Atthakatha Book 36 : PALI ROMAN
Jā.A.2 ekanipāt (2)

                    4. Jhānasodhanajātakaṃ
     ye saññinoti idaṃ satthā jetavane viharanto saṅkassanagaradvāre
attanā saṅkhittena pucchitapañhassa dhammasenāpatinā vitthārabyākaraṇaṃ
ārabbha kathesi. Tatridaṃ atītavatthuṃ.
     Atīte kira bārāṇasiyaṃ brahmadatte rajjaṃ kārente bodhisatto
araññāyatane kālaṃ karonto antevāsikehi pucchito nevasaññīnāsaññīti
āha .pe. Tāpasā jeṭṭhantevāsikassa kathaṃ na
Gaṇhiṃsu. Bodhisatto ābhassarato āgantvā ākāse ṭhatvā
imaṃ gāthamāha
              ye saññino tepi duggatā
              yepi asaññino tepi duggatā
              etaṃ ubhayaṃ vivajjaya
              taṃ samāpattisukhaṃ anaṅgaṇanti.
     Tattha ye saññinoti ṭhapetvā nevasaññānāsaññāyatanalābhino
avasese sacittakasatte dasseti. Tepi duggatāti tassā
samāpattiyā alābhato tepi duggatā nāma. Yepi asaññinoti
asaññibhave nibbatte acittakasatte dasseti. Tepi duggatāti tepi
imissāyeva samāpattiyā alābhato duggatāyeva nāma. Etaṃ ubhayaṃ
vivajjayāti etaṃ ubhayampi saññibhāvañca asaññibhāvañca vivajjaya
pajahāti antevāsikaṃ ovadati. Taṃ samāpattisukhaṃ anaṅgaṇanti taṃ
nevasaññānāsaññāyatanasamāpattilābhino santasantena sukhanti saṅkhaṃ
gataṃ jhānasukhaṃ anaṅgaṇaṃ niddosaṃ balavacittekaggatāsabhāvenapi taṃ
anaṅgaṇaṃ nāma jātaṃ.
     Evaṃ bodhisatto dhammaṃ desetvā antevāsikassa guṇaṃ kathetvā
brahmalokameva agamāsi. Tadā sesatāpasā jeṭṭhantevāsikassa
saddahiṃsu.
     Satthā imaṃ dhammadesanaṃ āharitvā jātakaṃ samodhānesi tadā
jeṭṭhantevāsiko sārīputto mahābrahmā pana ahamevāti.
                  Jhānasodhanajātakaṃ catutthaṃ.
                        -------


             The Pali Atthakatha in Roman Book 36 page 357-359.
http://84000.org/tipitaka/atthapali/read_rm.php?B=36&A=7112
             อรรถกถาบาลีอักษรไทย :-
http://84000.org/tipitaka/atthapali/read_th.php?B=36&A=7112
             อ่านอรรถกถาแปลไทย :-
http://84000.org/tipitaka/attha/attha.php?b=27&i=134
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=889
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=881
             The Pali Tipitaka in Roman Character :-
http://84000.org/tipitaka/read/roman_read.php?B=27&A=881
             Contents of The Tipitaka Volume 27
http://84000.org/tipitaka/read/?index_27