บาลีอรรถกถาเล่มที่ ๓๒

หน้าที่ ๑๐๗.

อฏฺฐิสญฺญายาติ อฏฺฐิกภาวนาย. อผรีติ "อฏฺฐี"ติ อธิมุจฺจนวเสน ปตฺถริ. ปฐวินฺติ อตฺตภาวปฐวึ. อตฺตภาโว หิ อิธ "ปฐวี"ติ วุตฺโต "โก อิมํ ปฐวึ วิเชสฺสตี"ติ- ^๑- อาทีสุ วิย. มญฺเญหนฺติ มญฺเญ อหํ. "มญฺญาหนฺ"ติปิ ปาโฐ. โสติ โส ภิกฺขุ. ขิปฺปเมว น จริสฺเสว กามราคํ ปหิสฺสติ ปชหิสฺสตีติ มญฺเญ. กสฺมา? อฏฺฐิกสญฺญาย กามราคสฺส อุชุปฏิปกฺขภาวโต. อิทํ วุตฺตํ โหติ:- โย เอกสฺมึ ปเทเส ลทฺธาย อฏฺฐิกสญฺญาย สกลํ อตฺตโน สพฺเพสํ วา อตฺตภาวํ "อฏฺฐี"เตฺวว ผริตฺวา ฐิโต, โส ภิกฺขุ ตํ อฏฺฐิกฌานํ ปาทกํ กตฺวา วิปสฺสนฺโต น จิเรเนว อนาคามิมคฺเคน กามราคํ, สพฺพํ วา กามนฏฺเฐน "กาโม ", รญฺชนฏฺเฐน "ราโค"ติ จ ลทฺธนามํ ตณฺหํ อคฺคมคฺเคน ปชหิสฺสตีติ. อิมํ คาถํ สุตฺวา โส เถโร "อยํ เทวตา มยฺหํ อุสฺสาหชนนตฺถํ เอวมาหา"ติ อปฺปฏิวานวิริยํ อธิฏฺฐาย วิปสฺสนํ วฑฺเฒตฺวา อรหตฺตํ ปาปุณิ. เตน วุตฺตํ อปทาเน ๒-:- "สตรํสี นาม ภควา สยมฺภู อปราชิโต วิเวกา อุฏฺฐหิตฺวาน ^๓- โคจรายาภินิกฺขมิ. ผลหตฺโถ อหํ ทิสฺวา ^๔- อุปคจฺฉึ นราสภํ ปสนฺนจิตฺโต สุมโน ตาลผลมทาสหํ. จตุนฺนวุติโต กปฺเป ยํ ผลํ อททึ ตทา ทุคฺคตึ นาภิชานามิ ผลทานสฺสิทํ ผลํ. กิเลสา ฌาปิตา มยฺหํ ฯเปฯ กตํ พุทฺธสฺส สาสนนฺ"ติ. อรหตฺตํ ปน ปตฺวา ตาย เทวตาย วุตฺตวจนํ ปติมาเนนฺโต ตเมว คาถํ อุทานวเสน อภาสิ. ตเทวสฺส เถรสฺส อญฺญาพฺยากรณํ อโหสีติ. สิงฺคาลปิตาเถรคาถาวณฺณนา นิฏฺฐิตา. @เชิงอรรถ: ^๑ ฉ.ม. วิจฺเจสฺสติ, ขุ.ธมฺม. ๒๕/๔๔/๒๔ ปญฺจสตภิกฺขุวตฺถุ ^๒ ขุ.อป. ๓๓/๙๙/๑๔๙ @ ตาลผลิยตฺเถราปทาน (สฺยา) ^๓ ปาลิ. วุฏฺฐหิตฺวาน ^๔ สี. ผลหตฺโถ ตํ ทิสฺวาน

อรรถกถาภาษาบาลีอักษรไทย เล่มที่ ๓๒ หน้า ๑๐๗. http://84000.org/tipitaka/atthapali/read_th.php?B=32&A=2426&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=32&A=2426&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=26&i=155 เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=5084 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=5381 The Pali Tipitaka in Roman Character :- http://84000.org/tipitaka/read/roman_read.php?B=26&A=5381 สารบัญพระไตรปิฎกเล่มที่ ๒๖ http://84000.org/tipitaka/read/?index_26