อรรถกถาเล่มที่ ๒ ภาษาบาลีอักษรไทย
 วินย.อ. (สมนฺต.๒)

     {๖๕๗} เตน สมเยนาติ ปริณตสิกฺขาปทํ ฯ ตตฺถ ปูคสฺสาติ
สมูหสฺส ฯ ธมฺมคณสฺสาติ อตฺโถ ฯ ปฏิยตฺตนฺติ ปฏิยาทิตํ ฯ
พหู สงฺฆสฺส ภตฺตาติ สงฺฆสฺส พหูนิ ภตฺตานิ อเนกานิ ลาภมุขานิ น
สงฺฆสฺส เกนจิ ปริหานีติ ทีเปนฺติ ฯ โอโณเชถาติ เทถ ฯ กึ
ปเนวํ วตฺตุํ วฏฺฏติ ฯ กสฺมา น วฏฺฏตีติ ฯ อยํ หิ อภิหฏภิกฺขา
อภิหริตฺวา เอกสฺมึ โอกาเส สงฺฆสฺสตฺถาย ปฏิยตฺตา ฯ
อภิหฏปฏิยตฺเต จ อุทฺทิสฺส ปิตภาเค จ ปยุตฺตวาจา นาม นตฺถิ ฯ
     {๖๕๘} สงฺฆิกนฺติ สงฺฆสฺส สนฺตกํ ฯ โส หิ สงฺฆสฺส ปริณตตฺตา หตฺถํ
อนารุฬฺโหปิ เอเกน ปริยาเยน สงฺฆสฺส สนฺตโก โหติ ฯ ปทภาชเน
ปน สงฺฆิกํ นาม สงฺฆสฺส ทินฺนํ โหติ ปริจฺจตฺตนฺติ เอวํ อตฺถุทฺธารวเสน
นิปฺปริยายโตว สงฺฆิกํ ทสฺสิตํ ฯ ลาภนฺติ ลภิตพฺพวตฺถุํ
อาห ฯ เตเนวสฺส นิทฺเทเส จีวรํปีติ อาทิ วุตฺตํ ฯ ปริณตนฺติ
สงฺฆสฺส ทินฺนํ สงฺฆสฺส โปณํ สงฺฆสฺส ปพฺภารํ หุตฺวา ิตํ ฯ เยน
ปน การเณน โส ปริณโต โหติ ตํ ทสฺเสตุํ ทสฺสาม กริสฺสามาติ
วาจา ภินฺนา โหตีติ ปทภาชนํ วุตฺตํ ฯ {๖๕๙} ปโยเค ทุกฺกฏนฺติ
ปริณตลาภสฺส อตฺตโน ปริณามิตปฺปโยเค ทุกฺกฏํ ฯ ปฏิลาเภน
ตสฺมึ หตฺถํ อารุฬฺเห นิสฺสคฺคิยํ ฯ สเจ ปน สงฺฆสฺส ทินฺนํ โหติ
ตํ คเหตุํ น วฏฺฏติ สงฺฆสฺเสว ทาตพฺพํ ฯ โย หิ อารามิเกหิ
สทฺธึ เอกโต ขาทติ ตํ ภณฺฑํ อคฺฆาเปตฺวา กาเรตพฺโพ ฯ
ปริณตํ ปน สหธมฺมิกานํ วา คิหีนํ วา อนฺตมโส มาตุสนฺตกํปิ
อิทํ มยฺหํ เทหีติ สงฺฆสฺส ปริณตภาวํ ตฺวา อตฺตโน ปริณาเมตฺวา
คณฺหนฺตสฺส นิสฺสคฺคิยํ ปาจิตฺตยํ ฯ อิมสฺส ภิกฺขุโน เทหีติ เอวํ
อญฺสฺส ปริณาเมนฺตสฺส สุทฺธิกปาจิตฺติยํ ฯ เอกํ ปตฺตํ วา จีวรํ
วา อตฺตโน เอกํ อญฺสฺส ปริณาเมติ นิสฺสคฺคิยํ ปาจิตฺติยญฺเจว
สุทฺธิกปาจิตฺติยญฺจ ฯ เอเสว นโย พหูสุ ฯ วุตฺตมฺปิ เจตํ
          นิสฺสคฺคิเยน อาปตฺตึ    ขุทฺทเก ปาจิตฺติยํ
          อาปชฺเชยฺย เอกโต    ปญฺหาเมสา กุสเลหิ จินฺติตาติ ๑- ฯ
     อยํ หิ ปริณามนํ สนฺธาย วุตฺตา ฯ โยปิ วสฺสิกสาฏิกสมเย
มาตุฆเรปิ สงฺฆสฺส ปริณตํ วสฺสิกสาฏิกํ ตฺวา อตฺตโน
ปริณาเมติ นิสฺสคฺคิยํ ปรสฺส ปริณาเมติ สุทฺธิกปาจิตฺติยํ ฯ
มนุสฺสา สงฺฆภตฺตํ กริสฺสามาติ สปฺปิเตลาทีนิ อาหรนฺติ ฯ
คิลาโน เจปิ ภิกฺขุ สงฺฆสฺส ปริณตภาวํ ตฺวา กิญฺจิ ยาจติ
นิสฺสคฺคิยํ ปาจิตฺติยเมว ฯ สเจ ปน โส ตุมฺหากํ สปฺปิอาทีนิ
อาภฏานิ อตฺถีติ ปุจฺฉิตฺวา อาม อตฺถีติ วุตฺเต มยฺหํปิ เทถาติ
วทติ วฏฺฏติ ฯ อถาปิ นํ กุกฺกุจฺจายนฺติ อุปาสกา วทนฺติ
@เชิงอรรถ: ๑. วิ. ปริวาร. ๘/๕๓๑.
สงฺโฆปิ อมฺเหหิ ทินฺนเมว ลภติ คณฺหถ ภนฺเตติ เอวํปิ วฏฺฏติ ฯ
     {๖๖๐} สงฺฆสฺส ปริณตํ อญฺสงฺฆสฺสาติ เอกสฺมึ วิหาเร สงฺฆสฺส ปริณตํ
อญฺ วิหารํ อุทฺทิสิตฺวา อมุกสฺมึ นาม วิหาเร สงฺฆสฺส เทถาติ
ปริณาเมติ ฯ เจติยสฺส วาติ กึ สงฺฆสฺส ทินฺเนน เจติยสฺส
ปูชํ กโรถาติ เอวํ เจติยสฺส วา ปริณาเมติ ฯ เจติยสฺส ปริณตนฺติ
เอตฺถ นิยเมตฺวา อญฺเจติยสฺส อตฺถาย โรปิตมาลาวจฺฉโต
อญฺเจติยมฺหิ ปุปฺผํปิ อาโรเปตุํ น วฏฺฏติ ฯ เอกสฺส เจติยสฺส
ปน ฉตฺตํ วา ปฏากํ วา อาโรเปตฺวา ิตํ ทิสฺวา เสสกํ
อญฺเจติยสฺส ทาเปตุํ วฏฺฏติ ฯ ปุคฺคลสฺส ปริณตนฺติ อนฺตมโส
สุนขสฺสาปิ ปริณตํ อิมสฺส สุนขสฺส มา เทหิ เอตสฺส เทหีติ
เอวํ อญฺปุคฺคลสฺส ปริณาเมติ ทุกฺกฏํ ฯ สเจ ปน ทายกา
มยํ สงฺฆสฺส ภตฺตํ ทาตุกามา เจติยปูชํ กาตุกามา เอกสฺส ภิกฺขุโน
ปริกฺขารํ ทาตุกามา ตุมฺหากํ รุจิยา ทสฺสาม ภณถ กตฺถ เทมาติ
วทนฺติ เอวํ วุตฺเต เตน ภิกฺขุนา ยตฺถ อิจฺฉถ ตตฺถ เทถาติ
วตฺตพฺพา ฯ สเจ ปน เกวลํ กตฺถ เทมาติ ปุจฺฉนฺติ ปาลิยํ
อาคตนเยเนว วตฺตพฺพํ ฯ เสสเมตฺถ อุตฺตานเมว ฯ ติสมุฏฺานํ
กายจิตฺตโต วาจาจิตฺตโต กายวาจาจิตฺตโต จ สมุฏฺาติ กิริยา
สญฺาวิโมกฺขํ สจิตฺตกํ โลกวชฺชํ กายกมฺมํ วจีกมฺมํ อกุสลจิตฺตํ
ติเวทนนฺติ ฯ
     สมนฺตปาสาทิกาย วินยสํวณฺณนาย ปริณตสิกฺขาปทวณฺณนา
นิฏฺิตา ฯ
                     ตึสกกณฺฑํ นิฏฺิตํ ฯ

             อรรถกถาภาษาบาลีอักษรไทย เล่มที่ ๒ หน้า ๒๘๐-๒๘๒.
http://84000.org/tipitaka/atthapali/read_th.php?B=2&A=5897&modeTY=1
             The Pali Atthakatha in Roman :-
http://84000.org/tipitaka/atthapali/read_rm.php?B=2&A=5897&modeTY=1
             อ่านอรรถกถาแปลไทย :-
http://84000.org/tipitaka/attha/attha.php?b=2&i=169
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=2&A=4428
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=2&A=2634
             The Pali Tipitaka in Roman Character :-
http://84000.org/tipitaka/read/roman_read.php?B=2&A=2634
             สารบัญพระไตรปิฎกเล่มที่ ๑
http://84000.org/tipitaka/read/?index_2