AtthaPali Vol.50

550/138. 8. Lomasakaṅgiyattherāpadānavaṇṇanā ^1- aṭṭhamāpadāne imamhi bhaddake kappetiādikaṃ ^2- āyasmato lomasakaṅgiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto kassapassa bhagavato kāle brāhmaṇakule nibbatto saddho pasanno ahosi. Aparo candano nāma tassa sahāyo cāsi. Te dvepi satthu santike dhammaṃ sutvā pasannamānasā pabbajitvā yāvajīvaṃ sīlaṃ rakkhitvā suparisuddhasīlā tato cutā devaloke nibbattitvā ekaṃ buddhantaraṃ dibbasukhaṃ anubhaviṃsu. Tesu ayaṃ imasmiṃ buddhuppāde sākiyakule nibbattitvā aparo candano devaputto hutvā tāvatiṃsabhavane nibbatti. Atha so sakyakulappasādakena kāḷudāyinā ārādhitena bhagavatā sakyarājūnaṃ mānamaddanāya kataṃ vessantaradhamma- desanāyaṃ ^3- pokkharavassaiddhipāṭihāriyaṃ disvā pasannamānaso pabbajitvā majjhimanikāye vuttaṃ bhaddekarattasuttantadesanaṃ ^4- sutvā araññavāsaṃ vasanto bhaddekarattasuttantadesanānusāsanaṃ saritvā tadanusārena ñāṇaṃ pesetvā kammaṭṭhānaṃ manasi karitvā arahattaṃ pāpuṇi. [225] Arahattaṃ patvā attano pubbakammaṃ saritvā sañjātasomanasso pubbacaritāpadānaṃ pakāsento imamhi bhaddake kappetiādimāha. Tattha kappo @Footnote: ¹ pāḷi. lomasatiYu.... ² i. imamhi bhaddakappamhi. @³ khu.jā. 28/1655-2440/308-385. ⁴ Ma.u. 14/279-88/248-261. Tāva catubbidho:- sārakappo varakappo maṇḍakappo bhaddakappoti. Tesu yasmiṃ kappe eko buddho uppajjanti, ayaṃ sārakappo nāma. Yasmiṃ dve vā tayo vā buddhā uppajjanti, ayaṃ varakappo nāma. Yasmiṃ cattāro buddhā uppajjanti, ayaṃ maṇḍakappo nāma. Yasmiṃ pañca buddhā uppajjanti, ayaṃ bhaddakappo nāma. Aññattha pana:- "sārakappo maṇḍakappo sāramaṇḍakappo tathā varakappo bhaddakappo kappā pañcavidhā siyuṃ. Eko dve tayo cattāro pañca buddhā yathākkamaṃ etesu pañcakappesu uppajjanti vināyakā"ti evaṃ pañca kappā vuttā. Tesu ayaṃ kappo "kakusandho koṇāgamano kassapo gotamo metteyyo"ti pañcabuddhapaṭimaṇḍitattā bhaddakappo nāma jāto. Tasmā imasmiṃ bhaddakappamhi kassapo nāyako uppajjīti sambandho. Sesaṃ uttānatthamevāti. Lomasakaṅgiyattherāpadānavaṇṇanā niṭṭhitā. ------------

The Pali Atthakatha in Roman Book 50 page 329-330. http://84000.org/tipitaka/atthapali/read_rm.php?B=50&A=7073 อรรถกถาบาลีอักษรไทย :- http://84000.org/tipitaka/atthapali/read_th.php?B=50&A=7073 อ่านอรรถกถาแปลไทย :- http://84000.org/tipitaka/attha/attha.php?b=32&i=138 เนื้อความพระไตรปิฎกฉบับหลวง :- http://84000.org/tipitaka/read/r.php?B=32&A=4009 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=32&A=4884 The Pali Tipitaka in Roman Character :- http://84000.org/tipitaka/read/roman_read.php?B=32&A=4884 Contents of The Tipitaka Volume 32 http://84000.org/tipitaka/read/?index_32