ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๑๐ ภาษาบาลีอักษรไทย ม.อ. (ปปญฺจ.๔)

                         ๖. ฉฉกฺกสุตฺตวณฺณนา
     [๔๒๐] เอวมฺเม สุตนฺติ ฉฉกฺกสุตฺตํ. ตตฺถ อาทิกลฺยาณนฺติ อาทิมฺหิ
กลฺยาณํ ภทฺทกํ นิทฺโทสํ กตฺวา เทเสสฺสามิ. มชฺฌปริโยสาเนสุปิ เอเสว นโย.
อิติ ภควา อริยวํสํ นวหิ, มหาสติปฏฺฐานํ สตฺตหิ, มหาอสฺสปุรํ สตฺตหิ ปเทหิ
โถเมสิ, อิมํ ปน สุตฺตํ นวหิ ปเทหิ โถเมสิ.
     เวทิตพฺพานีติ สห วิปสฺสนามคฺเคน ชานิตพฺพานิ. มนายตเนน
เตภูมกจิตฺตเมว กถิตํ, ธมฺมายตเนน พหิทฺธา เตภูมกธมฺมา จ, มโนวิญฺญาเณเนว
ฐเปตฺวา ทฺวิปญฺจวิญฺญาณานิ เสสํ พาวีสติวิธํ โลกิยวิปากจิตฺตํ. ผสฺสเวทนา
ยถาวุตฺตวิปากวิญฺญาณสมฺปยุตฺตาว. ตณฺหาติ วิปากเวทนาปจฺจยา ชวนกฺขเณ
อุปฺปนฺนตณฺหา.
     [๔๒๒] จกฺขุ อตฺตาติ ปาฏิเยกฺโก อนุสนฺธิ. เหฏฺฐา กถิตานํ หิ ทฺวินฺนํ
สจฺจานํ อนตฺตภาวทสฺสนตฺถํ อยํ เทสนา อารทฺธา. ตตฺต น อุปปชฺชตีติ น
ยุชฺชติ. เวตีติ วิคจฺฉติ นิรุชฺฌติ.
@เชิงอรรถ:  ม.ม. ๑๓/๖๙/๔๖   ม.ม. ๑๓/๒๐๖/๑๘๒    ม. (อาสิวิสูปมสุตฺเตสุ)
@ ม.ม. ๑๓/๓๙๕/๓๗๘

--------------------------------------------------------------------------------------------- หน้าที่ ๒๕๑.

[๔๒๔] อยํ โข ปน ภิกฺขเวติ อยมฺปิ ปาฏิเยกฺโก อนุสนฺธิ. อยํ หิ เทสนา ติณฺณํ คาหานํ วเสน วฏฺฏํ ทสฺเสตุํ อารทฺธา. ทุกฺขํ สมุทโยติ ทฺวินฺนํ สจฺจานํ วเสน วฏฺฏํ ทสฺเสตุนฺติปิ วทนฺติเยว. เอตํ มมาติอาทีสุ ตณฺหามานทิฏฺฐิคาหาว เวทิตพฺพา. สมนุปสฺสตีติ คาหตฺตยวเสน ปสฺสติ. เอวํ วฏฺฏํ ทสฺเสตฺวา อิทานิ ติณฺณํ คาหานํ ปฏิปกฺขวเสน, นิโรโธ มคฺโคติ อิเมสํ วา ทฺวินฺนํ สจฺจานํ วเสน วิวฏฺฏํ ทสฺเสตุํ อยํ โข ปนาติอาทิมาห. เนตํ มมาติอาทีนิ ตณฺหาทีนํ ปฏิเสธวจนานิ. สมนุปสฺสตีติ อนิจฺจํ ทุกฺขํ อนตฺตาติ ปสฺสติ. [๔๒๕] เอวํ วิวฏฺฏํ ทสฺเสตฺวา อิทานิ ติณฺณํ อนุสยานํ วเสน ปุน วฏฺฏํ ทสฺเสตุํ จกฺขุญฺจ ภิกฺขเวติอาทิมาห. ตตฺถ อภินนฺทตีติอาทีนิ ตณฺหาทิฏฺฐิวเสเนว วุตฺตานิ. อนุเสตีติ อปฺปหีโน โหติ. ทุกฺขสฺสาติ วฏฺฏทุกฺขกิเลสทุกฺขสฺส. [๔๒๖] เอวํ ติณฺณํ อนุสยานํ วเสน วฏฺฏํ กเถตฺวา อิทานิ เตสํ ปฏิกฺเขปวเสน วิวฏฺฏํ ทสฺเสนฺโต ปุน จกฺขุญฺจาติอาทิมาห. อวิชฺชํ ปหายาติ วฏฺฏมูลิกํ อวิชฺชํ ปชหิตฺวา วิชฺชนฺติ อรหตฺตมคฺควิชฺชํ อุปฺปาเทตฺวา. [๔๒๗] ฐานเมตํ วิชฺชตีติ เอตฺตเกเนว กถามคฺเคน วฏฺฏวิวฏฺฏวเสน เทสนํ มตฺถกํ ปาเปตฺวา ปุน ตเทว สมฺปิณฺเทตฺวา ทสฺเสนฺโต เอวํ ปสฺสํ ภิกฺขเวติอาทิมาห. สฏฺฐิมตฺตานํ ภิกฺขูนนฺติ เอตฺถ อนจฺฉริยเมตํ, ยํ สยเมว ตถาคเต เทเสนฺเต สฏฺฐิ ภิกฺขู อรหตฺตํ ปตฺตา. อิมํ หิ สุตฺตํ ธมฺมเสนาปติมฺหิ กเถนฺเตปิ สฏฺฐิ ภิกฺขู อรหตฺตํ ปตฺตา, มหาโมคฺคลฺลาเน กเถนฺเตปิ, อสีติมหาเถเรสุ กเถนฺเตสุปิ ปตฺตา เอว. เอตมฺปิ อนจฺฉริยํ. มหาภิญฺญปฺปตฺตา หิ เต สาวกา. อปรภาเค ปน ตามฺพปณฺณิทีเป มาเลยฺยเทวตฺเถโร ๑- นาม เหฏฺฐา โลหปาสาเท อิมํ สุตฺตํ กเถสิ. ตทาปิ สฏฺฐิ ภิกฺขู อรหตฺตํ ปตฺตา. ยถา จ โลหปาสาเท เอวํ เถโร มหามณฺฑเปปิ อิมํ สุตฺตํ กเถสิ. มหาวิหารา นิกฺขมิตฺวา ปน เจติยปพฺพตํ คโต, ตตฺถาปิ กเถสิ. ตโต สากิยวงฺกวิหาเร, ๒- กูฏาลิวิหาเร, @เชิงอรรถ: สี. มลิยเทวตฺเถโร ม. สากิยจงฺกวิหาเร, ฉ. สากิยวํสวิหาเร

--------------------------------------------------------------------------------------------- หน้าที่ ๒๕๒.

อนฺตรโสพฺเภ, มุตฺตงฺคเณ, ๑- ปาตกปพฺพเต, ๒- ปาจินฆรเก, ทีฆวาปิยํ, โลกนฺทเร, โนมณฺฑลตเล ๓- กเถสิ. เตสุปิ ฐาเนสุ สฏฺฐิ สฏฺฐิ ภิกฺขู อรหตฺตํ ปตฺตา. ตโต นิกฺขมิตฺวา ปน เถโร จิตฺตลปพฺพตํ คโต. ตทา จ จิตฺตลปพฺพตวิหาเร อติเรกสฏฺฐิวสฺโส มหาเถโร, โปกฺขรณิยํ กุรุวกติตฺถํ นาม ปฏิจฺฉนฺนฏฺฐานํ อตฺถิ, ตตฺถ เถโร นฺหายิสฺสามีติ โอติณฺโณ. เทวตฺเถโร ตสฺส สนฺติกํ คนฺตฺวา นฺหาเปมิ ภนฺเตติ อาห. เถโร ปฏิสนฺถาเรเนว "มาเลยฺยเทโว นาม อตฺถีติ วทนฺติ, โส อยํ ภวิสฺสตี"ติ ญตฺวา ตฺวํ เทโวติ อาห. อาม ภนฺเตติ. สฏฺฐิวสฺสสทฺธานํ เม อาวุโส โกจิ สรีรํ หตฺเถน ผุสิตุํ นาม น ลภติ, ตฺวํ ปน นฺหาเปหีติ อุตฺตริตฺวา ตีเร นิสีทิ. เถโร สพฺพมฺปิ หตฺถปาทาทิปริกมฺมํ กตฺวา มหาเถรํ นฺหาเปสิ. ตํทิวสญฺจ ธมฺมสฺสวนทิวโส โหติ. อถ มหาเถโร "เทว อมฺหากํ ธมฺมทานํ ทาตุํ วฏฺฏตี"ติ อาห. เถโร สาธุ ภนฺเตติ สมฺปฏิจฺฉิ. อตฺถงฺคเต สูริเย ธมฺมสฺสวนํ โฆเสสุํ. อติกฺกนฺตสฏฺฐิวสฺสาว สฏฺฐิ มหาเถรา ธมฺมสฺสวนตฺถํ อาคมึสุ. เทวตฺเถโร สรภาณาวสาเน อิมํ สุตฺตํ อารภิ, สุตฺตนฺตปริโยสาเน สฏฺฐิ มหาเถรา อรหตฺตํ ปาปุณึสุ. ตโต ติสฺสมหาวิหารํ คนฺตฺวา กเถสิ, ตสฺมิมฺปิ สฏฺฐิ เถรา. ตโต นาคมหาวิหาเร กาฬกจฺฉคาเม กเถสิ, ตสฺมิมฺปิ สฏฺฐิ เถรา. ตโต กลฺยาณึ คนฺตฺวา ตตฺถ จาตุทฺทเส เหฏฺฐาปาสาเท กเถสิ, ตสฺมิมฺปิ สฏฺฐิ เถรา. อุโปสถทิวเส อุปริปาสาเท กเถสิ, ตสฺมิมฺปิ สฏฺฐิ เถราติ เอวํ เทวตฺเถเรเยว อิทํ สุตฺตํ กเถนฺเต สฏฺฐิฏฺฐาเนสุ สฏฺฐิ สฏฺฐิ ชนา อรหตฺตํ ปตฺตา. อมฺพิลกาฬกวิหาเร ปน ติปิฏกจูฬนาคตฺเถเร อิมํ สุตฺตํ กเถนฺเต มนุสฺสปริสา คาวุตํ อโหสิ, เทวปริสา โยชนิกา. สุตฺตปริโยสาเน สหสฺสภิกฺขู อรหตฺตํ ปตฺตา, เทเวสุ ปน คโต ตโต เอเกโกว ๔- ปุถุชฺชโน อโหสีติ. ปปญฺจสูทนิยา มชฺฌิมนิกายฏฺฐกถาย ฉฉกฺกสุตฺตวณฺณนา นิฏฺฐิตา. --------------- @เชิงอรรถ: สี. มุติงฺคเณ ม. หิตงฺกปพฺพเต สี. คเมณฺฑวาเล ฏีกา. เอโกว

             อรรถกถาภาษาบาลีอักษรไทย เล่มที่ ๑๐ หน้า ๒๕๐-๒๕๒. http://84000.org/tipitaka/atthapali/read_th.php?B=10&A=6371&modeTY=2&pagebreak=1              The Pali Atthakatha in Roman :- http://84000.org/tipitaka/atthapali/read_rm.php?B=10&A=6371&modeTY=2&pagebreak=1              อ่านอรรถกถาแปลไทย :- http://84000.org/tipitaka/attha/attha.php?b=14&i=810              เนื้อความพระไตรปิฎกฉบับหลวง :- http://84000.org/tipitaka/read/r.php?B=14&A=10324              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=14&A=10161              The Pali Tipitaka in Roman Character :- http://84000.org/tipitaka/read/roman_read.php?B=14&A=10161              สารบัญพระไตรปิฎกเล่มที่ ๑๔ http://84000.org/tipitaka/read/?index_14

อ่านหน้า[ต่าง] แรกอ่านหน้า[ต่าง] ที่แล้วไม่แสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]