Atthakatha Book 55 : PALI ROMAN
Pañca.A. (paramatthadī.)

                      18. Maggapaccayaniddesavaṇṇanā
     [18] Maggapaccayaniddese maggaṅgānīti ahetukacittuppādavajjesu sesacittesu
uppannāni paññā vitakko sammāvācākammantājīvā viriyaṃ sati samādhi micchādiṭṭhi
1- micchāsaṅkappo micchāvāyāmo micchāsamādhīti 1- imāni dvādasaṅgāni. Maggassa
pana hetupacchimakattā ahetukacittesu maggaṅgāni na uddhaṭāni. Taṃsamuṭṭhānānanti
idhāpi kaṭattārūpaṃ saṅgahitameva. Vuttañhetaṃ pañhāvāre "paṭisandhikkhaṇe
vipākābyākatāni maggaṅgāni sampayuttakānaṃ khandhānaṃ kaṭattā ca rūpānaṃ
maggapaccayena paccayo"ti. Ayaṃ tāvettha pālivaṇṇanā.
     Ayaṃ pana maggapaccayo dvādasannaṃ maggaṅgānaṃ vasena ṭhitopi jātibhedato
kusalādivasena catudhā, kusalādīnañca kāmāvacarādibhūmibhedato dvādasadhā bhijjatīti
evamettha nānappakārabhedato viññātabbo vinicchayo. Evaṃ bhinne panettha
catubhūmikampi kusalamaggaṅgaṃ pañcavokāre sampayuttadhammānañceva cittasamuṭṭhānarūpassa
ca, ṭhapetvā rūpāvacaraṃ avasesaṃ arūpe sampayuttadhammānaññeva maggapaccayena
paccayoti sabbaṃ jhānapaccaye viya vitthāritanti 2- evamettha paccayuppannatopi
viññātabbo vinicchayoti.
                    Maggapaccayaniddesavaṇṇanā niṭṭhitā.
                         --------------
@Footnote: 1-1 cha.Ma. micchāvācākammantājīvāti    2 cha.Ma. vitthāretabbanti


             The Pali Atthakatha in Roman Book 55 page 436.
http://84000.org/tipitaka/atthapali/read_rm.php?B=55&A=9849
             อรรถกถาบาลีอักษรไทย :-
http://84000.org/tipitaka/atthapali/read_th.php?B=55&A=9849
             อ่านอรรถกถาแปลไทย :-
http://84000.org/tipitaka/attha/attha.php?b=36&i=524
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=36&A=2468
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=36&A=2617
             The Pali Tipitaka in Roman Character :-
http://84000.org/tipitaka/read/roman_read.php?B=36&A=2617
             Contents of The Tipitaka Volume 36
http://84000.org/tipitaka/read/?index_36