AtthaPali Vol.36

5. Candābhajātakaṃ candābhanti idaṃ satthā jetavane viharanto saṅkassanagaradvāre therasseva pañhassa byākaraṇaṃ ārabbha kathesi. Atīte bārāṇasiyaṃ brahmadatte rajjaṃ kārente bodhisatto araññāyatane kālaṃ karonto antevāsikena pucchito candābhaṃ suriyābhanti vatvā ābhassaresu nibbatto. Tāpasā jeṭṭhantevāsikassa na saddahiṃsu. Bodhisatto āgantvā ākāse ṭhito imaṃ gāthamāha candābhaṃ suriyābhañca yodha paññāya gādhati avitakkena jhānena hoti ābhassarūpagoti. Tattha candābhanti odātakasiṇaṃ dasseti. Suriyābhanti pītakasiṇaṃ. Yodha paññāya gādhatīti yo puggalo idha sattaloke idaṃ kasiṇadvayaṃ paññāya gādhati ārammaṇaṃ katvā anupavisati tattha vā patiṭṭhahati. Athavā. Candābhaṃ suriyābhañca yodha paññāya gādhatīti yattakaṃ ṭhānaṃ candābhā ca suriyābhā ca paṭṭhaṭā tattake ṭhāne paṭibhāgakasiṇaṃ vaḍḍhetvā taṃ ārammaṇaṃ katvā jhānaṃ nibbatteti ubhayampetaṃ ābhaṃ paññāya gādhati nāma. Tasmā Ayamettha atthoyeva. Avitakkena jhānena hoti ābhassarūpagoti so puggalo tathā katvā paṭiladdhena dutiyena jhānena ābhassarabrahmalokūpago hotīti. Evaṃ bodhisatto tāpase bodhetvā jeṭṭhantevāsikassa guṇaṃ kathetvā brahmalokameva gato. Satthā imaṃ dhammadesanaṃ āharitvā jātakaṃ samodhānesi tadā jeṭṭhantevāsiko sārīputto mahābrahmā pana ahamevāti. Candābhajātakaṃ pañcamaṃ. --------

The Pali Atthakatha in Roman Book 36 page 359-360. http://84000.org/tipitaka/atthapali/read_rm.php?B=36&A=7142 อรรถกถาบาลีอักษรไทย :- http://84000.org/tipitaka/atthapali/read_th.php?B=36&A=7142 อ่านอรรถกถาแปลไทย :- http://84000.org/tipitaka/attha/attha.php?b=27&i=135 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=896 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=889 The Pali Tipitaka in Roman Character :- http://84000.org/tipitaka/read/roman_read.php?B=27&A=889 Contents of The Tipitaka Volume 27 http://84000.org/tipitaka/read/?index_27