ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
first pageprevious pagedispage pageNumbernext pagelast page chage to ROMAN letter  
Atthakatha Book 27 : PALI ROMAN Iti.A. (paramatthadi.)

                        2. Desanasuttavannana
      [39] Dutiye pariyayenati ettha pariyayasaddo "madhupindikapariyayotveva
nam dharehi"tiadisu 1- desanayam agato. "atthi khvesa brahmana pariyayo,
yena mam pariyayena samma vadamano vadeyya akiriyavado samano gotamo"tiadisu 2-
karane. "kassa nu kho ananda ajja pariyayo bhikkhuniyo ovaditun"tiadisu 3-
vare. Idha pana varepi karanepi vattati, tasma bhikkhave tathagatassa
dve dhammadesana yatharaham karanena bhavanti varena vati ayamettha attho.
Bhagava hi veneyyajjhasayanurupam kadaci "ime dhamma kusala, ime akusala.
Ime savajja, ime anavajja. Ime sevitabba, ime na sevitabba"tiadina
kusalakusaladhamme vibhajanto kusaladhammehi akusaladhamme asankarato pannapento
"papam papakato passatha"ti dhammam deseti. Kadaci "panatipato bhikkhave
asevito bhavito bahulikato nirayasamvattaniko tiracchanayonisamvattaniko
pittivisayasamvattaniko, yo sabbalahuko panatipato, so appayukasamvattaniko"tiadina
4- adinavam pakasento papato nibbidadihi niyojento "nibbindatha
virajjatha"ti dhammam deseti.
      Bhavantiti honti pavattanti. Papam papakato passathati sabbam papadhammam
dittheva dhamme ayatinca ahitadukkhavahato lamakato passatha. Tattha nibbindathati
tasmim papadhamme "accantabhavato lamakatthena papam, akosallasambhutatthena
akusalam, pakatipabhassarassa pasannassa ca cittassa pabhassaradibhavavinasanato
sankilesikam, punappunam bhavadukkhanibbattanato ponobbhavikam, saheva darathehi
parilahehi samvattanato sadaratham, dukkhasseva vipaccanato dukkhavipakam, aparimanampi
@Footnote: 1 Ma.mu. 12/205/175     2 vi.mahavi. 1/5/3, an.atthaka. 23/101/175
@3 Ma.u. 14/398/344     4 an.atthaka. 23/130/251-2
Kalam anagate jatijaramarananibbattanato ayatim jatijaramaraniyam,
sabbahitasukhaviddhamsanasamatthan"tiadina nayena nanavidhe adinave, tassa ca pahane
anisamse sammapannaya passanta nibbindatha nibbedam apajjatha. Nibbindanta
ca vipassanam vaddhetva ariyamaggadhigamena papato virajjatha ceva vimuccatha ca.
Maggena va samucchedaviragavasena virajjatha, tato phalena patippassaddhivimuttivasena
vimuccatha. Atha va papanti lamakato papam. Kim vuttam hoti? yam aniccadukkhadibhavena
kucchitam ariyehi jigucchaniyam vattadukkham papetiti papam. Kim pana tam?
tebhumakadhammajatam. Yathavuttena atthena papakato disva tattha aniccato dukkhato
rogato gandato sallato aghato abadhatotiadina vipassanam vaddhenta 1-
nibbindatha. Ayampi dutiyati yathavato ahitanatthavibhavanam pathamam upadaya tato
vivecanam ayam dutiya dhammadesana.
      Gathasu buddhassati sabbannubuddhassa. Sabbabhutanukampinoti sabbepi
satte mahakarunaya anukampanasabhavassa. Pariyayavacananti pariyayena kathanam
desanam. Passati parisam alapati, parisajetthakam va sandhaya vuttam. Keci panahu
"attanameva sandhaya bhagava `passa'ti avoca"ti. Tatthati tasmim papake.
Virajjathati ragam pajahathati attho. Sesam vuttanayameva.
                       Dutiyasuttavannana nitthita.
                         --------------



             The Pali Atthakatha in Roman Book 27 page 174-175. http://84000.org/tipitaka/atthapali/read_rm.php?B=27&A=3835&modeTY=2              อรรถกถาบาลีอักษรไทย :- http://84000.org/tipitaka/atthapali/read_th.php?B=27&A=3835&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=25&i=217              เนื้อความพระไตรปิฎกฉบับหลวง :- http://84000.org/tipitaka/read/r.php?B=25&A=5141              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=25&A=5261              The Pali Tipitaka in Roman Character :- http://84000.org/tipitaka/read/roman_read.php?B=25&A=5261              Contents of The Tipitaka Volume 25 http://84000.org/tipitaka/read/?index_25

first pageprevious pagedispage pageNumbernext pagelast page chage to ROMAN letter

บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ DhammaPerfect@yahoo.com