekkhitvā pubbabhāge tadaṅgādivasena pajahantā vipassanaṃ ussukkāpetvā
tatiyamaggena anavasesaṃ samucchindathāti attho. Makkhāseti makkhitā makkhitaparaguṇā
paresaṃ guṇānaṃ makkhitāro, tato eva attanopi dhaṃsitaguṇāti attho. Sesaṃ
vuttanayameva.
                       Pañcamasuttavaṇṇanā niṭṭhitā.
                         --------------


             The Pali Atthakatha in Roman Book 27 page 55-56.
http://84000.org/tipitaka/atthapali/read_rm.php?B=27&A=1214
             อรรถกถาบาลีอักษรไทย :-
http://84000.org/tipitaka/atthapali/read_th.php?B=27&A=1214
             อ่านอรรถกถาแปลไทย :-
http://84000.org/tipitaka/attha/attha.php?b=25&i=183
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=25&A=4464
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=25&A=4766
             The Pali Tipitaka in Roman Character :-
http://84000.org/tipitaka/read/roman_read.php?B=25&A=4766
             Contents of The Tipitaka Volume 25
http://84000.org/tipitaka/read/?index_25