AtthaPali Vol.3

{344} Chakanenāti gomayena. Paṇḍumattikāyāti tambamattikāya. Mūlarajanādīsu haliddaṃ ṭhapetvā sabbaṃ mūlarajanaṃ vaṭṭati. Mañjeṭṭhañca tuṅgahārañca ṭhapetvā sabbaṃ khandharajanaṃ vaṭṭati. Tuṅgahāro nāma eko kaṇṭakarukkho tassa haritālavaṇṇaṃ khandharajanaṃ hoti. Loddañca kaṇḍalañca ṭhapetvā sabbaṃ tacarajanaṃ vaṭṭati. Allipattañca nilipattañca ṭhapetvā sabbaṃ pattarajanaṃ vaṭṭati. Gihiparibhuttaṃ pana allipattena ekavāraṃ rajituṃ vaṭṭati. Kiṃsukapupphañca kusumbhapupphañca ṭhapetvā sabbaṃ puppharajanaṃ vaṭṭati. Phalarajane Pana na kiñci na vaṭṭati. Sītudakāti apakkarajaṃ vuccati. Uttarāḷuvanti vaṭṭādhārakaṃ. Rajanakumbhiyā majjhe ṭhapetvā taṃ ādhārakaṃ parikkhipitvā rajanaṃ pakkhipituṃ anujānāmīti attho. Evaṃ hi kate rajanaṃ na uttarati. Udake vā nakhapiṭṭhikāya vāti sace hi pakkaṃ hoti udakapāṭiyā dinno thevo sahasā na visarati nakhapiṭṭhiyaṃpi avisaranto tiṭṭhati. Rajanuluṅkanti rajanauluṅkaṃ. Daṇḍakathālikanti tameva sadaṇḍakaṃ. Rajanakolambanti rajanakuṇḍaṃ. Maddantīti omaddanti. Na ca acchinne theve pakkamitunti yāva rajanabindu galitaṃ na chijjati tāva aññatra na gantabbaṃ. Patthinnanti atirajitattā thaddhaṃ atibharitanti attho. Udake osādetunti udake pakkhipitvā ṭhapetuṃ. Rajane pana nikkhante taṃ udakaṃ chaḍḍetvā cīvaraṃ madditabbaṃ. Dantakasāvānīti ekaṃ vā dve vā vāre rajitvā dantavaṇṇāni dhārenti.

The Pali Atthakatha in Roman Book 3 page 235-236. http://84000.org/tipitaka/atthapali/read_rm.php?B=3&A=4846 อรรถกถาบาลีอักษรไทย :- http://84000.org/tipitaka/atthapali/read_th.php?B=3&A=4846 อ่านอรรถกถาแปลไทย :- http://84000.org/tipitaka/attha/attha.php?b=4&i=110 เนื้อความพระไตรปิฎกฉบับหลวง :- http://84000.org/tipitaka/read/r.php?B=4&A=3044 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=4&A=3208 The Pali Tipitaka in Roman Character :- http://84000.org/tipitaka/read/roman_read.php?B=4&A=3208 Contents of The Tipitaka Volume 4 http://84000.org/tipitaka/read/?index_4