Atthakatha Book 54 : PALI ROMAN
Vibhaṅga.A. (sammoha.)

                        3. Pañhāpucchakavaṇṇanā
     [150] Idāni pañhāpucchakaṃ hoti.  tattha pañhāpucchane "pañcannaṃ
khandhānaṃ kati kusalā kati akasulā kati abyākatā"tiādinā nayena yaṃ labbhati,
yañca na labbhati, taṃ sabbaṃ pucchitvā vissajjane "rūpakkhandho abyākato"tiādinā
nayena yaṃ labbhati, tadeva uddhaṭanti veditabbaṃ. Yattha yattha ca "eko
khandho"ti vā "dve khandhā"ti vā paricchedaṃ akatvā "siyā uppannā siyā
@Footnote: 1 cha.Ma. dukesu ca
Anuppannā"tiādinā nayena tanti ṭhapitā, tattha tattha pañcannampi khandhānaṃ
gahaṇaṃ veditabbaṃ. Seso tesaṃ tesaṃ khandhānaṃ kusalādivibhāgo heṭṭhā
dhammasaṅgahaṭṭhakathāya 1- vuttoyeva.
     Ārammaṇattikesu pana cattāro khandhā pañcapaṇṇāsa kāmāvacaradhamme
ārabbha rajjantassa dussantassa muyhantassa saṃvarantassa sammasantassa
paccavekkhantassa ca parittārammaṇā honti, sattavīsati rūpārūpāvacaradhamme ārabbha
rajjantassa dussantassa muyhantassa saṃvarantassa pariggahaṃ paṭṭhapentassa
mahaggatārammaṇā, maggaphalanibbānāni paccavekkhantassa appamāṇārammaṇā, paññattiṃ
paccavekkhaṇakāle navattabbārammaṇāti.
     Teyeva sekhāsekhānaṃ maggapaccavekkhaṇakāle maggārammaṇā honti, maggakāle
sahajātahetunā maggahetukā, magga garuṃ katvā paccavekkhaṇakāle ārammaṇādhipatinā
maggādhipatino, viriyajeṭṭhakaṃ vā vīmaṃsajeṭṭhakaṃ vā maggaṃ bhāventassa
sahajātādhipatinā maggādhipatino. Chandajeṭṭhakaṃ pana cittajeṭṭhakaṃ vā bhāventassa
navattabbārammaṇā nāma honti.
     Atītāni pana khandhadhātuāyatanāni ārabbha rajjantassa dussantassa
muyhantassa saṃvarantassa pariggahaṃ paṭṭhapentassa atītārammaṇā honti, anāgatāni
ārabbha anāgatārammaṇā honti, paccuppannāni ārabbha paccuppannārammaṇā
honti. Paññattiṃ vā nibbānaṃ vā paccavekkhantassa navattabbārammaṇā
honti.
     Tathā attano khandhadhātuāyatanāni ārabbha rajjantassa dussantassa
muyhantassa saṃvarantassa pariggahaṃ paṭṭhapentassa ajjhattārammaṇā honti,
paresaṃ khandhadhātuāyatanāni ārabbha evaṃ pavattentassa bahiddhārammaṇā,
@Footnote: 1 saṅgaṇī. A. 1/985/403
Paṇṇattinibbānapaccavekkhaṇakālepi bahiddhārammaṇāyeva, kālena ajjhattaṃ kālena
bahiddhā dhammesu evaṃ pavattentassa ajjhattabahiddhārammaṇā. Ākiñcaññāyatanakāle
navattabbārammaṇāti veditabbā.
     Iti bhagavā imaṃ khandhavibhaṅgaṃ suttantabhājanīyādivasena tayo parivaṭṭe
nīharitvā bhājento dassesi. Tīsupi hi parivaṭṭesu ekoeva 1- paricchedo.
Rūpakkhandho hi sabbattha kāmāvacaroyeva, cattāro khandhā catubhūmikā
lokiyalokuttaramissakā kathitāti.
                  Pañhāpucchakavaṇṇanā   niṭṭhitā.
                  Sammohavinodaniyā    vibhaṅgaṭṭhakathāya
                  khandhavibhaṅgavaṇṇanā    niṭṭhitā.
                        -----------------
@Footnote: 1 cha.Ma. ekova


             The Pali Atthakatha in Roman Book 54 page 47-49.
http://84000.org/tipitaka/atthapali/read_rm.php?B=54&A=1092
             อรรถกถาบาลีอักษรไทย :-
http://84000.org/tipitaka/atthapali/read_th.php?B=54&A=1092
             อ่านอรรถกถาแปลไทย :-
http://84000.org/tipitaka/attha/attha.php?b=35&i=84
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=35&A=1499
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=35&A=1444
             The Pali Tipitaka in Roman Character :-
http://84000.org/tipitaka/read/roman_read.php?B=35&A=1444
             Contents of The Tipitaka Volume 35
http://84000.org/tipitaka/read/?index_35